Nuqqangatittisimagutingit aakkaaqtausimalirninginnut, Inuit angirutitigut katujjiqatigiingit atuliqtittigunnaqsivut aviktuqsimaniujunut naammaktunik ammalu piusituqarijaujunut ikpigusuttiaqtunik maligaqutinik ammalu piliriangujunik turaangajunik makkuktuit qanuinngittiarninginnut, angajuqqaangujuit ikajuqtutauninginnut, ammalu piliriniqarviuqattaliqunagit ilagiingujut inuusilirijikkunnut.
“Pijjutigillugit gavamaqausiqtigut atuqtausimajut ammalu pilirijjusirijauvaktut, amisut ilagiingujut siqumiqtauqattaqsimavut ammalu aksururnaluaqtumik kinguvaariingujut atuqattaqsimaliqhlutik,” uqaqtuq Natan Obed, Angijuqqaaq Inuit Tapiriit Kanatami. “Taanna angijualuk isumaliuqtausimajuq, tunngavviqaqtitausimallunik United Nation-kut Nalunaiqsijjutinginnit Pijunnautiqarningita Nunaqaqqaaqsimajuit, nalunairutijjuanguvuq pimmariujutigut asijjiisimaliriarnirmut piliriniqarunnaqsinittinnik Inungnuangajunit ammalu sapummisimalirlutigut pijunnautiqarnirijavut nangminiq isumaliurutiliurunnarnittinnik, pijunnautigijattinnik sakkulauqsimanngitattinnik.”
Amisuuluaqtut Inuit surusingit ammalu makkuktungit mianirijauvvingnut tigujauqattaqsimavut ammalu suli tigujauqattarmata pijjutiullutik ajjigiinngiuqtut inuusilirinirmi ammalu kiinaujaliurasuarutiuvaktut naliqqariiktitausimannginninginnut Inungnit. Ilagiingujut aulajunnaqtangitta silataaniittunut avisimaliqtitauvakput, uuktuutigillugit akhluluarnirmut uvvalu aanniarviliagiaqarnirmut.
Amigaluarninginnut mianiqsijiuvaktut angirraminni, pijitsirarutiksaujut, ammalu iglualuit kamagijauviit Inuit Nunaluktaanginni, surusiit nunaligijamikta ammalu aviktuqsimanirijangitta silataanut aullaqtitaugajummata mianirijausimavvingnut.
Maligaqutiit, Inuit Tapiriit Kanatami aaqqiksuqtauvallianinginni piliriniqarvigiqataulauqtangit, pitaqaliqtittivut Kanatami pilirijjusiuvanniaqtunik atuliqtitauniaqsutik surusilirinirmi piliriniqarviujulimaanut Kanatami tunngavviqaqtitaulutik tamakkiini United Nation-kut Nalunaisijjutinginnit ammalu Katimavigjuarniqarninginnit Surusiit Pijunnautiqarninginnut. Maligaqutiujut ilitaqsimijut ajurnannginninganik aaqqiksuisimaliriamik aaqqigiarutiksauniaqtunik Kanatami piqujarjuatigut tunngavviqutiksanik atuliqtittiniarnirmi Inuit nangminiq isumaliurutiliurunnarninginnut turaangatillugit surusilirinirmi qanuinngittiaqtittijariaqarnirnut.
Taakkua iqqaqtuivigjuaqtigut isumaliurutiusimajut nalunaiqsikkannirutiuvut Inuit pijunnautiqarninginnik piruqsaijiujunnarnirmut surusittinnik avatangiqtausimalutik uqausittinnit, piqusituqattinnit, atuqsimajattinnit, ammalu nunattinnit.
