ᐃᖃᓪᓕᐊᓂᖅ ᑕᓯᕋᕐᒥ

ᑏᕕ: ᑖᓐᓇ ᑕᓯᖅ ᑕᓯᕋᕐᒥᒃ ᐊᑎᓕᒃ. ᐃᓄᐃᑦ ᐊᑦᓰᔪᕕᓃᑦ ᐱᖃᕐᓂᕋᓯᑦᓱᑎᒃ ᑕᓯᕐᒥᒃ, ᐊᑎᖃᓚᕿᔪᖅ ᑕᓯᕋᕐᒥᒃ, ᐃᓄᑐᖃᖅ ᑕᓯᓕᐊᓲᕕᓂᐅᒻᒥᔪᖅ ᑌᒣᓕᓯᒪᔪᖅ.  ᐃᖃᓗᖃᓲᖅ ᐊᕐᕌᒍᓕᒫᖅ, ᐃᓯᐅᕋᓕᑦᑕᓂᒃ, ᓄᑎᓪᓕᓂᓪᓗ.  ᑖᓐᓇ ᑕᓯᖅ ᖃᓂᑦᑐᖅ ᑐᑦᑐᐃᑦ ᐊᕐᖁᑎᒋᓲᖏᓐᓄᑦ, ᑐᑦᑐᕕᐅᒍᓐᓇᓲᖅ ᐅᐱᕐᖓᓴᒥ, ᐅᐱᕐᖔᒥ, ᐅᑭᐊᒥᓗ.

ᑯᔨᔅᑏᓇ:  ᒪᓐᓇ ᑕᒻᒫᓯᒪᕕᒋᓲᕗᑦ ᒪᙯᓕᑐᐊᕋᑦᑕ ᐃᓚᒌᑦᓱᑕ.  ᐊᑖᑕᑉᐱᑦ ᐱᕈᕐᓴᕕᒋᓯᒪᔭᖓ ᐆᒪᔪᕐᓯᐅᕕᒋᒋᐊᖓᓗ ᐊᓕᐊᒋᑦᓱᒍ.  ᓄᑫᑦ ᓇᔦᓪᓗ ᐃᖃᓗᒋᐅᕐᓯᒪᔫᒃ ᑕᒫᓂ, ᑕᒡᒐᓂᑦᓭᓇᖅ ᐊᑦᔨᒌᖕᖏᑐᓂ ᐊᕐᕌᒍᓂ.  ᒪᙯᕝᕕᒃ ᐆᒪᔪᙯᓐᓇᓕᒫᓲᖅ ᓯᓚᐅᑉ ᐊᓯᑦᔨᑕᕐᓂᓕᒫᑦᓯᐊᖏᓐᓂ. ᑭᓯᐊᓂᓕ, ᑕᕆᐅᖅ ᑐᕙᕐᓇᓵᓲᖑᓕᕐᑐᖅ ᐊᐅᑦᓴᐅᑎᒋᓲᖑᓕᕐᓱᓂᓗ.  ᓇᖏᐊᕐᓇᓯᑲᐱᓐᓂᓴᐅᓲᖑᓕᕐᑐᖅ ᐊᕐᕌᒍᓂ ᐊᓂᒍᕐᑐᓂ.

ᑏᕕ:  ᑕᒪᐅᙵ ᒪᙯᒋᐊᕐᑐᓲᖑᕗᒍᑦ ᐊᕐᕌᒍᓕᒫᑉ ᐃᓗᐊᓂ ᐆᒪᔪᖃᑦᓯᐊᓯᑎᐅᒻᒪᑦ ᖃᓂᑕᓕᒫᖓ. ᑕᒪᐅᙵ ᐃᖏᕐᕋᓱᖓ ᐃᑉᐱᒍᓱᓲᖑᓕᕐᑐᖓ ᐊᐳᑎᒃ ᑐᕙᕐᓗ ᐊᓯᑦᔨᓯᒪᓕᕆᐊᖕᒋᒃ. ᐊᐳᑎᒃ ᐊᕿᓐᓂᓴᐅᓕᕐᑐᖅ ᑐᕙᕐᓗ ᓵᓐᓂᓴᐅᓕᖅᓱᓂ.  ᑐᕙᕐᐸᓕᐊᓯᕙᓚᐅᕐᑐᖅ ᐅᒃᑐᐱᕆᐅᑎᓪᓗᒍ ᖁᐊᓪᓚᕆᑦᓱᓂ ᓅᕕᒻᐱᕆᒥ ᔪᓓᒥᑭᓯᐊᓂ ᐊᐅᓂᐊᖅᓱᓂ.  ᑕᒡᒐᓂ ᐊᕐᕌᒍᒥ ᑐᕙᓚᐅᕐᑐᖅ ᑎᓯᒻᐱᕆᒥ ᐊᐅᑦᓱᓂ ᔫᓂᒥ.  ᑐᕙᒃᑰᓕᕋᑦᑕ ᐊᕐᖁᑎᒋᓲᕆᓯᒪᔭᑦᑎᓂᒃ ᐊᑐᓲᖑᒍᓐᓀᑐᒍᑦ ᐊᒻᒪᓗ ᐊᕐᖁᑎᒋᓲᕗᑦ ᑕᓯᕐᒥᑦ ᓄᓈᕐᕕᒋᑦᓱᒍ ᐊᑦᔨᒋᒍᓐᓀᒥᔭᖓ.

ᑯᔨᔅᑏᓇ:  ᓄᓗᐊᕐᓂᐊᖏᑐᐊᕋᑦᑕ, ᐊᐅᓚᓴᐅᑎᖃᓲᖑᔪᒍᑦ ᕿᔪᒻᒥ ᐅᔪᒃᑯᐊᖃᕐᓱᑕᓗ ᐅᕐᕕᐅᔭᐅᔭᓕᒻᒥᒃ ᐃᕿᐊᑦᑕᐅᑎᖃᕐᓱᑕ.  ᑌᒫᒃ ᐃᓕᓐᓂᐊᑎᑕᐅᓯᒪᕗᒍᑦ ᐃᖃᓪᓕᐊᕆᐊᒥᑦ ᐱᐊᕋᐅᓕᕐᓂᕋᑦᑕᓂᑦ.

ᑯᔨᔅᑏᓇ:  ᐃᑭᑦᑐᐊᐲᑦ ᓄᓇᓕᑦᑎᓂᒥᐅᑦ ᐃᖃᓪᓕᐊᕆᐊᕐᐸᑐᑦ ᓄᓇᒃᑰᓱᑎᒃ, ᑭᓇᓕᒫᒃᑯᑦ ᐅᑕᕐᕿᕆᐊᖃᓯᕙᑦᑐᑦ ᓯᑯᐃᕐᓰᓱᑎᒃ ᐃᖃᓪᓕᐊᕆᐊᓚᖓᒐᒥᒃ ᐅᒥᐊᒃᑯᑦ.  ᐅᐱᕐᖓᓴᒥ ᓂᕿᑦᓴᓯᐅᕐᓂᖅ ᐃᓱᓕᓲᖅ ᑐᕙᖅ ᓇᖏᐊᕐᓇᓯᓗᐊᑐᐊᕐᒪᑦ.

ᑯᔨᔅᑏᓇ:  ᐅᐱᕐᖓᓴᒥ, ᐃᖃᓗᑦᑕᑎᓐᓂᒃ ᐱᑦᓯᓕᕙᑦᑐᒍ, ᐃᖃᓗᒃ ᑎᔭᑦᓱᒍ, ᖁᑉᐸᕇᑦᑎᓱᒍ, ᓴᐅᓂᖓ ᐲᕐᓱᒍ, ᐸᐱᕈᖓᓃᑦᑐᒥ ᐊᒥᐊᒃᑯᓱᒍ, ᑐᑭᓕᕇᓂᒃ ᐱᓚᑦᑐᓱᒍ ᐸᓂᕐᓯᐊᕆᓂᐊᓕᕐᓱᒍ.  ᐅᑭᐅᒥ ᖁᐊᕐᓯᔨᑦᓴᐅᑎᒋᓲᖑᔪᒍᑦ ᐃᖃᓗᑦᑕᑎᓐᓂᒃ.

ᑏᕕ:  ᓱᒃᑯᐊᕿᔪᙯᓐᓇᓂᕐᓴᐅᕙᓕᕐᑐᖅ ᑐᕙᖅ ᓵᓐᓂᓵᓘᓲᖑᓕᕐᒪᑦ ᐊᕐᕌᒍᓂ ᐊᓂᒍᕐᑐᓂ.  ᑌᒣᓐᓂᑯᖓᓄᑦ ᐆᒪᔪᕐᓯᐅᓂᐅᓲᖅ ᑲᖏᕐᓱᔪᐊᑉ ᖃᓂᑕᖏᓐᓂ ᓄᕐᖃᑎᑕᐅᒋᐊᖃᕐᓯᒪᔪᖅ ᑖᒃᑯᐊ ᓄᓀᑦ ᐅᐸᑦᓴᐅᒍᓐᓀᖃᑦᑕᓯᒪᓕᕐᒪᑕ.  ᓱᓇᓕᒫᑦᓯᐊᑦ ᐊᓯᑦᔨᓕᕐᑎᓪᓗᒋ, ᐋᕐᕿᒋᐊᕆᐊᖃᕐᐸᓕᕐᑐᒍᑦ ᐱᕕᒋᒍᓐᓇᑕᑦᑎᓂᒃ ᐱᒐᓱᐊᕐᕕᖃᑐᐃᓐᓇᓱᑕ.