ᕗᕆᐊᓇ ᓕᔭᑦ, ᐋᓕᒃᓵᓐᑐ ᑲᔅᑐᕋᒃ, ᑕᐃᕕᑎ ᓯᖅᑯᐊᖅ ᐊᖅᒪᓗ ᑭᐊᕙᓐ ᕼᐄᒍᐊᕼᐃ. © Lisa Gregoire
ᐅᕕᒃᑲᓂᒃ ᓂᐱᖃᖅᑎᑦᓯᔨ
ᐊᐱᕐᓱᓂᖅ ᑲᓇᑕᒥ ᒪᒃᑯᒃᑐᑦ ᐃᓄᐃᑦ ᑲᑎᒪᔨᖕᒋᑦᑕ ᐊᖓᔪᕐᖄᖓᓂᒃ ᓲᓯ-ᐋᓐ ᑯᓪᓗᒥᒃ
ᓲᓯ-ᐋᓐ ᑯᓪᓗᒃ ᐊᖓᔪᕐᖄᕈᕐᑐᕕᓂᖅ ᑲᓇᑕᒥ ᒪᒃᑯᒃᑐᑦ ᐃᓄᐃᑦ ᑲᑎᒪᔨᖏᓐᓄᑦ ᔫᓂ 2023-ᒥ. 26-ᓂᒃ ᐅᑭᐅᓕᒃ ᑲᖏᕐᓱᒥᐅᖅ, ᓄᓇᕕᒻᒥ, ᐃᓄᑐᐃᓐᓇᓂᒃ ᐅᕕᒃᑲᓂᒃ ᐃᓄᐃᑦ ᓄᓇᖓᓂᓕᒫᖅ ᑲᓇᑕᓕᒫᒥᓗ ᐃᑉᐱᓂᐊᖁᔨᔪᖅ ᑐᓵᔭᐅᓂᕐᒥᒃ. ᐅᕕᒃᑲᐅᓱᖓ ᓇᒻᒥᓂᖅ, ᐅᖄᖃᑎᖃᕆᐊᒥᒃ ᓲᓯ-ᐋᓐᒥᒃ ᑲᔪᖏᕐᓴᑕᐅᓇᕐᑑᓚᐅᔪᖅ. ᐊᐱᕐᓱᓚᐅᔭᕋ ᓲᓯ-ᐋᓐ ᑐᕌᒐᖏᑦᑕ ᒥᑦᓵᓄᑦ ᐊᖓᔪᕐᖄᖑᓂᕐᒥᓂ ᐊᒻᒪᓗ ᐱᓇᓱᐊᕐᑕᖏᑦᑕ ᐅᕕᒃᑫᑦ ᑲᑎᖕᖓᔨᖏᑦᑕ ᒥᑦᓵᓄᑦ. ᖃᐅᔨᒪᓇᑦᓴᐅᑎᒋᔪᖅ ᐅᑉᐱᕆᔭᖃᓪᓚᕆᒋᐊᖓ ᐱᓇᓱᐊᕐᑕᒥᓂᒃ ᐊᒻᒪᓗ ᐱᓇᓱᐊᕐᓱᓂ ᐊᓯᑦᔩᕙᓪᓕᐊᓂᕐᒧᑦ ᐃᓄᑐᐃᓐᓇᓄᑦ ᐅᕕᒃᑲᓄᑦ.
ᓇᒻᒥᓃᖅ ᐅᖃᐅᓯᕆᒍᓐᓇᕿᑦ ᑭᓇᐅᒻᒪᖔᕐᐱᑦ ᐊᒻᒪᓗ ᓱᓇᒥᒃ ᓇᑦᓴᓯᒻᒪᒑᕐᐱᑦ ᑖᑦᓱᒧᖓ ᐃᓂᒧᑦ?
ᐱᓇᓱᐊᖃᑎᖃᓲᖑᓕᕐᖁᖓ ᐅᕕᒃᑲᓂᒃ ᐊᕐᕌᒍᓂᒃ ᐱᖓᓱᓂᒃ ᕿᑎᕐᖃᒥᓪᓗ. ᐱᒋᐊᕈᑎᖃᓚᐅᕐᓯᒪᔪᖓ ᓄᓇᕕᒻᒥ ᐅᕕᒃᑫᑦ ᑲᑎᖕᖓᔨᖏᓐᓂ ᑲᑎᖕᖓᔨᐅᑦᓱᖓ, ᐊᓱᐃᓛ ᐊᖓᔪᕐᖄᒧᑦ ᑐᖓᓕᕆᔭᐅᑦᓱᖓ ᖃᕐᔪᐃᑦ ᐅᕕᒃᑫᑦ ᑲᑎᖕᖓᔨᖏᓐᓂ. ᑲᖏᕐᓱᒥᐅᖑᕗᖓ, ᓄᓇᓕᒃ ᐃᓄᓕᒃ 700 ᒥᑦᓵᓂ. ᐅᑉᐱᕆᔭᖃᓪᓚᕆᒃᑯᖓ ᐱᓇᓱᐊᕐᑕᑲᓂᒃ ᐃᓄᑐᐃᓐᓇᓄᑦ ᐅᕕᒃᑲᓄᑦ. ᐅᕙᓐᓂᒃ ᓂᕈᐊᖔᕐᓯᒪᔪᖅ ᓂᕈᐊᖕᖏᖔᕐᑕᕋᓂ. ᖁᕕᐊᒋᑦᓯᐊᑕᕋ ᐅᕕᒃᑫᑦ ᓂᐱᖏᓐᓂᒃ ᑐᓴᕐᑕᐅᑎᑦᓯᒐᓱᐊᕆᐊᒥᒃ, ᐊᒻᒪᓗ ᐃᑉᐱᒍᓱᑦᓱᖓ ᓂᐱᖃᕐᑎᓯᔨᐅᒍᓐᓇᕆᐊᒥᒃ ᐅᕕᒃᑲᓂᒃ ᐅᖄᓗᒋᑦ ᐃᓱᒫᓘᑎᖏᑦ ᐱᓀᓗᑌᑦ.
ᕗᕆᐊᓇ ᓕᔭᑦ, ᐋᓕᒃᓵᓐᑐ ᑲᔅᑐᕋᒃ, ᑕᐃᕕᑎ ᓯᖅᑯᐊᖅ ᐊᖅᒪᓗ ᑭᐊᕙᓐ ᕼᐄᒍᐊᕼᐃ. © Lisa Gregoire
ᓱᓇᐅᕚ ᐱᒻᒪᕆᐅᓂᖓ ᐅᕕᒃᑲᓂᒃ ᐃᓚᐅᑎᑦᓯᓂᐅᑉ ᓯᕗᓕᕐᑎᐅᓂᕐᒥ?
ᐅᕕᒃᑫᑦ ᑕᑯᓐᓇᕈᓯᖓᓂᒃ ᑕᑯᓐᓇᓂᖅ ᐱᑕᖃᕆᐊᖃᓪᓚᕆᑦᑐᖅ. ᐅᕕᒃᑫᑦ ᖃᐅᔨᒪᔪᑦ ᐊᑑᑎᒐᒥᒃ ᓱᓀᑦ ᑭᖕᖒᒪᓇᕐᒪᖔᑕ ᐊᑦᑕᓇᕐᑐᒦᓐᓇᖏᑦᑐᓂᒃ ᐃᓂᓕᐅᕐᓂᒥ ᐅᕕᒃᑲᓄᑦ, ᑌᒣᒻᒪᑦ ᐅᕕᒃᑫᑦ ᑕᑯᓐᓇᕈᓯᖓᓂᒃ ᑕᑯᓐᓇᓂᕐᑕᖃᓪᓚᕆᒋᐊᓕᒃ ᑌᒣᑦᑐᓂ ᐱᔪᓐᓇᐅᑎᖃᕋᑦᑕ ᐅᖃᕐᓂᒥᒃ ᓯᕗᓂᕗᑦ ᖃᓄᐃᓕᖓᖁᒻᒪᖔᑦᑎᒍ, ᑐᓴᕐᑕᐅᒋᐊᖃᕐᓱᑕᓗ.
ᐅᖃᕈᓐᓇᖀᑦ ᓱᓀᑦ ᓯᕗᓪᓕᐅᔭᐅᔪᑦᓴᖁᑎᒋᔭᐅᒻᒪᖔᑕ ᑲᓇᑕᒥ ᒪᒃᑯᒃᑐᑦ ᐃᓄᐃᑦ ᑲᑎᒪᔨᖏᓐᓄᑦ ᒫᓐᓇ?
ᑐᖕᖓᕕᒋᑦᓱᒋᑦ ᑕᒃᑯᒧᑦ ᑲᑎᖕᖓᓂᕕᓃᑦ, ᐅᖄᒍᓐᓇᓯᓚᐅᔪᒍᑦ ᓱᓇᓂᒃ ᓯᕗᓪᓕᐅᔨᒍᒪᒻᒪᖔᑕ ᑲᑎᒪᔩᑦ. ᐃᓱᒪᒃᑯᑦ ᖃᓄᐃᖕᖏᓯᐊᕐᓂᖅ ᐱᒻᒪᕆᐅᓂᕐᐸᐅᓚᐅᔪᖅ ᑲᑎᒪᔨᓄᑦ, ᐊᒻᒪᓗ ᐃᓗᕐᖁᓯᕐᒥᒃ ᐅᖃᐅᓯᕐᒥᓗ ᐊᓯᐅᔨᑦᑌᓕᓂᖅ, ᐃᓕᓐᓂᐊᓂᖅ, ᐃᓄᐃᑦ ᐊᐅᓚᑦᓯᓂᖓ ᐊᒻᒪᓗ ᓯᓚᐅᑉ ᐊᓯᑦᔨᕙᓪᓕᐊᓂᖓ. ᓯᕗᓕᕈᓯᒐ ᐃᓘᓐᓇᖏᓐᓂᒃ ᐃᓚᐅᑎᑦᓯᓯᐊᕐᑐᖅ. ᐃᓘᓐᓇᖏᓐᓂᒃ ᐃᓱᕐᕆᖁᔨᕗᖓ ᐱᓇᓱᐊᓚᖓᔭᕗᑦ ᐱᑦᔪᑎᒋᓗᒋᑦ ᑌᒣᒻᒪᑦ ᑕᒪᓐᓇ ᑐᖕᖓᕕᓕᒃ ᐱᔪᒪᓚᐅᔭᖏᓐᓂᒃ ᐃᓘᓐᓈᒍᑦ.
ᓇᓗᓀᕐᓯᒪᔭᑎᓐᓃᒃ ᑐᕌᒐᖃᕐᖃ ᐱᔭᕆᒍᒪᔭᑎᓐᓂᒃ?
ᐃᓚᒋᔭᐅᓚᐅᔪᒐᒪ ᑲᓇᑕᒥ ᒪᒃᑯᒃᑐᑦ ᐃᓄᐃᑦ ᑲᑎᒪᔨᖏᓐᓄᑦ ᐊᕐᕌᒍᓕᒫᒐᓚᒻᒥ ᐊᖓᔪᕐᖄᕈᓚᐅᕐᓇᖓ, ᐊᒻᒪᓗ ᑐᖕᖓᕕᒋᑦᓱᒍ ᐱᓇᓱᐊᕐᓯᒪᓂᕋ, ᐃᓂᓪᓚᓯᒪᑦᓯᐊᓂᕐᓴᕈᕐᑎᓯᒍᒪᕗᖓ ᑲᑎᒪᔨᓂᒃ. ᑐᕌᒐᕋ ᓴᐳᒻᒥᔨᐅᓂᖅ ᐅᕕᒃᑲᓂᒃ ᑐᖕᖓᕕᖃᕐᓗᖓ ᓯᕗᓪᓕᐅᔭᐅᔪᑦᓴᖁᑎᑦᑎᓂᒃ ᐊᒻᒪᓗ ᓄᐃᑦᓯᓂᕐᒥᒃ ᐱᕕᑦᓴᒋᐊᓪᓚᓂᒃ ᐅᕕᒃᑲᓄᑦ ᑐᓴᕐᑕᐅᓂᕐᒥᒃ ᐊᒻᒪᓗ ᐃᑉᐱᒍᓱᓪᓗᑎᒃ ᑐᓴᕐᑕᐅᓂᕐᒥᓂᒃ ᐱᑦᔪᑎᒋᓗᒋᑦ ᐃᓱᒫᓗᒋᔭᖏᑦ ᐱᓀᓗᑌᑦ. ᐅᖄᑎᑦᓯᔨᐅᑐᐃᓐᓇᖁᖓ ᐅᕕᒃᑲᓂᒃ ᐅᖄᓗᑎᒃ ᐅᕙᒃᑯᑦ. ᑖᓐᓇ ᑐᕌᒐᕐᒪ ᐃᓚᖓᑦ ᐊᖓᔪᕐᖄᖑᓂᕋᓂ, ᐃᓄᑐᐃᓐᓀᑦ ᐅᕕᒃᑫᑦ ᐃᓘᓐᓇᑎᒃ ᐃᑉᐱᓂᐊᑎᒐᓱᓪᓗᒋᑦ ᑐᓵᔭᐅᓂᕐᒥᒃ.
ᐱᔭᕇᕈᑎᖃᓪᓗᑏᑦ ᐅᖃᐅᓯᑦᓴᖃᕐᕿᑦ ᐃᓄᑐᐃᓐᓇᓄᑦ ᐅᕕᒃᑲᓄᑦ?
ᑲᑐᑦᔨᓗᑕ ᐱᓇᓱᐊᕈᓐᓇᖁᒍᑦ ᒪᒥᑉᐸᓕᐊᓂᕐᒧᑦ. ᓯᕗᓂᑦᓴᐅᑐᐃᓐᓇᔭᖏᓪᓚᓯ; ᒫᓐᓇᐅᕗᓯ, ᓯᕗᓕᕐᑎᐅᕗᓯ ᐅᓪᓗᒥ. ᓯᕗᓕᕐᑏᑦ ᓈᓚᒋᐊᖃᓕᕐᖁᑦ ᒫᓐᓇ ᐅᕕᒃᑲᓂᒃ ᐱᔪᓐᓇᐅᑎᖃᕋᑦᑕ ᐅᖃᕐᓂᒥᒃ ᓯᕗᓂᕗᑦ ᖃᓄᐃᓕᖓᖁᒻᒪᖔᑦᑎᒍ. ᐅᕕᒃᑫᑦ ᑲᑎᑐᐊᕋᒥᒃ, ᐱᓗᐊᕐᑐᒥᒃ ᑲᑎᓐᓂᐅᔪᓂ, ᐱᒍᓐᓇᑐᑦ ᓱᓇᑐᐃᓐᓇᓂᒃ. ᓇᓗᕐᖁᑎᖕᖏᓚᖓ ᐃᓄᑐᐃᓐᓇᓂᒃ ᐅᕕᒃᑲᑎᓐᓂᒃ ᐱᒋᐊᕐᑎᓯᔨᐅᓚᖓᒐᑦᑕ ᐱᔪᓐᓇᑐᒻᒪᕆᐅᓗᑕᓗ ᓄᓇᕐᔪᐊᒥ. ᑕᒪᓐᓇ ᐅᑉᐱᕆᔭᕋ.
ᑯᓪᓗᒃ ᐋᑐᕚᒥ ᐃᓄᐃᑦ ᑕᐱᕇᑦ ᑲᓇᑕᒥ ᑲᑎᒪᔨᖕᒋᓐᓄᑦ ᑲᑎᒪᓂᖕᒋᓐᓃᑦᓱᓂ. © Lisa Gregoire
