ᓇᑭᖖᒑᖅᓯᒪᓂᖏᑦ ᐃᓄᕕᐊᓗᐃᑦ

ᑭᑦᑎᒐᕆᔭᒥᐅᑦ ᑕᒪᑐᒥᖓ ᓈᒻᒪᒃᓴᓚᐅᖖᒋᒻᒪᑕ.

ᒪᒃᑯᒃᑐᒥᒃ ᓯᕗᓕᖅᑎᖃᓚᐅᖅᓯᒪᕗᑦ ᐱᐅᒃᓴᖖᒋᑦᑐᒥᒃ ᐋᓐᑐᕐᓴᓐ ᑰᖓᓂᕐᒥᐅᖑᓪᓗᑎᒃ ᐃᓄᖏᑦ ᓇᖕᒥᓂᖅ ᐃᓅᓯᕐᒥᓐᓂᒃ ᐊᐅᓚᑦᓯᓂᖃᑦᑎᐊᕈᖕᓇᕐᓂᖏᓂᒃ; ᐊᓯᖏᓐᓂᕐᒥᐅᖑᓪᓗᑎᒃ ᐃᓅᒐᓗᐊᕐᒥᔪᓂᑦ ᐊᒻᒪᓗ ᓂᐅᕝᕈᑎᖃᖃᑦᑕᖅᓱᑎᒃ ᐃᖅᑭᓖᑦ ᐃᓄᖏᓐᓂᒃ. ᐃᓱᒪᖃᓚᐅᕋᒥ ᐃᓄᐃᑦ ᑕᒫᓂ ᐊᕕᒃᑐᖅᓯᒪᓂᐅᔪᓂᕐᒥᐅᖑᔪᑦ ᑕᒪᑐᒥᖓ ᐋᖅᑮᓯᒪᓂᖃᓕᕆᐊᖃᕐᓂᖏᑕ ᑖᒃᑯᓂᖓ ᐃᓄᖏᓐᓂᒃ, ᐊᒻᒪᓗ ᑭᑦᑎᒐᕆᐅᑦ ᓄᓇᖓᑦ ᓂᐅᕝᕈᑎᖃᕐᕕᐅᕙᒋᐊᖃᕐᓂᖓᑕ ᐊᕕᒃᑐᖅᓯᒪᓂᐅᔪᓕᒫᓂᑦ. ᑕᐃᒪᓕ ᐊᖑᓇᓱᒃᑎᒋᔭᐅᔪᓂᒃ ᐅᓇᑕᖅᑎᐅᔪᓂᒃᓗ ᑲᑎᖖᒐᖃᑎᖃᓕᓚᐅᖅᓯᒪᕗᑦ. ᐊᓱᐃᓛ ᐅᒥᐊᕐᒥᓐᓂᒃ ᐸᕐᓇᒃᓯᒪᓕᓚᐅᖅᐳᑦ ᐊᒻᒪᓗᐸᕈᓕᖅᓱᑎᒃ ᐋᓐᑐᕐᓴᓐ ᑰᖓᓄᑦ ᐊᐅᔭᖓᓂ ᑕᖅᑮᑦ ᐊᑐᖅᐸᓪᓕᐊᑎᓪᓗᒋᑦ ᓱᑯᐃᖅᓯᒪᓕᕐᒪᑦ ᐅᑭᐅᖅᑕᖅᑐᑉ ᑕᕆᐅᕌᓗᖓ, ᓯᒡᔭᒃᑯᑦ ᐃᖏᕐᕋᕙᓪᓕᐊᓪᓗᑎᒃ. ᑭᑦᑐᒐᕆᔭᒥᐅᑦ ᐃᓄᖏᓐᓂᒃ ᐅᓇᑕᓕᕐᖢᑎᒃ. ᐃᓄᐊᖅᑕᓕᒫᕆᓪᓗᒋᑦ ᓇᓂᔪᖕᓇᖅᑕᓕᒫᑎᒃ ᐃᓄᐃᑦ ᑕᐅᕙᓂᕐᒥᐅᑦ, ᐃᓄᑐᖃᕆᔭᐅᔪᓂᑦ ᒪᒃᑯᒃᑐᖏᓄᑦ. ᑭᑦᑐᒐᕆᔭᒥᐅᑦ ᖁᕕᐊᓱᓕᖅᖢᑎᒃ ᐊᐅᓚᑦᓯᓂᖃᕈᓐᓇᖅᓯᒐᒥᒃ ᐃᖏᕐᕋᕝᕕᐅᕙᒃᑐᓂᒃ ᐅᑭᐅᖅᖅᑐᒥ ᕿᑎᕐᒥᐅᓄᑦ ᑎᑭᓪᖢᒍ. ᑭᓇᑐᐃᓐᓇᖅ ᓂᐅᕝᕈᑎᖃᕈᒪᔪᖅ ᐅᕝᕙᓘᓐᓃᑦ ᓂᒋᖅᐸᓯᐊᓄᐊᕈᒪᔪᖅ ᑖᒃᑯᑎᒎᓈᕆᐊᖃᓕᖅᑎᑕᐅᓪᓗᑎᒃ. ᐊᐅᓚᑦᓯᓂᖃᕐᕕᒋᔭᒥᓐᓂᒃ ᐃᖏᕐᕋᓂᖃᕈᓐᓇᖅᓯᓪᓗᑎᒃ ᐊᒃᖢᐃᑦᑑᓕᕐᖢᑎᒃ.

ᑭᓯᐊᓂᓗ ᐊᑕᐅᓯᕐᒥᒃ ᐃᓄᐊᖖᒋᒪᐅᕐᓂᕐᒪᑕ, ᓄᑲᑉᐱᐊᑯᓗᒻᒥᒃ. ᐃᓄᑐᐊᖑᓪᓗᓂ ᐱᕈᖅᓴᔭᕆᐊᖃᓚᐅᕐᖢᓂ ᐊᒻᒪᓗ ᐊᖑᓇᓱᒍᖕᓇᖅᑎᑦᓯᐊᕐᖢᓂ ᐅᓇᑕᖅᑎᐅᔪᖕᓇᖅᓯᑦᓯᐊᖅᑐᒥᒃ. ᑖᓐᓇ ᐊᖑᑎ ᐱᕈᖅᓯᒪᓂᕋᒥ ᐊᖏᔪᒻᒪᕆᐊᓗᖕᒥᒃ ᓂᖖᒐᒃᓯᒪᓂᖃᓕᓚᐅᕐᒪᑦ ᖃᓄᑐᐃᓐᓇᕐᓗ ᐱᓕᕆᓂᖃᕈᓇᖅᓯᓪᓗᓂ ᐊᑭᒋᐊᕈᑎᒋᓂᐊᕐᓗᓂᐅᒃ ᐃᓚᒋᔭᒥᓂᒃ ᐃᓅᖃᑎᒋᔭᒥᓂᒃᓗ ᐃᓄᐊᖅᓯᓚᐅᖅᑐᓄᑦ.

ᐅᑭᐅᖑᓕᕐᒥᑎᓪᓗᒍ, ᐅᑭᐅᑦ ᐊᒥᓱᑦ ᓈᓯᒪᓕᖅᑎᓪᓗᒋᑦ, ᑕᐃᓐᓇ ᐋᓐᑐᕐᓴᓐ ᑰᖓᓂᕐᒥᐅᑕᖅ ᐊᖑᑎ ᓇᓂᓯᓕᓚᐅᕐᓂᖅᐳᖅ ᑭᑦᑎᒐᕆᔪᐃᑦᓂᒃ, ᑕᓕᓯᒪᒋᐊᓕᕐᓂᕐᐳᖅ ᓯᕗᓕᖅᑎᐅᓪᓗᓂ ᐊᖑᑎᐅᑉ ᐃᒡᓗᐊᑕ ᓯᓚᑖᓂ. ᐃᓕᑕᕆᓕᖅᐹ ᑖᓐᓇ ᓯᕗᓕᖅᑎᒋᔭᐅᔪᖅ ᑖᓐᓇᐅᓂᖓᑕ ᐊᖑᑎᐅᑉ ᐃᓅᖃᑎᖏᓂᒃ ᑐᖁᑎᕆᖁᔨᓚᐅᖅᑑᓂᖓᓄᑦ. ᐅᑐᖅᑲᖅᑐᕕᓂᐅᓪᓗᓂ.

ᑕᐃᔅᓱᒪᓂᐅᑎᓪᓗᒍ, ᐃᓄᐃᑦ ᖃᕐᒪᕐᓂᒃ ᐃᒡᓗᖃᖅᐸᓚᐅᖅᓯᒪᒻᒪᑕ ᖁᕝᕙᓯᖖᒋᑦᑐᓂᒃ ᒪᓂᕋᕐᒥᑦ. ᑕᒪᓐᓇᓗ ᐱᔾᔪᑎᒋᓪᓗᒍ ᐋᓐᑐᕐᓴᓐᒥᐅᑕᐅᑉ ᐊᖑᑎᑉ ᐊᔪᕆᓚᐅᖖᒋᒻᒪᒋᑦ ᑎᒍᐊᓪᓚᒡᓗᒋᑦ ᑐᖁᑎᕆᒋᐊᒥᓂᒃ ᓯᕗᓕᖅᑎᐅᔪᑉ ᐃᑲᔪᖅᑎᖏᓂᒃ ᐊᓂᕙᓪᓕᐊᑎᓪᓗᒋᑦ ᖃᕐᒪᕐᒥᑦ. ᑕᐃᓐᓇ ᓯᕗᓕᖅᑎᒋᔭᐅᔪᖅ, ᓂᕆᐅᒃᑲᓗᐊᕋᒥ ᐊᖑᑏᑦ ᐅᑎᕐᓂᐊᕐᓂᖏᓂᒃ, ᐸᓴᒍᓱᓕᕐᓂᕐᐳᖅ ᐅᑎᖖᒌᓐᓇᓕᕐᒪᑕ. ᐊᓱᐃᓛ ᐃᕐᓂᒥᓂᒃ ᑎᓕᓯᓕᕐᓂᕐᖢᓂ ᕿᓂᕆᐊᖁᔨᓪᓗᓂ.

ᑖᔅᓱᒪ ᐋᓐᑐᕐᓴᓐ ᑰᖓᓂᕐᒥᐅᑕᐅᑉ ᓄᑲᑉᐱᐊᖅ ᑎᒍᓕᕐᓂᖅᐹ ᐊᒻᒪ ᐃᕆᐊᓛᕈᓐᓇᖅᑎᒋᐊᕐᖢᒍ ᐃᑲᔪᖅᑕᐅᔪᒪᓗᓂ. ᑕᐃᓐᓇ ᓯᕗᓕᖅᑎ ᐊᓂᓕᕐᖢᓂ ᖃᕐᒪᕐᒥᓂᑦ ᑕᑯᓕᖅᐹ ᐃᕐᓂᓂ ᐱᔭᐅᓯᒪᔪᖅ. ᑖᓐᓇᓗ ᓯᕗᓕᖅᑎᐅᔪᖅ ᐃᓕᑕᖅᓯᓕᕐᓱᓂ ᐊᖑᑎᒥᒃ ᑲᑎᓚᐅᖅᓯᒪᔭᒥᓂᒃ ᑕᒡᕙᓗ ᖁᒡᕕᐅᓕᖅᓱᓂ, ᐅᖃᐅᑎᓪᓗᓂᐅᒃᓗ: “ᖃᐅᔨᒪᕗᖓ ᖃᓄᐃᓕᐅᓚᐅᕐᓂᒃᑲ ᐃᓕᖕᓄᑦ ᐃᓅᖃᑎᒋᔭᕐᓄᓪᓗ ᓈᒻᒪᖖᒋᓪᓚᕆᓚᐅᕐᒪᑕ. ᒪᒃᑯᒃᑑᓪᓗᖓ ᓂᖖᒐᐅᒪᕐᔪᐊᕐᓂᖃᓚᐅᖅᓯᒪᒐᒪ, ᑭᓯᐊᓂᓕ ᐃᓄᑐᖃᐅᓕᖅᓱᖓ, ᑐᑭᓯᐅᒪᓕᖅᐸᒃᑲ ᖃᓄᐃᓕᐅᓚᐅᖅᓯᒪᓂᒃᑲ ᓈᒻᒪᖖᒋᓪᓚᕆᓚᐅᕐᓂᖏᑕ. ᐃᕐᓂᕋ ᐊᑏ ᑐᖁᑕᐅᖁᖖᒋᑉᐸᕋ!”

ᑕᑯᓕᕋᒥᐅᒃ ᐅᒡᒍᐊᓪᓚᕆᖕᓂᖓᑕ ᐃᓄᑐᖃᐅᑉ ᐋᓐᑐᕐᓴᓐ ᑰᖓᓂᕐᒥᐅᑕᐅᑉ ᓄᑲᑉᐱᐊᖅ ᓴᑉᑯᓕᖅᐹ, ᑕᐃᒪᓗ ᐅᖃᓪᓚᖃᑎᒌᒍᓐᓇᖅᓯᓪᓗᑎᒃ. ᐅᖃᓪᓚᖃᑎᒌᒃᑎᓪᓗᒋᒃ, ᑕᐃᓐᓇ ᓯᕗᓕᖅᑎᒋᔭᐅᔪᖅ ᐅᖃᐅᔾᔨᓕᖅᓱᓂ ᐋᓐᑐᕐᓴᓐ ᑰᖓᓂᕐᒥᐅᑕᒥᒃ ᑕᒻᒫᔭᕈᑎᒋᓪᓗᓂᐅᒃ ᐱᓂᕐᓗᐊᕿᓯᒪᓂᕐᒥᓂᒃ.

ᐋᓐᑐᕐᓴᓐ ᑰᖓᓂᕐᒥᐅᑕᐅᓚᐅᖅᑐᑦ ᐃᓄᖏᑦ ᐱᑕᖃᕈᖕᓃᕐᒪᑕ, ᐃᖅᑭᓖᑦ ᑕᒃᐸᐅᖓ ᒪᔪᕋᖅᓱᑎᒃ ᑰᒃᑯᑦ ᐊᖑᓇᓱᐊᖅᐸᓕᓚᐅᕐᒪᑕ, ᐃᖃᓪᓕᕿᔭᕐᑐᖅᐸᒃᖢᑎᒃᓗ, ᐊᒻᒪᓗ ᓂᐅᕝᕈᑎᖃᕆᐊᖅᓯᒪᕙᒃᖢᑎᒃ ᐃᓄᐃᑦ ᓄᓇᒋᕙᓚᐅᒐᐃᓐᓂ. ᑭᒃᑎᒐᕆᒥᐅᑦ ᐊᔪᕐᓴᕐᓂᖅᓴᒻᒪᕆᐅᓕᓚᐅᖅᐳᑦ ᖃᓄᐃᑦᑑᒪᐅᕋᓗᐊᖅᓯᒪᓂᕐᒥᓐᓂᑦ ᐱᔾᔪᑎᒋᓪᓗᒍ ᐃᖅᑭᓕᒃᑕᖃᓕᕐᓂᖓᑕ ᐊᑯᓐᓂᕐᒦᓕᖅᑐᓂᒃ ᐅᑭᐅᖅᑕᖅᑐᒥ ᕿᑎᕐᒥᐅᑦ ᐊᕕᒃᑐᖅᓯᒪᓂᕆᓕᖅᑕᖓᓂᓗ.

ᑖᒃᑯᐊ ᒪᕐᕉᒃ ᐊᖑᑏᒃ ᐊᖏᖃᑎᒌᒃᓯᒪᓕᓚᐅᕐᐴᒃ ᐋᖅᑭᐅᒪᖃᑎᒌᓕᕋᓱᓐᓂᐊᕐᓂᕐᒥᓐᓂᒃ ᐃᓚᒋᔭᐅᖃᑕᐅᓕᖁᔨᓂᕐᒥᒃᑎᒍᑦ ᐋᓐᑐᕐᓴᓐ ᑰᖓᓂᕐᒥᐅᑕᒥᒃ ᐊᐃᑉᐸᖅᑖᕐᓗᓂ ᕿᑐᕐᖓᒥᓂᒃᓗ ᓇᒃᓴᕐᓗᓂ ᐅᑎᖅᓯᒪᓕᕐᓂᐊᕐᓂᖓᑕ ᐋᓐᑐᕐᓴᓐ ᑰᖓᑕ ᐊᕙᑎᒋᔭᖓᓄᑦ, ᐃᓕᓐᓂᐊᖅᑎᑦᓯᔪᓐᓇᕐᓂᐊᕐᒪᑦ ᑭᑎᒐᕆᔭᒥᐅᓂᒃ ᑎᑭᑦᑐᓂᒃ ᓄᓇᒥᓄ ᖃᓄᖅ ᐊᔾᔨᒋᖖᒋᑕᖓᓂ ᓄᓇᒥ ᐊᓐᓇᐅᒪᓇᓱᐊᕐᓂᐅᕙᒃᑐᓄᑦ. ᑕᒪᒃᑯᓂᖓᓗ ᐱᓕᕆᓂᐅᕙᒃᑐᑦ ᐱᓕᕆᐊᖑᕙᓐᓂᐊᕈᖕᓃᕐᒪᑕ ᐃᓛᒃᑰᖓᓂᖃᕐᑎᑕᐅᓗᑎᒃ, ᑭᓯᐊᓂᓕ ᐃᓅᖃᑎᒌᖕᓂᖅᑎᒍᑦ, ᐃᓄᓪᓚᑦᑖᖑᓂᕐᒥᒃᑎᒍᑦ, ᑕᒪᓐᓇᓗ ᐃᓄᕕᐊᓗᐃᑦ ᑕᐃᒪᓐᓇ ᑐᑭᖃᕐᒪᑦ. ᐅᖃᕆᐊᖅ ᐃᓄᓪᓚᕆᐅᕗᖓ ᐃᓱᒪᔾᔪᓯᐅᖖᒋᒻᒪᑦ ᓱᓕᖖᒋᓪᖢᑎᒃ ᐃᓄᒃᑕᖃᕐᓂᖓᓂᒃ, ᑭᓯᐊᓂᓗ ᖃᓄᖅ ᑐᑭᖃᕐᓂᖓᑕ ᐃᓄᕕᐊᓗᐃᑦ ᐅᖃᕈᓯᖓᑦ ᒪᓕᒃᖢᒍ. ᐅᖃᕆᐊᒥᒃ ᐃᓄᓪᓚᑦᑖᖑᕗᒍᑦ ᐃᓱᒪᔾᔪᓯᐅᖖᒋᒻᒪᑦ ᐊᓯᒋᔭᕗᑦ ᐃᓄᓪᓚᑦᑖᖑᖖᒋᓐᓂᖏᑕᓕ, ᑭᓯᐊᓂᓕ ᑲᑎᓐᓂᖃᖅᑑᓪᓗᑕ ᐃᓅᓂᑦᑎᓐᓂᒃ, ᐊᕕᓯᒪᓕᖅᑎᑕᐅᔪᓐᓇᕋᑕ, ᐅᓇᑕᖃᑎᒌᓕᖅᐸᒋᐊᖃᖖᒋᓐᓇᑦᑕ ᑕᐃᔅᓱᒪᓂᑐᖃᒥᑎᑐᑦ.