ᐊᖓᔪᖅᑳᑉ ᐅᖃᐅᓯᒃᓴᖏᑦ

ᐃᓄᐃᑦ ᑕᐱᕇᑦ ᑲᓇᑕᒥ ᓯᕗᓪᓕᖅᐸᐅᓪᓗᑎᒃ ᐱᒋᐊᖅᑎᑦᑎᔨᐅᒋᐊᖅᐳᑦ ᓯᓚᑦᑐᖅᓴᖅᕕᒡᔪᐊᖃᓕᖅᑎᑦᑎᒋᐊᒥᒃ ᐃᓄᐃᑦ ᓄᓇᖓᓐᓂ. ᐊᖏᔪᐊᓗᖕᒥᒃ ᐱᓕᕆᐊᒃᓴᖃᖅᐳᑦ ᑖᔅᓱᒥᖓ ᓂᕆᐅᖕᓂᕆᔭᐅᔪᒥᒃ ᐱᑕᖃᓕᖅᑎᑦᑎᒋᐊᕐᓂᐊᕐᓗᑎᒃ, ᑭᓯᐊᓂᓗ ᑐᑭᒧᐊᒍᑎᒃᓴᖃᖅᑎᑕᐅᓯᒪᕗᒍᑦ ᐱᓕᕆᐊᒃᓴᕆᔭᑦᑎᓐᓄᑦ ᓯᕗᓂᕆᓂᐊᖅᑕᑦᑎᓐᓂ ᐃᒪᓐᓇ ᐃᓄᐃᑦ ᐃᓕᓐᓂᐊᖅᑐᑦ ᖁᑦᑎᖕᓂᖅᐹᒥᒃ ᐃᓕᓐᓂᐊᕌᓂᒍᑎᖃᖃᑦᑕᓕᕈᑎᒃᓴᖏᓂᒃ ᐅᑯᓂᖓ ᐃᓕᓐᓂᐊᕐᓂᓕᕆᓂᕐᒥ, ᐊᑐᖅᑕᐅᓯᒪᔪᓕᕆᓂᕐᓄᑦ ᐊᒻᒪᓗ ᐊᐅᓚᑦᓯᔨᐅᓂᕐᒧᑦ, ᐋᓐᓂᐊᖅᓯᐅᕐᑎᓕᕆᓂᕐᒧᑦ ᐊᒻᒪᓗ ᐄᔭᒐᖅᑖᕈᑎᓕᕆᓂᕐᒧᑦ, ᐊᒻᒪᓗ ᐃᓄᒃᑐᑦ, ᐃᓚᖃᖅᑎᓪᓗᒋᑦ ᐊᕙᑎᓕᕆᓂᕐᒥ ᖃᐅᔨᓴᐃᓂᐅᕙᒃᑐᓄᑦ ᐊᒻᒪᓗ ᓴᓇᔨᒻᒪᕆᐅᓂᕐᒧᑦ, ᑕᒪᒃᑯᐊᓗ ᑐᖖᒐᕝᕕᖃᖅᑎᑕᐅᓗᑎᒃ ᐃᓄᐃᑦ ᖃᐅᔨᒪᕙᒃᑕᖏᓐᓂᑦ ᐊᒻᒪᓗ ᐃᓕᖅᑯᓯᕆᔭᖏᓐᓂᑦ.

ᑲᓇᑕ ᓄᓇᕐᔪᐊᑐᐊᖑᒻᒪᑦ ᐅᑭᐅᖅᑕᖅᑐᒥᒃ ᐊᕕᒃᑐᖅᓯᒪᓂᖃᖅᑐᒥᒃ ᓯᓚᑦᑐᖅᓴᖅᕕᒡᔪᐊᖃᕋᓂ ᐅᑭᐅᖅᑕᖅᑐᑉ ᐊᕕᒃᑐᖅᓯᒪᓂᖓᑕ ᐃᓗᐊᓂ. ᐃᓛᓗ ᑕᒪᓐᓇ ᓲᖃᐃᒻᒪ ᓄᓇᖖᒍᐊᑎᒍᑦ ᓇᓃᓐᓂᖓᓄᑦ ᑎᑭᑦᓴᕆᐊᒥᒃ ᐊᔪᕐᓇᖅᑑᓇᔭᕋᓗᐊᖅᑎᓪᓗᒍ ᐃᓄᓐᓄᑦ ᓯᓚᑦᑐᖅᓴᖅᕕᒡᔪᐊᖕᒥ ᐃᓕᓐᓂᐊᕈᑎᒥᓐᓂᒃ ᐃᓕᓐᓂᐊᕌᓂᒍᑎᖃᖅᓯᒪᓕᕈᒪᔪᓄᑦ, ᐱᑦᔪᑎᖃᕈᑎᐅᒋᕗᖅ ᐃᓄᖕᓂᒃ ᓯᕗᓕᖅᑎᖃᕐᓗᑎᒃ ᖁᑦᑎᖕᓂᖅᐹᒥᒃ ᐃᓕᓐᓂᐊᕆᐊᕐᕕᒃᑕᖃᖖᒋᓐᓂᖓᓄᑦ ᐃᓚᖃᖅᑎᑦᑎᓯᒪᔪᓂᒃ ᐃᓄᐃᑦ ᖃᐅᔨᒪᔭᖏᓐᓂᒃ, ᐅᖃᐅᓯᖓᓐᓂᒃ, ᐊᒻᒪᓗ ᐊᑐᖅᓯᒪᔭᖏᓐᓂᒃ ᐃᓚᐅᑎᑕᐅᓂᐊᕐᓗᑎᒃ ᖁᑦᑎᖕᓂᖅᓴᓂᒃ ᐃᓕᓐᓂᐊᕈᑎᐅᕙᒃᑐᓄᑦ. ᑖᓐᓇ ᓄᑖᖑᓪᓗᓂ ᓯᓚᑦᑐᖅᓴᖅᕕᒡᔪᐊᒃᓴᖅ ᑕᒪᒃᑯᓂᖓ ᐃᓚᑰᖃᕐᕕᐅᔪᓂᒃ
ᐱᓕᕆᓂᖃᖃᑕᐅᓕᕐᓂᐊᖅᐳᖅ, ᐃᓚᖃᖅᑎᓪᓗᒋᑦ ᑕᐃᒃᑯᐊ ᐃᓄᓐᓂᒃ ᖁᑦᑎᖕᓂᖅᐹᓂᒃ
ᐃᓕᓐᓂᐊᕌᓂᒍᑎᖃᖅᓯᒪᓕᕈᒪᔪᓄᑦ ᐊᑐᕐᓂᖃᕋᔭᖅᑐᓂᒃ ᐃᓅᓯᒥᖕᓄᑦ, ᐊᑕᐅᑦᓯᒃᑰᖅᑎᑕᐅᓯᒪᔪᓂᒃ ᐃᓚᒋᔭᐅᖃᑕᐅᑎᑦᑎᕙᓐᓂᕐᓄᑦ ᖁᑦᑎᖕᓂᖅᓴᓂᒃ ᐃᓕᓐᓂᐊᕈᑎᒋᔭᐅᕙᒃᑐᑦ ᐃᓱᒪᒋᓗᒋᑦ.

ᐃᓄᐃᑦ ᓄᓇᖓᓂ ᐃᓕᓐᓂᐊᕐᕕᔾᔪᐊᖅ ᐃᑲᔪᓂᐊᖅᐳᖅ ᐲᔭᐃᖃᑕᐅᓗᓂ ᑐᓗᖅᑕᕐᕕᐅᕙᒃᑐᓂ ᐃᓄᐃᑦ ᓯᓚᑦᑐᖅᓴᖅᕕᒡᔪᐊᖕᒥ ᐃᓕᓐᓂᐊᕆᐊᒍᓐᓇᕐᓂᖏᓐᓂᒃ. ᑕᐃᒃᑯᓄᖓᓗᑦᑕᐅᖅ ᐃᓄᓐᓄᑦ ᓇᖕᒥᓂᖅ ᓄᒃᑎᖅᓯᒪᓕᖅᐸᒃᑐᓄᑦ, ᐃᓛᓐᓂᓗ ᐃᓚᒋᔭᖏᑦ ᐃᓚᐅᖃᑕᐅᕙᒃᓱᑎᒃ, ᐃᓕᓐᓂᐊᕆᐊᕐᓂᐊᖅᓱᑎᒃ ᖃᓪᓗᓈᑦ ᓄᓇᖓᓐᓂ ᓯᓚᑦᑐᖅᓴᖅᕕᒡᔪᐊᖕᓂ, ᐊᒥᓱᑦ ᐃᓄᐃᑦ ᖃᐅᔨᓯᒪᓕᖅᐸᒻᒪᑕ ᓈᒻᒪᒃᑐᑎᒍᑦ ᐸᕐᓇᒃᑕᐅᓯᒪᓕᓚᐅᖖᒋᓐᓂᕐᒥᓐᓂᒃ ᓯᓚᑦᑐᖅᓴᖅᕕᒡᔪᐊᖕᒥ ᐃᓕᓐᓂᐊᕆᐊᕐᓂᐊᕐᓂᕐᒥᓐᓄᑦ ᐊᒻᒪᓗ ᓇᓗᓇᐃᑦᑐᒥᒃ ᖁᕝᕙᓯᒃᓯᒋᐊᒃᑲᓐᓂᖅᓱᒋᑦ ᐃᓕᓐᓂᐊᕈᑎᒋᓯᒪᔭᒥᓐᓂᒃ ᐃᓕᓐᓂᐊᕈᑎᖃᒃᑲᓐᓂᕆᐊᖃᖅᐸᒃᑐᑦ ᐅᕝᕙᓘᓐᓃᑦ ᐅᑭᐅᓄᑦ ᖃᔅᓯᓄᑦ ᐃᓕᓐᓂᐊᕈᑎᒃᓴᕆᔭᖏᑦ ᐃᓚᒋᐊᒃᑲᓐᓂᖅᑎᑕᐅᔭᕆᐊᖃᓕᖅᐸᒃᓱᑎᒃ. ᑕᒪᒃᑯᓇᖖᒐᑦ ᓈᒻᒪᖖᒋᑦᑐᖃᓕᕐᕕᐅᓯᒪᕙᒃᐳᑦ ᐊᓯᒋᔭᒥᓐᓂᑦ ᐃᓕᓐᓂᐊᕆᐊᖅᓯᒪᖃᑕᐅᔪᓂᑦ. ᑕᐃᒪᓐᓇᐃᑦᑑᕙᓐᓂᖓ ᐱᒋᐊᕐᕕᖃᖅᐳᖅ ᑕᒪᒃᑭᓐᓂᑦ ᑮᓇᐅᔭᐃᑦ ᕿᑐᕐᖏᐅᖅᑎᑕᐅᔪᑦ ᒥᑭᓗᐊᖅᑑᕙᓐᓂᖏᓐᓂᑦ ᐃᓕᓐᓂᐊᕐᓂᓕᕆᓂᕐᒥ ᐱᓕᕆᓂᖃᕐᕕᐅᔪᓄᑦ ᐃᓄᐃᑦ ᐊᕕᒃᑐᖅᓯᒪᓂᖏᓐᓂ, ᐊᒻᒪᓗ ᑲᓇᑕᒥ ᐃᓕᓐᓂᐊᕐᓂᓕᕆᓂᕐᒧᑦ ᐱᓕᕆᔾᔪᓯᐅᕙᒃᑐᓂᒃ ᐱᑕᖃᖖᒋᓗᐊᖅᑑᓂᖓᓄᑦ ᑲᓇᑕᒥ.
ᐃᓄᐃᑦ ᓄᓇᖓᓐᓂ ᐃᓕᖅᑯᓯᕆᔭᐅᑐᐃᓐᓇᖅᐸᓕᕐᒪᑦ ᐊᔾᔨᒌᒃᑎᑕᐅᕙᖖᒋᓐᓂᐅᔪᑦ ᐃᓕᓐᓂᐊᕐᕈᑎᒃᓴᐃᑦ ᐱᐅᑦᓯᐊᖅᑑᔭᕆᐊᖃᕐᓂᖏᓐᓂ ᐊᒻᒪᓗ ᐊᔾᔨᒌᖖᒋᓐᓂᖃᕐᕕᐅᕙᒃᑐᓄᑦ ᐃᓕᓐᓂᐊᖅᑐᓂᑦ ᐃᓕᓐᓂᐊᕌᓂᒃᓯᒪᐅᑎᒋᔭᐅᕙᒃᑐᓄᑦ, ᐃᓛᓐᓂᓗ ᓄᓇᓕᒋᔭᐅᔪᓂᑦ ᑕᕝᕙᓂᑦᓴᐃᓐᓇᖅ ᐊᕕᒃᑐᖅᓯᒪᓂᕆᔭᐅᔪᒥᐅᑕᐅᔪᑦ.

ᐃᓄᐃᑦ ᓄᓇᖓᓂ ᐃᓕᓐᓂᐊᕐᕕᔾᔪᐊᖅ ᑕᒪᒃᑯᓂᖓ ᑐᓗᖅᑕᕐᕕᐅᔪᓂᒃ ᐱᓕᕆᓂᖃᓕᕐᓂᐊᖅᐳᑦ ᐊᑐᓕᖅᑎᑦᑎᓂᕐᒥᒃᑎᒍᑦ ᐃᑎᔪᒥᒃ ᓄᓇᓕᐅᔪᓄᑦ ᐊᑕᕝᕕᖃᕐᓂᕐᒥᒃᑎᒍᑦ ᐊᒻᒪᓗ ᐊᑦᑕᑕᖅᓯᒪᓂᕐᒥᒃᑎᒍᑦ ᐃᓄᑐᖃᕆᔭᐅᔪᓄᑦ ᐊᒻᒪᓗ ᓄᓇᓕᐅᔪᓂ ᖃᐅᔨᒪᔨᒻᒪᕆᒋᔭᐅᔪᓄᑦ, ᐃᓚᖃᖅᑎᓪᓗᒋᑦ ᐃᓄᐃᑦ ᐃᓕᓐᓂᐊᓕᓵᖅᑐᓂᑦ ᖁᑦᑎᖕᓂᖃᖅᑐᓄᑦ 12-ᓂᒃ, ᖁᕝᕙᖅᑎᑦᑎᒋᐊᖅᓯᒪᓗᑎᒃᓗ ᖃᐅᔨᓴᐃᓂᐅᕙᒃᑐᓂᒃ ᐊᒻᒪᓗ ᐃᓕᓐᓂᐊᕐᓂᓕᕆᓂᕐᓂᒃ ᓈᒻᒪᖕᓂᐊᖅᑐᓂᒃ ᐃᓕᓐᓂᐊᖅᑐᓄᑦ ᐊᒻᒪᓗ ᓄᓇᓕᐅᔪᒥ ᐱᓯᒪᓕᖅᑕᐅᔭᕆᐊᖃᖅᑐᓄᑦ. ᐃᓕᓴᐃᔨᕐᔪᐊᖑᔪᑦ ᐊᒻᒪᓗ ᐃᖅᑲᓇᐃᔭᖅᑏᑦ ᐱᓕᒻᒪᒃᓴᒃᑕᐅᓯᒪᓂᐊᖅᐳᑦ ᐊᕕᒃᑐᖅᓯᒪᓂᕐᒥ ᐅᖃᐅᓯᖏᓐᓂᒃ, ᐊᒻᒪᓗ ᐃᓕᓐᓂᐊᕈᑎᒃᓴᐃᑦ ᐋᖅᑭᖅᑕᐅᓯᒪᓂᐊᖅᓱᑎᒃ ᐊᒻᒪᓗ ᓴᖅᑭᑎᑕᐅᓯᒪᕙᒡᓗᑎᒃ ᐃᓄᓐᓄᑦ ᐊᒻᒪᓗ ᖃᐅᔨᒪᔨᒻᒪᕆᒋᔭᐅᔪᓄᑦ ᐃᓕᓐᓂᐊᕈᑎᒃᓴᐅᔪᓄᑦ ᐱᓕᕆᐊᕆᔭᒥᓐᓄᑦ. ᐸᐃᕆᕝᕖᑦ ᐊᒻᒪᓗ ᐃᒡᓗᖁᑎᒋᔭᐅᔪᒃᓴᑦ ᑕᐃᒪᐅᑎᑕᐅᕙᓐᓂᐊᖅᑐᑦ, ᐃᓚᖃᖅᑎᓪᓗᒋᑦ ᐊᑭᑐᓗᐊᕐᓇᑎᒃ ᐃᖏᕐᕋᔾᔪᑎᒃᓴᐃᑦ ᐊᒻᒪᓗ ᑕᒪᐃᑎᒎᖓᓕᑎᑕᐅᓪᓗᑎᒃ ᐱᔨᑦᓯᕋᕈᑎᒃᓴᒃᑲᓐᓃᑦ ᐃᑲᔪᕈᑎᒃᓴᐅᑎᑕᐅᔪᑦ ᐃᓕᓐᓂᐊᖅᑐᑦ ᐃᓕᓐᓂᐊᕈᑎᒥᖕᓂᒃ ᐃᖏᕐᕋᑦᓯᐊᖅᑎᑦᑎᔪᓐᓇᖁᓪᓗᒋᑦ, ᐃᓚᖃᕐᓗᑎᑦ ᖃᕆᑕᐅᔭᓕᕆᕝᕕᖕᓂᒃ ᐊᒻᒪᓗ ᐅᖃᓕᒫᕆᐅᖅᓴᕐᕕᓐᓂᒃ, ᐊᒻᒪᓗ ᐋᓐᓂᐊᖅᓯᐅᕐᑎᓕᕆᓂᕐᒧᑦ ᖃᓄᐃᖖᒋᑦᓯᐊᕐᓂᓕᕆᓂᕐᒧᓪᓗ ᐱᔨᑦᓯᕋᕈᑎᒃᓴᐅᔪᓂᒃ. ᐃᓕᓐᓂᐊᕐᕕᔾᔪᐊᖅᑕᖃᓂᐊᕐᐳᖅ ᓄᓇᒋᔭᑦᑎᓐᓂᒃ, ᐊᒻᒪᓗ ᒥᑭᓂᖅᓴᓂᒃ ᐃᓕᓐᓂᐊᖅᕕᓂᑦ ᐊᑕᖓᔪᓂ ᐃᓕᓐᓂᐊᖅᕕᔾᔪᐊᒧ ᓯᑕᒪᓂᒃ ᐊᕕᒃᑐᖅᓯᒪᓂᐅᔪᓂᑦ ᐃᓄᐃᑦ ᓄᓇᖓᓐᓂ.

ᐃᓄᐃᑦ ᓄᓇᖓᓂ ᐃᓕᓐᓂᐊᕐᕕᔾᔪᐊᖅ ᐱᐅᓯᒋᐊᖅᑎᑦᑎᔪᓐᓇᕐᓂᐊᕐᐳᖅ ᑕᒪᐃᑎᒍᑦ ᖃᓄᐃᖖᒋᑦᓯᐊᖅᑎᑕᐅᓐᓂᖏᓐᓂᑦ ᐃᓄᐃᑦ ᑲᓇᑕᒥᐅᑕᐅᔪᓂᑦ, ᐃᓛᒃᑰᖓᑎᑕᐅᔪᓐᓇᖁᓪᓗᒋᑦ ᐱᓕᕆᓂᖃᕐᓂᕐᒥᓐᓂ ᐃᓄᐃᑦ ᐱᑦᔪᑎᒋᓪᓗᒋᑦ ᑐᕌᖓᔪᓄᑦ ᖁᑦᑎᖕᓂᖅᓴᓂᒃ ᐃᓕᓐᓂᐊᕈᑎᓕᕆᓂᕐᒥ ᐊᒻᒪᓗ ᖃᐅᔨᓴᐃᓂᐅᕙᒃᑐᓄᑦ ᐃᓄᐃᑦ ᐃᓚᒋᔭᐅᕙᓐᓂᖏᑦ ᑕᐃᒪᐅᑎᑕᐅᔭᕆᐊᖃᓪᓚᕆᖕᓂᐊᖅᐳᑦ. ᐃᓕᓐᓂᐊᕐᕕᔾᔪᐊᑉ ᓴᕐᕿᑕᐅᓂᖓ ᐃᖏᕐᕋᒋᐊᕐᕕᐅᓂᐊᕐᐳᖅ ᖃᐅᔨᓴᐃᓂᓕᕆᓂᕐᒥ, ᐃᑲᔪᕐᓗᓂᓗ ᐆᒻᒪᖅᑎᑦᑎᒋᐊᒃᑲᓐᓂᕐᓂᕐᒥᑦ,
ᐱᓕᕆᐊᖃᖅᕕᐅᓂᕐᒥᑦ ᐊᒻᒪᓗ ᖁᕝᕙᖅᑎᑦᑎᒋᐊᖅᑎᑦᓯᓂᕐᒥᑦ ᐅᖃᐅᓯᑦᑎᓐᓂᒃ ᐊᒻᒪᓗ ᐃᓕᕐᖁᓯᑦᑎᓂᑦ.

ᖁᕕᐊᓱᒃᐳᖓ ᑐᓴᖅᑎᑦᑎᒋᐊᓐᓂᒃ ᑲᑎᒪᔨᒋᔭᕗᑦ ᓈᒻᒪᒃᓴᓯᒪᓕᓚᐅᕐᓂᖏᓐᓂᒃ ᐃᓕᓐᓂᐊᕐᕕᔾᔪᐊᑉ ᑐᖖᒐᕝᕕᖁᑎᒃᓴᒋᓂᐊᖅᑕᒥᓂᒃ ᑏᓯᒻᐱᕇ 2023ᒥᑦ, ᐊᒻᒪᓗ ᐸᕐᓇᐃᔨᐅᓪᓗᑎᒃ ᐱᓕᕆᐊᖃᖃᑎᒌᑦ ᐋᖅᑭᒃᓱᐃᕙᓪᓕᐊᓂᐊᓕᕐᒪᑕ ᐱᓕᕆᐊᒃᓴᐅᔪᓂᒃ ᓲᕐᓗ ᐃᓕᓐᓂᐊᕐᓂᓕᕆᓂᕐᒥ, ᖃᐅᔨᓴᐃᓂᐅᕙᒃᑐᓄᑦ, ᐊᒻᒪᓗ ᐃᓕᓐᓂᐊᖅᑐᓄᑦ ᐱᔨᑦᓯᕋᕈᑎᒃᓴᐅᓂᐊᖅᑐᓂᒃ. ᐊᐅᓚᑦᓯᔨᐅᑲᓚᐅᕐᓂᐊᕐᓗᑎᒃ ᑎᒥᒋᔭᐅᔪᖅ ᐱᓕᕆᐊᒃᓴᖃᖅᑎᑕᐅᓯᒪᓕᖅᐳᑦ ᐋᖅᑭᒃᓱᐃᓂᕐᒥᒃ ᐃᓕᓐᓂᐊᕐᕕᔾᔪᐊᑉ ᒪᓕᒐᕐᔪᐊᖁᑎᒃᓴᖏᓐᓂᒃ, ᐋᖅᑭᒃᓱᐃᓂᕐᒥᒃ ᒪᓕᒐᕋᓛᖁᑎᒃᓴᓂᒃ ᐊᒻᒪᓗ ᐊᐅᓚᑦᓯᓂᕐᒧᑦ ᒪᓕᒐᖁᑎᐅᓂᐊᖅᑐᓂᒃ, ᐊᒻᒪᓗ ᐊᓯᖏᓐᓂᒃ ᒪᓕᒐᑎᒍᑦ ᐱᓕᕆᐊᖑᓯᒪᔭᕆᐊᓕᖕᓂᒃ ᐱᒋᐊᖅᑎᑦᑎᓯᒪᓕᕐᓂᐊᕐᓂᕐᒥ ᐃᓕᓐᓂᐊᕐᕕᔾᔪᐊᒥᒃ. ᐃᓄᐃᑦ ᓄᓇᖓᓂ ᐃᓕᓐᓂᐊᕐᕕᔾᔪᐊᖃᓕᕆᐊᒧᑦ ᐱᓕᕆᐊᖃᖅᑎᒋᔭᐅᔪᑦ ᓄᓇᓕᒋᔭᐅᔪᓂᒃ ᐱᓕᕆᖃᑎᖃᓕᐊᓂᒃᐳᑦ ᐱᓕᕆᔾᔪᓯᐅᓕᕐᓂᐊᖅᑐᑦ ᑮᓇᐅᔭᑎᒍᑦ ᐊᑐᕐᓂᖃᖅᑑᑎᑕᐅᖁᓪᓗᒋᑦ ᐊᒻᒪᓗ ᑲᔪᓰᓐᓇᖅᑎᑕᐅᔪᓐᓇᕐᓂᐊᖁᓪᓗᒋᑦ, ᐃᓱᒪᒋᓪᓗᒋᑦ ᐃᓕᓐᓂᐊᕈᑎᒃᓴᐃᑦ, ᐊᐅᓚᑦᓯᓂᖃᕐᕕᐅᔪᒃᓴᑦ, ᒪᓕᒐᑎᒍᑦ ᐱᓕᕆᐊᖑᓯᒪᕆᐊᖃᖅᑐᑦ, ᐊᒻᒪᓗ ᑮᓇᐅᔭᖁᑎᒃᓴᐅᓂᐊᖅᑐᑦ.

ᐃᓄᐃᑦ ᓄᓇᖓᓂ ᐃᓕᓐᓂᐊᖅᕕᔾᔪᐊᖅ ᓴᕐᕿᑎᑕᐅᓂᖓᓂ ᐱᑦᔪᑎᒋᔭᐅᖃᐅᕗᖅ ᑖᓐᓇ ᐃᓚᖓ 14 ᔪᓇᐃᑎᑦ ᓃᓴᒃᑯᑦ ᓇᓗᓇᐃᖅᓯᓯᒪᔾᔪᑎᖏᑦ ᓄᓇᖃᖅᑳᖅᓯᒪᔪᐃᑦ ᐱᔪᓐᓇᐅᑎᖃᕐᓂᖏᑕ ᐅᖃᖅᓯᒪᓂᖏᑦ ᓇᓗᓇᐃᔾᔪᑎᐅᒻᒪᑕ ᓄᓇᖃᖅᑳᖅᓯᒪᔪᐃᑦ ᐱᔪᓐᓇᐅᑎᖃᕐᓂᖏᑕ ᐱᒋᐊᖅᑎᑦᑎᓯᒪᔪᓐᓇᕐᓂᕐᒥᒃ ᐊᒻᒪᓗ ᐊᐅᓚᑦᓯᔨᐅᔪᓐᓇᕐᓂᖏᓐᓂᒃ ᓇᖕᒥᓂᖅ ᐃᓕᓐᓂᐊᕐᓂᓕᕆᓂᕐᒥᑦ. ᐱᒋᐊᖅᑎᑦᑎᓯᒪᓕᕐᓂᖅ ᐃᓕᓐᓂᐊᕐᕕᔾᔪᐊᕐᒥᒃ ᐃᓄᐃᑦ ᓄᓇᖓᓐᓂ ᐊᒥᓲᓂᖅᓴᐅᑎᑦᑎᒐᔭᖅᑐᖅ ᐃᓄᐃᑦ ᓯᓚᑦᑐᖅᓴᖅᕕᒡᔪᐊᖕᒥ ᐃᓕᓐᓂᐊᕌᓂᒃᓯᒪᐅᑎᖃᖅᑐᓂᑦ ᐊᒻᒪᓗ ᐱᑕᖃᓕᖅᑎᑦᑎᓗᓂᒃ ᐅᓪᓗᒥᐅᔪᒥ ᐊᒻᒪᓗ ᓄᑖᑎᒍᑦ ᓄᓇᒋᔭᒥᓐᓃᑦᑐᓂᒃ ᑲᑎᓐᓂᖃᕐᕕᒋᔭᐅᕙᒍᓐᓇᕐᓂᐊᖅᑐᒥᒃ ᖃᓄᖅᑑᖃᑎᒌᒃᑐᓂᒃ ᐊᒻᒪᓗ
ᐊᑐᐊᒐᓕᐅᖅᑎᓂᑦ. ᑲᑐᔾᔨᓗᑕ ᐱᓕᕆᐊᖃᕈᓐᓇᕋᑦᑕ ᐊᒥᓱᐃᓕᖓᔪᓂᒃ ᐱᓕᕆᐊᒃᓴᐅᔪᓂᒃ ᐃᓄᒃᑎᒍᑦ ᐋᖅᑭᒋᐊᕋᓱᒃᑕᑎᓐᓂᒃ, ᐊᒻᒪᓗ ᐃᓕᐅᖅᑲᐃᓗᑕ ᐊᑕᐅᑦᓯᑯᑦ ᑐᖖᒐᕝᕕᖁᑎᐅᓂᐊᖅᑐᓂᒃ ᓯᕗᓂᑦᑎᓐᓄᑦ.