Download a copy of Issue 130 here.
ᓯᕗᓂᑦᑎᓐᓄᑦ ᑐᕌᖓᑎᑦᑎᓯᒪᒋᓪᓗᑎᒃ, ᐃᓄᐃᑦ ᓴᓇᐅᒐᓕᕆᓂᖏᓐᓄᑦ, ᐱᐅᓯᑐᖃᖏᓐᓄᑦ ᐊᒻᒪᓗ ᑐᓴᐅᒪᖃᑦᑕᐅᑎᓕᕆᔾᔪᑎᖏᓐᓄᑦ ᓯᕗᓂᒃᓴᕆᔭᐅᔪᓄᑦ. ᐅᖃᓕᒫᒐᐃᑦ ᖄᖓᓂ, ᐊᒻᒪᓗ ᑐᕌᖓᔾᔪᑎᐅᓪᓗᑎᒃ ᑕᑯᒃᓴᐅᑎᑕᐅᔪᑦ ᐃᓗᐊᓂ, ᑕᑯᒃᓴᐅᑎᑦᑎᓯᒪᕗᑦ ᐃᓕᑕᕆᔭᐅᔾᔪᑎᓂᒃ ᓵᓚᒃᓴᐅᑎᑖᕈᑎᒋᓚᐅᖅᑕᖓᓄᑦ ᐅᓪᓗᒥᓂᑕᕐᓂᒃ ᐊᔾᔨᓕᐅᖅᓯᒪᔭᖓᓂᒃ ᐋᑐᕙᒥᐅᑕᐅᓪᓗᓂ ᑳᓱᕆᓐ ᑕᒃᐹᓂᐅᑉ. ᐅᖃᓕᒫᒐᓄᑦ ᐃᓕᓯᓯᒪᒻᒥᔪᒍᑦ ᐊᐱᖅᓱᕐᓂᕆᓚᐅᖅᑕᑦᑎᓐᓂᒃ ᓘᓯ ᑐᓗᒑᕐᔪᖕᒥᒃ, ᐊᐅᓚᑦᓯᓂᕐᒥ ᐃᓱᒪᑕᕆᔭᐅᔪᒥᒃ ᑲᓇᑕᒥ ᓯᕗᓪᓕᖅᐹᓪᓚᕆᐅᓪᓗᓂ ᓯᕿᖖᒍᔭᖅ ᑲᐃᕕᑦᓱᒍ ᑕᓚᕕᓴᑎᒍᑦ ᑕᑯᒃᓴᐅᑎᑦᑎᕙᓐᓂᕐᒥᒃ ᐃᓄᒃᑐᑦ ᐊᒻᒪᓗ ᖃᐅᔨᒋᐊᕐᓂᐅᔪᓄᑦ ᐱᕙᓪᓕᐊᔪᓕᕆᓂᐅᔪᓄᑦ ᓂᐅᕝᕈᑎᖃᒃᑲᓐᓂᕈᓐᓇᕆᐊᒥᒃ ᐱᔪᓐᓇᐅᑎᒋᔭᐅᔪᓂᒃ ᐊᒻᒪᓗ ᑮᓇᐅᔾᔭᒃᓴᕝᕕᐅᑐᐃᓐᓇᕆᐊᓕᖕᓂᒃ – ᓂᐅᕝᕈᑎᐅᒃᑲᓐᓂᕋᔭᖅᐸᑕ ᐃᓄᖕᓂᑦ ᓴᓇᐅᒐᓕᐊᖑᓯᒪᔪᕕᓃᑦ.
ᑭᓯᐊᓂᓗᑦᑕᐅᖅ ᑭᖑᒻᒧᑦ ᑕᑯᒋᐊᕐᓂᖃᕐᒥᔪᒍᑦ, ᑕᐃᒪ ᓄᓇᑦᓯᐊᕗᑦ ᐅᑭᐅᖏᑦ 1980-ᐃᑦ ᐊᑐᖅᑎᓪᓗᒋᑦ ᖃᕆᑕᐅᔭᑎᒎᖅᐸᓚᐅᖖᒋᑎᓪᓗᑕ ᓱᓕ, ᐊᒻᒪᓗ ᐱᓂᕐᓗᐊᕿᓂᐅᓚᐅᖅᓯᒪᔪᕕᓂᕐᒥᒃ ᐅᑭᐅᑦ 120 ᓈᓯᒪᓕᖅᑐᓂᑦ ᑕᐃᒪ ᐃᓄᐃᑦ ᐊᖏᖅᓯᒪᑎᓐᓇᒋᑦ ᕿᒪᐃᔭᕆᐊᖃᖅᑎᑕᐅᓚᐅᖅᓯᒪᓂᖏᑕ ᖁᕕᐊᒋᔭᐅᓪᓚᕆᒃᑑᓪᓗᓂ, ᑕᐃᒪᖖᒐᓂᑐᖃᒻᒪᕆᒃ ᓯᕗᓕᕕᓂᖏᑕ ᐊᖑᓇᓱᐊᕐᕕᒋᖃᑦᑕᖅᓯᒪᔭᖓᓐᓂᒃ ᑰᕕᒃ ᐸᐃ, ᓄᓇᕕᒃᒥ. ᐃᓱᒪᒋᔭᖃᓚᐅᖅᓯᒪᖖᒋᓚᓯᓕ ᖃᓄᖅ ᓯᕗᓪᓕᕐᒥᒃ ᐱᒋᐊᖅᑎᑕᐅᓚᐅᖅᓯᒪᓐᓂᕐᒪᖔᑕ ᐅᓂᒃᑳᕆᔭᐅᔪᓐᓇᖅᓱᑎᒃ ᐸᐅᒃᑑᑎᑦ ᐊᕐᓇᐃᑦ ᐃᓄᐃᑦ ᑲᓇᑕᒥ ᑎᒥᖁᑎᖓᓐᓂᑦ? ᐅᑎᕆᐊᖅᓯᒪᔾᔪᑎᓂᐊᖅᑕᑦᓯ ᐱᒋᐊᕈᑎᐅᓚᐅᖅᓯᒪᔪᓄᑦ ᑎᒥᖓᑦᑕ, 1975-ᖑᑎᓪᓗᒍ-ᔫᓇᐃᑎᑦ ᓃᓴᒃᑯᑦ ᓯᓚᕐᔪᐊᓕᒫᒥ ᐊᕐᓇᐃᑦ ᐅᑭᐅᕆᓚᐅᖅᓯᒪᔭᖓᓐᓄᑦ.
ᑖᒃᑯᐊᑐᐊᖑᖖᒋᒻᒥᔪᑦ. ᓇᓂᓯᓂᐊᖅᐳᓯ ᐅᓂᒃᑳᖅᑕᐅᓯᒪᔪᓂᒃ ᐊᒻᒪᓗ ᐊᔾᔨᓕᐅᖅᑕᐅᓯᒪᔪᓂᒃ ᐅᒥᐅᔭᖅ, ᓄᓇᕕᖕᒥ, ᑕᕐᕆᔭᒐᒃᓴᓕᐊᖑᓯᒪᔪᓂᒃ ᕿᒥᕐᕈᓂᕐᓄᑦ, ᐊᒻᒪᓗ ᐅᖃᐅᓯᒃᓴᖏᓂᒃ ᐃᓄᐃᑦ ᑕᐱᕇᑦ ᑲᓇᑕᒥ ᐊᖏᔪᖅᑳᖓᑕ ᓇᐃᑖᓐ ᐆᐱᑦ ᓴᖅᑭᓚᐅᖅᑕᖏᓂᒃ ᐃᒃᓯᕋᕐᔪᐊᕌᓗᒃ ᕗᕌᓐᓯᔅᒧᑦ ᐊᐃᐱᕆ 2022-ᒥ ᑕᑯᔭᖅᑐᐃᖃᑕᐅᓯᒪᒐᒥ ᐃᒃᓯᕋᕐᔪᐊᕌᓘᑉ ᓄᓇᕐᔪᐊᖓᓂᒃ. ᐊᑏ ᐃᖏᓪᓗᓯ ᐅᖃᓕᒫᑦᑎᐊᕐᓂᐊᖅᐳᓯ ᑐᓴᕐᓂᖅᑐᓂᒃ ᐊᐅᔭᐅᑎᓪᓗᒍ.
ᐋᖅᑭᒃᓱᐃᔩᑦ: ᑖᒻ ᒪᒃᓚᐅᑦ ᐊᒻᒪᓗ ᓖᓴ ᒍᕆᒡᒍᐊᕐ
ᑐᓂᓯᓯᒪᔪᑦ: ᒥᓯᐊᓪ ᕚᓐ ᐱᐅᓯᑳᒻ, ᓘᓯ ᑐᓗᒑᕐᔪᒃ, ᑕᐃᒪᓐ ᑭᓕᓐᒋᓐᐴᒃ, ᑭᐅᕈᓪ ᑯᓄᒃ, ᒫᒃ ᓄᑲᕐᓯᖅ ᒪᓪᓕᒃ, ᓖᓴ ᖁᐱᖅᕈᐊᓗᒃ, ᐊᐃᕙᓐ ᐱᓕᐅᑦ, ᐃᒪᓕ ᓗᐊᕋᓐᑦ ᕼᐃᓐᑐᕐᓴᓐ, ᑯᕆᔅᑏᓐ ᓄᔅᓴᓴᒃ, ᔨᐊᓯᑲ ᕕᓐᑐᕐᔅ, ᑳᑎ ᕗᐊᕐᑦ, ᐲᑕ ᕗᐊᓪ, ᐊᓃᑕ ᑯᐊᕋ, ᑎᕙᓂ ᓛᕐᑐᕐ, ᐋᓂ ᕇᑕ ᑐᑲᓗᒃ, ᐊᒻᒪᓗ ᓇᐃᑖᓐ ᐆᐱᑦ.