ᓈᓚᒃ ᓇᑉᐹᓗᒃ ᐅᒃᑑᐱᕆ 2004-ᒥ, ᖁᕕᐊᓱᖃᑕᐅᔪᖅ ᐅᑎᕐᑎᑕᐅᑎᓪᓗᒍ ᖃᔭᖅ ᑲᖏᕐᓱᔪᐊᒥ ᓴᓇᔭᐅᓚᐅᕐᑐᕕᓂᖅ. ᑖᓐᓇ ᖃᔭᖅ ᐅᑎᕐᑎᑕᐅᔪᕕᓂᖅ ᑯᐯᑉ ᑕᑯᑦᓴᐅᔪᑦᓴᔭᓂᒃ ᐱᐅᓕᐊᕐᕕᖓᓂᑦ ᓄᐃᑕᑎᑕᐅᓕᕐᓱᓂᓗ ᐱᖑᐊᓗᐃᑦ ᒥᕐᖑᐃᓯᕐᕕᖓᑕ ᑕᑯᑦᓴᐅᑎᑦᓯᕕᖓᓂ. © Robert Fréchette
ᐅᑎᕐᓂᖅ ᐃᒪᕐᐱᒧᑦ
2010-ᒥ ᐃᓅᒍᓐᓀᓚᐅᕋᓂ, ᓈᓚᒃ ᓇᑉᐹᓗᒃ ᖁᕕᐊᒋᔭᖃᒻᒪᕆᑦᓯᒪᔪᖅ ᐅᒥᐊᕐᑐᕆᐊᒥᒃ ᐃᒪᕐᐱᒥ, ᕿᓚᓗᒐᕐᓂᐊᓱᓂ. ᑲᖏᕐᓱᔪᐊᒥᐅᖅ ᐃᓄᑐᖃᖅ ᖁᑭᐅᑎᒡᒋᖏᓐᓇᓕᒫᖃᑦᑕᓯᒪᔪᖅ, ᑭᓯᐊᓂ ᐅᓈᕐᒥᒃ ᐊᑐᕆᐊᒥᒃ ᐃᓱᐊᕐᓴᓂᕐᓴᐅᓱᓂ, ᐱᓗᐊᕐᑐᒥᒃ ᐅᑦᔪᓂᐊᓕᕋᒥ, ᐅᖃᕐᑐᖅ ᐸᓂᖓ, ᕿᐊᓪᓚᒃ ᓇᑉᐹᓗᒃ. ᖃᓂᑕᖃᕆᐊᒥᒃ ᐳᐃᔨᒥᒃ ᐊᓕᐊᒋᔭᖃᕐᓯᒪᔪᖅ, ᓄᑭᒥᓂᒃ ᐊᑐᕆᐊᒥᒃ ᓄᓱᑦᓯᒐᓱᐊᕐᓱᓂ ᐳᐃᔨᒥᒃ, ᖃᐅᔨᒪᑦᓱᓂᓗ ᐅᓈᕐᒧᑦ ᓇᐅᓕᑦᓯᒪᑦᓯᐊᕋᒥ ᑖᓐᓇ ᐆᒪᔪᕐᑕᖓ ᑭᕕᓚᖓᖕᖏᒋᐊᖓ.
ᓈᓚᐅᑉ ᑕᕐᓂᖓ ᐅᑎᕐᓂᕆᕗᖅ ᐃᒪᕐᐱᒧᑦ, ᐱᑦᔪᔨᒍᑎᐅᓗᓂᓗ ᑲᓇᑕᒥᐅᓕᒫᓂᒃ.
ᐊᐅᔭᐅᓚᐅᕐᑐᒥ, ᐅᒥᐊᕐᔪᐊᖅ ᐊᐅᓪᓚᓚᐅᕐᑐᖅ ᕚᓐᑰᕙᒥᑦ ᓯᕿᓂᕐᒧᐊᓯᑦᓱᓂᓗ ᐹᓇᒪ ᑰᖓᑎᒍᑦ.
ᐄᒐᕐᕕᒋᕙᓐᓂᐊᑕᒥᓄᑦ ᑎᑭᑦᑐᕕᓂᖅ ᐅᒥᐊᕐᔪᐊᑯᕕᖓᓄᑦ ᑕᐅᑦᒪᐅᑦ, ᓅᕙ ᓱᑰᓴᐅᑉ, ᑖᕙᓂᓗ ᐊᑦᓯᔭᐅᓂᖃᓚᐅᕐᓱᓂ ᑲᓇᑕᐅᑉ ᐃᒪᕐᐱᖁᑎᖏᓐᓄᑦ ᐅᒥᐊᕐᔪᐊᖁᑎᒋᔭᐅᓂᐊᓕᕐᓱᓂ ᐊᑎᖃᕐᓗᓂ ᓈᓚᒃ ᓇᑉᐹᓗᒻᒥᒃ. ᑖᓐᓇ ᓯᕗᓪᓕᐹᑦᓯᐊᖅ ᑲᓇᑕᐅᑉ ᐃᒪᕐᐱᖏᓐᓂᒃ ᐯᕐᓯᔩᑦ ᓯᑯᐃᔦᓂᕐᒧᑦ ᐅᒥᐊᕐᔪᐊᖁᑎᖏᓐᓂ ᑲᕙᒪᑐᖃᒃᑯᓗ ᐅᒥᐊᕐᔪᐊᖁᑎᖏᓐᓂ ᐊᑦᓯᔭᐅᒍᑎᖃᕐᓱᓂ ᐃᓄᑐᐃᓐᓇᒥᒃ.
ᑖᓐᓇ ᓄᑖᖅ ᐅᒥᐊᕐᔪᐊᖅ ᖃᐅᔨᓴᕐᕕᐅᓚᖓᔪᖅ ᓯᑯᐃᔦᓂᒃᑯᑦ ᑲᓇᑕᒥᐅᑦ ᑐᑭᓯᓕᐅᒥᖁᓪᓗᒋᑦ ᐃᒪᕐᐱᑎᓐᓂᒃ, ᐃᕐᖃᒥᒃ, ᓯᓚᐅᓪᓗ ᐊᓯᑦᔨᓕᕐᓂᖓᓂᒃ. ᓴᓇᒻᒪᓕᐅᕐᑕᐅᓂᖓ ᓴᓇᔭᐅᓂᖓᓗ ᐅᒥᐊᕐᔪᐊᑉ ᑖᓐᓇᐅᓚᐅᔪᒐᓗᐊᕐᑎᓗᒍ – ᐊᑦᓯᒋᐊᖓᓕ ᐊᓯᐊᒎᓪᓚᕆᓚᐅᔪᖅ. ᑲᓱᖃᑎᒌᒋᐊᖃᕐᓂᖅ ᑎᓕᔭᐅᒪᐅᑎᐅᑎᓪᓗᒍ, ᑲᓇᑕᐅᑉ ᐃᒪᕐᐱᖏᓐᓂᒃ ᐯᕐᓯᔩᑦ ᓄᑕᐅᓯᓕᑎᕆᓕᕐᑐᑦ ᐊᑦᓰᒍᓯᕐᒥᓂᒃ ᐅᒥᐊᕐᔪᐊᖁᑎᒥᓂᒃ ᐃᓚᐅᑎᑦᓯᓕᐅᒥᑦᓱᑎᒃ ᐃᒫᙰᕈᓐᓇᓂᖓᓂᒃ ᐃᓄᐃᑦ, ᐊᓪᓓᑦ, ᐊᓪᓚᖓᔪᐃᓪᓗ. ᐅᑦᑑᑎᒋᓗᒍ, ᐅᒥᐊᕐᔪᐊᒥᒃ CCGS-ᒥᒃ ᐊᑦᓰᖃᕐᒥᓚᐅᕐᒥᔪᑦ Jean Goodwill-ᓕᐊᕆᑦᓱᒍ, ᑖᓐᓇ ᓴᓯᑲᑦᓯᒍᐊᓐᒥ ᓯᕗᓪᓕᐸᐅᓯᒪᔪᖅ ᓄᓇᖃᕐᖄᓯᒪᔫᑦᓱᓂ ᐋᓐᓂᐊᓯᐅᕐᑎᕈᕐᓱᓂ. ᓈᓚᒃ ᓇᑉᐹᓗᒃ ᓇᓪᓕᑳᑦᑕᐅᓚᐅᔪᖅ ᑕᑦᓱᒥᖓ ᐅᒥᐊᕐᔪᐊᒥᒃ ᐊᑎᕐᑖᑎᑦᓯᒍᑎᐅᑦᓱᓂ ᐱᓇᓱᐊᖃᑕᐅᑎᓪᓗᒋᒃ ᐃᓄᐃᑦ ᑕᐱᕇᑦ ᑲᓇᑕᒥ ᒪᑭᕝᕕᓗ.
© Seaspan
ᑖᑦᓱᒪ ᓄᑖᒻᒪᕆᐊᓘᑉ ᓯᑯᐃᔦᓂᕐᒧᑦ ᐅᒥᐊᕐᔫᐊᑉ ᐊᑦᓯᑕᐅᓂᖓ ᓈᓚᒃ ᓇᑉᐹᓗᒻᒥᒃ ᐃᕐᖃᐅᒪᒍᑎᑦᓯᐊᒪᕆᐊᓗᒃ – ᑐᖁᓚᐅᕋᓂ, ᑖᓐᓇ ᓄᓇᕕᒻᒥᐅᖅ ᐃᓄᒃ ᓯᕗᓕᕐᑎᐅᓯᒪᔪᖅ, ᐊᖑᓇᓱᑦᑎᐅᓱᓂ, ᐃᖃᓪᓕᐊᑎᐅᑦᓱᓂ, ᐃᕐᓂᓱᑦᓰᔨᐅᑦᓱᓂ, ᐅᓂᒃᑳᑐᐊᕐᑎᐅᓱᓂ, ᐃᓕᓐᓂᐊᑎᑦᓯᔨᐅᑦᓱᓂ, ᐅᒪᔪᕐᓯᐅᓂᕐᒥᓗ ᑫᓪᓗᐊᑎᐅᑦᓱᓂ. ᖃᐅᔨᒪᔨᐅᓂᒃᑯᑦ ᐱᓇᓱᐊᕐᑎᐅᓯᒪᔪᖅ, ᐅᓪᓗᕆᐊᓕᕆᔨᐅᑦᓱᓂ, ᑐᓴᕋᑦᓴᓂᐊᕐᑎᐅᓱᓂ, ᐊᖁᑦᑎᐅᓱᓂ, ᓯᓚᓕᕆᔨᐅᑦᓱᓂᓗ.
“ᐊᑖᑕᒋᑐᐃᓐᓇᓚᐅᔭᕋ,” ᐅᖃᕐᑐᖅ ᕿᐊᓪᓚᒃ ᓇᑉᐹᓗᒃ, ᑲᖏᕐᓱᔪᐊᑉ ᓯᕗᓕᕐᑎᖓ. “ᑭᓇᓕᒫᒃᑯᑦ ᐊᑖᑕᖃᕐᒪᑕ. ᑭᓯᐊᓂ ᐱᑕᖃᕈᓐᓀᒪᑦ, ᖃᐅᔨᓕᓚᐅᔪᖓ ᐊᑖᑕᒐ ᖃᐅᔨᒪᔪᒻᒪᕆᐊᓘᓯᒪᒋᐊᖓ ᐊᒥᓱᐊᓗᓐᓂᒃ ᐃᓕᓐᓂᐊᑎᑕᐅᓯᒪᒐᑦᑕ ᑖᑦᓱᒧᖓ. ᑭᓯᐊᓂᓕ ᐱᒻᒪᕆᐅᓂᕐᐸᐅᑎᓯᒪᔭᖓ ᐊᓂᕐᕋᖅ ᐃᓚᒌᓐᓂᓗ. ᐃᓚᖓᓂ ᐱᐅᔪᓂᒃ ᓵᖓᓯᕙᑦᓱᑕ, ᖁᕕᐊᓇᕐᑐᒥᒃ, ᖁᕕᐊᓇᖕᖏᑐᒥ, ᑭᓯᐊᓂ ᐱᓇᓱᐊᖃᑎᒌᒋᐊᖃᕐᑐᒍᑦ.”
ᐃᒪᕐᐱᒥᒃ ᐯᕐᓯᔩᑦ ᐅᖃᓚᐅᕐᑐᑦ ᐅᐱᒍᓱᒻᒪᕆᒋᐊᒥᒃ ᐱᓇᓱᐊᖃᑎᖃᕆᐊᒥᒃ ᐃᓄᐃᑦ ᓯᕗᓕᕐᑎᖏᓐᓂᒃ ᐃᓕᑕᕐᓯᓱᑎᓪᓗ ᐃᑲᔪᕐᓯᒪᓂᕆᔭᖏᓐᓂᒃ ᐃᓄᐃᑦ ᐃᓄᑐᖃᖏᑦᑕ. “ᑲᓇᑕᐅᑉ ᐃᒪᕐᐱᒋᓂᒃ ᐯᕐᓯᔩᑦ ᐅᒥᐊᕐᔪᐊᖁᑎᖏᑦᑕ ᐊᑎᖏᑦ ᐅᐱᒍᓱᒍᑎᐅᒋᐊᖃᕐᑐᑦ ᖁᕕᐊᓲᑎᖃᕐᓗᑎᓪᓗ ᐃᓄᓐᓂᒃ, ᓄᓇᐅᔪᓂᓪᓗ ᐊᕕᑦᑐᓯᒪᔪᓂ, ᑲᓇᑕᓕᒫᒥᓗ ᐱᒻᒪᕆᖁᑕᐅᔪᓂ, ᑭᒡᒐᑐᕐᓗᑎᒃ ᐊᑦᔨᒌᖕᖏᑐᓂᒃ ᐃᓕᕐᕈᓯᐅᔪᓂᒃ, ᐃᓄᓐᓂᒃ ᑲᓇᑕᒥᓗ ᐊᑑᑎᓯᒪᔪᓂᒃ,” ᐅᖃᓚᐅᕐᑐᖅ ᐃᒪᕐᐱᒥᒃ ᐯᕐᓯᔩᑦ ᑲᒪᔨᒻᒪᕆᖓ ᐅᒥᐊᕐᔪᐊᓂᒃ, ᕃᔭᓐ ᑎᐊᑕᒪᓐᑎ. “ᖃᐅᔨᒪᒐᑦᑕ ᐊᒥᓱᐃ ᐃᓄᐃᑦ ᐃᓄᑐᖃᖏᑦ ᐯᕐᓯᔨᐅᒋᐊᖏᑦ ᓄᓇᒥᒃ ᐃᒪᕐᐱᒥᓪᓗ, ᖁᕕᐊᓲᑎᖃᒻᒪᕆᑉᐳᒍᓪᓗ ᓇᓗᓀᕐᓯᒋᐊᒥᒃ ᐅᐱᒍᓱᓐᓂᑯᑦ ᓇᑉᐹᓘᑉ ᕿᒻᒪᖁᑎᒋᓯᒪᔭᖏᓐᓂᒃ ᐊᕐᖁᑕᐅᑎᓪᓗᒋᑦ ᐊᔪᐃᓐᓇᓂᕗᑦ ᓲᖑᓂᕐᓴᒥᒃ ᑐᑭᓯᒪᔭᐅᑎᑦᓯᒐᓱᐊᕐᑎᓗᑕ ᑲᓇᑕᐅᑉ ᐃᒪᕐᐱᖓᑕ ᐊᕙᑎᖓᓂᒃ.”
ᐃᒪᕐᐱᒥᒃ ᐯᕐᓯᔩᑦ “ᐊᔪᐃᓐᓇᒪᕆᓐᓂᖃᕐᖁᑦ ᑲᓱᖃᑎᒌᒋᐊᖃᕐᓂᑯᑦ ᐊᐅᓚᓂᕆᒋᐊᓕᒥᓂᒃ,” ᐅᖃᕐᑐᖅ ᓂᑰᓪ ᐃᐊᓪᒥ, ᐃᒪᕐᐱᒥᒃ ᐯᕐᓯᔩᑦ ᑲᒪᔨᒻᒪᕆᖓ ᓄᓇᖃᕐᖄᓯᒪᔪᓂᒃ ᐱᓇᓱᐊᖃᑎᖃᕐᓂᒧᑦ, ᑭᓯᐊᓂ ᐅᒥᐊᕐᔪᐊᒥᒃ ᐊᑦᓰᓂᖅ ᓄᓇᖃᕐᖄᓯᒪᔫᑉ ᐊᑎᖓᓂ ᐃᓚᒋᔭᐅᑐᐃᓐᓇᑐᖅ ᑕᒪᑐᒧᖓ. “ᐱᒻᒪᕆᐅᒍᑎᒋᒻᒥᔭᖓ ᖃᓄᖅ ᐊᑏᑦ ᓇᓪᓕᑳᕐᑕᐅᓲᖑᒻᒪᖔᑕ ᐊᒻᒪᓗ ᐱᕕᖃᕐᑎᓯᑦᓱᓂ ᐱᓇᓱᑦᑎᑎᓐᓂᒃ ᓇᐅᓕᒫᓂᓪᓗ ᐃᓕᑦᓯᒍᓐᓇᓂᕐᒥᒃ ᐱᒻᒪᕆᐅᓂᖓᓂᒃ,” ᑖᓐᓇ ᐅᖃᕐᑐᖅ. “ᑐᑭᓯᕗᒍᑦ ᓲᖑᓂᐊᓘᖃᕈᓐᓇᓂᖓᓂᒃ ᐊᑎᐅᑉ, ᖁᕕᐊᓲᑎᐅᒍᓐᓇᑐᖅ ᐅᕝᕙᓗᓐᓃᑦ ᐋᓐᓂᓇᕐᑑᓗᓂ, ᑌᒣᒻᒪᑦ ᐊᑦᓰᒋᐊᖃᓕᕋᑦᑕ ᐅᒥᐊᕐᔪᑖᕐᖃᒥᓐᓂᒃ ᐱᒻᒪᕆᐊᓘᑎᑦᓯᕗᒍ, ᐊᑕᐅᑦᓯᑯᑦ ᐃᑲᔪᖃᑎᒌᓐᓂᑯᑦ ᐱᓇᓱᐊᖃᑎᖃᕈᓐᓇᕈᑎᒋᒐᑦᑎᒍ ᓄᓇᖃᕐᖄᓯᒪᔪᓂᒃ.”
ᓈᓚᒃ ᑐᑭᓯᒪᓚᐅᕐᑐᖅ ᐊᑎᐅᑉ ᓲᖑᓂᐊᓗᖃᕈᓐᓇᓂᖓᓂᒃ. ᐱᔪᕆᐅᑎᖃᒻᒪᕆᓚᐅᕐᑐᖅ ᐊᑖᑕᖓᑕ ᐊᑖᑕᑦᓯᐊᖓᑕᓗ ᐊᑎᖓᓂ ᐊᑎᖃᕆᐊᖅ. ᐅᐱᒋᔭᒻᒪᕆᐊᓘᓯᒪᔪᖅ ᖃᐅᔨᒪᔪᒻᒪᕆᐊᓘᒋᐊᖓ ᐊᔪᐃᓐᓇᕈᑎᖃᕐᓱᓂᓗ ᐃᓚᒌᓐᓂᐅᑉ ᖃᐅᔨᒪᔭᐅᑦᓯᐊᕆᐊᖃᕐᓂᖓᓂᒃ ᐃᓄᐃᓪᓗ ᖃᐅᔨᒪᒍᓯᖏᓐᓂᒃ. ᑐᑭᑖᕐᓯᒪᑦᓯᐊᓚᐅᕐᑐᖅ ᐊᓯᒥᓂᒃ ᐃᓕᓐᓂᐊᑎᑦᓯᒍᒪᓂᕐᒥᒃ ᐊᒻᒪᓗ ᐱᐅᓕᐊᕐᑕᐅᓯᐊᖁᔨᑦᓱᓂ ᐅᖃᐅᓯᕐᓂᒃ ᐅᒪᔪᕋᓱᐊᕐᓂᒨᓕᖓᔪᓂᒃ, ᐊᐅᓚᓂᕐᒧᑦ, ᐊᓐᓇᐅᒪᒐᓱᐊᕐᓂᒧᓪᓗ, ᑕᒪᒃᑯᐊ ᐊᓯᐅᖁᓇᒋᑦ ᑭᖑᕚᓄᓪᓗ ᖃᐅᔨᒪᔭᐅᖁᓪᓗᒋᑦ. ᖃᐅᔨᒪᔫᓂᕐᒥᒍᑦ ᐱᓇᓱᐊᕐᑎᑕᐅᓚᐅᕐᑐᖅ ᐃᓄᐃᑦ ᑐᓴᕋᑦᓴᓕᕆᔨᒻᒪᕆᖓᓄ ᑕᕐᕋᒥᐅᑦ ᓂᐱᖕᒐᑦ ᑎᒥᖕᒐᓄᑦ, ᐊᕙᑕᒃᑯᓄᑦ, ᓄᓇᕕᒻᒥ ᐃᓕᓭᔩᑦ ᐃᓕᓐᓂᐊᑎᑕᐅᒍᑎᖕᒋᓐᓄᑦ, ᐊᓯᖕᒋᓐᓄᓗ ᐱᓇᓱᐊᕐᕕᒻᒪᕆᐅᔪᓄᑦ, ᐊᒥᕐᖃᕈᑎᖃᑦᓯᐊᓱᓂ ᖃᐅᔨᒪᓂᕐᒥᓂᒃ ᑭᓇᑐᐃᓐᓇᓐᓄᑦ ᓈᓚᒍᒪᔪᓄᑦ.
ᐊᖑᓇᓱᑦᑏᑦ ᑫᓪᓗᑐᐃᕙᓪᓕᐊᓕᕐᑎᓗᒋᑦ ᐊᕐᕕᓂᐊᕐᓂᒥᒃ ᐅᑎᖁᔨᑦᓱᑎᒃ ᓄᓇᕕᒻᒧᑦ, ᓈᓚᒃ ᓯᕗᓕᓪᓚᕆᓚᐅᕐᑐᖅ. ᐊᕐᕕᓂᐊᕐᓂᖅ ᓄᕐᖃᑎᑕᐅᓚᐅᕐᑐᕕᓂᐅᒐᓗᐊᕐᑎᓗᒍ ᐃᓅᓚᐅᕐᑎᓇᒍ 1928-ᒥ, ᐅᓂᒃᑳᕕᐅᖃᑦᑕᓯᒪᔪᕕᓂᖅ ᐱᕈᕐᓭᔨᒥᓄᑦ ᖃᓄᖅ ᐊᕐᕕᓂᐊᓲᖑᓐᓂᒪᖔᑕ ᐊᒥᓱᓂᓪᓗ ᐊᕐᕌᒍᓂᒃ ᐊᕐᕕᖁᔨᑦᓱᓂ ᐊᔪᐃᓐᓇᓯᒪᔪᖅ. ᐊᕐᕕᕈᓐᓇᐅᑎᑖᑦᓴᕋᑕᕐᒪᑕ 2008-ᒥ, ᖀᖃᓕᕐᑐᖅ ᓈᓚᒃ ᖁᕕᐊᓱᖃᑕᐅᓚᐅᕐᑐᖅ ᐊᑯᓕᕕᒻᒥ ᓂᐅᕕᐅᖃᑕᐅᑦᓱᓂ ᑎᑭᑦᑎᓗᒋᑦ ᐊᖑᓇᓱᑦᑐᕕᓃᑦ, ᒪᒪᕐᓴᕆᐅᕐᓱᓂᓗ ᐊᕐᕕᐅᑉ ᒪᑦᑕᖓᓂ. ᐃᓅᒍᓐᓀᓕᓚᐅᔪᖅ ᐊᕐᕌᒎᒃ ᒪᕐᕉᒃ ᐊᓂᒍᑐᐊᕐᒪᓂᒃ.
“ᐱᒻᒪᕆᐊᓘᓯᒪᔪᖅ ᓄᓇᕕᒻᒥᐅᓄᑦ,” ᐅᖃᕐᑐᖅ ᕿᐊᓪᓚᒃ, ᓂᐅᕕᐅᖃᑕᐅᓯᒪᒻᒥᔪᖅ ᓯᓈᓂ ᐊᕐᕕᑐᕕᓃᑦ ᑎᑭᑦᑎᓗᒋᑦ. “ᓂᕆᓕᓚᐅᕐᓯᒪᔪᒍᑦ ᐃᓕᑕᕐᓇᑑᔭᕐᓯᒪᔪᖅ ᓂᕆᓚᐅᕐᓯᒪᔭᕕᓂᕆᔮᕐᓱᒍ, ᓱᖏᐅᓐᓂᕆᔮᕐᓱᒍ. ᐃᓱᒪᔪᖓ ᐊᐅᑦᑎᓃᒋᐊᖓ. ᖁᕕᐊᓱᒻᒪᕆᓚᐅᕐᓯᒪᕗᒍᑦ. ᐊᐅᓚᔨᔪᖓ ᒪᒪᕐᑐᒪᕇᐊᓘᒋᐊᖓᓂᒃ.”
ᐊᕐᕕᓂᐊᕆᐊᒥᒃ ᖃᐅᔨᒪᓂᖅ ᐊᑑᑎᓚᐅᕐᓯᒪᖕᖏᓗᒍ ᐊᔪᒉᑦᑐᒪᕆᐊᓗᒃ. ᑭᓯᐊᓂ ᑕᒪᓐᓇ ᐅᑦᑐᕋᐅᑎᑐᐃᓐᓇᖅ ᓈᓚᐅᑉ ᐱᒍᓐᓇᓂᐊᓗᒋᓯᒪᔭᖓᓂᒃ, ᖃᓄᐃᓕᐅᕈᓐᓇᓂᖓᓂᒃ ᐃᑲᔪᕐᓯᒍᓐᓇᓂᖓᓂᓪᓗ ᐃᓅᖃᑎᒌᓂᒃ, ᕿᐊᓪᓚᖅ ᐅᖃᕐᑐᖅ.
ᖀᓕᒃ ᓈᓚᒃ ᑐᙵᓱᑎᑦᓯᔪᖅ ᐊᕐᕕᖃᒻᒥᓂᑦ ᐊᑯᓕᕕᐅᑉ ᑲᖕᒋᕐᓱᖕᒐᓂ.
ᓈᓚᒃ ᓇᑉᐹᓗᒃ ᑲᖏᕐᓱᔪᐊᒥ ᐅᒃᑑᐱᕆ 2004-ᖑᑎᓪᓗᒍ, ᐱᖓᓲᔪᕐᑐᓂᒃ ᐊᕐᕌᒍᓂᒃ ᐃᓅᓚᖓᑦᓱᓂᓱᓕ. © Robert Fréchette
ᐅᖃᕐᐸᓚᐅᕐᒥᔪᖅ ᐊᕐᓇᒎᖅ ᑎᒍᒥᐊᕆᐊᓕ ᐊᖑᑎᒥᓂᒃ ᐃᕐᓂᓱᓕᕈᓂ ᐊᒥᓱᐃᓪᓗ ᐊᖑᑏᑦ ᑌᒣᒍᒪᖃᑦᑕᓯᒪᖕᖏᒪᑕ ᑖᓐᓇ ᑎᒍᒥᐊᕐᑎᐅᓯᒪᔪᖅ, ᐃᑲᔪᕐᓱᓂ ᐊᕐᓇᒥᒃ ᐃᕐᓂᓱᑦᑐᒥᒃ ᐃᕐᓂᓱᑦᓱᒍ, ᕿᐊᓪᓚᒃ ᐅᖃᕐᑐᖅ. ᖃᐅᔨᒪᓯᒪᔪᖅ ᐃᓄᑦᑎᒍᑦ ᐊᑦᓯᕌᕐᑕᐅᒍᑎᖏᓐᓂᒃ ᐅᓪᓗᕆᐊᑦ – ᐅᑦᑑᑎᒋᓗᒍ ᐅᓪᓚᐅᑐᑦ, ᓴᑭᐊᑦᓯᐊᖅ, ᑐᒃᑐᔪᒃ – ᖃᐅᔨᒪᑦᓱᓂᓗ ᐅᓪᓗᕆᐊᓂᒃ ᑕᒻᒪᕇᒃᑯᑎᖃᓂᐊᕈᕕ, ᑐᑭᓯᐅᒪᔭᐅᒋᐊᖃᕐᒪᑕ ᓅᑦᑕᓂᖏᑦ ᕿᓚᒻᒥ. ᖃᐅᔨᒪᓯᒪᔪᖅ ᐅᐊᓐᓂᒥᑦ ᐊᓄᕆᓕᑐᐊᕐᒪᑦ ᐊᐳᑎ ᐃᖏᐅᓕᑦᑑᔭᕐᑎᑕᐅᒍᓐᓇᑐᖅ ᓇᒧᖕᖓᓂᐊᕆᐊᒥᓪᓗ ᖃᐅᔨᒪᒍᑎᐅᒍᓐᓇᓱᑎᒃ ᑖᒃᑯᐊ ᐃᑉᐱᒋᑦᓯᐊᓗᒋᑦ ᓇᒧᖕᖓᓕᖓᒻᒪᖔᑕ. ᐃᒻᒥᓂᒃ ᓴᐳᒻᒥᒍᓐᓇᓯᒪᔪᖅ ᓇᓄᖅ ᐃᕐᓯᓇᕐᓯᐸᑦ. ᐊᔭᔮᕈᑎᓂᓪᓗ ᐃᖕᖏᓗᑦᑖᕈᑎᓂᒃ ᖃᐅᔨᒪᑦᓱᓂ. ᐊᓕᐊᒋᔭᖃᕐᓯᒪᔪᖅ ᑕᒪᒃᑯᓂᖓ ᐃᖕᖏᓗᑦᑖᕆᐊᖅ.
ᑕᒪᒃᑯᐊ ᐃᓕᑦᓯᒪᔭᖏᑦ ᐊᓚᑯᒥᑦ, ᐃᓄᑐᖃᖅ ᐱᕈᐃᔨᒋᓯᒪᔭᖓ. ᓈᓚᒃ ᐊᑦᓯᑕᐅᓯᒪᔪᖅ ᐊᑖᑕᒥᓂᑦ, ᓈᓚᒃᑑᔭᕐᒥᑦ, ᐊᑖᑕᑦᓯᐊᒥᓂᓪᓗ ᓇᑉᐹᓗᒻᒥᑦ. ᑭᓯᐊᓂ ᓈᓚᒃᑑᔭᖅ ᑐᖁᓚᐅᕐᑐᕕᓂᖅ ᓈᓚᒃ ᐃᓅᓕᓚᐅᕐᑎᓐᓇᒍ, ᑕᒐ ᐊᓚᑯᒃ, ᑲᒪᑦᓯᐊᓯᑎᐊᓗᒃ ᐃᓄᑐᖃᐅᓕᕐᓱᓂ, ᑎᒍᐊᕐᓯᔪᕕᓂᖅ ᓱᕈᓯᐊᐱᒻᒥᒃ ᐃᓕᓐᓂᐊᑎᕙᓕᕐᓱᒍᓗ.
ᔫᐱ ᐊᕐᓀᑐᖅ, ᓈᓚᐅᑉ ᐅᔪᕈᖓ, ᐅᖄᕕᓕᒃ ᐃᓄᓐᓂᒃ ᑲᑎᑦᑐᓂᒃ ᓇᓪᓕᐅᓂᕐᓯᐅᕈᑎᖃᕆᐊᕐᑐᓱᑎᒃ ᐅᒥᐊᕐᔪᐊᑉ ᓈᓚᒃ ᓇᑉᐹᓘᑉ ᓄᐃᑎᑕᐅᓂᖓᓂᒃ ᕚᓐᑰᕙᒥ ᐊᐅᒡᒎᓯ 17, 2024-ᖑᑎᓪᓗᒍ. © Seaspan
ᐅᑭᐅᖏᑦ ᓈᒻᒪᓯᒻᒪᑕ, ᓈᓚᒃ ᐊᕐᓇᑖᓕᕐᑐᕕᓂᖅ ᒥᑎᐊᕐᔪᒥᒃ. ᒥᑎᐊᕐᔪᖅ ᖃᐅᔨᒪᔭᐅᑦᓯᐊᒪᕆᓚᐅᔪᒻᒥᔪᖅ ᐃᓄᑐᖃᐅᑦᓱᓂ, ᐃᓕᓭᔨᐅᑦᓱᓂ, ᓴᓇᖕᖑᐊᑎᐅᑦᓱᓂ ᐊᑐᐊᒐᓕᐅᕐᑎᐅᓱᓂᓗ. ᖃᐅᔨᒪᔭᐅᒍᑎᓕᒃ ᐊᑐᐊᒐᓕᐊᕆᓯᒪᔭᒥᓄᑦ ᓴᓈᕐᒥᒃ, ᓯᕗᓪᓕᐸᐅᖃᑕᐅᓯᒪᔪᖅ ᑎᑎᕋᕐᑕᐅᓯᒪᑦᓱᓂ ᐃᓄᑦᑎᑐᑦ, ᐃᑲᔪᕐᓯᒪᑦᓱᓂᓗ ᓯᕗᓪᓕᐸᐅᖃᑕᐅᒻᒥᔪᒥᒃ ᐅᓕᕐᓀᓯᒍᑎᒥᒃ ᐃᓄᑦᑎᑐᑦ. ᒥᑎᐊᕐᔪᒃ ᐃᓅᒍᓐᓀᓚᐅᔪᖅ 2007-ᒥ. ᓈᓚᒃᑰᒃ ᑕᓪᓕᒪᓂᒃ ᕿᑐᕐᖓᓖᒃ. ᐱᕈᐃᓯᒪᑦᓱᑎᓪᓗ ᑎᒍᐊᕐᒥᓂᒃ ᒪᕐᕉᓂᒃ, ᒪᕐᕈᓂᓪᓗ ᐃᕐᖑᑕᒥᓂᒃ, ᐊᖏᕐᑎᒋᔭᐅᓯᒪᑦᓱᑎᓗ ᐊᒥᓱᒻᒪᕆᐊᓗᓐᓄᑦ.
ᕿᐊᓪᓚᒃ ᐱᒻᒪᕆᐅᓂᕃᕗᖅ ᑕᒪᒃᑯᓂᖓ ᐅᖃᐅᓯᖃᕆᐊᖅ ᐅᐱᓐᓇᕋᓂ ᐊᑖᑕᖓ ᐱᒻᒪᕆᐅᓂᕐᐸᐅᑎᑦᓯᓯᒪᒻᒪᑦ ᐃᓚᒌᓐᓂᕐᒥᒃ. ᐅᖃᕐᓱᓂᓗ ᒥᑎᐊᕐᔪᓪᓗ ᓇᓪᓕᒋᐅᑎᒻᒪᕆᑦᓯᒪᒻᒪᓃᒃ ᐃᓅᓯᖃᑯᑖᖃᑎᒌᓚᕿᑦᓱᑎᒃ.
ᕿᐊᓪᓚᒃ ᓇᑉᐹᓗᒃ ᐸᑦᑎᓯᖃᑎᐅᔪᖅ ᐅᒥᐊᕐᔪᐊᑖᕐᖃᒥᕐᒥᒃ ᐊᑦᓯᔭᐅᑎᓪᓗᒍ ᐊᑖᑕᖓᓂᒃ ᓈᓚᒃ ᓇᑉᐹᓗᒻᒥᒃ, ᑲᓇᑕᐅᑉ ᐃᒪᕐᐱᖓᓂᒃ ᐯᕐᓯᔩᑦ ᐅᒥᐊᕐᔪᐊᑖᕐᖃᒥᖓᓂᒃ ᓯᑯᐃᔦᓂᕐᒥᒃ ᐱᓇᓱᐊᕋᖃᕐᓂᐊᑐᒥᒃ. © Seaspan
“ᐅᖃᕐᐸᓚᐅᕐᑐᖅ ᐃᓚᑎᑦ ᐱᒻᒪᕆᐊᓗᐃᑦ. ᖃᐅᔨᒪᒋᐊᖃᕐᖁᑎᑦ ᑭᓇᒃᑰᒪᖔᑕ ᐃᓚᑎᑦ ᐃᓱᕐᕆᓂᐊᕋᕕᑦ ᐃᑲᔪᖃᑎᒌᓐᓂᐊᕋᑦᓯᓗ,” ᕿᐊᓪᓚᒃ ᐅᖃᕐᑐᖅ. “ᑌᒣᖃᑦᑕᓯᒪᕗᑦ ᐃᓚᒌᑦ. ᖃᐅᔨᒪᖃᑦᑕᕆᐊᖃᕐᓯᒪᔪᒍᑦ ᐃᓚᓕᒫᑦᓯᐊᑎᓐᓂᒃ ᐃᑲᔪᖃᑎᒌᑉᐸᓂᐊᕋᑦᑕ. ᐊᓯᐊᓄᓪᓗ ᓄᓇᓕᒻᒨᕋᓗᐊᕈᕕᑦ ᐊᓂᕐᕋᓯᒪᔫᔭᑐᐃᓐᓇᓂᐊᕋᕕᑦ. ᐊᓂᕐᕋᒥᓂᒃ ᑌᒣᑦᑎᓯᓯᒪᔪᖅ ᐊᓯᒥᓄᑦ ᐊᓂᕐᕋᕆᔭᐅᔮᕐᑎᓱᒍ.”
ᐊᒥᓱᑦ ᓄᓇᕕᒻᒥᐅᑦ ᓴᐅᓂᖃᕐᑐᑦ ᓈᓚᒃ ᓇᑉᐹᓗᒻᒥ, ᑕᒡᒐ ᑖᓐᓇ ᐅᒥᐊᕐᔪᐊᑖᕐᖃᒥᖅ ᐊᑦᓯᑕᐅᑉᐸᑦ, ᐊᑎᕐᒥᓂᒃ ᓴᓂᕌᓂ ᐊᓪᓚᓯᒪᔪᒥ ᑕᑯᖃᑕᐅᓛᓕᕐᑐᑦ. ᑕᓐᓇ ᑐᓂᕐᕈᑎᒋᐊᓪᓚᖓ ᓈᓚᐅᑉ ᐃᓚᒥᓄᑦ.
ᑲᖕᒋᕐᓱᔪᐊᒥ ᐃᓄᑐᖃᕆᔭᐅᓯᒪᔫᑉ ᓈᓚᒃ ᓇᑉᐹᓘᑉ ᐃᓚᖏᑦ ᑲᑎᑦᑐᑦ ᕚᓐᑰᕙᒥ ᐊᐅᒡᒎᓯ 17, 2024-ᖑᑎᓪᓗᒍ. ᖁᕕᐊᓱᖃᑎᒌᒋᐊᕐᑐᓯᒪᔪᑦ ᐸᑦᑎᑕᐅᑎᓪᓗᒍ ᓄᑖᖅ ᐅᒥᐊᕐᔪᐊᖅ, ᐊᑦᓯᔭᐅᔪᖅ ᓇᑉᐹᓗᒻᒥᒃ. ᓴᐅᒥᐊᓂᑦ: ᓇᑉᐹᓘᑉ ᖃᖏᐊᖓ ᔫᐱ ᐊᕐᓀᑐᖅ, ᐸᓂᖓ ᕿᐊᓪᓚᒃ ᓇᑉᐹᓗᒃ ᐃᕐᓂᖓᓗ ᓘᑲᓯ ᓇᑉᐹᓗᒃ. © Seaspan
