Inuktitut Qimirruagaq - SAQQITITAQ 133/134

Iqallianiq Tasirarmi

Sikuup auppalianinga asitjiisimalirtuq uumajursiugunnanittinit

AUJAQ 2025 | Allati: Luukasi Kiatainnamut

ATAATAGA IQALUGIUQSIMAJUQ TUTTUGIUQSUNILU tamaani. Atsagiurvigisimammijara piruqsavigitsugulu timmianiaqpasunga asinginnilu uumajuqsiuvigitsugu. Taanna taijaujuq Tasirarmik, tasiq qanittuusuni anirraqarvinganut Kangiqsujuamut. Tuvakkut aullasuungujugut taggunga tasilialiratta, kisiani tariup sikunga saallivallianikunganut qunniilu angilivalliasitsautigisuungulirnikunginnut, tasiliarunnanivut pivikinnisausuunguliqtuq arraagutamaat. Taggani upirngasaukainnatumi, iqalliarialaujunga Tasirarmut ilakka ilagitsugit, angajuqqaaka Tiivi Alaku ammalu Christina Kiatainnaq uqaaqatigilaujaakka tamatsuma mitsaanut qanurlu asijjilirmangaat. Ukua uvannut uqausirilaujujangit.

Tiivi: Taanna tasiq Tasirarmik atilik. Inuit atsiijuviniit piqarnirasitsutik tasirmik, atiqalaqijuq Tasirarmik, inutuqaq tasiliasuuviniummijuq taimailisimajuq. Iqaluqasuuq arraagulimaaq, isiuralittanik, nutillinillu. Taanna tasiq qanittuq tuttuit aqqutigisuunginnut, tuttuviugunnasuuq upirngasami, upirngaami, ukiamilu.

Christina: Manna tammaasimavigisuuvut maqailituaratta ilagiitsuta. Ataatappit piruqsavigisimajanga uumajuqsiuvigigiangalu aliagitsugu. Nukait najaillu iqalugiuqsimajuuk tamaani, tagganitsainaq ajjigiinngituni arraaguni. Maqaivvik uumajuqainnalimaasuuq silaup asijjitarnilimaatsianginni. Kisianili, tariuq tuvarnasaasuunguliqtuq autsautigisuunguliqsunilu. Nangiarnasikapinnisausuunguliqtuq arraaguni aniguqtuni.

Tiivi: Tamaunnga maqaigiaqtusuunguvugut arraagulimaap iluani uumajuqatsiasitiummat qanitalimaanga. Tamaunnga ingirrasunga ippigususuunguliqtunga aputik tuvarlu asijjisimaliriangik. Aputik aqinnisauliqtuq tuvarlu saannisauliqsuni. Tuvaqpaliasivalauqtuq Uktupiriutillugu quallaritsuni Nuuvimpirimi, Julaimikisiani auniaqsuni. Taggani arraagumi tuvalauqtuq Tisimpirimi autsuni Juunimi. Tuvakkuuliratta aqqutigisuurisimajattinik atusuungugunnaitugut ammalu aqqutigisuuvut tasirmit nunaarvigitsugu ajjigigunnaimijanga.

Christina: Nuluarniangituaratta, aulasautiqasuungujugut qijummi ujukkuaqaqsutalu urviujaujalimmik iqiattautiqaqsuta. Taimaak ilinniatitausimavugut iqalliariamit piaraulirnirattanit.

Christina: Ikittuapiit nunalittinimiut iqalliariaqpatut nunakkuusutik, kinalimaakkut utaqqiriaqasivattut sikuiqsiisutik iqalliarialangagamik umiakkut. Upirngasami niqitsasiurniq isulisuuq tuvaq nangiarnasiluatuarmat.

Christina: Upirngasami, iqaluttatinnik pitsilivattugu, iqaluk tijatsugu, quppariittisugu, sauninga piiqsugu, papirunganiittumi amiakkusugu, tukiliriinik pilattusugu paniqsiarinialiqsugu. Ukiumi quaqsijitsautigisuungujugut iqaluttatinnik.

Tiivi: Sukkuaqijuqainnaniqsauvaliqtuq tuvaq saannisaaluusuungulirmat arraaguni aniguqtuni. Taimainnikunganut uumajuqsiuniusuuq Kangiqsujuap qanitanginni nuqqatitaugiaqaqsimajuq taakkua nunait upatsaugunnaiqattasimalirmata. Sunalimaatsiat asijjiliqtillugi, aaqqigiariaqaqpaliqtugut pivigigunnatattinik pigasuarviqatuinnasuta.