ᓴᓇᓂᖅ ᓄᓇᕕᒻᒥᒃ

“ᐱᔭᕇᑦᓴᑐᐊᕐᒪᑦ ᐅᒃᑯᐃᓚᐅᔭᕗᑦ,” ᐅᖃᕐᑐᖅ ᐱᓕ ᑲᐃᓐ, ᑕᓯᐅᔭᐅᑉ ᓯᕗᓕᕐᑎᖓ ᐊᖓᔪᕐᖄᕆᔭᐅᑦᓱᓂᓗ ᐊᕐᕿᕕᒃ ᓄᓇᒥᒃ ᑎᒍᒥᐊᕐᑎᑯᑦ ᑲᑎᒪᔨᖏᓐᓂ. “ᐱᐊᕋᕐᓂᒃ, ᐃᓅᓱᑦᑐᓂᒃ, ᐃᓄᒻᒪᕆᓐᓂᓗ ᐅᑕᕐᕿᑐᐃᓐᓇᖁᔨᓚᐅᔪᒍᓐᓀᕋᑦᑕ ᓱᓇᓱᐊᕋᑦᓴᖃᖕᖏᓗᑎᒃ.  ᐅᓪᓗᒥ, ᐱᖕᖑᐊᓂᖃᖃᑦᑕᓕᕐᑐᖅ ᕙᓕᐹᕐᓱᑎᒃ. ᐊᓕᐊᒋᔭᐹᓗᒃ ᑕᒪᓐᓇ. 9-ᖑᒥ ᐅᓐᓄᑯᑦ ᐱᒋᐊᕐᓱᑎᒃ 11-ᖑᒥ ᐅᓐᓄᑯᑦ ᓄᕐᖃᖃᑦᑕᑐᑦ.  ᑕᒪᑦᓱᒪ ᓯᕗᓂᐊᒍᑦ, ᐱᐊᕋᐅᓂᕐᓭᑦ ᐊᔪᑦᑕᖃᑦᑕᑐᑦ, ᖄᑭᖃᑦᑕᓱᑎᓪᓗ ᓇᑎᕐᒥ, ᐸᑦᑕᒥᓪᓗ ᐳᕐᓯᒐᓱᐊᕐᓂᒥᒃ ᐱᖕᖑᐊᓱᑎᒃ, ᓱᓇᓱᐊᕈᒪᔭᕐᓱᖃᑦᑕᑐᑦ.”

ᓄᓇᓕᒃ 400 ᒥᑦᓵᓂ ᐃᓄᓕᒃ, ᑖᓐᓇᓗ ᐱᖕᖑᐊᕕᒃ ᓱᖃᑦᓯᕕᒃ ᐃᓄᖃᕈᓐᓇᓱᓂ ᕿᑎᕐᖃᓕᒫᑲᓴᖏᓐᓂᒃ ᐊᑐᕐᑕᐅᒍᓐᓇᖃᑦᑕᓂᐊᕐᑐᖅ ᐃᓄᓕᒫᕐᑎᓯᓂᖃᓕᕐᐸᑦ ᓂᕆᒻᒫᑐᖃᓕᕐᐸᓗ.  ᐱᖕᖑᐊᕕᑦᑖᖃᒻᒥᖅ ᑭᖕᖒᒪᒋᔭᐅᔪᕕᓂᖅ ᓄᓇᓕᒻᒥ, ᑕᓯᐅᔭᐅᑉ ᐃᓄᓐᓂᒃ ᑲᑎᑦᑎᓯᕕᖓ ᓱᒃᑯᑕᐅᓚᐅᔪᑎᓪᓗᒍ ᐃᑯᐊᓚᒧᑦ 2023 ᐅᐱᕐᖓᓴᖓᓂ.

ᒪᑭᕝᕕᒃ, ᓄᓇᕕᐅᑉ ᐃᓄᖏᑦᑕ ᐊᖏᖃᑎᒌᒍᑎᕕᓂᖓᓂᒃ ᐯᕐᓯᔨᐅᔪᖅ, ᐊᒡᒍᑐᐃᑎᓪᓗᒍ ᓄᓇᕕᒻᒧᑦ $129 ᒥᓕᐊᓐᓂᒃ ᑮᓇᐅᔭᖃᕐᑎᓯᒍᑎᐅᔪᓂᑦ ᐃᓪᓗᒪᕆᓐᓂᒃ, ᓄᓇᓖᑦ ᑮᓇᐅᔭᓂᒃ ᐊᑐᕈᓐᓇᓂᕋᕐᑕᐅᓯᒪᔪᑦ ᐃᓅᓯᕐᒨᓕᖓᔪᓂᒃ ᐃᓪᓗᒪᕆᓐᓂᒃ ᓄᐃᑦᓯᒍᑎᒋᓗᒋᑦ, ᐅᖃᕐᑐᖅ ᕙᓂᐊᓴ ᑐᐃᒃ, ᐃᑲᔪᕐᑎᒋᔭᐅᔪᖅ ᐊᖓᔪᕐᖄᑉ ᐊᓪᓚᕕᖓᓂ ᒪᑭᕝᕕᑯᓐᓂ.  “ᐊᒥᓱᐃᑦ ᑮᓇᐅᔭᕐᑖᕈᑎᒋᓲᕗᑦ ᓄᓇᓕᒻᒥ ᐱᒍᑦᔨᐅᑎᓅᓕᖓᕙᓪᓗᓲᖑᒻᒪᑕ, ᐅᑦᑑᑎᒋᓗᒋᑦ ᐊᕐᖁᑏᑦ ᓄᓇᓕᓕᕆᔩᓪᓗ ᐃᓪᓗᒪᕆᖁᑎᑦᓴᖏᓐᓄᑦ,” ᐅᖃᕐᑐᖅ ᑐᐃᒃ. “ᐊᒥᓲᖕᖏᒪᑕ ᓄᐃᑕᐅᕙᑦᑐᑦ ᐱᓇᓱᐊᕈᑎᑦᓴᔭᐅᑦᓱᑎᒃ ᐃᓅᓐᓅᓕᖓᔪᓂᒃ.  ᓯᐊᕐᕆᔭᕐᕕᓕᐅᕈᑎᑦᓭᑦ ᐃᓅᓱᑦᑐᐃᓗ ᐃᓪᓗᖁᑎᖏᓐᓅᓕᖓᔪᑦ ᓯᕗᓪᓕᐸᐅᑦᔨᒐᑦᓴᔭᐅᓪᓗᐊᓲᖑᖕᖏᒪᑕ ᑮᓇᐅᔭᒻᒪᕆᓐᓄᑦ ᓄᐃᑕᐅᕙᑦᑐᓄᑦ.”

ᒪᑭᕝᕕᑯᑦ ᑖᒃᑯᓂᖕᒐ ᑮᓇᐅᔭᓂᒃ ᐱᕚᓪᓕᕈᑎᐅᑦᓯᐊᖁᔨᓯᒪᔪᑦ ᓄᓇᓕᓕᒫᓄᑦ ᐊᑐᕐᑕᐅᖁᙱᓱᒋᓪᓗ ᐃᓪᓗᒪᕆᓐᓄᑦ ᑮᓇᐅᔭᖃᕐᑎᑕᐅᒌᓱᓄᑦ ᑲᕙᒪᒃᑯᑎᒍᑦ ᑲᒪᒋᔭᑦᓴᐅᓱᑎᒃ.  ᒪᑭᕝᕕᑯᑦ ᑎᓕᔨᒍᑎᖕᒐᒍᑦ, ᑖᒃᑯᐊ ᓄᓇᖃᕐᖄᓯᒪᔪᑦ ᓄᓇᓖᑦ ᐃᓪᓗᒪᕆᖃᕐᑎᑕᐅᒍᑎᑦᓴᔭᖕᒋᓐᓂᒃ ᑮᓇᐅᔭᖃᕐᑎᓯᒍᑏᑦ ᐊᒡᒍᑕᐅᓂᖃᓚᐅᕐᑐᑦ ᐊᑦᔨᒌᑦᓯᐊᒥᒃ 14-ᓄᑦ ᓄᓇᓕᓐᓄᑦ, ᐃᓕᖕᒐᓂᐊᕐᑎᓗᒋᑦ ᓄᓇᓕᐅᑉ ᓇᒻᒥᓂᖅ ᑐᑭᑖᕈᑎᖕᒐᑎᒍᑦ ᐱᓇᓱᐊᕈᑎᐅᓂᐊᕐᓗᑎᒃ.  ᐊᒡᒍᑕᐅᑎᓪᓗᒋᑦ, ᑕᓯᐅᔭᖅ $9 ᒥᓕᐊᓂᒃ ᐱᓚᐅᕐᑐᖅ ᐱᙳᐊᕕᑦᑖᖃᒻᒥᒨᓕᖕᒐᓂᐊᕐᑎᓪᓗᒋᑦ.

ᐱᐅᔪᐊᓗᒃ ᓄᑖᖅ ᐃᓪᓗᖅ – ᓄᓇᓕᐅᑉ ᐱᒍᒪᓯᒪᑦᓯᐊᑕᖓ ᓱᓇᒥᒃ ᐱᒍᒪᒻᒪᖔᑕ ᐊᐱᕆᔭᐅᓂᖃᕐᓱᑎᒃ ᑐᓴᐅᑎᒃᑯᑦ.  ᑭᓯᐊᓂᓗᑦᑕᐅᖅ, ᐃᓄᕐᓴᓚᐅᕐᒥᔪᖅ ᐃᓪᓗᓕᐊᒥ ᐱᑕᖃᖁᔭᐅᔪᕕᓂᕐᓄᑦ, ᑮᓇᐅᔦᑦ ᓈᒻᒪᖏᓗᐊᕇᓚᐅᕐᒪᑕ ᓄᓇᓕᐅᑉ ᐱᒍᒪᓯᒪᔭᖏᓐᓄᑦ, ᐃᙯᓕᓴᕐᕕᖃᖁᔨᓯᒪᔫᒐᓗᐊᑦ, ᐊᓐᓄᕌᕐᑐᕕᑦᓯᐊᖃᖁᔨᑦᓱᑎᓪᓗ, ᑕᕐᕋᓕᔮᕐᕕᖃᖁᔨᑦᓱᑎᓪᓗ.  “ᐅᓪᓗᒥᐅᓕᕐᑐᖅ ᐃᓪᓗᓕᐅᕈᑎᑦᓴᔦᑦ ᐊᑭᑐᔪᒻᒪᕆᐊᓘᓕᕐᒪᑕ. ᐱᒍᒪᔭᓕᒫᑦᑎᓂᒃ ᐱᓚᐅᖕᖏᓚᒍᑦ,” ᐅᖃᕐᑐᖅ ᑲᐃᓐ. “ᑐᑦᓯᕋᐅᑎᒋᓯᒪᔭᕐᑎᓂᒃ, ᐅᑯᐊ ᐱᒍᓐᓇᓯᓚᐅᕐᑕᕋᓗᐊᕗᑦ, ᐃᒐᕕᒃ, ᓂᐅᕕᐊᑦᓴᖃᕐᕕᐅᒍᓐᓇᓗᓂ ᓂᕆᒐᑦᓴᓂᒃ, ᑲᑎᒪᕕᑦᓴᖅ, ᖁᕐᕕᑯᕖᓪᓗ ᐅᕕᓂᓐᓂᐊᕕᖃᕐᓱᑎᒃ,” ᐃᓚᒋᔭᐅᒻᒥᑎᓪᓗᒍ ᐱᖕᖑᐊᕕᒃ.

ᑖᓐᓇ ᐱᖕᖑᐊᕕᒃ ᓱᖃᑦᓯᕕᒃ ᐃᓘᓐᓇᓕᒫᖓ ᑲᕙᒪᑐᖃᒃᑯᓄᑦ ᑮᓇᐅᔭᖃᕐᑎᑕᐅᓚᐅᕋᓗᐊᕐᑎᓪᓗᒍ, ᓄᓇᓕᒃ ᓄᓇᒥᒃ ᑎᒍᒥᐊᕐᑎᑯᓪᓗ ᑮᓇᐅᔭᓂᒃ ᑐᕌᕋᓕᐅᕆᐊᖃᓚᖓᔪᑦ ᓇᒻᒥᓂᖅ ᑲᔪᓯᑎᑦᓯᒍᑎᑦᓴᐅᓂᐊᕐᑎᓗᒋᑦ ᑕᑦᓱᒥᖓ ᓄᑖᒥᒃ ᐃᓪᓗᒥᒃ.  “ᐊᐅᓚᒍᑎᑦᓭᑦ ᑮᓇᐅᔦᑦ ᓵᖕᖓᔭᐅᒋᐊᖃᓚᖓᔪᑦ ᐊᑭᓕᕐᑐᐃᒋᐊᖃᕋᑦᑕ ᐱᓇᓱᐊᕐᑎᓂᒃ ᑌᑲᓂ,” ᐅᖃᕐᑐᖅ ᑲᐃᓐ.  “ᑐᑭᒧᐊᑦᑎᓯᔨ, ᓴᓗᒻᒪᓭᔩᑦ, ᓄᓇᓕᒻᒧᑦ ᐱᑦᔪᔭᐅᒍᑏᑦ ᑖᒃᓯᖏᑦ, ᐊᓯᖏᓪᓗ ᐃᓱᒪᓇᕐᓂᖏᑦᑐᑦ ᑮᓇᐅᔭᕐᑑᑏᑦ.”

ᑲᒪᒋᔭᐅᒍᓐᓇᖁᓪᓗᒋᑦ ᐃᓪᓗᒪᕆᓐᓅᓕᖓᔪᑦ ᑮᓇᐅᔦᑦ ᓄᓇᕕᒻᒥ, ᒪᑭᕝᕕᒃ ᓄᐃᑦᓯᓚᐅᕐᑐᖅ ᓄᑖᓂᒃ ᐱᓇᓱᐊᕐᑎᐅᓂᐊᕐᑐᓂᒃ ᑐᑦᓯᕋᐅᑎᓕᕆᔨᐅᓂᐊᕐᑐᓂᒃ ᐃᑲᔪᕐᓯᒪᔨᐅᓂᐊᕐᓗᑎᓪᓗ ᓄᓇᓕᓐᓂᒃ ᐱᕙᓪᓕᐊᑎᑦᓯᒐᓱᐊᕐᑎᓗᒋᑦ ᐱᓇᓱᐊᕐᑕᐅᒍᒪᔪᒥᒃ ᐃᓱᒪᑖᕕᓂᐅᓂᖓᓂᑦ ᐱᒋᐊᕐᓗᓂ ᓴᓇᔭᐅᓂᖓᓄᑦ ᑎᑭᓪᓗᒍ.  ᑖᒃᑯᐊ ᐱᓇᓱᐊᕐᑏᑦ ᓴᓇᓪᓗᑯᐊᐱᑦᓯᒪᔪᓕᕆᔩᑦ, ᐃᓪᓗᓕᐅᕐᓂᒥᒃ ᖃᐅᔨᒪᔪᒻᒪᕇᑦ, ᐱᓇᓱᐊᕐᑕᐅᓂᐊᕐᑐᒥᓪᓗ ᑲᒪᔩᑦ.  ᓯᑕᒪᓄᑦ ᐊᕐᕌᒍᓅᓕᖓᑦᓱᑎᒃ ᑲᕙᒪᑐᖃᒃᑯᑦ ᑮᓇᐅᔭᖃᕐᑎᓯᒍᑎᖏᑦ ᐃᓪᓗᒪᕆᓕᐅᕈᑎᑦᓭᑦ ᓴᓇᒋᐊᖃᕐᓂᐅᔪᓂᒃ ᑭᖑᕙᕐᑎᓯᒍᓐᓇᓂᑯᖏᓐᓄᑦ, ᒪᑭᕝᕕᑯᑦ ᐃᑲᔪᕐᓯᒪᔪᑦ ᓱᑲᓐᓂᓴᐅᖁᔨᑦᓱᑎᒃ ᓴᓇᓂᐅᔪᓂᒃ ᐃᓪᓗᓕᐅᕐᑎᒥᓂᒃ ᑲᐅᑕᕐᒥᒃ ᐊᑐᕐᑕᐅᑎᑦᓯᓱᑎᒃ, ᑖᒃᑯᐊᓗ ᐱᓇᓱᐊᕐᕕᓚᕆᖃᕐᓱᑎᒃ ᓄᓇᕕᒻᒥᒃ.  “ᓄᓇᖃᕐᖄᓯᒪᔪᑦ ᓄᓇᓕᖏᓐᓂ ᐃᓪᓗᒪᕆᓕᐅᕈᑎᑦᓭᑦ ᑮᓇᐅᔦᑦ ᓄᐃᑕᐅᓚᐅᔪᑦ ᑲᕙᒪᑐᖃᒃᑯᑦ ᑐᕌᕋᓕᐊᖏᑎᒍᑦ 2021-ᖑᑎᓪᓗᒍ ᐁᕆᓕᒥ,” ᐅᖃᕐᑐᖅ ᑐᐃᒃ.  “ᐊᐅᒡᒎᓯᐅᓕᕐᒪᑭᓯᐊᓂ ᖃᐅᔨᓚᐅᔪᒍᑦ ᐃᓄᓐᓅᓕᖓᔪᐃᑦ ᐊᒡᒍᑕᐅᒍᑎᖏᓐᓂᒃ, ᑭᖑᕃᑦᓱᑕᓗ ᐅᒥᐊᕐᔪᐊᑰᕐᑎᓯᓂᐅᒋᐊᓕᓐᓄᑦ.  $517.8 ᒥᓕᐊᓂᒃ ᑮᓇᐅᔭᕐᑖᑲᓪᓚᓱᑕ ᐃᓄᐃᑦ ᓄᓇᖓᓐᓅᓕᖓᔪᓂᒃ ᐊᒥᓲᖕᖏᑐᐃᓪᓘᑯᐊ ᐅᒥᐊᕐᔪᐊᑦ ᐃᓪᓗᓕᐊᑦᓵᓗᐃᓪᓗ ᐅᒥᐊᕐᔪᐊᑰᕐᑎᒋᐊᖃᕐᓱᒋᑦ.”

ᐃᓄᐃᑦ ᓄᓇᖓᓂ, ᐃᓪᓗᓕᐅᕈᑎᑦᓭᑦ ᑮᓇᐅᔦᑦ ᕿᑎᕐᖃᓕᒫᖏᑦᑕ ᐅᖓᑖᓄᑦ ᐊᑐᕐᑕᐅᓯᒪᓕᓚᐅᔪᑦ ᑐᑭᑖᕈᑕᐅᒪᓕᕐᓱᑎᓪᓘᓃᑦ ᐁᕆᓕ 2024-ᒥ, ᐊᕐᕌᒍᓕᒫᑐᐃᓐᓇᐅᓕᕐᑎᓗᒍ ᑮᓇᐅᔭᖃᕐᑎᓯᓂᐅᔪᖅ, ᑕᒪᓐᓇ ᐃᓄᐃᑦ ᑕᐱᕇᑦ ᑲᓇᑕᒥ ᖃᐅᔨᓚᐅᔪᔭᖓ ᕿᒥᕐᕈᓂᖃᕐᓱᑎᒃ ᑲᓇᑕᐅᑉ ᐃᓪᓗᓕᐅᕈᑎᑦᓴᔭᓂᒃ ᑮᓇᐅᔭᖃᕐᑎᓯᒍᑎᖏᓐᓂᒃ ᐊᕐᕌᒎᑉ ᕿᑎᖓᓂ.  ᑭᓯᐊᓂᓗᑦᑕᐅᖅ ᑖᓐᓇᓭᓐᓇᖅ ᕿᒥᕐᕈᓂᖓ ᑕᐱᕇᒃᑯᑦ ᐱᓇᓱᑦᑎᖏᑦᑕ ᐅᖃᕐᓯᒪᒻᒥᔪᖅ ᑖᓐᓇᒎᖅ ᐊᑕᐅᓯᐊᑲᓪᓚᑐᐃᓐᓇᑐᖅ ᑮᓇᐅᔭᖃᕐᑎᓯᓂᖅ “ᐊᓪᓗᕆᐊᕐᓂᐅᓱᓂ ᐱᒻᒪᕆᐅᒐᓗᐊᖅ, ᐊᖑᒻᒪᑎᑎᑦᓯᒍᑎᐅᓚᖓᒍᓇᐅᖕᖏᑐᖅ ᐃᓪᓗᒪᕆᖃᕆᐊᖃᕐᓂᖓᓂᒃ ᐃᓄᐃᑦ ᓄᓇᖓᑕ ᑲᓇᑕᓕᒫᑉ ᓴᓂᐊᓐᓂᑦ.”  2022-ᒥ ᕿᒥᕐᕈᔭᐅᓂᖃᕐᑎᓗᒍ ᐃᓪᓗᒪᕆᖃᑦᓯᐊᖏᓐᓂᖓ ᐃᓄᐃᑦ ᓄᓇᖓᑕ, ᑕᐱᕇᒃᑯᑦ ᓄᓇᓕᓐᓂᓗ ᑎᒥᐅᔪᐃᑦ ᖃᐅᔨᓚᐅᔪᔪᑦ $55.3 ᐱᓕᐊᓂᒃ ᑮᓇᐅᔭᕐᑕᓯᔭᐅᒋᐊᖃᕋᔭᕆᐊᖓ 115-ᓂᒃ ᐃᓪᓗᒪᕆᓕᐅᕐᓂᖅ ᖁᓖᑦ ᐊᕐᕌᒍᐃᑦ ᐃᓗᐊᓐᓂ ᐊᖑᒻᒪᑎᑎᑦᓯᓂᐊᕈᒪᒍᑦᑕ. ᑖᒃᑯᐊᓗ ᑮᓇᐅᔦᑦ ᐃᓚᖃᕋᑎᒃ ᐊᕐᕌᒍᑕᒫᑦ ᑮᓇᐅᔭᕐᑐᕈᑎᐅᒐᔭᕐᑐᓂᒃ ᐃᓪᓗᐃᑦ ᐊᐅᓚᑕᐅᓂᖏᓐᓄᑦ ᓴᓇᒣᓐᓇᑎᑦᑕᐅᓯᐊᕆᐊᖃᕐᓂᖏᓐᓄᓗ.

“ᐃᓪᓗᒪᕆᖃᑦᓯᐊᖏᓐᓂᖅ ᐃᓄᐃᑦ ᓄᓇᖓᓂ ᐱᑦᔪᑎᐅᓪᓚᕆᑦᑐᖅ ᐃᓅᓯᒃᑯᑦ ᑮᓇᐅᔭᑎᒍᓪᓗ ᐊᑦᓱᕈᑎᖃᕐᓂᕆᕙᑦᑕᖏᓐᓄᑦ ᐃᓄᐃᑦ,” ᖃᐅᔨᓴᕈᑎᒃ ᐅᖃᕐᓯᒪᔪᖅ.  “ᐃᓄᐃᑦ ᓄᓇᖓᓂ 51 ᓄᓇᓖᑦ ᐃᓪᓗᒪᕆᖃᑦᓯᐊᔭᖕᒋᑦᑐᑦ ᓇᐅᒃᑯᓕᒫᖅ, ᐃᓚᒋᔭᐅᑎᓪᓗᒋᑦ ᑐᓴᕈᑎᓕᕆᓂᕐᒧᐊᖓᔪᑦ ᐃᓪᓗᐃᑦ, ᐅᓯᑲᑦᑕᐅᑎᓅᓕᖓᔪᑦ, ᐊᓯᖏᓪᓗ ᐃᓅᓯᕐᒧᐊᖓᔪᑦ ᐅᑦᑑᑎᒋᓗᒋᑦ ᐃᓕᓐᓂᐊᕖᑦ, ᐋᓐᓂᐊᕖᑦ ᐊᑦᑕᓇᕐᑐᒦᑦᑐᐃᓪᓗ ᓇᔪᒐᑦᓴᕕᖏᑦ.  ᐊᖑᒪᒋᐊᓚᖓᒍᑎᒃ ᐃᓄᐃᑦ ᓄᓇᖓᓐᓂᒃ ᑲᓇᑕᓕᒫᒥ ᓄᓇᖁᑎᒋᔭᖏᑎᑐᑦ, ᓄᓇᖃᕐᖄᓯᒪᔪᑦ ᓄᓇᓕᖏᓐᓂ ᐃᓪᓗᒪᕆᓕᐅᕈᑎᑦᓭᑦ ᑮᓇᐅᔦᑦ ᐊᕗᖕᖓᒋᐊᓕᑎᑕᐅᒋᐊᓖᑦ, ᓯᑕᒪᓄᑦ ᐊᕐᕌᒍᓅᓕᖓᑐᐃᓐᓇᖏᓪᓗᑎᒃ.”

ᒫᓐᓇᐅᓂᖓᓂ, ᓄᓇᓖᑦ ᑖᒃᑯᓂᖓ ᑮᓇᐅᔭᓂᒃ ᐊᑐᑦᓯᐊᖃᑦᑕᓕᕐᑐᑦ, ᑕᐃᔭᐅᑦᓱᓂᓗ “ᑲᕙᒪᑐᖃᒃᑯᑎᒍᑦ ᑮᓇᐅᔭᖃᕐᑎᑦᓯᒍᑎᖏᓐᓂᑦ ᐊᑑᑎᖃᑦᓯᐊᓂᕐᐹᖅ” ᒪᑭᕝᕕᑯᓐᓄᑦ ᐊᑐᕐᑕᐅᓯᒪᔪᓂ, ᑐᐃᒃ ᐅᖃᓚᐅᕐᒥᔪᖅ. “ᒪᓕᑕᐅᔭᕆᐊᖃᕈᑎᑐᐊᖃᕋᒥ ᐊᖑᒻᒪᑎᑎᑦᓯᒐᓱᐊᕐᓂᒥᒃ ᐃᓪᓗᒪᕆᑦᑎᒍᑦ, ᑐᑭᖃᕐᑎᑕᐅᒍᓐᓇᓱᓂᓗ ᐱᐅᔪᒃᑯᑦ,” ᐅᖃᓚᐅᕐᑐᖅ ᑐᐃᒃ. 2024 ᐅᐱᕐᖔᖓᓂ, 90%-ᑲᓭᑦ ᒪᑭᕝᕕᐅᑉ ᑖᒃᑯᓇᖕᖓ ᑮᓇᐅᔭᖁᑎᑖᕕᓂᖏᑦ ᐃᓱᒪᓕᐅᕐᑕᐅᓯᒪᓕᓚᐅᕐᑐᑦ ᓇᓂ ᐊᑐᕐᑕᐅᓛᕐᒪᖔᕐᒦ, ᓄᓇᓕᓕᒫᑦ ᐱᔭᕇᕐᓯᒪᓕᕐᓱᑎᓗ ᐸᕐᓇᕈᑎᓕᐅᕐᓂᕐᒥᒃ ᓱᓇᒧᑦ ᐊᑐᓛᕐᒪᖔᑦ ᐃᓘᓐᓇᖏᑦ ᑮᓇᐅᔭᑖᖏᑦ ᐅᕝᕙᓗᓐᓃᑦ 60% ᐅᖓᑖᓅᕐᑐᖏᑦ. ᒪᕐᕉᒋᐊᓪᓛᒃ  ᑕᓯᐅᔭᐅᑉ ᐱᖕᖑᐊᕕᖏᑦᑕ ᐊᑦᔨᖏ ᑮᓇᐅᔭᕐᑕᓯᔭᐅᒪᔫᒃ, ᐊᓯᖏᓪᓗ ᑮᓇᔭᐃᑦ ᑐᕌᓛᕐᓱᑎᒃ ᐃᓅᓱᑦᑐᐃᑦ ᐃᓪᓗᖁᑎᖏᓐᓄᑦ, ᕿᔪᓕᕆᕕᓄᑦ ᓯᑭᑑᓕᐅᕐᕕᓄᓗ, ᓯᐊᕐᕇᔭᕐᕖᑦ ᓄᑕᐅᓯᓕᑎᕐᑕᐅᓂᖏᓐᓄᑦ, ᓄᓇᓕᐅᓪᓗ ᓱᖃᑦᓯᕕᖏᑦᑕ ᐊᖏᓕᒋᐊᕐᑕᐅᓂᖏᓐᓄᑦ, ᓯᓚᒥᓗ ᐱᐊᕃᑦ ᐱᖕᖑᐊᕕᖏᓐᓄᑦ.

“ᐅᖄᒍᑕᐅᓂᖃᒻᒪᕆᓚᐅᕐᑐᑦ ᐃᒫᒃ ‘ᖃᓄᐃᓕᐅᓚᖓᕕᑖ ᐃᓄᐃᑦ ᐱᕚᓪᓕᓯᐊᖁᓪᓗᒋᑦ?’ ᐊᕐᖁᑏᑦ, ᐱᒻᒪᕆᐅᒐᓗᐊᕐᒥᑎᓪᓗᒋᑦ,” ᐅᖃᓚᐅᕐᑐᖅ ᑐᐃᒃ. “ᑭᓯᐊᓂ ᓇᓂ ᐱᐊᕃᑦ ᐱᖕᖑᐊᓲᖑᕙᑦ?  ᐅᕝᕙᓗᓐᓃᑦ ᓇᓂ ᓄᓇᓕᒻᒥᐅᑦ ᑲᑎᓲᖑᕙᑦ? ᑕᒪᒃᑯᐊᑕᒐ ᓯᕗᓪᓕᐸᐅᑦᔨᒋᐊᖃᓪᓚᕆᒻᒥᔭᕗᑦ.”