Inuktitut Qimirruagaq - SAQQITITAQ 128-129

Nakinngaaqsimaningit Inuvialuit

Sivulliqpaamik Inuit Gavamalirinirmi Union-nngat

Aujaq 2021 | Allati: Tom Mcleod

Taipsumanituqaaluk silarjuaq pituqaalutuqauliqtillugu, Inuit kisiani pitaqalilauqsimaningit nutaangutillugu suli, ajjigiinngiuqtuullutik amisukallaujunik Inuktaqalauqsimajuq Ukiuqtaqtumi Ualinirmiuni. Inungit Qikiktarmiungullutik Herschel Qikiqtanganit, Kuupakmiungullutik Mackenzie Kuuraaluanit, Kittirgaryamiungullutik Kittigariutmit, ammalu Anderson Kuunganirmiungullutik Inungit taijaujjusingili Iqqaumannginnattigut. Uvvaluunniit uvanga iqqaumannginnakku taijaujjusirivalauqtangit.

Kittirgaryamiut Inugiangniqpaulauqsimajut. Tariumit atuinnauvviulauqsimammata qilalugarviurvigijunnaqtaminnik, amma qakiaktumik imiquqhlutik Mackenzie-up Kivataanit Kuukpalliajumik imirmik ammalu ujarqauqtuulluni tarraqpasianit tariumik angunasuarvigivaktaminnik tariumi. Nunaqatsiaqtuullutik kangiqhlunginnirmiungullutik ammalu uqquanganiitsutik tarraqpasinganit nunamingnit ingirraniqarunnaqpakhlutik tarrangata tariut sigjaqpasinganiittunik imarnit ammalu Mackenzie Kuuraaluanit situqattarlutiklu majuraqattarunnarni qaqsutik.

Kittirgaryamiut Inugiangniqpaulauqsimajut. Tariumit atuinnauvviulauqsimammata qilalugarviurvigijunnaqtaminnik, amma qakiaktumik imiquqhlutik Mackenzie-up Kivataanit Kuukpalliajumik imirmik ammalu ujarqauqtuulluni tarraqpasianit tariumik angunasuarvigivaktaminnik tariumi.

Niuvrutiqatiqaqattarunnalauqsimajut Kuupukmiunik nunaliqaqtunik kuup sigjangani ammalu tamatuminga quviagijaqallariksutik aturungnarnirijaminnik. Anderson Kuunganirmiungit Inuit qanirniqsau lauqsimammata Paulatuup nunalingata inigiliqtanganik ullumi. Niuvrutiqaqpakhlutik Anderson Kuunganirmiungullutik Iqqilinginnik taununga Great Bear Lake Tasianirmiunut ammalu kuuqarvium mijutigut nunagijaujuni. Kittigaryamiut tamatuminga naammaksalaunngimmata.

Makkuktumik sivuliqtiqalauqsimavut piuksanngittumik Anderson Kuunganirmiungullutik Inungit nangminiq inuusirminnik aulatsiniqattiarungnarninginik; asinginnirmiungullutik inuugaluarmijunit ammalu niuvrutiqaqattaqsutik Iqqiliit inunginnik. Isumaqalaurami Inuit tamaani aviktuqsimaniujunirmiungujut tamatuminga aaqqiisimaniqaliriaqarningita taakkuninga Inunginnik, ammalu Kittigariut nunangat niuvrutiqarviuvagiaqarningata aviktuqsimaniujulimaanit. Taimali angunasuktigijaujunik unataqtiujuniklu katinngaqatiqaalauqsimavut. Asuilaa umiarminnik parnaksimalilauqput ammalu paruliqsutik Anderson Kuunganut aujangani taqqiit atuqpalliatillugit sukuiqsimalirmat Ukiuqtaqtup Tariuraalunga, sigjakkut ingirravaliallutik. Kittugaryamiut Inunginnik unatalirhlutik. Inuaqtalimaarillugit nanijungnaqtalimaatik Inuit tauvanirmiut, inutuqarijaujunit makkuktunginut. Kittugarymiut quviasuliqhlutik aulatsiniqarunnaqsigamik ingirravviuvaktunik Ukiuqqtumi Qitirmiunut tikihlugu. Kinatuinnaq niuvrutiqarumajuq uvvaluunniit nigiqpasianuarumajuq taakkuti-guunaariaqaliqtitaullutik. Aaulatsiniqarvigijaminnik ingirraniqarunnaqsillutik akhluittuulirhlutik.

Kisianilu atausirmik inuanngimaurnirmata, nukappiakulummik. Inutuangulluni piruqsajariaqalaurhluni ammalu angunasugungnaqtitsiarluni unataqtiujungnaqsitsiaqtumik. Taanna anguti piruqsimanirami angijummarialungmik ninngaksimaniqalilaurmat qanutuinnarlu piliriniqarunaqsilluni akigiarutiginiarluniuk ilagijaminik inuuqatigiijaminiklu inuaqsilauqtunut.

Ukiungulirmitillugu, ukiut amisut naasimaliqtillugit, tainna Anderson Kuunganirmiutaq anguti nanisililaurniqpuq Kittigaryuitnik, talisimagialirnirpuq sivuliqtiulluni angutiup igluata silataani. Ilitariliqpaa tainna sivuliqtigijaujuq tannauningata angutiup Inuuqatinginik tuqutiriqujilauqtuuninganut, utuqqaqtuviniulluni.

Taissumaniutillugu, Inuit qarmarnik igluqaqpalauqsimammata quvvasinngittunik manirarmit. Tamannalu pijjutigillugu Anderson Kuunganirmiutaup angutip ajurilaunngimmagit tiguallaglugit tuqutirigiaminik sivuliqtiujup ikajuqtinginik anivalliatillugit qarmarmit. Tainna sivuliqtigijaujuq, niriukkaluarami angutiit utirniarninginik, pasagusulirnirpuq utinngiinnalirmata. Asuilaa irniminik tilisilirnirhluni qiniriaqujilluni.

Taassuma Anderson Kuunganirmiutaup nukappiaq tigulirniqpaa ammalu irialaarunnaqtigiarhlugu ikajuqtaujumaluni. Tainna sivuliqti anilirhluni qarmarminit takuliqpaa irnini pijausimajuq. Taannalu sivuliqtiujuq ilitaqsilirsuni angutimik katilauqsimajaminik tagvalu qugviuliqsuni, uqautilluniuklu: “Qaujimavunga qanuiliulaurnikka ilingnut Inuuqatigijarnullu naammanngillarilaurmata. Makkuktuullunga ninngaumarjuarniqalauqsimagama, kisianili inutuqauliqsunga, tukisiumaliqpakka qanuiliulauqsimanikka naammanngillari laurningita. Irnira atii tuqutauqunngippara!”

Takuliramiuk ugguallaringningata inutuqaup Anderson Kuunganirmiutaup nukappiaq sapkuliqpaa, taimalu uqallaqatigiigunnaqsillutik. Uqallaqatigiiktillugik, tainna sivuliqtigijaujuq uqaujjiliqsuni Anderson Kuunganirmiutamik tammaajarutigilluniuk pinirluaqisimanirminik. Anderson Kuunganirmiutaulauqtut Inungit pitaqarungniirmata, Iqqiliit takpaunga majuraqsutik kuukkut angunasuaqpalilaurmata, iqalliqijartuqpakhlutiklu, ammalu niuvrutiqariaqsimavakhlutik Inuit nunagivalaugainni. Kiktigarimiut ajursarniqsammariulilauqput qanuittuumauraluaqsimanirminnit pijjutigillugu iqqiliktaqalirningata akunnirmiiliqtunik Ukiuqtaqtumi Qitirmiut aviktuqsimanirilqtanganilu.

Taakkua marruuk angutiik angiqatigiiksimalilaurpuuk aaqqiumaqatigii-lirasunniarnirminnik ilagijauqatauliqujinirmiktigut Anderson Kuunganirmiutamik aippaqtaarluni qiturngaminiklu naksarluni utiqsimalirniarningata Anderson Kuungata avatigijanganut, ilinniaq-titsijunnarniarmat kitigarijamiunik tikittunik nunaminu qanuq ajjiginngitangani nunami annaumanasuarniuvaktunut. Tamakkuningalu piliriniuvaktut pilirianguvanniarungniirmata ilaakkuunganiqartitaulutik, kisianili Inuuqatigiingniqtigut, Inullattaangunirmiktigut, tamannalu Inuvialuit taimanna tukiqarmat. Uqariaq Inullariuvunga isumajjusiunngimmat sulinngilhlutik Inuktaqarninganik, kisianilu qanuq tukiqarningata Inuvialuit uqarusingat malikhlugu. Uqariamik Inullattaanguvugut isumajjusiunngimmat asigijavut Inullattaangunnginningitali, kisianili katinniqaqtuulluta Inuunittinnik, avisimaliqtitaujunnarata, unataqatigiiliqpagiaqannginnatta taissumanituqamititut.

Tamanna nutaangulluni kinaunirmut nalunaikkutaujuq ammalu saimaqatigiingnirmik nalunaiqsisimaniq piruqpallialilaurmat Ukiuqtaqtup Ualinirmiulimaani, attatarvigiturausimajjutigigattigu Inugiaulluta, Inuvialuugatta.