Angujatit Igajatit

Nunakkuurutikkut ikaarnikkut nunaptingnit Tikirarjuamut, iqalukhiuqpagaat Iqaluktuuttiaq haniani una Igaji Tasha Tologanak Iqalukpit pinnarijaa. Aujami, iqaluit hitugaangat tarjurmut, iqqakharaangamik iqalungnaqpaktuq, uqaqtuq. Iqqakharaangami iqalungnigaangat, hungaijaqpakhuniuk angilrautivagaa, piffiliuriangat.

Uuma Tologanak, iganirmut ilihaijiujuq uvani Nunavut Inirnit Iliharvianit Iqaluktuuttiami, iqalukhiurniq hulijjutigivagaat.

“Niqikhamik iqqakhaunmiglu nakhainnaqpaktavut. Hivajautinnuakkut turaarnaittuq tahamani, quvianaqhivluni”, uqaqtuq.

Uvani uataani Nunavunmi nunalingni, Iqalukpit nirijaunginnaqpagaat, hamna umingmait ikitpalliagamik tuktuillu ajurnaqhivakhuni. “Nunapta ilihimajauvaktuq Iqalukpit amigaitpaktut. Igainnaqhuta iqalukpik imiraanik Iqaluit niqainiglu,” Tologanak uqaqtuq.

Ilihaijiungittaraangami ilihalihaaqtut iganirmut ajurnaittumik, uuminngaluuniit tuglirijaujut ukiunganit pinnarijumik iganirmut ajuiqhainingit ilihaqhimajuq ilihaqhuni iganirnut ilihautingit uvani Northern Alberta Institute of Technology Edmonton-mi, Tologanak quviagijaa hannaijariiqhuni niqinit nunalingni katimaliraangat unalu Inirnikhat katimajunut.

“Ikpigijara kivgautigaangavit mikijumik aimavipta kivgautigaangat niqainnarmik, Inirnikhanut ihumavlugit,” uqaqtuq.  “Niqainnaqtuqattangittut, taimanitut, taimaa quviahuutauvakhuni kivgautigaangat niqainnarmik, taimaa tuniqhaihimajatit, aimaviktut ittuq taimaa.”

Iganiq Iqaluktuuttiami aallakpiaqtuq havaangit taunani Qaplunaat nunangani, uqaqtuq. Iharianaqhivahuni nutaaqpaingujut niqikhat pijumajamingnit nunamiutuqait aajjigiinngittut. Havaakhanut uvani iganirmut aimavingmi Iqaluktuuttiami taamna hinnaktuumivagaa Tologanak taimaa arnaruhiuvluni iganngalirami. “Inulrammiuvluni Inuk arnauplunga, ikpigiinnaqhugu quvianaqpiaqhuni, hivuliqtiuvlunga nunamni tautuktittivlunga huliniq hulijaami ihumagiinnarlugu, iliharniq ihumagijakharlu,” uqaqtuq.

Tamurnaqtuq Iqalukpik Hiirnaqtuq

Avvautikhangit:

Avvautainnaa tiahimajuq uuminngaluuniit pijumajatit iqalukpik

Tarjuq unalu pepper qimilrurlugu

¼ qallunmik muqpaujakhanut uutakhaat

¼ qallunmik haunilingnit almonds, avguqhimajut igahimajullu

3-4 angivjaktuq aluut Extra Virgin Olive Uqhuq – qanurluuniit avaffilaaq angijuqpat

4 angivjaktuq aluut butter

Juice-nganit 2 lemon

5 uuminngaluuniit hiamivjaktumik thyme

3 angivjaktuq aluut honey

1-2 angivjaktuq aluut paniumajuq parsley

–

Ilitturvikhat:

1. Aviglugit iqalukpik 8 oz-nik avguutait. Paniqhimalugit tiahimajuit allarunmut tarjuqtirlugit pepper-tirlugillu. Iliurarlugit ikittumik muqpaujaq uutaktakhat. Hanianunngarlugit.

2. Aturlugu nipittailijut avaffilaarmik uuminngaluuniit uqumaittumik avaffilaaq, igalugit hauniliit almonds uunavjaktumik 3-4 takilrainnaanut, kajuqtuq ivitaaqhimaluni. Ahivaqhimalugit hanianunngarlugit.

3. Iluani avaffilaarmi uuminngaluuniit uqumaittumik avaffilaaq uunakhiilugu ¼ inch-gut extra virgin olive uqhuanit uunavjaktumi-uunaktumik. Uunnakpiarumi, ililugu iqalukpik tiahimajut igahimalugit 3-4 takilrainnaatigut tamarmik, kajuqtuq ivitaanngurumigluuniit. Ahivarlugit avaffilaarmit hanianunngarlugit.

4. Aturlugu aulajuittuq avaffilaaq, naiglihimalugu uunaqtuq naittumik-ikittumigluuniit, ilalugu butter, lemon juice, thyme unalu honey.

5. Hamna butter puriliqqat, ahivarlugu avaffialaaq uunnaktumik ilalugu parsley unalu igahimajut hauniliit almond.

6. Ilalugit iqalukpik tiahimajut avaffilaarmit kuvilugulu mihuraa iqalup qaangani.

7. Akkiutaqhimalugu igahimajatit naammagijangnit ilavikhaat.

Una niqi, ilavaktara garlic hauhimajut patiitat, igahimajut asparagus unalu arugula paunngaq salad.