ᓇᓗᓇᐃᖅᑕᐅᓯᒪᙱᑦᑐᖅ ᑭᒃᑰᒻᒪᖔᑎᒃ ᐃᓄᒡᕼᐅᐃᑦ ᐊᐃᑉᐸᕇᒃ ᕙᓯ ᓄᕗᐊᓂ ᐳᑭᖅᑕᓕᒃᑯᑦ ᑎᑎᕋᕐᕕᖓᓂ ᐊᐅᓱᐃᑦᑐᑉ ᕿᑭᖅᑕᖓᓂ. Maurice Haycock, Library and Archives Canada
ᐃᓕᑕᕆᔭᐅᓯᒪᙱᑦᑐᑦ:
ᓄᓕᐊᕆᔭᐅᔪᑦ ᐊᒻᒪᓗ ᓱᕈᓰᑦ ᐃᓄᐃᑦ ᐸᓖᓯᕆᔭᐅᕙᓚᐅᖅᓯᒪᔪᓂᑦ
ᐃᓄᐃᑦ ᐳᑭᖅᑕᓕᒃᑯᓐᓄᑦ ᐃᑲᔪᖅᑏᑦ ᐱᐅᓕᔨᐅᕙᓚᐅᖅᑐᑦ ᐃᓕᑕᕆᔭᐅᓯᒪᒐᑎᑦ, ᑭᓯᐊᓂᓕ ᐃᓕᑕᕆᓕᕐᓚᕗᑦ ᐊᐃᑉᐸᕆᕙᓚᐅᖅᑕᖏᑦ ᐸᓖᓯᒃᑯᑦ ᐃᑲᔪᖅᑎᖏᑦ ᐃᑲᔪᖅᐸᓚᐅᕐᒪᑕ ᐅᐃᖏᑕ ᐃᖅᑲᓇᐃᔮᖏᓐᓂᒃ, ᐃᓕᑕᕆᔭᐅᓯᒪᙱᑐᒻᒪᕆᐅᓪᓗᑎᑦ ᓯᕗᓂᐊᒍᑦ 1983ᒥ, ᒥᐊᕆ ᕼᐊᓐᑦ ᓯᕗᓪᓕᖅᐹᖑᓪᓗᓂ ᐃᓄᒃ ᐊᕐᓇᐅᓪᓗᓂ ᐃᖅᑲᓇᐃᔭᖅᑎᑖᕆᔭᐅᒐᒥ ᐸᓖᓯᒃᑯᓐᓄᑦ ᓄᓇᕘᓕᖅᑐᒥ, ᐃᓄᐃᑦ ᐊᕐᓇᐃᑦ, ᐊᒻᒪᓗ ᐃᓛᓐᓂᒃᑯᒻᒪᕆᒃ ᓱᕈᓰᑦ, ᐃᑲᔪᖅᐸᓚᐅᖅᓯᒪᔪᑦ ᐊᔾᔨᒌᙱᑦᑐᓂᑦ ᐱᓕᕆᐊᒃᓴᓂᒃ ᑭᓯᐊᓂᓕ ᑎᒃᑯᐊᖅᑕᐅᓚᐅᖅᓯᒪᒐᑎᑦ ᐸᓖᓯᓄᑦ ᐃᑲᔪᖅᑎᐅᒋᐊᖏᓐᓂᒃ. ᐅᕝᕙ ᐅᑯᐊ ᐆᑦᑑᑎᐅᕗᑦ ᖃᓄᖅ ᐃᓚᒌᑦ ᐃᓄᐃᑦ ᐸᓖᓯᒃᑯᓐᓄᑦ ᐃᖅᑲᓇᐃᔭᖅᑐᑦ ᐃᑲᔪᖅᐸᓚᐅᖅᓯᒪᖕᒪᖔᑕ ᐳᑭᖅᑕᓕᒃᑯᓐᓄᑦ ᐃᓄᐃᑦ ᓄᓇᖓᓐᓂ ᐊᕐᕌᒍᑦ ᐱᒋᐊᓕᓵᖅᑎᓪᓗᒋᑦ.
ᐃᓄᐃᑦ ᐊᕐᓇᐃᑦ ᖃᐅᔨᒪᔭᐅᑦᓯᐊᕐᒪᑕ ᐊᔪᙱᓐᓂᖏᓐᓄᑦ ᒥᖅᓱᓲᖑᓪᓗᑎᑦ ᐊᓐᓄᕌᓂᒃ ᓈᒻᒪᑦᑐᓄᑦ ᐅᑭᐅᖅᑕᖅᑐᑉ ᓯᓚᖓᓄᑦ ᐊᕙᑎᖓᓄᓪᓗ. ᐸᓖᓯᒃᑯᓐᓄᑦ ᐃᑲᔪᖅᑎᑉ ᓄᓕᐊᖓ ᐊᐱᕆᔭᐅᒃᑲᔪᓚᐅᖅᑐᖅ, ᑐᓴᐅᒪᑎᑕᐅᔮᕋᓂᓗ, ᐊᓐᓄᕌᓂᒃ ᒥᖅᓱᖁᔭᐅᓪᓗᓂ ᓲᕐᓗᒃ ᖁᓕᒃᑕᓕᐅᕐᓗᓂ, ᑲᒦᖕᓂᒃ, ᐊᒻᒪᓗ ᐳᐊᓘᖕᓂᒃ ᐅᕝᕙᓘᓐᓃᑦ ᓯᓂᑦᑐᖅᓯᐅᑎᓂᑦ ᐴᕐᓂᑦ ᐳᑭᖅᑕᓕᒃᑯᓐᓄᑦ ᐊᐅᓪᓚᕐᓂᐊᓕᕌᖓᑦ. 1920ᖏᓐᓂ ᐊᒻᒪᓗ 1930ᖏᓐᓂ ᐳᑭᖅᑕᓕᒃᑯᑦ ᐃᖅᑲᓇᐃᔭᖅᑎᖃᖃᑦᑕᓚᐅᖅᓯᒪᔪᑦ ᐃᓄᒡᕼᐅᐃᓂᑦ (ᐃᓄᐃᑦ ᑲᓛᖡᑦ ᓄᓈᓐᓂ ᐱᖓᓐᓇᖓᓂᖅᐸᓯᕐᒥᐅᓂᑦ) ᐊᖑᑎᓂᑦ ᐸᓖᓯᒃᑯᓐᓄᑦ ᐃᑲᔪᖅᑎᒋᔭᐅᓪᓗᑎᑦ ᕙᑦᓯ ᓄᕗᐊᑦᑎᐊᖓᓄᑦ ᐸᓖᓯᒃᑯᓐᓂ ᐊᐅᓱᐃᑦᑑᑉ ᕿᑭᖅᑕᖓᓂ ᖁᑦᑎᒃᑐᒥ. ᐃᓚᖏᖕᓄᑦ ᐊᐃᑉᐸᕆᔭᐅᕙᓚᐅᖅᓯᒪᔪᑦ ᐊᒻᒪᓗ ᑎᑎᖅᑲᑦ ᑕᑯᒃᓴᐅᑎᑦᑎᔪᑦ ᐊᕐᓇᐃᑦ ᐊᑭᓕᖅᑕᐅᕙᓚᐅᖅᓯᒪᖕᒪᑕ ᒥᖅᓱᖃᑦᑕᕐᓂᖏᓐᓄᑦ.
12ᓂᑦ ᐅᑭᐅᓕᒃ ᑐᓵᔨ ᐲᑕ ᓇᑎᑦ ᐱᖃᑎᖃᖅᖢᓂ ᐳᑭᖅᑕᓕᒃ ᐊᓪᕗᑦ ᔫᓯᐱ ᑦᓴᕐᑐᕌᓐᑦ. Royal Canadian Mounted Police Collection, Library And Archives Canada
ᐳᑭᖅᑕᓕᒃᑯᑦ ᐃᑲᔪᖅᑎᖓ ᐅᖓᓯᑦᑐᒧᑦ ᐊᐅᓪᓚᕐᓂᐊᕋᐃᖕᒪᑦ ᐅᐊᑦᑎᒋᐊᖅᑐᖅᖢᓂ, ᐃᓛᓐᓂᒃᑯᑦ ᐃᓚᒥᖕᓂᒃ ᓇᒃᓴᖃᑦᑕᓚᐅᖅᓯᒪᔪᑦ. ᑕᐃᒪᐃᓚᐅᖅᓯᒪᕗᖅ ᐊᐅᓪᓚᐅᔾᔨᔨ ᔫ ᐸᓂᒃᐸᑯᑦᑐᒃ ᐃᖅᑲᓇᐃᔭᖅᑎᑖᕆᔭᐅᑲᐃᓐᓇᖅᓯᒪᓪᓗᓂ ᐊᒻᒪᓗ ᐅᐊᑦᑎᐊᕉᓕᖅᑎᓪᓗᒍ ᐳᑭᖅᑕᓕᒃᑯᓐᓄᑦ ᐃᑲᔪᖅᑎᒋᔭᐅᓕᓚᐅᖅᓯᒪᓪᓗᓂ. ᐋᒡᒌᓯ 1944ᖑᑎᓪᓗᒍ, ᐃᑭᓚᐅᖅᓯᒪᔪᖅ ᐳᑭᖅᑕᓕᒃᑯᑦ ᑎᖏᕐᕋᐅᑎᓕᖓᓄᑦ ᐅᒥᐊᒃᑯᑦ ᓴᐃᓐᑦ. ᕌᒃ ᓄᓕᐊᖓᓗ ᓖᑎᐊ, ᐊᓈᓇᖓ ᐸᓂᒃᐸᒃ, ᐃᕐᓂᒃᓴᖓᓗ ᐋᕆᐊᒃ, ᐸᓂᖓᓗ ᐋᓂ ᐸᓪᓗᖅ, ᐃᕐᓂᖓ ᐃᓚᐃᔭ ᑯᓪᓗ, ᐸᓂᖓ ᓲᐱ ᕕᒍᖅ, ᐅᔪᕈᖓ ᒥᐊᕆ ᐸᓂᒍᓯᖅ, ᐊᒻᒪᓗ 17ᖑᔪᑦ ᕿᒻᒥᖏᑦ. ᐅᒥᐊᖅᑐᓚᐅᖅᓯᒪᔪᑦ ᒥᑦᑎᒪᑕᓕᖕᒥ ᕿᑭᖅᑖᓗᖕᒥ ᑕᐅᕗᖓ ᕿᓪᓚᖃᕐᕕᖕᒧᑦ ᐃᓄᕕᐊᓗᐃᑦ ᓄᓇᖓᓂ, ᐊᐅᓪᓚᖅᖢᑎᑦ ᑲᓇᓐᓇᒥ ᐱᖓᓐᓇᒧᑦ ᐅᒥᐊᒃᑯᑦ ᑕᓪᓗᕈᑎᐅᑉ ᐃᒪᖓᒍᑦ. ᐊᐅᓪᓚᖅᓯᒪᓪᓗᑎᑦ, ᐋᕆᐊᒃ ᐊᒻᒪᓗ ᐊᑖᑕᖓ ᐆᒪᔪᖅᑐᒥᓂᐅᕘᒃ, ᓂᕆᔭᐅᓪᓗᓂ ᐳᑭᖅᑕᓕᒃᑯᓐᓄᑦ, ᐊᒻᒪᓗ ᓇᑦᑎᖅᓯᐅᖃᑦᑕᖅᖢᑎᑦ ᕿᒻᒥᖏᓐᓄᑦ ᕿᒥᖅᑯᑎᒃᓴᓂᑦ. ᓖᑎᐊ ᐊᓐᓄᕌᓕᐅᖅᐸᒃᖢᓂ ᐊᖑᑎᓄᑦ ᐊᒻᒪᓗ ᐸᓂᒃᐸᒃ ᐃᑲᔪᖅᐸᓚᐅᖅᑐᖅ ᐊᖁᑎᐅᕙᒃᖢᓂ ᓴᐃᓐᑦ. ᕌᒃᒥᒃ. ᐸᓂᒃᐸᑯᑦᑐᑉ ᐃᓚᒌᓪᓗ ᕿᓪᓚᖃᕐᕕᒻᒦᓚᐅᖅᓯᒪᔪᑦ ᐊᕐᕌᒍᒥ ᐊᑕᐅᓯᕐᒥ ᐊᑯᓂᐅᑎᒋᔪᖅ ᐃᑭᒃᑲᓐᓂᓕᕆᓪᓗᑎᑦ ᓴᐃᓐᑦ. ᕌᒃ ᐅᒥᐊᕐᒧᑦ ᑲᓇᓐᓇᒧᑦ ᐃᖃᓗᒃᑑᑦᓯᐊᕐᒧᑦ ᐅᑮᓪᓗᑎᑦ. ᕿᒧᒃᓯᒃᑯᑦ ᐊᐅᓪᓚᓕᕆᓪᓗᑎᑦ ᕗᐊᑦ ᕌᔅᒧᑦ (ᒫᓐᓇ ᐃᓄᖃᕈᓐᓃᖅᑐᖅ ᓂᐅᕕᕐᕕᕕᓂᖅ ᑕᐅᕙᓃᑦᑐᖅ ᖃᐅᓱᐃᑦᑐᖅ ᐊᒻᒪᓗ ᑕᓗᕐᔪᐊᑉ ᐊᑯᕐᖓᖓᓂ) ᐊᐃᔭᐅᓚᐅᖅᓯᒪᔪᑦ ᓂᐅᕕᕐᕕᒃᑯᑦ ᐅᒥᐊᕐᔪᐊᖓᓄᑦ ᓈᓯᑰᐱᒧᑦ ᐅᑎᑦᑕᓯᓐᓇᓕᖅᖢᑎᑦ ᒥᑦᑎᒪᑕᓕᖕᒧᑦ ᓯᑏᕝᕙ 1946ᖑᑎᓪᓗᒍ, ᒪᕐᕉᒃ ᐊᕐᕌᒎᒃ ᐊᓂᒍᖅᑐᒥᓂᐅᑎᓪᓗᑎᒃ ᐊᐅᓪᓚᓚᐅᖅᓯᒪᒻᒪᑕᓂᑦ.
ᓖᑎᐊ (ᕿᑎᐊᓂ, ᓵᙵᔪᖅ ᐊᔾᔨᓕᐅᕈᑎᒧᑦ, ᔫ ᐸᓂᒃᐸᑯᑦᑐᑉ ᓄᓕᐊᖓ) ᐊᒻᒪᓗ ᐸᓂᒃᐸᒃ (ᕿᑎᐊᓂ, ᑐᓄᙵᔪᖅ ᐊᔾᔨᓕᐅᕈᑎᒧᑦ, ᔫ ᐸᓂᒃᐸᑯᑦᑑᑉ ᐊᓈᓇᖓ) ᒥᖅᓱᖅᑐᖅ ᐊᐃᑉᐸᖃᖅᖢᓂ ᐃᓚᒥᓂᒃ ᐅᒥᐊᕐᔪᐊᕐᒥ, ᓴᐃᓐᑦ. ᕉᑦᔅ ᐋᒡᒌᓯ 1994. Courtesy Of The Vancouver Maritime Museum, Larsen Fonds Collection
ᓄᓕᐊᕆᔭᐅᔪᑦ ᐳᑭᖅᑕᓕᒃᑯᑦ ᐃᑲᔪᖅᑎᖏᑕ ᐃᑲᔪᖅᐸᓚᐅᖅᓯᒪᖕᒥᔪᑦ ᐳᑭᖅᑕᓕᒃᑯᓐᓂᑦ ᑐᓵᔨᐅᖃᑦᑕᖅᖢᑎᑦ. 1926ᖑᑎᓪᓗᒍ, ᐅᓂᒃᑳᑦ ᑕᑯᒃᓴᐅᑎᑦᑎᔪᑦ ᒪᕆᐊ ᑐᕇᓴ ᑯᒪ’ᓈᖅ ᐹᑲ ᑭᕙᓪᓕᕐᒥᐅᖅ ᐳᑭᖅᑕᓕᒃᑯᓐᓄᑦ ᑐᓵᔨᒋᔭᐅᓚᐅᖅᓯᒪᔪᖅ ᐊᒻᒪᓗ ᐊᐅᓪᓚᖃᑕᐅᓪᓗᓂ. ᐳᑭᖅᑕᓕᑉ ᐃᑲᔪᖅᑎᖓ ᐹᑲᑉ ᓄᓕᐊᕆᓚᐅᖅᓯᒪᔭᖓ (ᐹᑲ ᐅᕝᕙᓘᓐᓃᑦ ᐹᑲᕐᔪᐊᖅ) ᐊᒻᒪᓗ ᐊᔪᕿᖅᑐᐃᔨᒃᑯᑦ ᑐᒃᓯᐊᕐᕕᖏᓐᓄᑦ ᐱᕈᖅᓴᑎᓪᓗᒍ ᖃᓪᓗᓇᐅᔭᕆᐅᖅᓴᑎᑕᐅᓚᐅᖅᓯᒪᔪᖅ.
ᐃᓛᓐᓂᒃᑯᑦ, ᓱᕈᓯᑦ ᐊᓪᓛᑦ ᐸᓖᓯᒃᑯᓐᓄᑦ ᑐᓵᔨᒋᔭᐅᓚᐅᖅᓯᒪᔪᑦ, ᐊᔾᔨᙳᐊᕐᒥ ᑕᑯᔪᓐᓇᖅᑐᑎᑦ 12ᓂᒃ ᐅᑭᐅᓕᒃ ᐲᑕ ᓇᑎᑦ ᕿᑎᕐᒥᐅᖅ. ᓱᕈᓰᑦ ᐃᑲᔪᖅᐸᓚᐅᖅᑐᑦ ᐊᑖᑕᖏᖕᓂᒃ ᑲᒪᓪᓗᑎᑦ ᕿᒻᒥᓂᒃ ᐅᕝᕙᓘᓐᓃᑦ ᐊᐅᓪᓚᖃᑎᒋᔭᐅᕙᒃᖢᑎᑦ ᐅᐊᑦᑎᔭᖅᑐᓕᕋᐃᖕᒪᑕ ᖃᐅᔨᓴᕆᐊᖅᖢᑎᑦ.
ᐊᕐᕌᒎᕋᑖᕐᓂᓴᐅᓚᐅᖅᑐᓂᓪᓕ, ᓄᓕᐊᕆᔭᐅᔪᑦ ᑭᐅᔨᐅᖃᑦᑕᓕᓚᐅᖅᓯᒪᔪᑦ − ᑐᓴᖅᑎᑦᑎᕙᒃᖢᑎᑦ ᐅᖄᓚᐅᑎᓂᑦ ᐊᖏᕐᕋᖏᓐᓄᑦ. ᐊᒻᒪᓗ ᐃᓛᓐᓂᒃᑯᑦ ᐃᓄᐃᑦ ᐊᕐᓇᐃᑦ ᐅᐊᑦᑎᔨᐅᖁᔭᐅᕙᓚᐅᖅᓯᒪᔪᑦ ᑎᒍᔭᐅᒪᔪᓂᑦ.
ᑕᑯᔪᓐᓇᖅᑐᑎᑦ, ᐊᖑᑎ ᐃᖅᑲᓇᐃᔮᖅᑖᕋᐃᖕᒪᑦ ᐳᑭᖅᑕᓕᒃᑯᓐᓄᑦ ᐃᑲᔪᖅᑎᒋᔭᐅᓪᓗᓂ, ᑐᑭᖃᖅᐸᓚᐅᕐᒥᔪᖅ ᐃᓚᒌᓕᒫᑦᑎᐊᑦ ᐃᑲᔪᕐᓂᐊᕐᒪᑕ, ᐊᑭᓕᖅᓱᖅ ᑕᐅᒐᓗᐊᕈᑎᓪᓘᓐᓃᑦ ᐊᑭᓕᖅᓱᖅᑕᐅᙱᒃᑲᓗᐊᖅᖢᑎᓪᓘᓐᓃᑦ. ᐃᖅᑲᐅᒪᔭᕆᐊᖃᖅᑐᒍᑦ, ᐅᐊᑦᑎᐊᕈ, ᐊᕐᓇᐃᑦ ᐊᒻᒪᓗ ᓱᕈᓰᑦ ᐱᒻᒪᕆᐊᓗᒃᑯᑦ ᐃᑲᔪᕐᔪᐊᖅᓯᒪᔪᑦ ᐳᓖᓯᓕᕆᓂᕐᒥᒃ ᐃᓄᐃᑦ ᓄᓇᖓᓐᓂ.
