ᕿᓚᐅᑎᒧᑦ ᐆᒪᓂᖅ

ᑕᐃᑲᓂᓗᒃᑖᖅ ᖁᕕᐊᓱᒍᑕᐅᔪᒥ ᓴᖅᑭᑎᑦᑎᓚᐅᖅᐳᒍᑦ ᐆᒥᖓ ᑕᑯᕋᓐᓇᕐᓂᐅᔪᒥ, ᑕᑯᒃᓴᐅᑎᑦᑎᓪᓗᑕ ᐊᔾᔨᒌᙱᑦᑐᓂ ᑕᑯᕋᓐᓇᖅᑕᐅᓲᓂ ᐊᒻᒪ ᖃᓄᐃᑦᑑᓂᖏᓐᓂ, ᐃᓚᓕᐅᔾᔨᓪᓗᑕ ᑲᑕᔾᔭᕐᓂᕐᒥ, ᐅᐊᔩᕐᓂᖅ ᐅᕝᕙᓘᓐᓃᑦ ᑮᓇᑉᐸᖕᒥ ᒧᒥᕐᓂᐅᔪᒥ, ᐊᒻᒪᓗ ᐊᑐᒻᒪᕆᒃᖢᑕ loop pedal−ᒥ (ᓂᐱᓕᐅᕈᑎ ᐃᓕᑦᓯᑲᐅᑎᒍᑎᒥ ᑐᓴᕐᓂᔮᖅᑕᐅᔪᓄ) ᐅᐸᒃᑕᐅᓚᐅᖅᑐᒥ ᑕᑕᑦᑎᐊᖅᑐᒥ ᐃᒡᓘᔪᒥ.

ᐃᓕᓐᓂᐊᕐᓂᐅᔪᓂ, ᐅᖃᐅᓯᖃᓚᐅᖅᐳᒍᑦ ᐱᒻᒪᕆᐅᓂᖓᓂ ᕿᓚᐅᔾᔭᕐᓂᕐᒥ, ᖃᓄᖅ ᐅᕙᑦᑎᓐᓄᑦ ᑐᑭᖃᕐᓂᖓᓂ, ᐊᒻᒪ ᑕᑯᓂᑦᑎᓐᓂ ᕿᓚᐅᑎᒥᒃ ᐱᓕᕆᔾᔪᑕᐅᓂᖓᓄᑦ.
ᓇᖕᒥᓂᖅ, ᓵᙵᓂᖅᓴᐅᓯᒪᕗᖓ ᑲᑕᔾᔭᕐᓂᕐᒧᑦ, ᕿᓚᐅᔾᔭᕐᓂᕐᒥ ᐊᒻᒪ ᕿᓚᐅᔾᔭᕐᓂᕐᒧᑦ ᐱᓯᐅᔪᓂᑦ ᐃᓕᑦᑎᒃᑲᓐᓂᕋᓱᐊᕐᓂᕐᒧᑦ ᐅᖃᐅᓯᑦᑎᓂ, ᐃᓄᐃᑦ ᖃᐅᔨᒪᔭᑐᖃᖏᓐᓂ, ᐃᓄᐃᑦ ᐅᓂᒃᑳᖅᑐᐊᖏᓐᓂ, ᐊᒻᒪᓗ ᓴᙱᒃᑎᒋᐊᖅᓯᓂᕐᒥ ᐃᓅᓂᓐᓂ ᑭᓇᐅᓂᓐᓂ. ᑐᙵᓂᖃᖅᖢᓂ ᐃᒃᐱᒍᓱᖕᓂᐅᔪᒥ ᐃᒻᒥᓂᒃ ᐊᒻᒪ ᐅᖃᐅᓯᖃᕐᓂᕐᒥ ᑭᓇᐅᓂᕐᒥ ᐃᓅᖃᑎᓐᓂ ᐅᕙᓐᓂ ᑐᓂᓯᓂᖃᖅᐳᖅ ᐃᒃᐱᒍᓱᖕᓂᐅᔪᒥ ᐃᓚᒋᔭᐅᓂᓐᓂ ᐊᒻᒪ ᓇᑭᙶᕐᓂᐅᔪᒥ ᓴᙱᓂᐅᔪᒥ ᐱᕕᒃᓴᕆᔭᓐᓂ. ᐃᓚᐅᖃᑕᐅᑎᓪᓗᖓ ᓄᓇᕗᑦ ᓯᕗᓂᒃᓴᕗᑦ ᐃᓕᓐᓂᐊᕕᖕᒥᑦ ᐋᑐᕚᒥ, ᓴᓇᔪᓐᓇᓚᐅᖅᐳᖓ ᓇᖕᒥᓂᖅ ᕿᓚᐅᑎᓐᓂ ᖃᐅᔨᒪᔭᐅᕐᔪᐊᖅᑐᒥ ᕿᓚᐅᔾᔭᖅᑎᐅᔪᒥ ᑕᐃᕕᑦ ᓯᖅᑯᐊᕐᒥ. ᐃᓚᐅᖃᑕᐅᑎᓪᓗᖓ ᓄᓇᕗᒻᒥ ᐃᓕᑕᖅᓯᓂᐅᑉ ᒥᖅᓱᕐᓂᕐᒧᑦ ᐊᔪᙱᓐᓂᐅᔪᓂ ᐱᓕᕆᐊᖑᔪᒥ ᑕᐃᔭᐅᔪᒥ ᒥᖅᑯᑦ ᐱᓕᕆᐊᒃᓴᐅᔪᒥ, ᐃᓕᑦᑎᔪᓐᓇᓚᐅᖅᐳᖓ ᐆᒃᑑᑎᓕᐅᕐᓂᕐᒥᑦ ᐊᒻᒪ
ᑭᒡᒐᖅᑐᖅᑕᐅᓂᖏᓐᓂ ᐆᒪᔪᓄᑦ ᐊᒻᒪ ᒥᖅᓱᖅᖢᖓ ᓇᖕᒥᓂᖅ ᑐᐃᓕᖕᒥ ᐊᔪᕆᖅᓱᖅᑕᐅᓪᓗᑕ ᑲᖏᖅᖠᓂᕐᒥ ᐃᓄᑐᖃᕐᒧ ᒥᓯᔅ ᒥᐊᕆᐋᓐ ᑕᑦᑐᐃᓂᒧᑦ. ᐅᐱᒍᓱᓚᐅᖅᐳᖓ ᓇᒃᓴᕐᓂᕐᒥ ᓅᒻᒧᑦ ᑕᒪᒃᑭᓂ ᐊᓐᓄᕌᖑᔪᓂ ᐊᒻᒪ ᐊᑐᕐᓂᕐᒥ ᑕᑯᓐᓇᕋᖅᑕᐅᓂᐅᔪᓂ. ᐊᑯᓂᐅᔪᒃᑯᑦ, ᐃᓕᑦᑎᓂᖅ ᐊᑐᖅᑕᐅᕙᓚᐅᖅᑐᓂ, ᑕᐃᒎᓯᖏᓐᓂ, ᓇᓗᓇᐃᖅᓯᓂᖏᓐᓂ ᐊᒻᒪ ᐅᓂᒃᑳᖅᑐᓂ ᐱᓯᐅᔪᓄᑦ, ᒧᒥᕐᓂᐅᔪᓄᑦ, ᐊᓐᓄᕌᖏᓐᓄᑦ ᐊᒻᒪ ᓴᓇᕐᕈᑎᓂ ᐅᕙᓐᓂ ᑕᑯᑎᑦᑎᓯᒪᕗᖅ ᐃᓗᑐᔪᒥ ᐃᓱᒪᓂᐅᔪᒥ, ᐃᒃᐱᒍᓱᑦᑎᐊᕐᓂᐅᔪᒥ ᐊᕙᑎᒧᑦ, ᐊᒻᒪ ᐃᓱᒪᑐᓂᐅᔪᓂ ᐃᓄᖕᓄ ᓯᕗᓕᑦᑎᓐᓂ.

ᖁᕕᐊᓱᒍᑕᐅᔪᒥ, ᑲᑎᙵᓂᕗᑦ ᐃᙱᓚᐅᕆᕗᑦ ᐱᓯᕐᒥ ᓴᓪᓕᕐᒦᙶᖅᓯᒪᔪᒥ ᐃᓕᓚᐅᖅᑕᑦᑎᓐᓂ ᓲᓴᓐ ᐊᕕᙵᕐᒥ ᐊᒥᑦᑐᕐᒥᐅᒧ, ᐅᕝᕙᓘᓐᓃᑦ ᐃᒡᓗᓕᒃ. ᐅᓇ ᐱᓯᖅ ᓴᓇᔭᐅᓚᐅᖅᐳᖅ ᐊᖑᓇᓱᒃᑎᐅᔪᒥ ᐃᓄᑑᓪᓗᓂ ᐱᓱᖃᑎᖃᖅᖢᓂ ᕿᒻᒥᒥᓂᒃ ᐃᑲᔪᖅᑐᒥ ᓇᓂᓯᓂᖓᓂ ᐊᒡᓗᓂᑦ. ᐊᖑᓇᓱᒃᑎ ᐊᒃᓱᕈᖅᐳᖅ ᓇᓂᓯᓂᖓᓂ ᓈᒻᒪᒃᑐᓂ ᐅᖃᐅᓯᐅᔪᓂ ᐱᓯᖓᓄᑦ ᐃᓄᑐᖃᖏᑦ ᐱᓚᐅᕐᒪᑕ ᑕᒪᒃᑭᓂ ᐅᖃᐅᓯᕐᓂᑦ, ᑭᓯᐊᓂ ᐃᙱᐅᓯᖃᖅᐳᖅ ᐱᓚᐅᖅᑕᒥᓂ, ᐅᒡᔪᖕᒥ ᐊᒻᒪ ᑐᒃᑐᒥ. ᑐᓱᓐᓇᒦᒃ ᐊᕕᙵᖅ ᐃᓕᑦᑎᓚᐅᕐᓂᖓᓂ ᐱᐅᔪᒻᒪᕆᐊᓗᖕᓂ ᐱᓯᕐᒥ ᐊᒻᒪ ᐊᓕᐊᓇᐃᑦ ᐅᖃᐅᓯᕆᓚᐅᕐᒪᒍ.
ᐃᓱᒪᓕᐅᒍᓐᓇᖅᓯᒪᕗᖓ ᐱᒻᒪᕆᐅᓂᖓᓂ ᖃᐅᔨᒪᓂᕐᒥᑦ ᑕᐃᒃᑯᓂᖓ ᓄᑕᐅᙱᑦᑐᓂ ᐱᓯᕐᓂ, ᐊᒻᒪ ᑐᑭᓯᐅᒪᓂᕐᒥᑦ ᓇᓗᓇᐃᖅᑕᐅᓯᒪᓂᖓᓂ ᑕᐃᒎᓯᖏᓐᓂ ᐊᑐᖅᑕᐅᔪᓂ ᐱᓯᕐᓂᑦ ᐊᑐᖅᑕᐅᕙᙱᑦᑐᓂ ᐅᖃᓪᓚᖕᓂᐅᔪᒃᑯᑦ ᐅᖃᐅᓯᑦ ᐅᓂᒃᑳᕆᔪᓂ ᐆᒪᔪᓂᑦ ᐅᕝᕙᓘᓐᓃᑦ ᓴᓇᕐᕈᑎᓂ.

ᐃᓄᑐᖃᖅ ᐃᓄᑭᑦᓱᖅ ᓴᑐᕋᓇ ᖄᓈᕐᒥᐅᑕᖅ, ᐅᐊᖕᓇᒥ ᑲᓛᖦᖡᑦ ᓄᓈᓐᓂ, ᐅᓂᒃᑳᓚᐅᖅᐳᖅ ᑲᑎᙵᓂᑦᑎᓐᓄᑦ ᐃᓚᒌᖑᔪᒥ ᐱᓯᕐᒥ ᐊᑖᑕᖓᓂᙶᖅᑐᒥ ᐊᒻᒪ ᐊᑖᑕᑦᑎᐊᖓᓂ. ᕿᓚᐅᔾᔭᖅᑎᓪᓗᒍ, ᓄᓕᐊᖓ ᔨᓄᕕᕙ ᐃᙱᓚᐅᖅᐳᖅ ᐊᒻᒪ ᐅᐃᔾᔮᖅᑎᑦᑎᓪᓗᓂ ᒥᑭᑦᑐᒥ ᑑᒑᕐᒥ ᓴᓇᓯᒪᔪᒥ ᐋᕐᙳᐊᕐᒥ. ᐃᓱᐊᓂ ᐱᓯᕐᒥ ᐱᓕᕆᓂᖃᖅᐳᖅ ᖁᔭᓕᓂᖃᕐᓂᕐᒥ ᐊᒻᒪ ᐃᓕᓴᖅᓯᓂᐅᔪᒥ ᐱᓯᓕᐅᓚᐅᖅᑐᓂ. ᓄᑲ ᐋᓕᔅ ᓚᓐᑦ ᓯᓯᒥᐅᑕᖅ ᐃᙱᓚᐅᖅᐳᖅ ᐱᓯᕐᓂ ᓴᓇᓚᐅᖅᑕᖏᓐᓂ, ᐊᒻᒪ ᐃᖏᕐᕋᓂᕆᔭᖓᓂ ᐅᑎᖅᑎᕆᓂᕐᒧᑦ ᐊᒻᒪ ᐆᒻᒪᖅᑎᑦᑎᒃᑲᓐᓂᕐᓂᕐᒥ ᕿᓚᐅᔾᔭᕐᓂᕐᒥ. ᐅᖃᐅᓯᖃᕈᓐᓇᕐᓂᖅ ᐱᓯᐅᑉ ᐅᓂᒃᑳᖅᑐᐊᖏᓐᓂ ᐊᓯᖏᓪᓗ ᕿᓚᐅᔾᔭᖅᑎᓂ ᒪᑐᐃᖅᓯᓚᐅᖅᐳᖅ ᐅᖃᓪᓚᖕᓂᕐᒥ ᐃᓚᒌᖑᔪᑦ ᐱᓯᖏᓐᓂ, ᓇᖕᒥᓂᖅ ᐱᓯᕐᓂ, ᐊᒻᒪ ᑲᑐᔾᔭᐅᓪᓗᑎᒃ ᐱᓯᕐᓂ. ᑕᐅᑐᙳᐊᓲᖑᕗᖓ ᒥᖅᓱᕐᓂᕐᒧᑦ ᐆᒃᑑᑎᓂᑦ ᐃᓱᒪᖃᓕᕈᒪ ᐊᔾᔨᒌᙱᑦᑐᓂ ᕿᓚᐅᔾᔭᖅᑐᒧᑦ
ᐱᓯᕐᓂ, ᐃᓚᒋᓗᒋ ᐃᙱᖅᑎᖏᑦ. ᐃᓚᖏᓐᓂ ᐆᒃᑑᑎᐅᔪᓂ ᐃᓄᐃᑦ ᑐᓂᓯᔪᒪᑐᐃᓐᓇᖅᑐᓂ, ᐃᑲᔪᕐᓂᕐᒧᑦ ᓴᖅᑭᑎᑦᑎᓂᕐᒥ ᐆᒃᑑᑎᓂ ᐱᓕᕆᔾᔪᓯᐅᔪᓂ ᐆᒪᐃᓐᓇᕈᓐᓇᕐᓂᐊᕐᒪᑕ ᓯᕗᓂᒃᓴᒧᑦ; ᐊᒻᒪᓗ ᐃᓚᖏᓐᓂ ᐆᒃᑑᑎᐅᔪᓂ ᐊᒻᒪ ᖃᓄᐃᓕᖓᓂᖏᓐᓂ ᒥᖅᓱᖅᑎᐅᔪᑦ ᖃᐅᔨᒪᔭᐅᓂᖏᓐᓄᑦ, ᐊᒻᒪ ᑐᓂᓯᓂᐅᔪᒥ ᑭᒡᓕᖃᖅᑎᑕᐅᕗᑦ ᐃᓚᒋᔭᐅᔪᓄᑦ ᐊᒻᒪ ᓇᖕᒥᓂᖅ ᑲᑎᙵᓂᖃᖅᑐᓄᑐᐊᖅ.

ᐅᓂᒃᑳᖅᑐᐊᕗᑦ, ᐅᖃᐅᓯᕗᑦ, ᐊᑐᓚᐅᕐᓂᑯᕗᑦ ᐊᒻᒪ ᐃᒃᐱᒍᓱᑦᑎᐊᕐᓂᕗᑦ ᐆᒪᔪᓂᑦ ᐊᒻᒪ ᐊᕙᑎᒥᑦ ᑲᑎᙵᓂᖃᖅᐳᖅ ᓴᓇᐅᒐᓕᕆᓂᕐᒧᑦ. ᓴᓇᐅᒐᓕᕆᓃᑦ, ᐱᓗᐊᖅᑐᒥ ᑕᑯᓐᓇᕋᖅᑕᐅᓂᐅᔪᓂ, ᐱᓕᕆᔾᔪᑎᑦᑎᐊᕙᐅᕗᖅ ᐅᖃᐅᓯᕐᒥ ᐆᒻᒪᕆᐊᖅᑎᑦᑎᒃᑲᓐᓂᕐᓂᕐᒥ ᐊᒻᒪ ᐃᓕᖅᑯᓯᒧᑦ ᑲᑎᖃᑎᖃᒃᑲᓐᓂᕐᓂᐅᔪᒥ.

ᑕᒪᑦᑕ ᓴᖑᓲᖑᕗᒍᑦ ᓴᓇᐅᒐᓕᕆᓂᕐᒧᑦ—ᓴᓇᔨᐅᓪᓗᑕ ᐅᕝᕙᓘᓐᓃᑦ ᐊᑐᖅᑎᐅᓪᓗᑕᐱᓯᖅᑎᒍᑦ ᐊᒻᒪ ᓂᔾᔮᑎᑦᑎᓂᒃᑯᑦ; ᐅᓂᒃᑳᖅᑐᐊᕐᓂᒃᑯᑦ, ᐃᓚᖃᖅᑐᒥ ᑕᕐᕆᔭᓕᐊᓂ, ᑕᓚᕖᓴᒃᑯᑦ ᐊᒻᒪ ᖁᙱᐊᖅᑕᐅᓂᐅᔪᒃᑯᑦ; ᓴᓇᐅᒐᓂ ᐊᒡᒐᒧᑦ ᓴᓇᓯᒪᔪᓂ ᓲᕐᓗ ᑎᑎᕋᐅᔭᒐᕐᓂ, ᓴᐸᖓᑎᒍᑦ ᐊᒻᒪ ᒥᖅᓱᖅᑕᐅᓯᒪᔪᓂ ᑭᓱᑐᐃᓐᓇᓂ, ᐊᒻᒪ ᓴᓇᙳᐊᒐᓂ.
ᐱᓕᕆᓂᐅᕗᖅ ᑲᑎᖃᑎᖃᕐᓂᕐᒥ ᐊᖏᓂᖅᓴᐅᔪᒧᑦ ᓄᓇᓕᖕᒧᑦ, ᐅᕙᑦᑎᓐᓂ ᐅᖃᐅᓯᖃᕐᓂᕐᒧᑦ ᐊᒻᒪ ᐃᒃᐱᒋᔭᑦᑎᓐᓄᑦ, ᑕᑯᒃᓴᐅᑎᑦᑎᓂᕐᒥ ᐊᕙᑎᑦᑎᓐᓂ, ᐊᒻᒪ ᐅᖃᐅᓯᖃᕐᓂᕐᒥ ᐃᓕᓐᓂᐊᕐᓂᐅᔪᓂ. ᑕᐃᑲᓂ ᐱᓇᓱᐊᕈᓯᐅᔪᒥ ᓅᒃᒥ, ᑲᐅᑕᖅ ᐃᓕᖅᑯᓯᓕᕆᕝᕕᖅ ᕿᑎᐊᓃᓚᐅᖅᐳᖅ ᓴᓇᐅᒐᓕᕆᓂᕐᒥ, ᐊᒻᒪ ᐃᓂᐅᓪᓗᓂ ᓄᓇᓕᖕᒥᐅᑕᓄᑦ ᓴᓇᕕᐅᓪᓗᓂ ᐊᒻᒪ ᖁᔭᒋᔭᖃᕐᓂᕐᒥ ᓴᓇᐅᒐᓕᕆᓂᕐᒥ. ᖁᕕᐊᓱᒍᑎᖃᕈᓐᓇᖅᐳᒍᑦ ᐊᑐᖅᑕᐅᖏᓐᓇᖅᑐᒥ ᕿᓚᐅᔾᔭᕐᓂᒥᑦ ᐱᑦᔪᑎᒋᓗᒋᑦ ᓯᕗᓕᕗᑦ, ᐱᓯᖏᓐᓂᓗ ᐃᓕᑦᑎᓯᒪᒐᑦᑕ—ᓯᕗᒻᒧᑦ ᐃᖏᕐᕋᓂᐊᖅᑐᒍᑦ ᓴᖅᑭᑎᑦᑎᓂᒃᑯᑦ ᓄᑖᓂ ᐱᓯᕐᓂᑦ ᐊᒻᒪ ᑕᑯᓐᓇᕋᖅᑕᐅᒍᓯᕐᓂᑦ.