ᐊᖑᓇᓱᒃᑏᑦ

ᐊᖑᓇᓱᒃᑏᑦ ᐃᓚᒋᔭᐅᕙᒃᑐᑦ ᓂᕿᒃᓴᓂᒃᓯᕙᒃᑐᓄᑦ ᓄᓇᓕᖕᓂᒃ, ᖃᐅᔨᑎᑦᑎᕙᓪᓕᐊᓇᓱᒃᓱᑎᒃ ᖃᐅᔨᒪᔭᐅᔭᕆᐊᓕᖕᓂᒃ ᐊᒻᒪᓗ ᐊᔪᕈᓐᓃᖅᑕᐅᔪᓐᓇᖅᑐᓂᒃ ᐃᓚᐅᔪᒪᔪᓄᑦ, ᐊᕙᑎᓕᕆᓂᕐᒧᑦ ᖃᐅᔨᓴᖃᑦᑕᕐᓂᕐᒥᒃ ᐊᒻᒪᓗ ᓇᐅᑦᑎᖅᑐᐃᔨᐅᖃᑦᑕᕐᓂᕐᒥᒃ, ᐃᑲᔪᖅᑎᐅᕙᒃᓱᑎᒡᓗ ᕿᓂᖅᑎᓄᑦ ᐊᒻᒪᓗ ᐃᑲᔪᖅᑎᐅᕙᒃᓱᑎ ᐃᓄᖕᓂᒃ, ᐊᖑᓇᓱᒃᑎᓂᒃ, ᐃᓐᓇᑐᖃᕐᓂᓗ.

“ᐃᓄᐃᑦ ᐊᖑᓇᓱᒃᑎᐅᖃᑦᑕᐃᓇᕐᒪᑕ,” ᐅᖃᓚᐅᖅᑐᖅ ᐊᖑᓇᓱᒃᑎᒃᑯᓐᓂ ᖃᐅᔨᓴᖅᑎ ᐊᒻᒪ ᐃᑲᔪᖅᑎᐅᖃᑕᐅᔪᖅ ᑯᓄᒃ ᐃᓅᑎᖅ. “ᐅᒃᐱᕆᔭᕗᑦ, ᐊᕙᑎᓕᕆᓂᕐᒥᒃ ᐃᓱᒪᒋᖃᕈᓯᕗᑦ, ᒪᓕᒋᐊᖃᓲᕆᕗᑦ ᑐᙵᕕᐅᓪᓗᑎᒃ ᐱᔾᔪᑎᖃᖅᐳᑦ ᐊᖑᓇᓱᕐᓂᕐᒥᒃ ᐃᓅᓯᑦᑎᓐᓂ. ᓴᙱᔪᒥᒃ ᓇᒡᓕᖕᓂᕐᒥᒃ ᐊᒻᒪᓗ ᐃᒃᐱᒍᓱᑦᑎᐊᖃᑦᑕᕐᓂᕐᒥᒃ ᐃᒃᐱᒍᓱᖕᓇᕐᒪᑦ ᓂᕿᒃᓴᖅᓯᐅᕈᔾᔨᕙᖕᓂᖅ ᐅᕙᑦᑎᓄᑦ, ᐃᓚᒋᔭᑦᑎᓐᓄᑦ, ᐃᓄᖕᓄᓪᓗ ᓄᓇᑦᑎᓐᓂ.”

ᐊᖑᓇᓱᒃᑏᑦ ᐃᖅᑲᓇᐃᔭᖃᑕᐅᓐᓂᖏᓐᓂ ᐊᑭᓕᖅᑐᖅᑕᐅᕙᒃᑐᑦ ᐅᓪᓗᓕᒫᖅᓯᐅᑎᓂᒃ ᑕᒪᐃᓐᓂᒃ ᐊᔪᙱᓂᕐᒥᓂᒃ ᐊᔪᕈᓃᖅᓴᐃᒋᐊᓪᓚᑲᓐᓂᕈᓐᓇᖁᓪᓗᒋᑦ ᐊᒻᒪᓗ ᐃᓕᓐᓂᐊᖅᑎᑦᑎᕙᓪᓕᐊᔪᓐᓇᖁᓪᓗᒋᑦ ᖃᐅᔨᒪᓕᖅᑕᒥᓂᒃ. ᑕᐃᒪᐃᓕᐅᕐᓂᖏᑦ ᖃᓄᖅᑑᕈᑎᑦᓯᐊᕙᐅᕗᖅ ᓂᕿᒃᓴᖃᑦᑎᐊᕈᓐᓇᓂᕐᒧᑦ ᐃᓄᐃᑦ ᓄᓇᖏᓐᓂ. ᐊᖑᓇᓱᒃᑏᑦ ᐱᒋᐊᓚᐅᖅᓯᒪᔪᑦ 2020−ᒥ ᐆᒃᑐᓱᑎᒃ ᐊᑕᐅᓰᓐᓇᕐᒥᒃ ᐅᓪᓗᓕᒫᖅᑐᒥᒃ ᐊᖑᓇᓱᒃᑎᖃᕐᓂᕐᒥᒃ, ᑕᐃᑲᖓᓪᓗ ᐊᒥᓱᕈᕆᐊᖅᓯᒪᓪᓗᑎᒃ ᑕᓪᓕᒪᐅᓕᖅᓱᑎᒃ ᐊᖑᓇᓱᒃᑏᑦ−ᐊᔪᕈᓐᓃᖅᓴᐃᔩᑦ ᐅᓪᓗᓕᒫᖅᐸᒃᑐᑦ ᐊᒻᒪᓗ ᐃᑲᔪᖅᑎᖃᓕᖅᓱᑎᒃ ᐃᖅᑲᓇᐃᔭᖅᑎᓂᒃ ᐱᓕᕆᕙᒃᑐᓂᒃ ᐊᕐᕌᒍᓕᒫᖅ. ᓇᓗᓇᖏᑦᑎᐊᖅᑐᑦ ᑖᒃᑯᐊ ᐱᐅᔫᑎᐊᓗᖕᓂᒃ ᐊᒃᑐᐃᓂᖃᕐᒪᑕ ᐃᑲᔫᑕᐅᕙᒃᓱᑎᒡᓗ ᑲᖏᖅᑐᒑᐱᖕᒥᑦ ᐊᒻᒪᓗ ᐊᓯᖏᓐᓂᑦ ᐃᓄᐃᑦ ᓄᓇᓕᖏᓐᓂᑦ, ᑭᓯᐊᓂ ᐊᖑᓇᓱᒃᑏᑦ ᐊᐅᓚᕙᒃᑐᑦ ᐃᓱᒫᓘᑕᐅᖃᑦᑕᐃᓐᓇᖅᓱᓂ ᑮᓇᐅᔭᒃᓴᓂᒃᑕᐅᖃᑦᑕᐃᓐᓇᕈᓐᓇᕐᓂᖏᑦ. ᑮᓇᐅᔭᖃᑦᓯᐊᖏᓐᓂᖏᑦ ᐊᑭᓕᐅᑎᒃᓴᖏᓐᓄᑦ, ᐱᖁᑎᖃᑦᑎᐊᕐᓂᖏᓐᓄᑦ, ᐊᓯᖏᓐᓂᒡᓗ ᐱᖁᑎᕐᔪᐊᖃᕐᓂᖏᓐᓄᑦ ᐊᕝᕕᐊᕈᑎᐅᕗᑦ ᐊᖑᓇᓱᒃᑏᑦ ᑲᔪᓰᓐᓇᕈᓐᓇᓯᐊᕐᓂᖏᓐᓄᑦ.

ᑲᔪᓯᑐᐃᓐᓇᕈᓘᔭᕆᕗᑦ ᑕᐃᒪᙵᑦ ᐊᔪᕈᑎᖃᖅᑎᑕᐅᖏᓐᓇᕋᓗᐊᖅᑎᓪᓗᒋᑦ ᑖᒃᑯᐊ ᒪᓕᒐᖃᖅᑎᑕᐅᖏᓐᓇᕐᓂᖏᓐᓄᑦ ᐱᑐᖃᐅᔪᓂᒃ ᐃᒍᑉᑎᕆᔪᓐᓇᖅᑐᓂᒃ ᐋᖅᑭᐅᒪᔭᖏᓐᓂᒃ ᐃᑲᔫᑎᒃᓴᓂᒃ ᐃᓄᖕᓄᑦ ᑐᕌᖓᔪᓂᒃ ᐊᖑᓇᓱᒃᑎᐅᓕᕈᓐᓇᕐᓂᖏᓐᓄᑦ. ᐃᓄᐃᑦ ᓄᑕᕋᖏᑦ ᐃᓕᓐᓂᐊᕆᐊᖅᑎᑕᐅᕙᓚᐅᕐᓂᖏᑦᑕ ᓯᕗᓂᐊᒍᑦ, ᐃᓄᐃᑦ ᓄᒃᑎᖅᑕᐅᖃᑦᑕᓚᐅᕐᓂᖏᑦᑕ ᓄᓇᖃᕈᑕᐅᓇᓱᓐᓂᕐᒧᑦ ᑲᓇᑕᒧᑦ ᓯᕗᓂᐊᒍᑦ, ᐊᒻᒪᓗ ᐊᓯᖏᑦ ᐃᓄᐃᑦ ᐃᓅᓯᕆᕙᓚᐅᖅᑕᖏᑦ ᓈᒻᒪᒍᓐᓃᕈᑕᐅᓯᒪᓂᖏᑦᑕ ᓯᕗᓂᐊᒍᑦ, ᐃᓄᐃᑦ ᐋᖅᑭᐅᒪᑦᓯᐊᖅᑐᓂᑦ ᐱᐅᓯᑐᖃᖃᖅᐸᓚᐅᖅᐳᑦ ᐃᓅᖃᑎᒌᑦᑎᐊᓂᕐᒨᖓᔪᓂᑦ ᐃᒃᐱᒍᓱᑦᑎᐊᓂᕐᒨᖓᔪᓂᓪᓗ ᐃᓅᖃᑎᒥᓂᒃ, ᓄᓇᒥᓂᒃ ᐊᒻᒪᓗ ᐆᒪᔪᓂᑦ. ᐃᓄᐃᑦ ᐊᓂᒎᑎᖃᑦᑕᕈᓐᓇᕐᓂᖏᑦ ᐅᔾᔨᖅᑐᕈᑎᒋᖕᒪᔾᔪᒃ ᑕᒪᒃᑯᓂᖓ ᖃᐅᔨᒪᔭᑐᖃᖏᓐᓂᒃ, ᐱᑕᖃᐃᓐᓇᕆᐊᖃᕐᓂᖏᓐᓄᑦ ᐊᑐᖅᑕᐅᖃᑦᑕᐃᓐᓇᕐᓗᑎᒃ ᑲᔪᓯᔪᒥᒃ ᐸᖅᑭᔨᐅᑦᑎᐊᕈᓐᓇᕐᓂᕐᒧᑦ ᐃᓚᒋᔭᒥᓂᒃ, ᓄᓇᓕᖕᒥᐅᑕᖏᓐᓂᒡᓗ.

ᐊᖑᓇᓱᒃᑏᑦ ᐱᓕᕆᐊᕆᔭᖏᑦ ᐊᑐᓕᖅᑎᑕᐅᕙᓪᓕᐊᒥᔪᑦ ᐊᓯᖏᓐᓂ ᐃᓄᐃᑦ ᓄᓇᖏᓐᓂ. ᑕᒫᓂ ᔭᓄᐊᕆ 2023-ᒥ, ᐃᑦᑕᒃᑯᑦ ᑕᐃᒃᑯᐊᓗ ᒪᕐᕉᕕᒃ ᒐᕙᒪᒃᑯᖏᑦ ᓄᓇᑦᓯᐊᕗᒻᒥ, ᐸᕐᓇᐅᓯᐅᖅᐸᓪᓕᐊᖃᑎᒋᔭᐅᓚᐅᖅᑐᑦ ᐊᑐᕐᓂᐊᖅᑕᒥᓂᒃ ᐊᑕᐅᓯᕐᒧᑦ−ᐊᕐᕌᒍᒧᑦ ᐅᓪᓗᓕᒫᖅᑎᐅᓇᔭᖅᑐᓂᒃ ᐊᖑᓇᓱᒃᑎᖃᕐᓂᕐᒥᒃ ᑲᔪᓯᑎᑦᑎᒋᐊᕈᒪᓪᓗᑎᒃ ᑕᐅᕙᓂ ᐊᓯᐊᓂ ᐃᓄᐃᑦ ᓄᓇᓕᖓᓂ. ᒪᕐᕉᕕᖕᒥ ᐱᒋᐊᖅᑎᑕᐅᓇᓱᓐᓂᖏᑦ ᑖᒃᑯᐊ ᐊᑐᐃᓐᓇᐅᑎᑦᑎᓂᐊᓕᖅᑐᑦ ᐃᓄᐃᓐᓇᕐᓄᑦ ᑐᕌᖓᔪᓂᒃ ᐃᓕᓐᓂᐊᖃᑎᒌᒍᑎᒃᓴᓂᒃ ᐱᔾᔪᑎᖃᖅᑐᓂᒃ ᐊᖑᓇᓱᖃᑦᑕᕐᓂᕐᒥᒃ, ᓂᕿᒃᓴᓂᒃᓯᖃᑦᑕᕈᓐᓇᕐᓂᕐᒥᒃ ᓇᓕᖅᑲᒌᑎᑦᑎᕙᒡᓗᑎᒃ, ᕿᑦᓯᕆᓂᕐᒥᒃ, ᐊᒻᒪᓗ ᐊᖏᕐᕋᕆᔭᐅᔪᓄᑦ ᕿᔪᒃᑕᕈᔾᔨᖃᑦᑕᕐᓂᕐᒥᒃ ᐅᖅᑰᓴᐅᑎᒃᓴᖏᓐᓄᑦ ᐃᒡᓗᖏᓐᓂ. ᑐᑭᓯᓂᐊᖃᑦᑕᐅᑎᕙᓐᓂᖏᑦ ᐋᖅᑭᐅᒪᓂᐊᖅᑐᑦ ᐱᓕᕆᖃᑎᒌᑦᑎᐊᕈᓐᓇᕐᓂᕐᒧᑦ ᑐᕌᖓᔪᓂᒃ, ᖃᐅᔨᒪᔭᒥᓂᒡᓗ ᑐᓴᐅᒪᑎᑦᑎᕙᓪᓕᐊᔪᓐᓇᖁᓪᓗᒋᑦ ᓄᓇᓕᖕᒥᓂ, ᐃᓕᓐᓂᐊᑎᑕᐅᓗᑎᒃ ᓯᕗᓕᐅᖅᑎᓄᑦ ᖃᐅᔨᒪᔪᓂᒃ ᓄᓇᖁᑎᒥᓂᒃ. ᐱᒻᒪᕆᐅᕗᖅ ᑕᒪᓐᓇ ᓄᓇᓕᖕᓄᑦ ᐊᑐᓂ, ᐱᕕᒃᓴᖃᕆᐅᕐᓂᐊᕐᒪᑕ  ᐊᓯᑦᑎᐊᒻᒪᕆᖏᓐᓂᒃ ᓄᓇᖓᑕ ᐊᕕᒃᑐᖅᓯᒪᓂᖓᓂᒃ ᑕᐅᖅᓰᖃᑕᐅᔪᓐᓇᕐᓂᖅ ᐱᐅᓯᑐᖃᕆᔭᐅᔪᓂᒃ ᐊᖑᓇᓱᒍᓯᕆᔭᐅᔪᓂᒃ ᐊᒻᒪᓗ ᓄᓇᒦᖃᑦᑕᕈᓯᕆᔭᐅᔪᓂᒃ.

ᑕᒫᓂ ᐅᐱᕐᖔᒃᑯᑦ 2023−ᒥ, ᒪᕐᕉᕕᖕᒥᐅᑦ ᐊᐅᓪᓛᓚᐅᖅᐳᑦ ᒪᕐᕉᕕᖕᒥᒃ ᑲᖏᖅᑐᖔᐱᖕᒧᑦ ᐱᒋᐊᕐᓂᐊᓕᕋᒥᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᑕᐅᓰᖃᑦᑕᐅᔭᖅᑐᕐᓂᕐᒥᒃ. ᐊᐅᓪᓛᓚᐅᖅᑐᑦ ᐱᖓᓱᓂ ᐅᓪᓗᓂᒃ ᐊᑐᖅᓱᑎᒃ, ᐊᒻᒪᓗ ᐱᖓᓱᓂᒃ ᐊᔾᔨᒌᖏᑦᑑᑎᓂᒃ ᖃᖓᑕᓲᕐᓂᒃ. ᑕᒪᐃᓐᓂᑲᓴᒃ ᐊᐅᓪᓛᖃᑕᐅᔪᑦ ᓄᓇᕗᒻᒧᐊᕆᐅᖅᓱᑎᒃ, ᖃᓪᓗᓈᑦ ᓄᓇᓕᒡᔪᐊᖓᒎᕆᐊᖃᓚᐅᖅᓱᑎᓗ ᓲᕐᓗ ᑕᐅᕘᓇ ᐋᑐᕚᒃᑯᑦ. ᒪᒥᐊᓇᖅᑐᖅ ᐋᑐᕚᒃᑰᕆᐊᖃᓚᐅᕐᓂᖏᑦ ᑭᓯᐊᓂᐅᓂᖓᓄᑦ ᐊᕕᒃᑐᖅᓯᒪᓂᖓᓄᐊᕋᓱᐊᕐᓂᖏᓐᓂᒃ ᓄᓇᒋᙱᑕᒥᓄᑦ, ᑎᑭᓴᐃᔪᓐᓇᕋᓗᐊᕆᓪᓗᑎᒃ ᖃᖓᑕᓲᕐᒥᒃ ᐃᓛᓐᓂᒃᑯᑦ ᑭᓯᐊᓂ ᐊᑭᑐᓗᐊᖃᑦᑕᕐᓂᖓᓄᑦ ᐅᕝᕙᓗᓐᓃᑦ ᑎᑭᑦᑐᓐᓇᓲᖑᖏᓐᓂᖏᓐᓄᑦ ᒥᑭᔫᑎᐅᓂᖅᓴᓄᑦ ᑎᑭᑐᒪᔭᖏᓐᓄᑦ ᓄᓇᓕᖕᓄᑦ ᐊᔪᕈᑕᐅᕙᖕᒥᖕᒪᑕ.

ᒪᕐᕉᕕᖕᒥᐅᑦ ᑕᑯᓂᐊᖅᑎᑕᐅᓚᐅᖅᑐᑦ ᐃᑦᑕᕐᒥᒃ, ᐃᓕᓐᓂᐊᖅᑎᑕᐅᓗᑎᒡᓗ ᐊᖑᓇᓱᒃᑏᑦ ᖃᐅᑕᒫᖅᓯᐅᑎᖏᓐᓂᒃ. ᖃᐅᔨᑎᑕᐅᓚᐅᕐᒥᔪᑦ ᖃᓄᐃᑦᑐᓂᒃ ᖃᐅᔨᒋᐊᕐᕕᖃᓲᖑᖕᒪᖔᑕ ᐊᒻᒪᓗ ᖃᓄᐃᑦᑐᓂᒃ ᐱᖁᑎᕐᔪᐊᖃᕆᐊᖃᓲᖑᖕᒪᖔᑕ, ᓲᕐᓗ ᓯᓚᓕᕆᕝᕕᖏᓐᓂᒃ, ᖃᓄᕐᓗ ᐊᐅᓚᑕᐅᕙᖕᒪᖔᑕ ᒪᓕᒃᑐᓂᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᒻᒪᓗ ᓇᐅᒃᑰᖃᑦᑕᕐᒪᖔᑕ ᐊᐅᓪᓛᕐᕕᑐᖃᖏᓐᓄ. ᑎᑭᓯᒪᓂᖏᓐᓂ ᓄᓇᓕᖕᒧᑦ, ᒪᕐᕉᕕᖕᒥᐅᑦ ᐃᓚᐅᖃᑦᑕᓚᐅᖅᑐᑦ ᐱᙳᐊᖃᑎᖃᖅᑐᑎᑦ ᐃᓐᓇᑐᖃᕐᓂᒃ, ᐃᓄᒃᓯᐅᑎᓂᒡᓗ ᓂᕆᕙᒃᓱᑎᒃ ᐊᖑᓇᓱᒃᑎᖏᓐᓂᖔᖅᑐᓂᒃ, ᐊᒻᒪᓗ ᑕᑯᓂᐊᖅᑐᑎᒃ ᐱᖅᑯᓯᓕᕆᕕᖏᓐᓂᒃ, ᐃᓄᖕᓄᑦ ᐃᓕᖅᑯᓯᑐᖃᓕᕆᕕᖓᓂᑦ ᐃᓚᒋᔭᐅᔪᓂᒃ ᐅᑭᐅᖅᑕᖅᑐᒥ ᓯᓚᑦᑐᖅᓴᖅᕕᒃᑯᓄᑦ. ᑲᖏᖅᑐᒑᐱᖕᒥᐅᑦ ᐊᒃᓱᐊᓗᒃ ᑐᙵᓱᒃᑎᑦᑎᓚᐅᖅᑐᑦ ᓄᓇᒥᓄᑦ ᐃᓄᖕᓂᒃ ᐊᓯᖏᓐᓂᒃ ᐊᕕᒃᑐᖅᓯᒪᓂᕐᒦᖔᖅᑐᓂᒃ. ᐱᒻᒪᕆᐊᓘᓚᐅᕐᒪᑦ ᑕᒪᓐᓇ ᑕᐅᖅᓰᖃᑦᑕᐅᑎᔪᓐᓇᕐᓂᕐᒧᑦ ᐃᓕᖅᑯᓯᑐᖃᖏᓐᓂᒃ, ᐊᒻᒪᓗ ᒪᕐᕉᕕᖕᒥᐅᑦ ᓄᓇᓕᖕᒦᒍᓐᓇᓯᒃᓱᑎᒃ ᐃᓄᒃᑎᑐᑦ ᐅᖃᐅᓯᖃᕐᓂᖅᓴᐅᔪᒥᑦ.

ᐅᑭᐊᒃᓴᒃᑯᑦ ᑕᒫᓂ 2023−ᒥ,  ᓄᓇᕗᒻᒥᐅᑕᐃᑦ 9−ᖑᔪᑦ ᐊᐅᓪᓚᓕᓚᐅᕆᕗᑦ ᓄᓇᑦᓯᐊᕗᒻᒧᑦ ᑎᑭᓚᐅᖅᑐᑎᒡᓗ ᖃᓐᓂᖅᑐᒻᒪᕆᖕᒧ ᐊᒃᑑᐱᕆᒥ. ᓄᖅᑲᑭᑕᒋᐊᖃᓚᐅᖅᑐᑦ 11-ᖏᖅᑕᖅᓱᑎᒃ ᖃᖓᑕᓲᒃᑯᑦ ᐊᔾᔨᒌᖏᑦᑑᑎᓄᑦ ᑲᖏᖅᑐᒑᐱᖕᒥᒃ ᒪᕐᕉᕕᖕᒧᖓᐅᓂᖏᓐᓂ, ᐅᖃᓚᐅᖅᑐᖅ ᐃᓅᑎᖅ. ᐅᖓᓯᖕᓂᖃᑐᐃᓐᓇᕋᓗᐊᖅᑐᑦ ᓄᓇᓖᑦ ᐊᑯᓐᓂᐊᒍᑦ 1,774 ᑭᓛᒥᑕᓂᒃ, ᖃᓪᓗᓈᑦ ᓄᓈᒎᕆᐊᖃᕐᓂᖏᓐᓄᑦ ᐊᐅᓪᓛᕆᐊᖃᓚᐅᖅᑐᑦ ᐅᖓᓯᖕᓂᓕᖕᒥᒃ 6,541 ᑭᓛᒥᑕᓂᒃ.  ᐊᓯᐊᒎᓚᐅᕈᑎᑦ ᑕᐃᑯᖓ ᑐᕌᖓᑲᐅᑎᒋᓂᖅᓴᒃᑯᑦ ᐊᑯᓂᐅᑎᒋᓇᔭᓚᐅᖅᑐᓂᒃ ᑕᓪᓕᒪᓗᑳᓂᒃ ᐃᑲᕐᕋᓂᒃ ᖃᖓᑕᓲᒃᑯᑦ. “ᐊᒃᓱᕈᕐᓇᓂᖅᐹᖑᓚᐅᖅᑐᖅ ᖃᖓᑕᓲᒃᑰᕆᐊᖃᓚᐅᕐᓂᖅ. ᑐᑭᓯᕚᓪᓕᕈᑎᒋᓚᐅᖅᑕᕗᑦ ᖃᓄᖅ ᐊᔪᕐᓇᖅᑎᒋᕙᒻᒪᖔᑦ ᐅᑎᖅᑕᕈᓐᓇᕐᓂᖅ ᐃᓄᐃᑦ ᓄᓇᒐᓴᖏᓐᓄᑦ, ᐊᒻᒪᓗ ᖃᓄᐃᓕᐅᕆᐊᖃᕐᓂᖅ ᐃᓕᖅᑯᓯᑐᖃᕆᔭᐅᔪᓂᒃ ᑐᑭᓯᓂᐊᕈᒪᓂᕐᒧᑦ,” ᐅᖃᓚᐅᖅᑐᖅ ᐃᓅᑎᖅ. “ᐃᓄᐃᑦ ᑲᑎᓐᓇᒥᒃ, ᑕᐅᖅᓰᖃᑦᑕᐅᑎᕙᓪᓕᐊᓂᖏᓐᓂ ᐊᑐᖅᑑᔮᓚᐅᖅᑐᑦ ᐱᐅᓯᑐᖃᕐᒥᓂᒃ, ᐊᒃᓱᕈᓇᖅᑑᔮᖏᑦᑐᓂᒃ ᐃᖕᒥᓄᑦ ᐃᓅᓂᖏᓐᓄᑦ ᐱᐅᓯᑐᖃᕐᒥᓂᒃ ᐊᑐᕐᓂᕐᒥᓄᑦ.”  ᒪᕐᕉᕕᖕᒥ, ᐊᖑᓇᓱᒃᑏᑦ ᐊᖑᓇᓱᒃᑕᐅᓯᒪᔪᓂᒃ ᑕᐃᑲᓂ ᓂᕆᔭᕆᐅᓚᐅᖅᑐᑦ ᐃᓚᖏᓐᓂᒃ ᐊᓯᖏᓐᓂᒃ ᓇᑦᓯᕙᖕᓂᒃ ᐊᒻᒪᓗ ᑎᖕᒥᐊᕐᓂᒃ, ᐆᒐᖅᓯᐅᖅᑎᑕᐅᓪᓗᑎᒡᓗ ᐊᒻᒪᓗ ᐸᐅᕐᖓᖅᑕᖅᑎᑕᐅᓪᓗᑎᒃ. ᑕᒪᕐᒥᒃ ᓂᕆᕕᒡᔪᐊᓚᐅᖅᑐᑦ ᐃᓚᒋᓪᓗᒋᑦ ᓄᓇᓕᖕᒥᐅᑕᐃᑦ ᐊᖑᓇᓲᒃᑏᓗ, ᐃᓚᖏᓪᓗ ᐃᓐᓇᑐᖃᐃᑦ ᓂᕿᒃᓴᓂᒃᑕᐅᓚᐅᖅᓱᑎᒃ.

ᐊᖑᓇᓲᒃᑏᑦ ᓂᕆᔭᒃᓴᑖᖅᑎᑐᐃᓐᓇᐅᖏᑦᑐᑦ. ᐅᓪᓗᒥᐅᓕᖅᑐᖅ ᐃᓄᐃᑦ ᖃᓄᖅᑑᕈᑎᒃᓴᖅᓯᐅᖃᑦᑕᕐᑎᓗᒋᑦ ᓂᕿᒃᓴᖃᕈᓐᓇᕆᐊᖃᕐᓂᕐᒧᑦ, ᐊᔪᖅᓴᕈᑕᐅᕙᖕᓂᕐᒧᑦ, ᐊᓯᖏᓄᓪᓗ ᐊᔪᕈᑎᒋᔭᐅᕙᒃᑐᓄᑦ ᐃᓄᐃᑦ ᐱᔮᕆᔭᐅᖃᑦᑕᖅᓯᒪᓂᖏᓐᓄ ᖃᓪᓗᓈᕈᖅᑎᑕᐅᒐᓱᐊᖅᓯᒪᓂᖏᓐᓄᑦ, ᐊᖑᓇᓱᒃᑏᑦ ᐱᑕᖃᕆᐊᓕᒻᒪᕆᖕᓂᒃ ᐊᖅᑯᓯᐅᖅᑎᐅᓯᒪᓕᖅᑐᑦ ᑕᒪᒃᑯᓄᖓ ᐱᔪᓂᒃ ᐃᓚᒌᖕᓂᕐᒧᑦ ᐃᓕᖅᑯᓯᑐᖃᓕᕆᓂᕐᒧᓗ ᓄᓇᖁᑎᒥᓄᑦ. ᐱᕕᒃᓴᖃᖅᑎᑦᑎᕙᖕᒥᔪᑦ ᐃᓚᐅᔪᓐᓇᖅᓯᑎᑦᓱᒋᑦ ᒪᒃᑯᒃᑐᖁᑏᑦ ᓄᓇᓕᖕᓂ ᑕᐃᒫᒃ ᐊᓯᐊᒍ ᐱᕕᒃᓴᖃᖅᑎᑕᐅᕙᙱᑐᓂᒃ. ᐃᑲᔫᑎᒃᓴᐃᑦ ᑖᒃᑯᐊ ᐊᑐᖅᐳᑦ ᓯᕗᓪᓕᕕᓂᑦᑎᓐᓃᖔᖅᑐᓂᑦ − ᑐᙵᕕᐅᖏᓐᓇᖅᓱᑎᒡᓗ ᓂᕿᑦᑎᐊᕙᖃᖅᑎᑦᑎᓂᕐᒧᑦ ᐃᓕᖅᑯᓯᑐᖃᕆᔭᑦᑎᒍᑦ ᓄᓇᑦᑎᖕᓂᒡᓗ ᐊᖑᓇᓱᒃᑕᐅᓯᒪᔪᓂᑦ, ᐱᐅᓂᖅᓴᓂ ᓂᐅᕕᕐᕕᖕᓃᖔᖅᑐᓂᒃ ᓂᕿᒃᓴᓂᒃ. ᐃᓅᑎᖅ ᐅᖃᓚᐅᖅᑐᖅ ᐱᒻᒪᕆᐅᖃᑕᐅᖕᒪᑦ ᑕᒪᓐᓇ ᐊᖑᓇᓱᒃᑏᑦ ᐃᑲᔫᑎᖏᑦ “ᐃᓄᖕᓂᑦ ᐃᓅᒍᓐᓇᑎᑦᑎᓯᒪᒻᒪᑦ ᑲᙳᓇᖏᑦᑎᐊᖅᑐᒃᑯᑦ ᐃᓄᐃᑦ ᓄᓇᖓᓐᓂ.”