Braden Kadlun Johnston amaamangalu Hovak Johnston hannaijaqhutik niqainnarnit unalu ITK Hivuliqtiujuq Natan Obed. © Lisa Gregoire
Qaritaujakkut Ajuitpiaqtuq
UNA BRADEN KADLUN JOHNSTON, ilitturnaqhunilu kititiqhimajuq uluit, Inuit hanaugait iglum talirnit, qiqitiivingalu tatattuni naiqainnarnit imaa tuktu maktaarmiglu inugiangnirmi nunaqaqhuni aimavianit.
Avatquumajumik 500,000 ilavlugit malikpagaat uvani qaritaujakkuurvianit Instagram unalu TikTok, una Calgary-tunngavianit iluliqaqtumik aulapkaiji unalu iliharvigjuanganit inuuhirmingnit ilihaqtuq atuinnaqhugit qaritaujakkuurvingat quviahuutigivluniuk Inuit inuujjuhianit avvautigivlugillu ingilraniagut inuuhittiarnikkut hilarjuanganit nunaliit. Pingahunit ukiunganit takupkailiqpakhuni qunniaqtakhainit, quviahuutigijaa amihuujut arlirihuutivagaat ilulik, kihimi inmi upalungaijaqhimaittuq tautugiamingnit havaamingnit amihurjuat qunnialiqpagaat.
“Una anginiqhaq tautukpagaat haffumani qunniaqtut haffumani niqainnarnit—uvanga amaamagalu nirivluta niqainnarmik atauttumi, iglaqhunuk hulilukaaqhutalu,” uqaqtuq Kadlun Johnston, angiklitiqhimajuq Yellowknife-mi kihimi Kugluktuminngaaqtuq. Tahapkuat avvautihimajut-inuuhianut ilitturnaqtuq qunniaqtittijuq humaaginngittuniuk Inuinnainut, uqaqtuq, kihimi amihuujut ilihimajumavagaat uvanngat Inuinnaunngittunut qunniaqtut “arlirihuinnaqtut” tautukhuniuk nirijuq quarmik uuhimaittumigluuniit niqainnait.
Kadlun Johnston havaqatigijaa amaamamingnit Hovak Johnston—ilihimarjuaqtuq havaamingnit utiqtittinahuaqtangit Inuinnait kakiniit—avvautigivluniuk ilihautikhat uuminngatut uqauhianut haluugiami Inuinnaqtun (Aatituu); qanuq piffaariangani maktaaq ulunut; uqautigivlugillu Inuit maligautainit haffumanitut angatkurnigut.
Amaamaujuq-irnialu malruujuk katimapkaivlutik quaqtuqtuk uvani ITK’p ukiunnguraangat niqhiuqtut unalu pitquhitigut hulipkaijut, Tapiriit 2024. © Cynthia Munster
Quviahuutigivlugit tuktu unalu maktaaq uvani atauhiq qunniarunmi, Kadlun Johnston uqaqtuq, “Piliujunga Rudolph tuktunnuaq unalu qarjurmiuttaq qinmiqpagjuaq tahapkuat unipkaarijauvagaat ihumagijauvagaat qiniqhialugit qunniarlugillu taimaa.” Tutqiqhiivluni qanuqtut nirijauvagaat uuhimaittut qiqumajulluuniit tuktu niqainnait imaatut “hamna mamaqpaiqtumik mipku hanalaaqtatit,” hamna tuugalik amia “arlingaqhuni tukiqarnanngitturlu” iqalukhungnittuq tipaa tarjulingnit mihuraanit mamaqpiaqhuni. Taimaa tipinga mamaqhuni, maktaaq mamarijauvluni inuullakhuni qavlunaat nunangani. “Niriinnaqtara angilrauhiliraangama,” uqaqtuq.
Tamainnut iluqaqtut, Kadlun Johnston akhuuqpiaqhuni nanminirijainnit inuuhianit, ilaani tukiqaqhunilu qunniarut uqumailliuqtauvagaat. Ajuqhautihimavagaat inmikkut aangajaarnaqtumik ipirailimairaluaqtangit saivanit ukiunganit, nutqallakhimavluni iliharvigjuamingnit mamiharvingnunngauvluni ikajuqtauvakhuni ilamingnit.
“Qanuq nutqaqtailihimajaat inuujjuhiup pilihaarninga mamiharnirnirma. Quviahukpiaqtunga. Taimaa amihuujut ikajuqtauhimaittut uvaptitut,” uqaqtuq. Qunniarutaanit ilumuuqtumik qunniapkailiqpagaat haffumani mamiharnirnut ajuqhautingigut taanngarmik, higaarlungmit aahiillu imingangnaqtumik angikliktiqhuni ihumamikkut hakugingniagut.
“Avvautihimajuittatka quvianaqtumik uvlungit; avvautiliqagatka nikallurnaqtumik uvlungillu. Avvautijumainnaqtatka hunanikliqaa ikajuutauniaramik inungnut qunniaqtut,” uqaqtuq. “Hivuani ajurnaraluaqhuni pilihaarama kihimi ajurnailiqtuq ihuaqhinahuaraangat ajuqhautiniq.”
Braden Kadlun Johnston qaritaujakkuuqattaqhuni avvautijaa Inuit pitquhingit hilarjuatigut. © Jamie Stevenson Photography
Hamna ilulingnit hivulliqpaami kiunahuaqpagara akunngiujuq Inuit kivgautivagaat qaritaujakkuuqtuq, takupkaivakhuni hulijjutigiliqhugit hulivikhainit. Uvanngat Kanata Katimarjuaqtunut Itquumanikkut Itqaumajjuhiiniklu hilataani Toronto-mi uvani Apitilirvik 2022-mi, Kadlun Johnston amaamaalu atauttimut avvautigivlugit inuuhirmingnit unipkaaqhutik kinguliriiktunut ajuqhaqtitaujut imaalu ilihariaqtuqtitaujunut. 2023-mi, malruk ilauqatauvakhutik uqaqtiujuk haffumunga inuuhiqattiangnikkut katimajiit Iqittiaqhimalugu Inuuhiq Katimajiit Nunavunmi Inulramiit Hivuliqhungnikkut Pinahuarutit. Uvani upinngaami malruk katimapkaivlutik imaa quaqtuqtut uvani ITK’p ukiunnguraangat niqhiuqtut unalu pitquhiutigut hulijjuhiit, Tapiriit. Inungmiujut uvvaluuniit qunniaqtittijut, malruk atauttimut kivgautiliqpakhutik quvianaqtumik taimaa ilitturnaqhuni haniraakkut.
“Amaamaaga angitqijauniaqtigut akhuuqtittivagaanga quvianaqtumik. Ikajuqpiaqhimajaanga qanuq mamihariangani,” uqaqtuq. “Tautuinnaqhugu inmingnik mamihailiqhuni inuujjutaanit talvanngat maliinnarumavlugu mamihainirnut. Qunnialiuriami atauttikkut taimaa ilannarivlugulu. Taimaa, ilagiigaangapta, alianaqpakhuni taimaa.”
Talvanngat qunniaqtittinigut ukiuqaqhuni 23-nit, Kadlun Johnston ilittupkaivluni Inuit inulrammiit naalakpagaat unipkaangit. Inulrammiit ilittuqpagaat inuuhianut, uqaqtuq, taimaa ilitturnaqhunilu kinaliqaak ukiuqaqtumik ajurnaittumik ilittulaaqtut ajurnangnigut ihuaqhijuumilaaqtut inuuhianut.
Braden Kadlun Johnston unalu Hovak Johnston uvani Tapiriit 2024. © Cynthia Munster
“Apirigungma hitamanit aippaanganianut mamihalihaaqtillunga tautulimaittuugaluujunga uvamnut takupkaigiangat inugiaktunut tautuktut mamihaqtillunga, ukpirilimaittagit. Ingilraraaqhunga taimaa talvanngat nanngarivlugu tajja.”
Taimaittuq avvautigiami niqainnarnit, talvanngat unipkaaruhiit utiqtittivakhugit, inuujjuhianit, nautkaivlutik katilviunirnut.
Makpiraaliurniq havaangit ukuninngat Inhabit Midia, ilihaqhimmaaqhunga uvani Iliharvigjuanga Calgary-mi, nutaangujurlu apquhikhaa inuujjuhianut katuhiqhilihaaqhunilu, tutqignaqhuni una Kadlun Johnston amigaittumik unipkaaqarniaqhuni kinguani.
© Jamie Stevenson Photography
