ᐄᐳ 21, 2026 – ᐋᑐᕚ, ᐋᓐᑎᐅᕆᔪ
ᓇᑖᓐ ᐅᐱᑦ, ᐊᖓᔪᖄᖓᑦ ᐃᓄᐃᑦ ᑕᐱᕇᑦ ᑲᓇᑕᒥ, ᑕᐃᓐᓇᓗ ᓵᓐ ᐳᐃᓐ, ᐃᒃᓯᕙᐅᑕᕆᔭᖅ ᑲᑎᒪᔨᖏᓐᓂ ᐋᒡᓃᑯ−ᐄᒍᓪ ᐅᔭᕋᖕᓂᐊᕐᕕᖏᓐᓂ ᑐᓴᒐᒃᓴᓕᐅᖃᐅᔫᒃ ᐋᒡᓃᑯ−ᐄᒍᓪᑯᑦ ᑮᓇᐅᔭᒃᓴᓂᒃᓯᓂᐊᓕᖅᑐᓂᒃ $10 ᒥᓕᔭᓐᓂᒃ ᐃᑲᔪᖅᓱᐃᓂᖏᓐᓄᑦ ᐃᓄᐃᑦ ᓄᓇᖓᑦ ᔪᓂᕘᓯᑎᑉ ᐃᓕᓐᓂᐊᕐᕕᒡᔪᐊᒃᓴᖓᓂᒃ. ᑐᓴᒐᒃᓴᓕᐅᖃᐅᔫᒃ ᑖᒃᑯᐊᒃ ᐅᓪᓗᒥ ᑕᐃᑲᖓᑦ ᓯᕗᓂᒃᓴᒥ ᓇᖕᒥᓂᖃᖅᑎᐅᓂᐊᖅᑐᑦ ᑲᑎᒪᓂᖏᓐᓂ, ᑲᓇᑕᒥ ᑲᑎᒪᔨᕐᔪᐊᒃᑯᑦ ᓇᖕᒥᓂᓖᑦ ᑲᑎᒪᑎᑦᑎᓂᖏᓐᓂ ᐋᑐᕚᒥ.
ᐃᓄᐃᑦ ᓄᓇᖓᑦ ᔪᓂᕘᓯᑎᑉ ᐃᓕᓐᓂᐊᕐᕕᒡᔪᐊᒃᓴᖅ ᐃᓄᖕᓄᑦ−ᐊᐅᓚᑕᐅᓗᓂ, ᓄᓇᕐᔪᐊᒥ ᐊᓯᖏᑎᑐᑦ ᐱᐅᔫᑎᒋᕗᖅ ᐃᓕᓐᓂᐊᑯᑖᕝᕕᐅᔪᓐᓇᕐᓂᐊᖅᑐᖅ, ᓯᕗᓪᓕᕐᒥ ᐃᓕᓐᓂᐊᕐᕕᐅᒋᐊᕈᒫᕐᕕᒃᓴᓕᒃ ᑕᒫᓂ 2030−ᒥ. ᐃᓕᓐᓂᐊᕐᕕᒡᔪᐊᒃᓴᖓᑦ ᐊᕐᕕᐊᓃᓐᓂᐊᖅᑐᖅ, ᓄᓇᕗᒻᒥ, ᐊᔾᔨᖐᖏᑦᑐᑎᐅᔪᓂᓗ ᐃᓄᐃᑦ ᓄᓇᖓᓂ ᐃᓕᓐᓂᐊᕐᕕᖃᕐᓂᐊᕆᓪᓗᑎᒃ. ᑕᒪᓐᓇ ᐱᒋᐊᖅᑎᑕᐅᓯᒪᕗᖅ ᐃᓄᐃᑦ ᑕᐱᕇᑦ ᑲᓇᑕᒥ ᑎᒥᖁᑎᖓᓄᑦ ᐊᒻᒪᓗ ᐃᓄᐃᑦ ᓄᓇᑖᖃᑕᐅᓯᒪᔪᑦ ᑲᑐᔾᔨᖃᑎᒌᖏᓐᓄᑦ, ᓴᕿᑎᑕᐅᖁᔨᓂᕐᒥᓄᑦ ᐃᓕᓐᓂᐊᒃᑲᓐᓂᕐᕕᒃᓴᒥᒃ ᑐᖓᕕᖃᕐᓂᐊᖅᑐᒥᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ, ᐃᓄᐃᑦ ᐅᖃᐅᓯᖏᓐᓂᒃ ᐊᒻᒪᓗ ᐃᓕᖅᑯᓯᑐᖃᖏᓐᓂᒃ.
“ᐋᒡᓃᑯ−ᐄᒍᓪᑯᑦ ᖁᕕᐊᓱᑦᑎᐊᖅᑐᑦ ᑐᓂᓯᓂᐊᓕᕐᓂᖅ $10 ᒥᓕᔭᓐᓂᒃ ᑖᒃᑯᓄᖓ ᓴᓇᔭᐅᕙᓪᓕᐊᓂᖓᓂᒃ ᐃᓄᐃᑦ ᓄᓇᖓᑦ ᐃᓕᓐᓂᐊᕐᕕᒡᔪᐊᒃᓴᖓᓂᒃ, ᐱᒻᒪᕆᐊᓗᖕᓂᒃ ᑮᓇᐅᔭᒃᓴᓂᒃᑕᐅᓂᖓ ᐃᑲᔪᖅᓱᐃᓂᐊᕐᒪᑦ ᑲᓇᑕᓕᒫᒥ ᖃᓄᐃᓕᐅᕈᑕᐅᒋᐊᒃᑲᓂᕈᓐᓇᖅᑐᓂᒃ ᐃᓄᐃᑦ ᐃᓕᓐᓂᐊᖅᑐᓕᕆᔨᐅᔪᓐᓇᕐᓂᖏᓐᓄᑦ ᐊᐅᓚᑦᑕᐅᓗᑎᒃ ᐃᓄᐃᑦ ᑕᐱᕇᖏᓐᓄᑦ ᑲᓇᑕᒥ,” ᐅᖃᖃᐅᔪᖅ ᓵᓐ ᐳᐃᑦ, ᐃᒃᓯᕙᐅᑕᖓᑦ ᑲᑎᒪᔨᖏᓐᓂ ᐋᒡᓃᑯ−ᐄᒍᓪᑯᓐᓂ. “ᑕᒪᓐᓇ ᐱᒋᐊᖅᑎᑕᐅᓂᖓ ᑭᒡᒐᖅᑐᐃᕗᖅ ᑐᑭᓕᐅᖅᑐᓂᒃ ᐱᕕᒃᓴᖃᖅᑎᑦᑎᓂᖅ ᐃᓕᓐᓂᐊᕈᑎᒃᓴᓂᒃ ᐊᑐᖅᑕᐅᓕᕈᓐᓇᕈᒫᖅᑐᓂᒃ ᐃᓄᖕᓄᑦ ᒪᒃᑯᒃᑐᓄᑦ, ᓴᖏᓂᖅᑖᕈᑕᐅᒃᑲᓂᕈᓐᓇᖅᑐᓂᒃ ᐊᑯᓂᐅᓂᐊᖅᑐᒧᑦ−ᑐᕌᖓᔪᓂᒃ ᐊᔪᕈᓐᓃᖅᓴᕐᕕᒃᓴᐅᔪᓐᓇᖅᑐᓂᒃ ᐊᒻᒪᓗ ᓯᕗᓕᐅᖅᑎᑖᖅᐸᓪᓕᐊᔪᓐᓇᕐᓂᖏᓐᓄᑦ ᓇᓂᑐᐃᓐᓇ ᐃᓄᐃᑦ ᓄᓇᖏᓂ. ᐊᒡᓃᑯ−ᐄᒍᓪᑯᑦ ᐊᖏᓂᖅᐹᕆᔭᐅᓪᓗᑎᒃ ᐅᔭᕋᖕᓂᐊᕐᕕᖕᓂ ᓄᓇᕗᒻᒥ, ᐃᓕᑕᕆᔭᐅᓯᒪᕗᑦ ᐱᑕᖃᕆᐊᓕᒻᒪᕆᖕᓂᒃ ᐃᓚᒋᔭᐅᔭᕆᐊᖃᕐᓂᖏᓐᓂ ᐃᓕᓐᓂᐊᖅᑐᓕᕆᓂᕐᒥᒃ ᐊᒻᒪᓗ ᐊᔪᕈᓐᓂᖅᓴᖅᑕᐅᔪᓐᓇᕐᓂᖏᓐᓂᒃ ᐃᓱᒪᒋᓪᓗᒍ ᓴᕿᑎᑦᑎᕙᓪᓕᐊᔪᓐᓇᕐᓂᖅ ᓴᖏᔪᓂᒃ, ᐊᓂᒎᑎᖃᑕᕈᓐᓇᖅᑐᓂᒃ ᓄᓇᓕᖕᓂᒃ, ᐅᐱᒋᔭᐅᓪᓗᑎᒡᓗ ᓯᕗᓕᖅᑎᖏᑦ ᐊᐃᑎᑮᒃᑯᓐᓂ, ᕼᐊᒻᒪᓚᒃᑯᓐᓂᓗ ᐊᕐᕕᐊᓂ ᐱᕙᓪᓕᐊᑎᑦᑎᓂᖏᓐᓂᒃ ᑕᒪᒃᑯᓂᖓ ᐱᒻᒪᕆᐅᔪᓂᒃ ᐃᓄᖕᓄᑦ−ᐊᐅᓚᑕᐅᔪᓂᒃ ᓴᕿᑎᑦᑕᐅᕙᓪᓕᐊᓂᐊᓕᖅᑐᓂᒃ. ᓂᕆᐅᓇᖅᐳᖅ ᐃᑲᔫᑎᒋᔭᕗᑦ ᓴᖏᓂᖅᑖᕈᑕᐅᑲᓂᕈᓐᓇᕐᓂᐊᖅᑐᖅ ᐱᔫᒥᓴᐅᑕᐅᖁᓪᓗᒋᓪᓗ ᑲᑐᔾᔨᖃᑎᒌᒍᓐᓇᕐᓂᕐᒧᑦ ᒐᕙᒪᒋᔭᐅᕙᒃᑐᓄᑦ, ᐊᖏᔫᑎᓂᒃ ᐱᓕᕆᕕᖃᖅᑐᓄᑦ, ᐃᓄᐃᓪᓗ ᑲᑐᔾᔨᖃᑎᒌᖏᓄᑦ, ᐊᓯᖏᓄᓪᓗ ᐃᓚᒋᔭᐅᕙᖕᒥᔪᓄᑦ ᐃᑲᔪᖅᓱᐃᓂᖏᓐᓂᒃ ᐊᑯᓂᐅᓂᐊᖅᑐᒧᑦ ᑲᔪᓯᔪᓇᐅᑎᒃᓴᖏᓐᓂᒃ.”
“ᖁᔭᓕᔪᒪᔭᒃᑲ ᐋᒡᓃᑯ−ᐄᒍᓪᑯᑦ ᐊᑯᓂ ᐃᑲᔪᖅᓱᐃᓂᖏᓐᓂᒃ ᓴᓇᔭᐅᕙᓪᓕᐊᓂᖓᓂ ᓯᕗᓕᕆᔭᐅᔪᖅ ᐃᓄᖕᓄᑦ−ᐊᐅᓚᑕᐅᓂᐊᖅᑐᖅ ᐃᓕᓐᓂᐊᕐᕕᒡᔪᐊᒃᓴᖅ ᑲᓇᑕᒥ,” ᐅᖃᖃᐅᔪᖅ ᐆᐱᑦ. ᑲᔪᓯᑎᑕᐅᕙᓪᓕᐊᓂᖓ ᑕᒪᓐᓇ ᐊᔪᕐᓇᕋᔭᓚᐅᖅᑐᖅ ᐊᓯᑎᓐᓂᒃ ᐊᒥᓱᓂᒃ ᐃᓚᖃᓚᐅᖏᒃᑯᑕ. ᐋᒡᓃᑯ−ᐄᒍᓪᑯᑦ ᐃᑲᔪᖅᓱᐃᖏᓇᕐᒪᑕ ᑕᐃᒪᖓᑦ ᖁᓕᐅᓕᖅᑐᓂᒃ ᐊᕐᕌᒎᓂᒃ ᐅᐱᒋᑦᑎᐊᖅᑕᕗᑦ ᐱᓕᕆᖃᑎᒋᔪᓐᓇᕐᓂᖅ ᐊᑐᓕᖅᑎᑕᐅᕙᓪᓕᐊᓂᕐᒧᑦ ᑕᐅᑐᒐᕆᔭᑎᓐᓂᒃ ᐃᓄᐃᑦ ᐃᖕᒥᓂᒃ−ᐃᓱᒪᓕᐅᖅᑎᐅᔪᓐᓇᕐᓂᖏᓐᓂᒃ, ᐊᔪᕈᓃᖅᓴᕕᐅᔪᒃᓴᓂᖏᒡᓗ ᐃᓄᐃᑦ ᓄᓇᖏᓐᓂ ᐃᓕᓐᓂᐊᕈᓐᓇᖅᓯᔪᒫᖅᑐᓂ.”
ᐋᒡᓃᑯ−ᐄᒍᓪᑯᑦ ᑐᓂᓯᓂᖏᓐᓄᑦ, ᐃᓄᐃᑦ ᓄᓇᖓᓂ ᐃᓕᓐᓂᐊᕐᕕᒡᔪᐊᒃᓴᖅ ᐱᓯᒪᓕᖅᑐᑦ ᐅᖓᑖᓂ $160 ᒥᓕᔭᓐᓂᒃ ᐱᑕᖃᕆᐊᓕᒻᒪᕆᖕᓂᒃ ᑮᓇᐅᔭᒃᓴᓂᒃ, ᓴᖏᔪᒥᒃ ᑐᖓᕕᖃᕈᑕᐅᓕᕈᓐᓇᕐᓂᐊᖅᑐᓂᒃ ᓴᓇᔭᐅᔭᕆᐊᖃᕐᓂᖓᓄᑦ ᐃᓕᓐᓂᐊᕐᕕᒃᓴᖅ ᐊᒻᒪᓗ ᓇᔪᕐᕕᒃᓴᖃᕆᖃᕐᓂᖏᓐᓄᑦ ᐃᓕᓐᓂᐊᕆᐊᖃᑕᐅᔪᒫᖅᑐᓄᑦ ᓯᕗᓂᒃᓴᒥ.”
ᐃᓄᐃᑦ ᑕᐱᕇᑦ ᑲᓇᑕᒥ ᑭᓇᒃᑰᓂᖏᑦ
ᐃᓄᐃᑦ ᑕᐱᕇᑦ ᑲᓇᑕᒥ ᓂᕈᐊᖅᑕᐅᖃᑦᑕᖅᑐᓂᒃ ᑲᑎᒪᔨᖃᖅᐳᑦ ᑭᒡᒐᖅᑐᐃᔨᖏᓐᓂᒃ ᑎᓕᔭᐅᓯᒪᓪᓗᑎᒃ ᐃᓱᒪᓕᐅᖅᑎᐅᔭᕆᐊᖃᕐᓂᖏᓐᓄᑦ ᑕᐅᕙᖓᑦ ᐃᓄᕕᐊᓗᐃᑦ ᑯᐊᐳᕇᓴᖏᓐᓂᒃ, ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖏᓐᓂᒃ, ᒪᑭᕕᒃᑯᓐᓂᒃ ᐊᒻᒪᓗ ᓄᓇᑦᓯᐊᕗᑦ ᒐᕙᒪᒃᑯᖏᓐᓂᒃ.
ᐋᒡᓃᑯ−ᐄᒍᓪᑯᑦ ᑭᓇᒃᑰᓂᖏᑦ
ᑲᓇᑕᒥᐅᑕᓄᑦ−ᐊᐅᓚᑕᐅᔪᑦ, ᐋᒡᓃᑯ−ᐄᒍᓪᑯᑦ ᑲᓇᑕᒥ ᐊᖏᓂᖅᐹᕆᔭᐅᕗᑦ ᐅᔭᕋᖕᓂᐊᕐᕕᐅᓂᕐᒧᑦ ᑲᒻᐸᓂᐅᔪᓂ, ᑐᒡᓕᕆᔭᐅᓪᓗᑎᒡᓗ ᐊᖏᓂᐹᓂᒃ ᒎᓘᖃᕐᓂᕐᒥᒃ ᓴᕿᑎᕆᕙᓪᓕᐊᖃᑕᐅᓪᓗᑎᒃ ᓄᓇᕐᔪᐊᕐᒥ, ᐊᐅᓚᑦᑎᕙᒃᓱᑎᒃ ᐅᔭᕋᖕᓂᐊᕐᕕᖕᓂ ᑲᓇᑕᒥ, ᐋᔅᑐᕇᓕᐊᒥ, ᕕᓐᓚᓐᒥ, ᒥᐊᒃᓯᑰᒥᓗ. ᑲᒻᐸᓂᑕ ᑕᒪᓐᓇ ᐊᑐᓕᖅᑎᑦᑎᕙᓪᓕᐊᓕᖅᑐᑦ ᓱᓪᓗᓕᐅᖅᓯᒪᕙᓕᕐᓂᖅ ᐱᐅᔫᑎᒻᒪᕆᐅᔪᓂᒃ ᑕᒪᒃᑯᓇᓂ ᐊᔾᔨᒌᖏᑦᑑᑎᐅᔪᓂ ᓄᓇᓕᖕᓂ, ᐃᑲᔪᖅᓱᐃᓂᕐᒧᑦ ᓄᓇᒥᒃ ᐊᒥᐊᒃᑯᓯᒪᐃᓐᓇᕆᐊᖅᑐᓂᒃ ᐱᕈᖅᐸᓪᓕᐊᔪᓐᓇᕐᓂᖏᓐᓂᒃ ᖁᓕᓂᒃ ᐊᕐᕌᒎᓂᐊᓕᖅᑐᓂ. ᐋᒡᓃᑯ−ᐄᒍᓪᑯᑦ ᓂᕈᐊᖅᑕᐅᓯᒪᕗᑦ ᐅᔭᕋᖕᓂᐊᕐᕕᖕᓂᒃ ᓴᓈᖃᕐᕕᖏᓐᓂᒃ, ᐃᓕᑕᕆᔭᐅᓯᒪᓪᓗᑎᒃ ᓄᓇᕐᔪᐊᕐᒥ ᓯᕗᓕᖅᑎᐅᓂᖏᓐᓂᒃ ᓄᓇᒥᒃ ᐊᒥᐊᒃᑯᓯᒪᑦᑎᐊᕋᓱᐊᕐᓂᕐᒥᒃ ᐊᑐᖃᑕᖁᔨᓂᕐᒥᒃ ᐱᓕᕆᕙᖕᓂᖏᓐᓂ.