ᓵᓕ ᑯᐊᑕ ᒪᓐᑐᕆᐊᓪᒥ. © ᓖᓴ ᒥᓘᓴᓪᔨᕕᒃ
ᓄᓇᕐᔪᐊᓕᐅᑦᓯᐊᓂᕐᒧᑦ ᓄᓇᖃᕐᖄᕐᓯᒪᔪᑦᑎᑐᑦ
ᓵᓕ ᑯᐊᑕ ᒪᓐᑐᕆᐊᓪᒦᑦᓱᓂ ᐊᒥᓱᓂᒃ ᐱᒍᓐᓇᓱᓂ ᑕᑯᒥᓇᕐᑐᓕᐅᕐᑎ ᑕᑯᓐᓇᐅᔮᕐᑎᓯᔨᐅᑦᓱᓂᓗ ᐱᓇᓱᓲᖅ ᑕᑯᓐᓇᐅᔮᕐᑎᓯᔨᐅᑦᓱᓂ, ᐊᑦᔨᓕᐅᕆᔨᐅᑦᓱᓂ, ᐊᒻᒪᓗ
ᖁᓪᓕᓴᔭᕐᒥᒃ ᓴᓇᖕᖑᐊᑎᐅᑦᓱᓂ. ᐱᔭᑦᓴᖃᓲᖑᒻᒥᔪᖅ ᓴᓇᑐᔫᓂᒃᑯᑦ ᐱᓇᓱᐊᕐᓂᓂᒃ ᐃᓕᓐᓂᐊᑎᑦᓯᓲᓂᒃ ᒪᓐᑐᕆᐊᓪᒥᐅᓂᒃ ᐃᓄᑐᐃᓐᓀᑦ ᐱᐅᓯᕕᓂᖏᓐᓂᒃ
ᑕᑯᒥᓇᕐᑐᓕᐅᕐᓂᑯᑦ ᑕᑯᓐᓇᐅᔮᕐᑕᐅᓂᒃᑯᓗ. ᓵᓕᐅᑉ ᖃᐅᔨᒋᐅᕐᓂᖓ ᑕᑯᓐᓇᐅᔮᕐᑎᓯᔨᐅᓂᕐᒥᒃ ᐊᑑᑎᓚᐅᕐᓯᒪᔪᖅ ᐊᕐᕌᒍᐃᑦ 10 ᓈᓕᕐᑐᑦ. ᐳᕐᑐᓂᕐᓴᒥᒃ ᐃᓕᓐᓂᐊᕇᕋᒥ ᑰᑦᔪᐊᖅ, ᓄᓇᕕᒻᒥ, ᐃᓕᓐᓂᐊᕆᐊᓯᓚᐅᕐᓯᒪᔪᖅ ᐃᓱᒪᓕᕆᓂᕐᒥᒃ ᐊᒻᒪᓗ ᓱᓕᔪᖕᖑᐊᑎᐅᓂᕐᒥᒃ ᒪᓐᑐᕆᐊᓪᒥ ᐊᒻᒪᓗ ᑕᑯᒥᓇᕐᑐᓕᐅᕐᑎᕈᕐᓱᓂ ᑕᑯᓐᓇᐅᔮᕐᑎᓯᔨᐅᑦᓱᓂᓗ ᐅᓪᓗᓕᒫᕐᓯᐅᑎᒋᑦᓱᒍ ᐱᓇᓱᒐᕆᓕᕐᓱᒍ ᐱᓇᓱᖃᑎᖃᓪᓚᕆᓲᖑᑦᓱᓂ ᐃᓄᑐᐃᓐᓇᓂᒃ ᒪᓐᑐᕆᐊᓪᒥ. ᒪᓐᑐᕆᐊᓪ ᕿᑭᕐᑕᖓᓂᒥᐅᖅ ᐃᓚᖃᕐᓱᓂ ᐁᑉᐸᒥᓂᒃ ᐊᒻᒪᓗ ᐃᕐᓂᒥᓂᒃ ᐱᐊᕌᕈᕐᒥᒃ.
ᓱᓇᒨᑦ ᐱᒍᒪᓕᕐᑎᑕᐅᓐᓂᕿᑦ ᐊᑦᔨᒌᖕᖏᑐᓂᒃ ᑕᑯᒥᓇᕐᑐᓕᐅᕐᓂᓂᒃ ᑕᑯᓐᓇᐅᔭᕐᑎᓯᔨᐅᓂᕐᓂᓗ ᐱᓇᓱᕝᕕᒋᓲᑎᓐᓂᒃ?
ᐊᑦᔨᓕᐅᕆᔨᐅᕗᖓ, ᑕᑯᓐᓇᐅᔮᕐᑎᓯᔨᐅᑦᓱᖓ, ᐊᒻᒪᓗ ᖁᓪᓕᓴᔭᕐᒥᒃ ᓴᓇᖕᖑᐊᑎᐅᑦᓱᖓ. ᐊᓕᐊᒋᓂᕐᐹᕋ ᑕᑯᓐᓇᐅᔮᕐᑎᓯᔨᐅᓂᕐᒥ ᐃᖃᖕᖏᑑᒍᑎᒋᒐᒃᑯ ᑎᒥᒃᑯᑦ ᐊᒻᒪᓗ ᐃᓚᐅᑎᑦᓯᓱᓂ ᑎᒥᒐᓂᒃ. ᐱᕕᑦᓴᖃᕐᑎᓯᓲᖑᒻᒥᔪᖅ ᑕᑯᓐᓇᐅᔮᕐᑕᐅᓂᕐᒥᒃ ᑕᑯᓐᓇᐅᔮᕐᑕᐅᕕᒻᒥ ᐊᒻᒪᓗ ᓄᐃᑦᓯᓗᖓ ᓇᒻᒥᓂᖅ ᓴᓂᕐᕙᓯᒪᓲᒥᒃ. ᐊᑦᔨᓕᐅᕆᓂᕐᒧᑦ, ᓴᓂᕐᕚᔦᔨᐅᓗᐊᖕᖑᐊᑐᕆᓲᖑᔪᖓ ᐊᒻᒪᓗ ᐊᓕᐊᒋᔭᖃᕐᓱᖓ 35mm-ᒥᒃ ᐊᑦᔨᖑᐊᑦᓴᔭᕐᒥᒃ. ᒫᓐᓇ ᐃᕐᓂᖃᓕᕋᒪ, ᐊᑦᔨᓕᐅᕆᕙᓪᓗᖃᑦᑕᓕᕐᑐᖓ ᐃᓚᒃᑲᓂᒃ. ᖁᓪᓕᓴᔭᕐᒥᒃ ᓴᓇᖕᖑᐊᓂᕐᒧᑦ, ᐊᓕᐊᒋᓪᓚᕆᑦᑕᕋ ᓄᓪᓚᖓᓂᕐᒨᓚᕆᓲᖑᒐᒪ ᐃᑦᓯᕙᑐᐃᓐᓇᕈᓐᓇᓱᖓ ᐊᒻᒪᓗ ᖁᓪᓕᓴᔭᕐᒥᒃ ᓴᓇᖕᖑᐊᓯᒪᖕᖏᑐᒥᒃ ᐱᑕᖃᕐᓗᖓ ᐊᒻᒪᓗ ᓇᒻᒥᓂᖅ ᐊᐱᕆᓗᖓ, ᓱᓇᓕᐅᕈᓐᓇᖁᖔ ᑕᒃᑲᖓᑦ?
ᖃᖔ ᖃᐅᔨᓐᓂᕿᑦ ᐅᓪᓗᓕᒫᕐᑎᐅᓗᑎᑦ ᑕᑯᒥᓇᕐᑐᓕᐅᕐᑎᐅᒍᒪᓂᕐᒥᒃ ᑕᑯᓐᓇᐅᔮᕐᑎᓯᔨᐅᓗᑎᓪᓗ?
ᑲᔪᖏᕐᓴᑕᐅᓚᐅᔪᕗᖓ ᐅᒃᑯᐃᓯᑐᐃᓐᓇᕆᐊᖃᕐᓂᕋᓄᑦ ᓇᒻᒥᓂᕋᓂᒃ ᑕᑯᓐᓇᐅᔮᕐᑎᓯᔨᐅᓂᕐᒥᒃ ᑌᔭᐅᔪᒥᒃ ᑐᐱᖅ ᐱᓇᓱᐊᖃᑎᒋᓗᒋᑦ ᐱᖃᑎᒃᑲ ᐱᓇᓱᖃᑎᒃᑲᓗ ᐱᓇᓱᖃᑎᒋᓲᕆᓕᕐᑕᑲ ᐊᑯᓂ ᓄᓇᕕᒻᒥᐅᑦ. ᐅᒃᑯᐃᓚᐅᔪᕗᒍᑦ [ᓴᕋᑕᖅ] ᖄᖏᕐᓂᑯᓕᐅᕐᑎᐅᖏᑦᑑᓱᑕ ᑎᒥᐅᔫᑦᓱᑕ, ᐱᓇᓱᒐᖃᕈᒪᑦᓱᑕ ᐊᒻᒪᓗ ᐃᓗᐃᑦᑐᒥᒃ ᓴᓇᑐᔫᓂᑦᑎᓂᒃ ᐃᓱᒣᓐᓇᕿᒍᑎᖃᕈᒪᑦᓱᑕ ᐱᑦᔪᑎᒋᓗᒋᑦ ᖃᓄᐃᑦᑐᓂᒃ ᑕᑯᓐᓇᐅᔮᕋᑦᓴᓕᐅᖃᑦᑕᓂᕆᓚᖓᔭᕗᑦ.
ᓵᓕ ᑯᐊᑕ ᑕᑯᓐᓇᐅᔮᕐᑎᓯᔪᖅ ᖃᖓᑕᑦᓱᓂ ᑕᑯᓐᓇᐅᔮᕐᑎᓯᓂᕐᒥᒃ MONTRÉAL COMPLÈTEMENT CiRQUE-ᒥ 2022-ᒥ. © Sage Rebelle Photo
ᖃᓅᖅ ᖄᖏᕐᓂᑯᓕᐅᕐᑎᐅᖏᑦᑑᓱᑎᑦ ᐱᓇᓱᓐᓃᑦ ᓈᒻᒪᓈᕐᖃ ᐃᓅᓯᕐᓄᑦ ᑕᑯᒥᓇᕐᑐᓕᐅᕐᑎᐅᓱᑎᑦ ᑕᑯᓐᓇᐅᔮᕐᑎᓯᔨᐅᑦᓱᑎᓪᓗ?
ᑐᐱᕐᒥ, ᑐᑭᑖᓚᐅᔪᒍᑦ ᖄᖏᕐᓂᑯᓕᐅᕐᑎᐅᖏᑦᑑᓚᖓᒋᐊᒥᒃ ᐃᓕᑕᕐᓯᓚᐅᔪᒐᑦᑕ ᑮᓇᐅᔭᓂᒃ ᑐᓂᔨᓲᓂᒃ ᐊᒥᓱᓂᒃ ᐱᕕᑦᓴᑕᖃᕆᐊᖓ ᓄᓇᖃᕐᖄᓯᒪᔪᑦ ᖄᖏᕐᓂᑯᓕᐅᕐᑎᐅᒐᑎᒃ ᑎᒥᐅᔪᖁᑎᖏᓐᓄᑦ. ᑌᒫᑕᒃᑲ ᑕᑯᓐᓇᐅᔮᕋᑦᓴᓕᐅᓲᖑᕗᒍᑦ. ᒫᓐᓇ ᐱᓇᓱᑦᑐᖓ ᐊᕙᑕᖅ ᐱᐅᓯᑐᖃᓕᕆᕕᒻᒥ ᐱᓇᓱᕝᕕᖃᕐᓱᖓ ᐱᒍᑦᔨᕕᒻᒥ ᐊᐅᒫᒡᒌᕕᒻᒥ, ᓄᓇᕕᒻᒥ ᑕᑯᒥᓇᕐᑐᓕᐅᕐᓂᒧᑦ ᐊᓪᓚᕕᒻᒥ. ᐱᔭᑦᓴᕋ ᑲᒪᒋᔭᖃᕐᓂᖅ ᑐᓂᕐᕈᑎᓕᕆᓂᕐᒥᒃ ᑮᓇᐅᔭᓂᒃ ᐃᖏᕐᕋᑎᓲᑦᑎᓂᒃ ᓄᓇᕕᒻᒥᐅᓄᑦ ᐃᓄᑐᐃᓐᓇᓄᑦ ᑕᑯᒥᓇᕐᑐᓕᐅᕐᑎᓄᑦ ᑐᑦᓯᕋᕆᐊᖕᖓᑐᓄᑦ ᑐᓂᕐᕈᑎᓂᒃ ᐊᒻᒪᓗ ᐃᑲᔪᓲᕆᑦᓱᒋᑦ ᐱᓇᓱᐊᕐᓂᖏᓐᓂ.
ᓱᓇᐅᕚᑦ ᐱᐅᓰᑦ ᐅᕝᕙᓘᓐᓃᑦ ᓱᓇᒐᓓᑦ ᐃᓕᑦᓯᓯᒪᔭᑎᑦ ᐃᓕᓐᓂᒃ ᐃᑲᔪᕐᓯᓯᒪᔪᑦ ᑕᑯᒥᓇᕐᑐᓕᐅᕐᑎᐅᑎᓪᓗᑎᑦ ᑕᑯᓐᓇᐅᔮᕐᑎᓯᔨᐅᑦᓱᑎᓪᓗ?
ᐊᓕᐊᓱᓲᑐᖃᐅᕗᖓ ᐅᒃᑯᐃᖔᑦᓯᐊᑐᒥᒃ ᐃᓱᒪᖃᕆᐊᒥᒃ ᐊᒻᒪᓗ ᐃᑎᔪᓂᒃ ᓂᕆᐅᒋᔭᖃᖅᑕᐃᓕᕆᐊᒥᒃ ᖃᓪᓗᓈᑦ ᐱᐅᓯᖏᓐᓂᑦ. ᐃᓄᐃᑦ ᓇᒻᒥᓂᖅ ᐃᓱᒪᒋᔭᒥᓂᒃ ᐃᓱᒪᖃᕐᑎᓗᒋᑦ, ᑕᑯᓐᓇᖑᐊᕐᑕᖏᓐᓂᑦ ᐱᔪᑦ ᓱᓇᐅᒐᓗᐊᕐᐸᑕ, ᐊᒻᒪᓗ ᑲᔪᓯᑦᓯᐊᓗᑎᒃ
ᓱᓇᒦᒃ ᐊᓕᐊᒋᔭᖃᕐᕿᑦ ᐱᓇᓱᑦᓱᑎᑦ ᒪᓐᑐᕆᐊᓪᒥ ᐊᒻᒪᓗ ᖃᓅᖅ ᐃᓄᐃᑦ ᐱᐅᓯᖃᓲᖑᕙᑦ ᐱᓇᓱᐊᕐᑕᑎᑦ ᐱᓪᓗᒋᑦ?
ᐊᔪᒉᑦᑐᒐᓚᕋᑕᖅ ᒪᓐᑐᕆᐊᓪᒦᒋᐊᒥᒃ ᐱᑦᔪᑎᒋᑦᓱᒍ ᑭᓇᑐᐃᓐᓇᑯᑦ ᖃᐅᔨᒪᑐᐊᕐᒪᑕ ᓄᓇᖃᕐᖄᓯᒪᔫᑦᓱᑎᑦ ᑕᑯᒥᓇᕐᑐᓕᐅᕐᑎᐅᒋᐊᕐᐱᑦ, ᐃᓕᓐᓂᑦ ᓂᕆᐅᕝᕕᖃᓯᓲᖑᒻᒪᑕ. ᐊᑦᔨᒋᖕᖏᑕᖓᓂᒃ ᐱᓇᓱᒍᓯᓖᑦ ᐊᒻᒪᓗ ᑕᒪᓐᓇ ᑐᑭᓯᓇᑦᓯᐊᓲᖑᖕᖏᑐᖅ ᓄᓇᖃᕐᖄᓯᒪᔪᑦ ᑕᑯᓐᓈᓂᖓᒍᑦ. ᑌᒫᒃ ᐱᓇᓱᐊᖕᖏᓂᕐᓴᐅᓲᖑᔪᒍᑦ. ᑭᓯᐊᓂ ᐃᓘᓐᓈᒍᑦ, ᑭᓇᑐᐃᓐᓇᑯᑦ ᐱᐅᓯᖃᕐᓂᖓ ᐱᓇᓱᐊᕐᑕᑲᓄᑦ ᑕᒫᓂ, ᐊᖏᓂᕐᓴᒥᒃ ᐱᐅᔫᓂᓕᒃ.
ᐅᖃᐅᑎᓚᐅᕐᑎᒍᑦ ᐱᔭᕆᒍᒪᔭᑎᓐᓂᒃ ᐱᓇᓱᒐᕐᓂ ᐊᒻᒪᓗ ᐅᖃᕐᓗᑎᑦ ᐱᓇᓱᐊᕈᒪᓲᑐᖃᕐᓂᒃ ᓲᕐᓗ ᓯᓐᓇᑑᒪᐅᔮᕐᑎᓗᒍ!
ᐃᕐᓂᕋ ᐱᐊᕋᑦᓴᕆᔭᐅᓕᕐᑎᓗᒍ, ᐃᓱᒪᓪᓚᕆᖃᑦᑕᓯᓚᐅᔪᕗᖓ, ᖃᓄᐃᑦᑐᒦ ᓄᓇᕐᔪᐊᒥ ᐱᕈᕐᓴᑕᐅᓛᕐᖃ ᒪᓐᑐᕆᐊᓪᒥᐅᖑᒍᒪᑐᐊᕈᑦᑕ ᐃᓅᓯᓕᒫᑦᑎᓂ. ᐃᕐᙯᒍᑎᒋᓚᐅᔭᕋ ᐊᑦᓱᕈᕐᓇᖃᑦᑕᓯᒪᔪᓂᒃ ᐱᕈᕐᓴᑎᓪᓗᖓ ᐅᑭᐅᕐᑕᑐᒥ, ᐃᒻᒥᓂᒃ ᓱᕐᖃᔭᖕᖏᑐᕆᓂᕐᒥᒃ ᐊᕙᓗᔭᐅᒪᓚᐅᕐᓯᒪᒐᒪ ᑕᑯᓐᓇᕋᑦᓴᓄᑦ ᑐᓵᒐᑦᓴᓄᓪᓗ, ᐅᖃᐅᓯᕐᒧᑦ, ᐊᒻᒪᓗ ᐱᐅᓯᕐᒧᑦ
ᓇᒻᒥᓂᕆᖕᖏᑕᕋᓄᑦ. ᐊᒥᓱᕕᑦᓱᖓ ᐅᕕᒃᑲᐅᓱᖓ, ᐊᐱᕆᖏᓐᓇᓕᒫᖃᑦᑕᓯᒪᔪᖓ, ᑭᓇᐅᕗᖔ? ᐃᕐᓂᕋ ᑌᒫᑦᓭᓇᖅ ᐱᕈᕐᓴᖁᓚᐅᔪᖕᖏᑕᕋ. ᑌᒣᒻᒪᑦ, ᑕᑯᓐᓇᖑᐊᕐᓯᒪᕗᖓ ᓄᓇᕐᔪᐊᒥᒃ ᓄᓇᓕᕐᓚᓂ ᓄᐃᑕᑎᑦᓯᓂᕐᓴᓂ ᑭᓇᐅᒻᒪᖔᑦᑕ ᐃᓄᑐᐃᓐᓇᐅᓱᑕ ᐅᕝᕙᓘᓐᓃᑦ ᓄᓇᖃᕐᖄᓯᒪᔫᑦᓱᑕ. ᐱᒍᒪᓪᓚᕆᑦᓯᒪᔭᕋ ᑎᒍᓯᓂᖅ ᓄᓇᓕᕐᓚᓕᒫᒥᒃ ᐃᓪᓗᒐᓴᕐᔪᐊᓕᒻᒥᒃ, ᐅᖁᒣᑦᓴᑎᑦᓯᓂᒃᑰᖏᑦᑐᖅ, ᑭᓯᐊᓂ ᐃᕐᙯᑎᓗᒋᑦ ᓄᓇᓕᕐᓚᒥᐅᑦ ᖃᓄᐃᓕᖓᓐᓂᒪᖔᑦ ᑕᓐᓇ ᕿᑭᕐᑕᖅ ᕿᕐᓱᑎᑎᒐᖃᓚᐅᕐᑎᓇᒍ. ᓄᐃᑕᑎᑕᐅᒐᔭᕐᑐᖅ ᐅᖃᐅᓯᕐᓄᑦ ᐆᑦᑑᑎᒋᓗᒋᑦ ᐊᕐᖁᑎᐅᑉ ᓴᓂᕌᓃᑦᑐᑦ ᓄᐃᑕᑎᑦᓯᕖᑦ ᐊᓪᓚᓯᒪᓗᑎᒃ ᓄᓇᖃᕐᖄᓯᒪᔪᑦ ᐅᓂᒃᑲᐅᓯᖏᓐᓂᒃ. ᐅᕝᕙᓘᓐᓃᑦ ᑐᓪᓕᓂᖅ ᓄᓇᒥ ᓴᓗᒪᔪᒥ ᑐᓵᕕᒋᒍᓐᓇᑕᕐᓂ ᐅᓂᒃᑲᐅᓯᖏᓐᓂᒃ ᐃᓄᑐᙯᑦ ᐊᒻᒪᓗ ᓄᓇᖃᕐᖄᓯᒪᔪᑦ ᐅᖃᐅᓯᖓᓂᒃ. ᑌᒫᒃ ᐃᕐᙯᑎᑕᐅᒍᓐᓇᕋᕕᑦ ᐅᓪᓗᑕᒫᑦ ᓄᓇᖃᕐᖄᓯᒪᔪᑦ ᓄᓇᖓᓃᒋᐊᕐᐱᑦ. ᑌᒣᒻᒪᑦ, ᐃᓱᒪᒋᔭᕋ ᐃᓘᓐᓈᒍᑦ ᐱᒍᒪᓪᓚᕆᑦᓯᒪᔭᕋ ᓄᑕᐅᓯᓖᒋᐊᕐᓂᖅ ᐱᐅᓯᒋᐊᕐᓗᒍ ᐃᓅᖃᑎᒌᑦᑐᑦ ᐃᓱᒪᒍᓯᖓᓂᒃ ᑲᓇᑕ ᓱᓇᐅᒻᒪᖔᑦ. ᖃᓅᖅ ᑐᑭᖃᕐᖃ ᑲᓇᑕᒥᐅᖑᒋᐊᒥᒃ? ᖃᓅᖅ ᑐᑭᖃᕐᖃ ᓄᓇᖃᕆᐊᒥᒃ ᓇᓗᓀᕐᑕᐅᓯᒪᔪᒥᒃ ᐃᓂᒥᒃ?
ᐃᒫᙰᕈᑎᑦᓴᖃᕐᖀᑦ ᐅᕕᒃᑲᓄᑦ ᐃᓄᑐᐃᓐᓇᓄᑦ ᐱᓇᓱᒐᖃᕈᒪᔪᓄᑦ ᑕᑯᒥᓇᕐᑐᓕᐅᕐᑎᐅᓂᕐᒥ ᑕᑯᓐᓇᐅᔮᕐᑎᓯᔨᐅᓂᕐᒥᓗ ᐊᒻᒪᓗ ᐃᓗᕐᖁᓯᓕᕆᓂᕐᒥ?
ᐅᖃᐅᑎᒐᔭᕐᑕᑲ ᓇᓗᕐᖁᑎᖕᖏᑑᖁᓗᒋᑦ ᐃᒻᒥᓂᒃ ᐅᑉᐱᕆᑦᓯᐊᓗᑎᒃ ᐊᒻᒪᓗ ᓴᐱᓕᕐᑌᓕᖁᓗᒋᑦ.
ᓵᓕ ᑯᐊᑕ ᑕᑯᓐᓇᐅᔮᕐᑎᓯᔪᖅ ᐅᓂᒃᑳᕐᑐᐊᑦᒥ ᑕᑯᓐᓇᐅᔮᕐᑎᓯᓂᕐᒥ ᓱᓕᔪᖕᖑᐊᓱᑎᒃ ᑲᓇᑕᒥ ᑕᑯᓐᓇᐅᔮᕐᑎᓯᕕᒻᒥ, 2020. © Alexandre Galliez
