Aippu 21, 2026 – Ottawa, Ontario
Natan Obed, Angajuqaangat Inuit Tapiriit Kanatami, tainnalu Sean Boyd, Iksivautarijaq Katimajinginni Agnico-Eagle Ujarangniarvinganni tusagaksaliuqaujuuk Agnico-Eaglekut kiinaujaksaniksinialiqtunik $10 milijannik ikajuqsuininginnut Inuit Nunangat Ilinniarvigjuaksanganik. Tusagaksaliuqaujuuk taakkuak ullumi taikangat Sivuniksami Nangminiqaqtiuniaqtut Katimaninginni, Canadami Katimajirjuakkut Nangminiliit Katimatittininginni Ottawami.
Inuit Nunangat Ilinniarvigjuaksaq Inungnut−aulatauluni, nunarjuami asingititut piujuutigivuq ilinniakutaavviujunnarniaqtuq, sivullirmi ilinniarviugiarumaarviksalik tamaani 2030−mi. Ilinniarvigjuaksangat Arvianiinniaqtuq, Nunavummi, Ajjingiingittutiujunilu Inuit Nunangani ilinniarviqarniarillutik. Tamanna pigiaqtitausimavuq Inuit Tapiriit Kanatami timiqutinganut ammalu Inuit Nunataaqatausimajut Katujjiqatigiinginnut, saqititauqujinirminut iliniakkannirviksamik tungaviqarniaqtumik Inuit qaujimajatuqanginnik, Inuit uqausinginnik ammalu iliqqusituqanginnik.
“Agnico-Eaglekut quviasuttiaqtut tunisinialirniq $10 milijannik taakkununga sanajauvallianinganik Inuit Nunangat Ilinniarvigjuaksanganik, pimmarialungnik kiinaujaksaniktauninga ikajuqsuiniarmat Canadalimaami qanuiliurutaugiakkanirunnaqtunik Inuit ilinniaqtulirijiujunnarninginnut aulattaulutik Inuit Tapiringinnut Kanatami,” uqaqaujuq Sean Boyd, Iksivautangat Katimajinginni Agnico-Eaglekunni. “Tamanna pigiaqtitauninga kiggaqtuivuq tukiliuqtunik piviksaqaqtittiniq ilinniarutiksanik atuqtaulirunnarumaaqtunik Inungnut makkuktunut, sanginiqtaarutaukkanirunnaqtunik akuniuniaqtumut−turaangajunik ajurunniiqsarviksaujunnaqtunik ammalu sivuliuqtitaaqpalliajunnarninginnut nanituinna Inuit Nunangini. Agnico-Eaglekut anginiqpaarijaullutik ujarangniarvingni Nunavummi, ilitarijausimavut pitaqarialimmaringnik ilagijaujariaqarninginni ilinniaqtulirinirmik ammalu ajurunniqsaqtaujunnarninginnik isumagillugu saqitittivalliajunnarniq sangijunik, aniguutiqatarunnaqtunik nunalingnik, upigijaullutiglu sivuliqtingit ITK-kunni, hammalakkunnilu Arviani pivalliatittininginnik tamakkuninga pimmariujunik Inungnut−aulataujunik saqitittauvallianialiqtunik. Niriunaqpuq ikajuutigijavut sanginiqtaarutaukanirunnarniaqtuq pijuumisautauqullugillu katujjiqatigiigunnarnirmut gavamagijauvaktunut, angijuutinik piliriviqaqtunut, Inuillu katujjiqatigiinginut, asinginullu ilagijauvangmijunut ikajuqsuininginnik akuniuniaqtumut kajusijunautiksanginnik.”
“Qujalijumajakka Agnico-Eaglekut akuni ikajuqsuininginnik sanajauvallianingani sivulirijaujuq Inungnut−aulatauniaqtuq Ilinniarvigjuaksaq Canadami,” uqaqaujuq Obed. Kajusititauvallianinga tamanna ajurnarajalauqtuq asitinnik amisunik ilaqalaungikkuta. Agnico-Eaglekut ikajuqsuinginarmata taimangat quliuliqtunik arraaguunik upigittiaqtavut piliriqatigijunnarniq atuliqtitauvallianirmut tautugarijatinnik Inuit ingminik−isumaliuqtiujunnarninginnik, ajuruniiqsaviujuksaningiglu Inuit Nunanginni ilinniarunnaqsijumaaqtuni.”
Agnico-Eaglekut tunisininginnut, Inuit Nunangani ilinniarvigjuaksaq pisimiliqtut ungataani $160 milijannik pitaqarialimmaringnik kiinaujaksanik, sangijumik tungaviqarutaulirunnarniaqtunik sanajaujariaqarninganut ilinniarviksaq ammalu najurviksaqariaqarninginnut ilinniariaqataujumaaqtunut sivuniksami.”
Inuit Tapiriit Kanatami kinakkuuningit
Inuit Tapiriit Kanatami niruaqtauqattaqtunik katimajiqaqput kiggaqtuijinginnik tilijausimallutik isumaliuqtiujariaqarniq tauvangat Inuvialuit Kuapuriisanginnik, Nunavut Tunngavikkut Timiqutinganik, Makivikkunnik ammalu Nunatsiavut Gavamakkunginnik.
Agnico-Eaglekut kinakkuuningit
Canadamiutanut−aulataujut, Agnico-Eaglekut tamaani anginiqpaarijauvut ujarangniarviunirmut kampaniujuni, tuglirijaullutiglu anginipaarijaujut guuluuqarnirmik ujarangniaqtiujuni nunarjuarmi, aulattivaksutik ujarangniarvingni Canatami, Australiami, Finlandmi, Mexicomilu. Kampaningatauq atuliqtittivallialiqtut sulluliuqsimavalirniq piujuutimmariujunik sanajausimajunik ajjigiingittuutiujuni nunalingni, ikajuqsuinirmut nunamik amiakkusimainnariaqtunik piruqpaliatittilutiglu quliniq arraaguunialiqtuni. Agnico-Eaglekut niruaqtausimavut ujarangniarvingnik ilitarijausimallutik nunarjuarmi sivuliqtiuninginnik nunamik amiakkusimattiarasuarnirmik atuqataqujinirmik pilirivangninginni.