ᓕᐅᕐ ᐅᐊᐃᐅᑦ
ᐃᓕᓴᐱᑦᑎᑐᑦ, ᐆᒻᒪᑎᒃᑯᑦ
ᐱᙳᐊᖃᒥᐅᑦᓱᓂ, ᐊᑐᐃᓐᓇᕈᑦᑎᓱᓂᓗ ᐱᙳᐊᓂᕆᓛᖅᑕᒥᓂᑦ ᑲᓇᑕᒥᑦ ᐊᒻᒪᓗ ᑕᕆᐅᑉ ᐊᑭᐊᓂ, ᓴᓪᓗᕐᒥᐅᑕᖅ ᐃᓕᓴᐱ ᐊᐃᓴᒃ ᐅᖃᐅᓯᖃᒍᓐᓇᓯᓚᐅᖅᑐᖅ ᑐᓴᕐᓂᔮᓕᐊᕆᖅᑲᒥᒋᓚᐅᖅᑕᒥᓂᑦ ᓰᑦᑎᒻᐱᕇ 2023ᒥᑦ ᐊᑎᓕᒻᒥᑦ ᐃᓄᒃᑎᑐᑦ. ᑖᓐᓇ ᑐᓴᕐᓂᔮᒐᖅᑕᓕᒃ 1960ᓂᑦ 1990ᓄᑦ ᐃᙱᑕᐅᓯᒪᔪᓂᑦ ᐃᓄᒃᑎᑑᓕᖅᑎᑕᐅᓯᒪᔪᓂᑦ ᐃᓕᓴᐱᒻᒧᑦ.
“ᐊᑯᓂᐅᓕᖅᑐ ᐃᒪᐃᓕᐅᒍᒪᓯᒪᕗᖕᒐ, ᖃᓪᓗᓈᓄᐊᖕᒐᑦᔭᕋᓂ, ᑭᓯᐊᓂ ᐅᕙᓐᓄᑦ ᐃᓚᓐᓄᓗ,” ᐅᖃᖅᑐᖅ ᐊᐱᖅᓱᑕᐅᑦᓱᓂᒃ ᐃᓄᒃᑎᑐᑦ ᐊᒻᒪᓗ ᖃᓪᓗᓈᑦᑎᑐᑦ.
“ᖁᕕᐊᒋᒐᒃᑯ —ᑕᒪᐅᓇ ᓂᐱᑖᓯᒪᒐᒪ, ᑐᓴᕐᓂᔮᓕᐊᒋᔭᐅᓯᒪᔪᒃᑯᑦ, ᐃᙱᑕᐅᓯᒪᔪᒃᑯᑦ ᐋᐸᒃᑯᓄᑦ, ᐸᓛᓐᑎᒻᒧᓗ.” ᑐᓴᖅᐸᑦᑕᕕᓂᕐᒥᓂᒃ ᓴᓪᓗᐃᑦ ᐱᙳᐊᕕᖕᒐᓂ 1990ᖕᒋᓐᓂᒃ, ᑭᓇᑐᐃᓐᓇᑯᑦ ᐱᙳᐊᕈᑎᓂ ᐊᑐᒋᐊᖅᑐᕙᑦᑎᓪᓗᒋᑦ ᐅᓪᓗᑯᑦ, ᐃᓄᒻᒪᕆᐅᓂᖅᓴᐃᓪᓗ ᑖᓂᓯᒋᐊᖅᑐᕙᑦᑎᓪᓗᒋᑦ ᐅᓐᓄᐊᑯᑦ. “ᐅᒃᑯᐃᖕᒑᖃᑦᑕᑐᕕᓂᖅ 2ᒧᑦ ᐅᓐᓄᐊᕌᓗᒃᑯᑦ, ᖁᐊᒋᐊᖅᑐᖃᑦᑕᓚᐅᖅᓯᒪᕗᖕᒐ ᐅᓐᓅᑎᓪᓗᒍ 10ᒥᑦ 2ᒧᑦ,” ᐅᖃᖅᑐᖅ ᐃᔪᖅᓱᓂ. “ᑐᖅᓲᒥᐅᑕᐅᖃᑦᑕᓂᖅᑯᒍᑦ 16ᓂᒃ ᐅᑭᐅᖃᑦᔭᖕᒋᓐᓇᑕ. ᐃᑎᖃᑦᑕᑐᓂᒃ ᐊᓂᖃᑦᑕᑐᓂᓪᓗ ᑐᓱᑦᓱᑕ, ᐅᑕᖅᑭᓱᑕ 16ᓂᒃ ᐅᑭᐅᖅᑖᒋᐊᒥᒃ, ᑕᑯᓐᓈᓱᑕ ᑖᓂᓯᖅᑐᓂᑦ ᑐᓴᕐᓂᓪᓚᕆᑦᑐᓄᑦ.”
ᐃᓄᒃᑎᑑᓕᖅᑎᑦᓯᓯᒪᔭᖕᒋᑦ 10 ᐃᙱᒐᐃᑦ ᑐᓴᕐᓂᔮᒐᓕᐊᒥᓄᑦ ᓇᒻᒥᓂᑖᒋᑦᓯᐊᕙᓗᑦᑕᖕᒋᑦ—ᐃᓚᖕᒐᒍ ᑕᐃᒫᒃ ᐱᐅᓯᖃᒧᑦ, ᐃᓚᖕᒐᒍᓪᓗᒃ ᐊᑕᖕᒐᒍᑎᒥᓄᑦ ᑖᒃᑯᓄᖕᒐ ᐃᙱᒐᕐᓄᑦ.
ᒪᒃᓯᒻ ᐸᕆᕗᐊᕐᑎᓐ
“ᐊᒥᓱᕕᑦᓱᖕᒐ ᐊᐱᖅᓱᑕᐅᓯᒪᓕᖅᑯᖕᒐ, ᖃᓄ ᐃᓄᒃᑎᑑᓕᖅᑎᑦᓯᒍᓐᓇᓂᖅᑭᑦ? ᐋᑦᓲᒃ! ᐆᒻᒪᑎᒐᓄᑦ. ᐃᑉᐱᓇᖅᑐᐊᓘᓕᖅᐸᑕ ᐊᑦᓱᕈᓐᓇᖕᒋᓂᖅᓴᖅ ᑐᑭᑖᒃᑲᐃᒋᐊᒥᒃ ᐅᖃᐅᓯᓐᓂᒃ…
ᐊᔪᒐᐃᑦᑐᓂᒃ ᐅᖃᕈᓯᓂᑦ, ᐅᖃᐅᓯᓂᓪᓗ ᑐᑭᑖᑦᑎᓯᓇᖅᑐᖅ ᐃᑉᐱᒍᓱᓐᓂᐅᔪᑦ ᓲᔫᒻᒪᑕ.” ᐅᖃᓚᐅᕐᒥᔪᖅ ᐊᒥᓲᓂᕐᒪᑕ ᐃᓄᒃᑎᑑᓕᖅᑎᒋᐊᒥᒃ ᐊᑦᓱᕈᓐᓇᑐᕕᓃᑦ, ᐱᖕᒐᓱᓂᑦ ᐅᖃᐅᓯᓂᒃ ᑐᑭᓯᒐᓗᐊᕋᒥᒃ, ᐃᓄᒃᑎᑐᑦ, ᖃᓪᓗᓈᑦᑎᑐᑦ, ᐅᐃᕖᑎᑐᓪᓗ.
“ᑕᐃᒫᑐᐃᓐᓇᖅ ᐱᐅᔫᑎᑦᓯᓇᑦᔭᖕᒋᑦᑐᖅ, ᐅᖃᐅᓯᕐᒨᑎᑦᓯᒋᐊᖅ ᐃᙱᕕᒋᔭᐅᖅᑳᓂᖕᒋᑦᑐᓂᒃ. ᑕᐃᒪᐃᒻᒪᑦ, ᐃᙱᐅᓯᖅ ᐆᒻᒪᑎᒧᑦ ᐊᑕᖕᒐᓕᕈᓂ ᐊᑦᓱᕈᓐᓇᖕᒋᓂᖅᓵᓗᒃ ᐃᓄᒃᑎᑑᓕᖅᑎᑦᓯᒋᐊᖅ.”
ᐃᓕᓴᐱ ᐱᓯᑎᒧᑦ ᐃᑲᔪᖅᑕᐅᓚᐅᕐᒥᔪᖅ ᐊᓯᑦᔩᕙᓪᓕᐊᓱᓂᒃ ᑖᒃᑯᓂᖕᒐ ᐃᙱᒐᕐᓂᑦ.
“ᓯᐊᔭ ᐊᓘᐸ ᖁᐊᖅᑕᕐᒥᐅᑕᖅ ᐃᓄᒃᑎᑑᓕᖅᑎᑦᓯᔨᑦᓯᐊᕚᓗᒃ, ᖁᕕᐊᒋᔭᖃᖅᓱᓂᓗ ᑐᓴᕐᓂᔮᙳᐊᓂᕐᒥᒃ. ᐱᓇᓱᐊᖃᑎᒌᑦᓯᐊᓂᖅᑯᒍᑦ, ᐃᓄᒃᑎᑑᓕᖅᑎᑐᐃᓐᓇᓗᒍ ᐃᙱᓗᒍᓘᑦᔭᖕᒋᒻᒪᑦ. ᑕᐃᒫ ᑐᑭᖃᒐᔭᑦᔭᖏᑐᖅ,” ᐅᖃᖅᑐᖅ ᐃᓕᓴᐱ.
ᒪᒃᓯᒻ ᐸᕆᕗᐊᕐᑎᓐ
ᑖᓐᓇᑑᓚᐅᑦᔭᕋᓂᓗ ᐊᑦᓱᕈᓐᓇᒐᓛᑦᑐᖅ ᑐᓴᕐᓂᔮᒐᓕᐅᕐᓂᖕᒐᓂᑦ.
ᐃᙱᐅᓯᒋᔭᐅᔪᓂᑦ ᓂᐱᓕᐅᕈᒪᒍᓂᑦ ᑐᓴᕐᓂᔮᓕᐊᒐᒥᓅᕐᓗᒋᑦ, ᓂᐱᓕᐅᖅᑳᒋᐊᓕᕕᓂᖕᒋᑦ ᓴᓇᖅᑳᓗᒋᓗ ᑕᐃᒪ ᑐᓴᖅᑕᐅᑎᓪᓗᒋᑦ ᐊᖕᒋᖅᑕᐅᓗᑎᓗᒃ ᐃᙱᑕᐅᓯᒪᔪᑦ ᑲᒪᔨᖕᒋᓐᓄᑦ. ᐊᕐᕌᒍᓕᒫᒥᑦ ᐅᑕᖅᑭᓚᐅᖅᓱᓂᒃ, ᐊᖕᒋᖅᑕᐅᖃᑦᑕᓂᖅᑯᖅ, ᓴᖅᑭᒍᓐᓇᓯᑦᓱᒍᓗ ᑐᓴᕐᓂᔮᓕᐊᒐᖕᒐ.
ᐃᓄᒃᑎᑐᑦ ᐱᒋᐊᒍᑎᓕᒃ ᐊᑎᓕᒻᒥᒃ ᐃᓱᒪᒋᔪᓐᓇᐃᑕᐅᖕᒋᑐᖅ, ᒥᑖᓕᑲᒃᑯᓄᑦ ᐃᙱᑕᐅᓯᒪᔪᖅ ᐊᑎᖃᖅᓱᓂᒃ The Unforgiven. ᐃᓕᓴᐱ ᐅᖃᖅᑐᖅ ᑕᐃᒃᑯᐊᒎᖅ ᐃᙱᖅᑏᑦ ᐱᒻᒪᕆᐅᓂᕐᒪᑕ ᐃᓄᓐᓄᑦ ᐊᓯᖕᒋᓐᓄᓗ ᓄᓇᖃᖅᑳᖅᓯᒪᔪᓄᑦ ᓯᓚᑦᔪᐊᓕᒫᒥᑦ.
“ᐃᑉᐱᒋᔭᐅᔪᓂᒃ ᐅᖃᐅᓯᖃᓲᑦ. ᖃᐃᒐᓛᒍᓐᓇᑎᓐᓇᑕ, ᓂᙵᐅᒪᒍᓐᓇᑎᓐᓇᑕ, ᐃᑉᐱᓂᐊᖅᑕᑎᓐᓂᑦ ᐅᖃᐅᓯᖃᒍᓐᓇᑎᓐᓇᑕ, ᓂᐱᒋᔭᐅᓯᒪᔪᑦ.”
ᑲᑕᑦᔭᓂᖅ ᐊᒻᒪᓗ ᓇᑕᐅᒑᕈᑎ ᑐᓴᖅᓴᐅᕗᓪᓕ ᓂᐱᓕᐊᒥᑦ ᑳᓕᕗᐊᓐᔭᒧᑦ, ᑲᑎᑎᑦᓯᓱᓂᒃ ᐃᓄᐃᑦ ᑐᓴᕐᓂᔮᒍᓯᖕᒋᓐᓂᒃ ᐊᒻᒪᓗ ᓕᑦ ᓯᐸᓕᓐᑯᓐᓂᑦ.
ᐆᒻᒪᑎ ᐊᑦᑕᓇᕐᓯᒪᑦ ᐃᙱᐅᓯᐅᕗᖅ ᐃᓕᓴᐱᐅᑉ ᐊᓯᑦᔨᓚᐅᖅᑕᖕᒐ ᐱᓗᐊᙱᓂᖅᓴᒧᑦ ᑭᓯᐊᓂ ᑖᓂᓯᒍᑕᐅᒍᓐᓇᖕᒋᓐᓈᑐᒻᒧᑦ. ᐃᓘᓐᓈᒍᑦ, ᐃᑉᐱᓇᖅᐳᖅ ᐃᓕᓴᐱ ᐱᒻᒪᕆᐅᑎᑦᓯᒪᑦ ᐊᒻᒪᓗ ᑎᒍᒥᐊᑦᓯᐊᒪᑦ ᐃᓄᒃᑎᑑᒍᓐᓇᓂᕐᒥᓂᑦ.
ᐃᒻᒥᓂ ᐊᖕᒋᓕᑎᑦᓯᔭᖕᒋᑦᑐᖅ ᐃᓄᒃᑎᑐᑦ ᖃᐅᔨᒪᔨᐅᖃᑕᐅᒐᓗᐊᖅᓱᓂ, ᑭᓯᐊᓂ ᐅᖃᖅᑐᖅ ᖁᕕᐊᒋᔭᖃᕐᒪᑦ ᐃᑉᐱᓂᐊᕐᑕᒥᓂᑦ ᐅᓂᒃᑲᐅᓯᓕᐅᒍᓐᓇᒪᑦ ᐅᖃᐅᓯᒋᔭᖕᒐᑎᒍᑦ.
“ᑕᐃᒪᓕᐅᒋᐊᖃᑉᐳᒍᑦ, ᐆᑦᑐᓗᑕ ᐊᒻᒪᓗ ᑲᑉᐱᐊᒋᒍᓐᓇᐃᓗᒍ, ᐊᐃᓐ? ᐊᑦᔨᐅᔭᖕᒋᑦᑐᑯᑦ ᐊᑐᓯᒍᓐᓇᒥᔭᕗᑦ, ᐅᖃᐅᓯᕗᑦ ᐱᕚᓪᓕᒋᐊᖃᒻᒪᑦ ᑲᔪᓯᖁᒍᑦᑎᒍᑦ, ᐃᓕᖅᑯᓯᕗᑦᑕᐅ ᑕᐃᒪᐃᑦᑐᑰᓯᒪᒻᒪᑦ, ᑕᐃᒪᐃᑦᑐᑰᕐᒪᑦ, ᐅᕙᒍᓪᓗ ᐃᓅᓪᓗᑕ.”
