ᐃᖅᑲᖅᑐᐃᕝᕕᒡᔪᐊᒃᑯᑦ ᐃᑲᔪᖅᑐᒐᐅᓂᖓᑦ ᐃᓄᖕᓂᑦ

ᑲᓇᑕᒥ ᖁᑦᑎᖕᓂᖅᐸᐅᓪᓗᑎᒃ ᐃᖅᑲᖅᑐᐃᕕᒃᑯᑦ ᑕᒪᕐᒥᐅᓪᓗᑎᒃ ᓇᓗᓇᐃᖅᓯᒃᑲᓐᓂᖅᐳᑦ ᑕᐃᒪᖖᒐᓂᑐᖃᒥᑦ ᐃᓄᐃᑦ ᓇᖕᒥᓂᖅ ᐊᐅᓚᑦᓯᕈᓐᓇᕐᓂᖏᓐᓂᒃ.

ᕕᑉᕈᐊᕆ 9, 2024, ᑲᓇᑕᒥ ᐃᖅᑲᖅᑐᐃᕕᒡᔪᐊᒃᑯᑦ ᓱᓕᔫᓂᕋᐃᓚᐅᖅᐳᑦ ᐅᐱᒍᓱᒋᐊᖃᕐᓂᕐᒥᒃ ᒪᓕᒐᖁᑎᐅᔪᓂᒃ ᐃᖅᑭᓖᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᑦ ᓱᕈᓯᖏᓐᓄᑦ, ᒪᒃᑯᒃᑐᖏᓐᓄᑦ ᐊᒻᒪᓗ ᐃᓚᒌᖑᔪᓄᑦ. ᒪᓕᒐᖁᑏᑦ ᑖᒃᑯᐊ, ᐊᑐᓕᖅᑎᑕᐅᓚᐅᖅᑐᑦ 2020-ᒥ, ᐅᑎᖅᑏᕗᖅ ᐱᔪᓐᓇᐅᑎᒋᔭᐅᔪᓂᒃ ᐊᒻᒪᓗ ᐊᐅᓚᑦᓯᔨᐅᓂᕆᔭᐅᔪᓂᒃ ᓄᓇᖃᖅᑳᖅᓯᒪᔪᐃᑦ ᓱᕈᓯᓕᕆᓂᖏᑦᑕ ᐊᒻᒪᓗ ᖃᓄᐃᖖᒋᑦᑎᐊᕐᓂᓕᕆᓂᖏᑦᑕ ᓄᓇᖃᖅᑳᕐᓯᒪᔪᓄᑦ.

ᒪᓕᒐᖁᑎᐅᔪᑦ ᐊᑐᓕᖅᑎᑕᐅᓯᒪᓂᖏᑦ ᒪᕐᕉᖕᓄᑦ ᐅᑭᐅᓐᓄᑦ ᓄᖅᑲᖓᑎᑕᐅᓯᒪᓕᖅᑐᑦ ᑯᐃᐸᒃᒥ ᒐᕙᒪᐅᔪᑦ ᐊᓯᔾᔩᓇᓱᐊᖅᓯᒪᓂᖏᓐᓄᑦ ᒪᓕᒐᕐᓂᑦ, ᐅᖃᖅᓯᒪᓪᓗᑎᒃ ᑲᓇᑕᐅᑉ ᐱᖁᔭᕐᔪᐊᖏᓐᓂᒃ ᒪᓕᑦᑎᐊᖖᒋᑦᑑᓂᖏᓐᓂᒃ ᐱᔾᔪᑎᒋᓪᓗᒍ ᓯᖁᒥᑦᑎᓯᒪᓂᕋᐃᓪᓗᑎᒃ ᐳᕌᕕᓐᓯᐅᔪᑦ ᐊᐅᓚᑦᓯᓂᖃᕈᓐᓇᕐᓂᖏᓐᓂᒃ.

ᓄᖅᑲᖓᑎᑦᑎᓯᒪᒍᑎᖏᑦ ᐋᒃᑳᖅᑕᐅᓯᒪᓕᕐᓂᖏᓐᓄᑦ, ᐃᓄᐃᑦ ᐊᖏᕈᑎᑎᒍᑦ ᑲᑐᔾᔨᖃᑎᒌᖏᑦ ᐊᑐᓕᖅᑎᑦᑎᒍᓐᓇᖅᓯᕗᑦ ᐊᕕᒃᑐᖅᓯᒪᓂᐅᔪᓄᑦ ᓈᒻᒪᒃᑐᓂᒃ ᐊᒻᒪᓗ ᐱᐅᓯᑐᖃᕆᔭᐅᔪᓄᑦ ᐃᒃᐱᒍᓱᑦᑎᐊᖅᑐᓂᒃ ᒪᓕᒐᖁᑎᓂᒃ ᐊᒻᒪᓗ ᐱᓕᕆᐊᖑᔪᓂᒃ ᑐᕌᖓᔪᓂᒃ ᒪᒃᑯᒃᑐᐃᑦ ᖃᓄᐃᖖᒋᑦᑎᐊᕐᓂᖏᓐᓄᑦ, ᐊᖓᔪᖅᑳᖑᔪᐃᑦ ᐃᑲᔪᖅᑐᑕᐅᓂᖏᓐᓄᑦ, ᐊᒻᒪᓗ ᐱᓕᕆᓂᖃᕐᕕᐅᖃᑦᑕᓕᖁᓇᒋᑦ ᐃᓚᒌᖑᔪᑦ ᐃᓅᓯᓕᕆᔨᒃᑯᓐᓄᑦ.

“ᐱᔾᔪᑎᒋᓪᓗᒋᑦ ᒐᕙᒪᖃᐅᓯᖅᑎᒍᑦ ᐊᑐᖅᑕᐅᓯᒪᔪᑦ ᐊᒻᒪᓗ ᐱᓕᕆᔾᔪᓯᕆᔭᐅᕙᒃᑐᑦ, ᐊᒥᓱᑦ ᐃᓚᒌᖑᔪᑦ ᓯᖁᒥᖅᑕᐅᖃᑦᑕᖅᓯᒪᕗᑦ ᐊᒻᒪᓗ ᐊᒃᓱᕈᕐᓇᓗᐊᖅᑐᒥᒃ ᑭᖑᕚᕇᖑᔪᑦ ᐊᑐᖃᑦᑕᖅᓯᒪᓕᕐᖢᑎᒃ,” ᐅᖃᖅᑐᖅ ᓇᑖᓐ ᐆᐱᑦ, ᐊᖏᔪᖅᑳᖅ ᐃᓄᐃᑦ ᑕᐱᕇᑦ ᑲᓇᑕᒥ. “ᑖᓐᓇ ᐊᖏᔪᐊᓗᒃ ᐃᓱᒪᓕᐅᖅᑕᐅᓯᒪᔪᖅ, ᑐᖖᒐᕝᕕᖃᖅᑎᑕᐅᓯᒪᓪᓗᓂᒃ ᔪᓇᐃᑎᑦ ᓃᓴᒃᑯᑦ ᓇᓗᓇᐃᖅᓯᔾᔪᑎᖏᓐᓂᑦ ᐱᔪᓐᓇᐅᑎᖃᕐᓂᖏᑕ ᓄᓇᖃᖅᑳᖅᓯᒪᔪᐃᑦ, ᓇᓗᓇᐃᕈᑎᑦᔪᐊᖑᕗᖅ ᐱᒻᒪᕆᐅᔪᑎᒍᑦ ᐊᓯᔾᔩᓯᒪᓕᕆᐊᕐᓂᕐᒧᑦ ᐱᓕᕆᓂᖃᕈᓐᓇᖅᓯᓂᑦᑎᓐᓂᒃ ᐃᓄᖕᓄᐊᖓᔪᓂᑦ ᐊᒻᒪᓗ ᓴᐳᒻᒥᓯᒪᓕᕐᓗᑎᒍᑦ ᐱᔪᓐᓇᐅᑎᖃᕐᓂᕆᔭᕗᑦ ᓇᖕᒥᓂᖅ ᐃᓱᒪᓕᐅᕈᑎᓕᐅᕈᓐᓇᕐᓂᑦᑎᓐᓂᒃ, ᐱᔪᓐᓇᐅᑎᒋᔭᑦᑎᓐᓂᒃ ᓴᒃᑯᓚᐅᖅᓯᒪᖖᒋᑕᑦᑎᓐᓂᒃ.”

ᐊᒥᓲᓗᐊᖅᑐᑦ ᐃᓄᐃᑦ ᓱᕈᓯᖏᑦ ᐊᒻᒪᓗ ᒪᒃᑯᒃᑐᖏᑦ ᒥᐊᓂᕆᔭᐅᕝᕕᖕᓄᑦ ᑎᒍᔭᐅᖃᑦᑕᖅᓯᒪᕗᑦ ᐊᒻᒪᓗ ᓱᓕ ᑎᒍᔭᐅᖃᑦᑕᕐᒪᑕ ᐱᔾᔪᑎᐅᓪᓗᑎᒃ ᐊᔾᔨᒌᖖᒋᐅᖅᑐᑦ ᐃᓅᓯᓕᕆᓂᕐᒥ ᐊᒻᒪᓗ ᑮᓇᐅᔭᓕᐅᕋᓱᐊᕈᑎᐅᕙᒃᑐᑦ ᓇᓕᖅᑲᕇᒃᑎᑕᐅᓯᒪᖖᒋᓐᓂᖏᓐᓄᑦ ᐃᓄᖕᓂᑦ. ᐃᓚᒌᖑᔪᑦ ᐊᐅᓚᔪᓐᓇᖅᑕᖏᑦᑕ ᓯᓚᑖᓃᑦᑐᓄᑦ ᐊᕕᓯᒪᓕᖅᑎᑕᐅᕙᒃᐳᑦ, ᐆᒃᑑᑎᒋᓪᓗᒋᑦ ᐊᒃᖢᓗᐊᕐᓂᕐᒧᑦ ᐅᕝᕙᓗ ᐋᓐᓂᐊᖅᕕᓕᐊᒋᐊᖃᕐᓂᕐᒧᑦ.

ᐊᒥᒐᓗᐊᕐᓂᖏᓐᓄᑦ ᒥᐊᓂᖅᓯᔨᐅᕙᒃᑐᑦ ᐊᖏᕐᕋᒥᓐᓂ, ᐱᔨᑦᓯᕋᕈᑎᒃᓴᐅᔪᑦ, ᐊᒻᒪᓗ ᐃᒡᓗᐊᓗᐃᑦ ᑲᒪᒋᔭᐅᕖᑦ ᐃᓄᐃᑦ ᓄᓇᓗᒃᑖᖏᓐᓂ, ᓱᕈᓰᑦ ᓄᓇᓕᒋᔭᒥᒃᑕ ᐊᒻᒪᓗ ᐊᕕᒃᑐᖅᓯᒪᓂᕆᔭᖏᑦᑕ ᓯᓚᑖᓄᑦ ᐊᐅᓪᓚᖅᑎᑕᐅᒐᔪᒻᒪᑕ ᒥᐊᓂᕆᔭᐅᓯᒪᕝᕕᖕᓄᑦ.

ᒪᓕᒐᖁᑏᑦ, ᐃᓄᐃᑦ ᑕᐱᕇᑦ ᑲᓇᑕᒥ ᐋᖅᑭᒃᓱᖅᑕᐅᕙᓪᓕᐊᓂᖏᓐᓂ ᐱᓕᕆᓂᖃᕐᕕᒋᖃᑕᐅᓚᐅᖅᑕᖏᑦ, ᐱᑕᖃᓕᖅᑎᑦᑎᕗᑦ ᑲᓇᑕᒥ ᐱᓕᕆᔾᔪᓯᐅᕙᓐᓂᐊᖅᑐᓂᒃ ᐊᑐᓕᖅᑎᑕᐅᓂᐊᖅᓱᑎᒃ ᓱᕈᓯᓕᕆᓂᕐᒥ ᐱᓕᕆᓂᖃᕐᕕᐅᔪᓕᒫᓄᑦ ᑲᓇᑕᒥ ᑐᖖᒐᕝᕕᖃᖅᑎᑕᐅᓗᑎᒃ ᑕᒪᒃᑮᓂ ᔪᓇᐃᑎᑦ ᓃᓴᒃᑯᑦ ᓇᓗᓇᐃᓯᔾᔪᑎᖏᓐᓂᑦ ᐊᒻᒪᓗ ᑲᑎᒪᕕᒡᔪᐊᕐᓂᖃᕐᓂᖏᓐᓂᑦ ᓱᕈᓰᑦ ᐱᔪᓐᓇᐅᑎᖃᕐᓂᖏᓐᓄᑦ. ᒪᓕᒐᖁᑎᐅᔪᑦ ᐃᓕᑕᖅᓯᒥᔪᑦ ᐊᔪᕐᓇᖖᒋᓐᓂᖓᓂᒃ ᐋᖅᑭᒃᓱᐃᓯᒪᓕᕆᐊᒥᒃ ᐋᖅᑭᒋᐊᕈᑎᒃᓴᐅᓂᐊᖅᑐᓂᒃ ᑲᓇᑕᒥ ᐱᖁᔭᕐᔪᐊᑎᒍᑦ ᑐᖖᒐᕝᕕᖁᑎᒃᓴᓂᒃ ᐊᑐᓕᖅᑎᑦᑎᓂᐊᕐᓂᕐᒥ ᐃᓄᐃᑦ ᓇᖕᒥᓂᖅ ᐃᓱᒪᓕᐅᕈᑎᓕᐅᕈᓐᓇᕐᓂᖏᓐᓄᑦ ᑐᕌᖓᑎᓪᓗᒋᑦ ᓱᕈᓯᓕᕆᓂᕐᒥ ᖃᓄᐃᖖᒋᑦᑎᐊᖅᑎᑦᑎᔭᕆᐊᖃᕐᓂᕐᓄᑦ.

ᑖᒃᑯᐊ ᐃᖅᑲᖅᑐᐃᕕᒡᔪᐊᖅᑎᒍᑦ ᐃᓱᒪᓕᐅᕈᑎᐅᓯᒪᔪᑦ ᓇᓗᓇᐃᖅᓯᒃᑲᓐᓂᕈᑎᐅᕗᑦ ᐃᓄᐃᑦ ᐱᔪᓐᓇᐅᑎᖃᕐᓂᖏᓐᓂᒃ ᐱᕈᖅᓴᐃᔨᐅᔪᓐᓇᕐᓂᕐᒧᑦ ᓱᕈᓯᑦᑎᓐᓂᒃ ᐊᕙᑕᖏᖅᑕᐅᓯᒪᓗᑎᒃ ᐅᖃᐅᓯᑦᑎᓐᓂᑦ, ᐱᖁᓯᑐᖃᑦᑎᓐᓂᑦ, ᐊᑐᖅᓯᒪᔭᑦᑎᓐᓂᑦ, ᐊᒻᒪᓗ ᓄᓇᑦᑎᓐᓂᑦ.