Vuriana Lijat, Aaliksaantu Kasturak, Taiviti Siqquaq armalu Kiavat Hiiguahi. © Lisa Gregoire
Uvikkanik Nipiqaqtitsiji
Apiqsuniq Kanatami Makkuktut Inuit Katimajingitta Angajuqqaanganik Susie-Ann Kudlumik
SUSIE-ANN KUDLUK angajuqqaaruqtuviniq Kanatami Makkuktut Inuit Katimajinginnut Juuni 2023-mi. 26-nik ukiulik Kangiqsumiuq, Nunavimmi, Inutuinnanik uvikkanik Inuit Nunanganilimaaq Kanatalimaamilu ippiniaqujijuq tusaajaunirmik. Uvikkausunga namminiq, uqaaqatiqariamik Susie Ann-mik kajungiqsataunaqtuulaujuq. Apiqsulaujara Susie-Ann turaagangitta mitsaanut angajuqqaangunirmini ammalu pinasuaqtangitta uvikkait katimajingitta mitsaanut. Qaujimanatsautigijuq uppirijaqallarigianga pinasuaqtaminik ammalu pinasuaqsuni asijjiivallianirmut Inutuinnanut uvikkanut.
Namminiq uqausirigunnaqit kinaummangaaqpit ammalu sunamik natsasimmagaaqpit taatsumunga inimut?
Pinasuaqatiqasuunguliqqunga uvikkanik arraagunik pingasunik qitiqqamillu. Pigiarutiqalauqsimajunga Nunavimmi Uvikkait Katinngajinginni katinngajiutsunga, asuilaa angajuqqaamut tungalirijautsunga Qarjuit Uvikkait Katinngajinginni. Kangiqsumiunguvunga, nunalik inulik 700 mitsaani. Uppirijaqallarikkunga pinasuaqtakanik Inutuinnanut uvikkanut. Uvannik niruangaaqsimajuq niruanngingaaqtarani. Quviagitsiatara uvikkait nipinginnik tusaqtautitsigasuariamik, ammalu ippigusutsunga nipiqaqtisijiugunnariamik uvikkanik uqaalugit isumaaluutingit pinailutait.
Vuriana Lijat, Aaliksaantu Kasturak, Taiviti Siqquaq armalu Kiavat Hiiguahi. © Lisa Gregoire
Sunauvaa pimmariuninga uvikkanik ilautitsiniup sivuliqtiunirmi?
Uvikkait takunnarusinganik takunnaniq pitaqariaqallarittuq. Uvikkait qaujimajut atuutigamik sunait kinnguumanarmangaata attanaqtumiinnangittunik iniliurnimi uvikkanut, taimaimmat uvikkait takunnarusinganik takunnaniqtaqallarigialik taimaittuni pijunnautiqaratta uqarnimik sivunivut qanuilingaqummangaattigu, tusaqtaugiaqaqsutalu.
Uqarunnaqiit sunait sivulliujaujutsaqutigijaummangaata Kanatami Makkuktut Inuit Katimajinginnut maanna?
Tunngavigitsugit takkumut katinnganiviniit, uqaagunnasilaujugut sunanik sivulliujigumammangaata katimajiit. Isumakkut qanuinngisiarniq pimmariuniqpaulaujuq katimjinut, ammalu iluqqusirmik uqausirmilu asiujittailiniq, ilinnianiq, Inuit aulatsininga ammalu silaup asijjivallianinga. Sivulirusiga iluunnanginnik ilautitsisiaqtuq. Iluunnanginnik isurriqujivunga pinasualangajavut pijjutigilugit taimaimmat tamanna tunngavilik pijumalaujanginnik iluunnaagut.
Nalunaiqsimajatinniik turaagaqaqqa pijarigumajatinnik?
Ilagijaulaujugama Kanatami Makkuktut Inuit Katimajinginnut arraagulimaagalammi angajuqqaarulaurnanga, ammalu tunngavigitsugu pinasuaqsimanira, inillasimatsianiqsaruqtisigumavunga katimajinik. Turaagara sapummijiuniq uvikkanik tunngaviqarlunga sivulliujaujutsaqutittinik ammalu nuitsinirmik pivitsagiallanik uvikkanut tusaqtaunirmik ammalu ippigusullutik tusaqtaunirminik pijjutigilugit isumaalugijangit pinailutait. Uqaatitsijiutuinnaqunga uvikkanik uqaalutik uvakkut. Taanna turaagarma ilangat angajuqqaangunirani, Inutuinnait uvikkait iluunnatik ippiniatigasullugit tusaajaunirmik.
Pijariirutiqallutiit uqausitsaqaqqit Inutuinnanut uvikkanut?
Katujjiluta pinasuarunnaqugut mamippalianirmut. Sivunitsautuinnajangillasi; maannauvusi, sivuliqtiuvusi ullumi. Sivuliqtiit naalagiaqaliqqut maanna uvikkanik pijunnautiqaratta uqarnimik sivunivut qanuilingaqummangaattigu. Uvikkait katituaramik, piluaqtumik katinniujuni, pigunnatut sunatuinnanik. Naluqqutinngilanga Inutuinnanik uvikkatinnik pigiaqtisijiulangagatta pijunnatummariulutalu nunarjuami. Tamanna uppirijara.
Kudluk Aatuvaami Inuit Tapiriit Kanatami Katimajinginnut katimaninginniitsuni. © Lisa Gregoire
