Utaqqijut nallikataagiamut piqutitsanik pisimajunit Canada Goose. © Eldred Allen
Katingaqatigiittisijut Atigitsajat
Tapiriikkut saqqitititsijut Canada Goose Atuttausuunik Initsanganik Nainimi
Atigitsajait, ilulliit, ivalutsait ammalu coyote amingit namutuinnak tunijaulauttut isuanit Nainiup Jeremias Sillett Nunaliit Iningani saqqituinnasimajunut qallunaattasajait piqutigalangit tigujautuinnasuungulauttut ukiatsaangulauttumi. Ihlivitsuak tatajumik qallunaattajannik tikilauttut nunalimmut naammasiattumut sivullipaanganut Canada Goose Atuttausuunut Ininganik piniannigijausimajumut Nunatsiavummi. Tainna piniannik takusimalauttuk pigumatsiatunut Nainimiunut, utaqqilauttunut pitaagiamut piujualunnik mitsutausuunik tikivalliajumut atuttauqattagialimmut paakait.
Tainna aittuijut, saqqititsilauttut Inuit Tapiriit Kanatami ikajuttigiihlutik Nunatsiavut kavamakkunut, taikkua Nunatsiavut katingaqatigiijut kampaninga ammalu Canada Goose, anginitsaulauttuk Tapiriikkut jaari tamaat katimatsuatitsiqattajanginnut saqqititaulauttumut Septembera 27 ammalu 28 iluani Nunatsiavut aulatsijiit iningani.
Nunatsiavut Angajuqqaanga Johannes Lampe uqajuk qittaingajuk takugiamut iluunnanginnik Nunatsiavut nunaliit ikajuttaulaummata ikajuttigiinnikut.
“Nakummiik qailaugatsi Nainimut ammalu quviasuttisilaugatsi inunnik. Ikumattisijuk inuit uummatinginnut,” Lampe uqajuk taipsumani ukiatsaami 2023 katimaniammata. “Inuusuttugijavut sunamikkiak pitaagialiit imminik pigunnagiamut ilukkut immigut. Annaga ikajulaattuk ingutamminik, takutitsigiamut qanuk mitsugiamut ammalu sanagiamut pigunnagiamullu atugialinginnik.”
Pitaluviniqavuk aittugatsanik. Mary Anderson. © Eldred Allen
Atuttausuuk Ininga pinianniit ammalu suliatsait taikkutituna sunaunginnatut Canada Goose suliaqaqattajut “ilisigiamut pitsiasuunik ammalu sanannguatautsiasuunut,” ammalu “takutitsigiamut sulitsiatumik” iluani Taggami, angajuqqaak Carrie Baker uqasimajuk Tapiriikkut Katimajinginnut, Sept. 27. Tainna suliangujuk utisimavuk 2009-imut taipsumani magguuk Mittimatalimmiut sanajiik niugguniammata Canada Goose sanapvinganut Toronto-imi ammalu apigisimalauttuuk qanuk pijauqattamangaammik amiakkugijaujut qallunaattasajait takulauttanginnik.
“Apigilauttut utittisigajammangaammik piqutinik aniggagijanginnut tamannauluasimajuk tamanna anginippaungummat inuit piqattajanginnik nunagijanginni sanagiamut namminitsanginik annugaanik ilagijanginnut pitsanginnik ammalu ilannaanginnut, ammalu pitaagunnaqattangitut piqutinik upvalu sanautitsait akituluahlaqattajut,” Baker uqajuk, ilagiatsihluni isumagijanginnik summat sanajauliaqisimajuung atuttausuunik iningata suliangujuk.
Puiguniagatsi ivalutsanik. Steohanie Angnatok, Jessie Lidd, Mary Lou Harris. © Eldred Allen
Tainna Nainimi pinianniusimajuk 20-gilauttanga aittusimanninginnik mitsutausuunik atuttausuunillu, atautsik saqqititaulauttuk Yukon-imi aggaaniulauttuk ammalu atautsik pannaigutigijaujuk Inuvimmut. Canada Goose tunitsisimajut ungataani 1,000 atuttausimajunik ammalu sanagiallatausimajunik paakanik nunalinnut namutuinnak Inuit Nunangani. Allaat paakanik atuttaugunnangitut sanagiallatauqattajut mitsutiujunut atugiallatausuunguniammata ilangit.
Tapiriikkut ikajuttigiisimalittut Canada Goose-ikkunut taimanganit 2018, saqqititauhluni Suliangujuk Atigi, takusimaniattilugit Inuit sanattinik ikajuttigiijunut pingasunut paakanik katitsutausimajunut. Suliangujuk Atigi sanatuinnasimanngituk pivitsanik niuvipviqajunut, ilitagijaulaummijut silatsuami ilingajumut Inuit paakanik-sanagiamut allanguagijaulluni.
“Inuit uqumaitsaqattasimajut iligiingugiamut sanajigalannut. Nakutsavugut uvattinut qaisimagatsi ammalu apigihlugi qanuk ikajuttigiigajammangaatta ammalu suliaqaqatigiilluta,” Angajuqqaak Natan Obed uqautjiujuk Bakerimik, ilitagillugu kampaniup piggautigijanginnik utittisigiamut Inunnut ammalu Inuit Nunanganut – ilautitsijumik kiinaujatuinnatigut tuniggusiamik pisimajumit Canada Goose suliaqattinit taikkununga Nunatsualimaami Inuit Inusuttut kaunsallinginut. “Tamanna atautsituinnak uuttuutik atannimut Canada Goose-ikkunut ammalu suliaqattinginnut tigumiajanginnut taikkununga Inutuinnanut ammalu Inuit Nunanganut,” taimaak uqajuk.
Tapiriikkut suliaqaqatiqajut nunaqqatigiinngitunut Inuit katujjiqatigiinginnik kamatsiagiamut Canada Goose nunalinnut atavut tamakkua atuttausuut suullu taikkuninga kajusiutigijausuut atuqatigiittaulutik Inunnut
Silpa Obed. © Eldred Allen
