ᕿᒧᒋᐅᖅᓴᓂᕐᒧᑦ ᓴᙱᓂᖃᕐᓂᖅ

ᑕᒪᕐᒥ ᑖᒃᑯᐊᒃ ᐃᓅᒃ ᑐᙵᕕᖃᐃᓐᓇᓚᐅᖅᐴᒃ ᕿᒧᒃᓯᒥᓂᒃ. ᐊᑖᑕᒐᓕᑦᑕᐅᖅ, ᕼᐊᐅᓕ ᐃᑎᓐᓄᐊᖅ, ᑕᒪᑐᒥᖓ ᐃᓕᖅᑯᓯᑐᖃᕐᒥᒃ ᑲᔪᓯᑎᑦᑏᓐᓇᓚᐅᕐᒥᔪᖅ, ᐊᒥᓱᓂᒃ ᐅᓂᒃᑳᖃᑕᓚᐅᖅᑐᖅ ᐅᕙᓐᓄᑦ ᓯᕗᓪᓕᕐᒥ ᕿᒧᒃᓯᕆᐅᓕᓵᓚᐅᕐᓂᕐᒥᓂᒃ. ᐊᕙᓗᔭᐅᓯᒪᐃᓐᓇᕐᓂᑰᓪᓗᖓ, ᑐᓴᐅᒪᓪᓗᒋᓪᓗ ᖃᐅᔨᒪᓪᓗᒋᑦ ᕿᒧᒃᓰᑦ, ᐃᓐᓇᐅᓕᕋᒪ ᑭᓯᐊᓂ ᐆᒃᑐᕈᒪᓕᓵᓚᐅᖅᓯᒪᔪᖓ ᑕᒪᒃᑯᓂᖓ. ᓯᕗᓪᓕᐅᓚᐅᖅᑐᖓ ᐊᕐᓇᓂ ᐃᓚᒋᔭᑦᑎᓂᒃ ᐃᖅᑲᐅᒪᔭᐅᖃᑦᑕᐃᓐᓇᖁᔨᓕᓚᐅᕋᒪ ᑕᒪᑐᒥᖓ ᐱᐅᓯᑐᖃᕐᒥᒃ ᑲᔪᓯᕙᓪᓕᐊᔭᕆᐊᖃᕐᓂᖓᓂᒃ ᓯᕗᒧᑦ. ᓇᓗᓇᐃᔭᐃᔨᖃᑦᑎᐊᖅᓱᖓ ᐃᓱᒻᒥᖅᓴᐃᔨᖃᖅᓱᖓᓗ ᐃᖃᓗᖕᓂ, ᐊᔪᕈᓃᖅᓴᖅᑕᐅᓕᓚᐅᖅᑐᖓ ᐱᒋᐊᖅᓱᖓᓗ ᐃᒻᒥᓂ ᐃᓕᓐᓂᐊᕐᓂᕐᒥᒃ ᖃᐅᔨᕙᓪᓕᐊᕐᓂᕐᒥᓗ.

ᓯᕗᓪᓕᕐᒥ ᕿᒧᒋᐅᖅᓴᑎᑦᑎᓕᓵᕋᓱᖕᓂᖅ ᐃᓐᓇᐅᓕᖅᓱᓂ ᐅᑕᖅᑭᔪᓐᓇᑦᑎᐊᕆᐊᖃᕐᓇᖅᑐᖅ, ᐱᓇᓱᐃᓐᓇᕆᐊᖃᕐᓇᖅᑐᖅ ᐊᒻᒪᓗ ᐱᔪᒥᓂᖃᕆᐊᖃᕐᓇᖅᑐᑦ ᐊᑲᐅᔪᐃᓐᓇᐅᔾᔭᖏᑦᑐᒥᒃ ᐊᑐᕈᓐᓇᕆᐊᖃᕐᓂᖅ ᐊᒻᒪᓗ ᐊᔪᖏᓐᓂᖃᕐᓗᓂ ᐃᓕᑕᖅᓯᔪᓐᓇᕐᓂᖅ ᕿᒻᒦᑦ ᐊᑐᓂ ᐊᔾᔨᒌᖏᓪᓚᑐᖃᑦᑕᕐᓂᖏᓐᓂᒃ ᐱᐅᓯᕆᔭᖏᓐᓂ. ᐊᐅᓚᔨᕗᖓ ᑕᐃᔅᓱᒪᓂ ᑐᙵᕕᖃᓪᓚᕆᓕᓚᐅᕐᓂᕋᓂᒃ ᕿᒻᒥᓂᒃ. ᖃᒧᑏᖕᓂᒃ ᐸᕐᓇᐃᔪᓐᓇᖅᓯᒐᒪ, ᐊᓄᓕᖅᑐᐃᔪᓐᓇᖅᓯᓪᓗᖓᓗ, ᓇᖕᒥᓂᕐᓗ ᐃᓄᑑᓪᓗᖓ ᕿᒧᒃᓯᕈᓐᓇᖅᓯᓪᓗᖓ. ᑕᐃᒪᓕ ᐃᖅᑲᐅᒪᔭᕋᓂ ᐊᑕᐅᓰᖅᓱᑕ, ᐃᖏᕐᕋᓕᕋᑦᑕ, ᐃᓚᒌᑦᑎᐊᖅᓱᑕ ᓯᕗᒻᒧᓕᖅᑐᒍᑦ, ᐅᕙᖓ ᐅᔾᔨᖅᑐᐃᓐᓇᖅᑐᖓ ᕿᒻᒥᓂᒃ, ᐃᓕᑕᖅᓯᖃᑦᑕᕐᓂᖏᓐᓂᓪᓗ ᓂᐱᒐᓂᒃ ᑲᔪᓯᕙᓪᓕᐊᓂᑦᑎᓐᓂᒃ ᐊᑐᕆᐊᒃᑰᖅᐸᓪᓕᐊᓂᖅ. ᖄᖐᕙᓪᓕᐊᓕᕐᓂᖅ ᐊᓯᖏᓐᓂᒃᑕᐅᖅ ᕿᒧᒃᓯᖅᑐᓂᒃ ᐃᓛᓐᓂᒃᑯᑦ ᐊᒃᓱᕈᕐᓇᖅᑐᒃᑰᖃᑦᑕᕐᓇᕐᒪᑦ, ᐊᐅᓚᑦᑎᔪᓐᓇᖅᓯᓚᐅᖅᓱᖓᓗ ᕿᒥᒃᑲᓂᒃ ᓂᐱᒐ ᐊᑐᖅᓱᒍ, ᑎᒥᒐᓗ ᐊᑐᖅᐸᒃᓱᒍ ᓇᓗᓇᐃᔭᐃᕙᓐᓂᕐᒧᑦ ᓇᐅᒃᑰᕆᐊᖃᕐᒪᖔᑕ. ᕿᒻᒦᑦ ᑐᑭᓯᑲᐅᑎᒋᕙᒃᑐᑦ ᓇᓗᓕᓚᐅᕋᑎᒃ, ᑲᔪᓯᔪᓐᓇᑦᑎᐊᖅᑐᐊᓘᓚᐅᖅᑐᒍᑦ ᐅᖓᓯᖕᓂᓕᖕᒧᑦ 15-ᑭᓛᒥᑕᓂᒃ.

ᖃᐅᑕᒫᖅ ᖃᐅᔨᕙᓪᓕᐊᓕᓚᐅᖅᑐᖓ ᐊᔪᕈᓃᖅᐸᓪᓕᐊᓂᕋᓂᒃ, ᓴᙱᓂᖃᖅᑖᖅᐸᓪᓕᐊᔪᑦᑎᑐᑦ ᕿᒻᒥᓂᒃ ᐸᖓᓖᓐᓇᖅᑐᓂᒃ, ᑕᖃᔪᓐᓇᖅᑐᔮᖏᑦᑐᑦ, ᑕᐃᒃᑯᑎᑐᓇ ᓲᕐᓗ ᓯᕗᓪᓕᕕᓂᑦᑎᓐᓂᒃᑦ ᕿᒧᒃᓯᖅᐸᓚᐅᕐᒥᔪᓂᒃ. ᐃᖏᕐᕋᓂᑦᑎᓐᓂᒃ, ᐊᐳᑎᒃᑯᑦ ᐃᖃᓗᐃᑦ ᓄᓇᖓᑕ ᓯᓚᑖᒍᑦ ᑲᔪᓯᓪᓗᑕ, ᐊᔪᕈᓃᕐᓂᕋᓂᒃ ᐅᔾᔨᕈᓱᓕᓚᐅᖅᑐᖓ ᕿᒧᒃᓯᕈᓐᓇᕐᓂᕋᓂᒃ ᐊᒻᒪᓗ ᖃᐅᔨᕙᓪᓕᐊᓕᖅᓱᖓ ᐃᓅᓯᖃᕈᑎᒋᓕᖅᑕᕋᓂᒃ ᐊᒻᒪᓗ ᐊᓂᒎᑎᖃᑦᑕᕈᓐᓇᕐᓂᕋᓂᒃ ᓇᖕᒥᓂᖅ ᐃᓗᒃᑯᑦ ᐊᒃᓱᕉᑎᒋᕙᒃᑕᒃᑲᓐᓂ.

ᐊᓈᓇᐅᓕᖅᓱᖓ, ᖃᐅᔨᒪᓚᐅᖅᑐᖓ ᖃᓄᖅ ᐱᒻᒪᕆᐅᓂᖃᕐᓂᖓᓂᒃ ᕿᒧᒃᓯᕈᓐᓇᕐᓂᖅ ᑲᔪᓯᑎᑕᕆᐊᖃᕐᓂᕋᓂᖓᓂᒡᓗ ᕿᑐᕐᖓᕋᓄᑦ, ᐃᕐᓂᕋᓄᑦ, ᐃᓕᓐᓂᐊᕐᓗᓂ ᐅᐱᓐᓇᕐᓂᖓᓂᒃ ᐃᓕᖅᑯᓯᑐᖃᑦᑎᓐᓂᒃ ᑎᒍᒥᐊᕈᓐᓇᕐᓂᑎᓐᓂᒃ ᐃᓄᖁᑎᑦᑎᓐᓃᖔᖅᓯᒪᔪᓂᒃ. ᐊᑕᐅᑦᑎᒃᑰᖅᓱᑕ, ᓄᓇᒃᑯᑦ, ᓯᑯᒃᑯᑦ ᐃᑳᕈᓐᓇᖅᑐᒍᑦ, ᕿᒻᒦᑦ ᐸᖓᓕᒃᓱᑎᒃ ᓯᕗᒧᑦ, ᖁᕕᐊᓱᐊᔪᑦᑎᑐᑦ ᑲᔪᓯᔪᑦ ᑲᓕᑕᐅᑎᓪᓗᑕ.

ᑕᐅᑐᕋᓐᓈᓚᐅᕆᕗᖓ 8−ᓂᒃ ᐅᑭᐅᖃᓕᖅᑎᓪᓗᒍ ᐃᕐᓂᕋ ᖃᐅᔨᕙᓪᓕᐊᓕᖅᑐᖅ ᓄᓇᒥᒃ, ᕿᒧᒃᐸᒃᑐᓂᒡᓗ ᕿᒻᒥᓂᒃ, ᐃᓕᓐᓂᐊᖅᑐᖅ ᐱᓇᓱᐃᓐᓇᕈᓐᓇᕐᓂᕐᒥᒃ, ᐱᓕᕆᖃᑎᖃᕈᓐᓇᑦᑎᐊᕆᐊᖃᕐᓂᕐᒥᓂᒃ, ᐃᒃᐱᒍᓱᑦᑎᐊᕆᐊᖃᕐᓂᕐᒥᓂᒡᓗ ᓄᓇᐅᑉ ᖃᓄᐃᓂᖓᓂᒃ. ᐅᑭᐅᖃᓕᖅᑎᓪᓗᒍᓕ 12-ᓂᒃ ᒫᓇᐅᓕᖅᑐᖅ, ᒥᓯᒃᐸᓕᖅᑐᖅ ᑐᑉᐸᒃᓱᓂᓗ ᐃᑭᒃᑲᓂᖃᑦᑕᖅᓱᓂ ᐅᓪᓚᓯᕙᒃᓱᓂᓗ ᐊᖑᒪᐃᓐᓇᕈᓐᓇᖅᓯᓪᓗᓂ ᖃᒧᑏᖕᓂᒃ, ᖁᖓᔮᖅᑐᑯᓗᒃ, ᖁᕕᐊᓱᒃᑐᑯᓗᒃ, ᐊᔭᐅᖃᑕᐅᔪᑯᓗᒃ, ᐃᓚᒥᓂᒃ ᐃᑲᔪᖅᑎᐅᖃᑕᐅᓪᓗᓂ, ᖃᐅᔨᒪᓕᖅᓱᓂᓗ ᑲᑉᐱᐊᓱᙱᓂᖅᓴᐅᓕᕋᒥ ᓯᕗᓂᐊᒍᑦ ᑕᐃᒪᐃᑉᐸᓚᐅᖏᑦᑑᒐᓗᐊᖅ ᐊᓂᒎᑎᓪᓗᓂᐅᒃ. ᐅᐱᖅᑲᓈᓗᒃ ᑕᒪᓐᓇ ᑕᐅᑐᒃᓱᒍ ᐊᓈᓇᒋᔭᐅᓗᓂ.

ᐊᑐᓕᖅᑎᑦᑎᕙᓪᓕᐊᒃᑲᓐᓂᕐᓂᖅ ᕿᒧᒃᓯᖃᑦᑕᕐᓂᕐᒥᒃ ᐱᓕᕆᐊᕆᓯᒪᕙᕋ ᖁᕕᐊᒋᒻᒪᕆᒃᓱᒍ, ᑕᐃᒫᒃ ᐅᐱᒋᓗᒍ ᑎᒍᒥᐊᕈᓐᓇᕐᓂᖅ ᓱᓕ ᐱᔪᓐᓇᕐᓂᕐᒥᒃ ᓯᕗᓪᓕᕕᓂᑦᑎᓂᖔᖅᑐᓂᒃ, ᐊᑐᖅᑕᐅᒃᑲᓂᕈᓐᓇᖁᓗᒋᑦ ᓯᕗᓂᒃᓴᒥᒃ ᐃᓅᔪᒫᕐᒥᔪᓄᑦ. ᓂᐱᖃᓕᕋᒪ ᐃᓅᓪᓗᖓ ᐊᕐᓇᐅᓪᓗᖓ, ᓂᓪᓕᐅᑎᒋᓗᒋᑦ ᖃᓄᐃᓕᐅᖅᑕᐅᖃᑦᑕᖅᓯᒪᓂᖅᐳᑦ ᐃᓅᓪᓗᑕ ᓱᕋᐃᔭᐅᓇᓱᓐᓂᑰᓗᑎᒃ ᐃᓕᖅᑯᓯᑐᖃᖅᐳᑦ, ᐃᓕᑕᕆᔭᐅᔪᓃᖅᑎᑕᐅᓇᓱᖕᓂᖏᓐᓂᒃ, ᑕᐱᕆᔭᐅᔭᕆᐊᖃᖅᑐᖓ ᐊᑑᑎᓕᖕᒥᒃ  ᕿᒧᒃᓯᖃᑦᑕᕈᓐᓇᕐᓂᕐᒥᒃ ᑲᔪᓯᑎᑦᑏᓐᓇᕈᓐᓇᕆᐊᖃᕐᓂᕐᒥᒃ.

ᑕᐃᒪᓕ ᐱᕕᒃᓴᖃᖅᑎᑕᐅᓕᓚᐅᕆᕗᒍᑦ ᐃᓚᐅᔪᓐᓇᕐᓂᖅ ᑕᕐᕆᔭᐅᓯᐅᖅᑎᓄᑦ ᑲᒻᐸᓂᖓᓂᒃ ᒪᔅᑖᖕ−ᓱᕙᐃᕗᓪ−ᒋᐅᒃᑯᑦ ᐱᖁᑎᓕᕆᔨᒃᑯᑦ (Mustang Survival Gear), ᕿᒧᒃᓯᖃᑎᒋᓚᐅᕋᑦᑎᒍᑦ ᓯᑯᔪᐃᑦᑐᒃᑯᑦ ᐊᐅᒃᑲᕐᓂᖓᔫᑉ ᖃᓂᒋᔭᖓᓄᖓᐅᓪᓗᑕ; ᐊᒻᒪ ᓱᓕ ᐊᓯᖓᓂᒃᑕᐅᖅ ᓯᑭᑑᓕᕆᔨᐅᔪᑦ ᑲᒻᐸᓂᖓᓂᒃ ᑕᕐᕆᔭᐅᓯᐅᓚᐅᕐᒥᔪᑦ ᑕᐃᒫᒃ ᕿᒧᒃᓯᖅᐸᖕᓂᑦᑎᓐᓂᒃ ᓴᖅᑭᐅᒪᑎᑦᑎᓗᑎᒃ ᐅᓪᓗᒥᓗ ᐃᖏᕐᕋᔾᔪᑎᐅᔪᓂᒃ ᓯᑭᑑᒃᑯᑦ ᖃᓄᐃᑑᕙᓕᕐᓂᖏᓐᓂᒃ.

ᐱᓕᕆᖃᑎᖃᓚᐅᕐᒥᔪᒍᑦ ᑎᐊᓚᔅᑯᓐᓂᒃ (Telus) ᓄᓇᕐᔪᐊᕐᒥ ᖃᐅᔨᓴᖅᑎᕐᔪᐊᖏᓐᓂᒃ ᐃᐊᑦᒪᓐᑕᓐᒥ ᑕᑯᔭᒐᖃᕐᕕᖓᓂᒃ, ᑕᕐᕆᔭᐅᓯᐅᓚᐅᕐᓂᖏᓐᓂ ᐅᑭᐅᖅᑕᖅᑐᒥ ᐊᐅᓪᓛᕐᕕᐅᖃᖑᑦᑕᓯᒪᔪᓂᒃ ᑕᓚᕖᓴᒃᑯᑦ ᑕᐅᑐᕋᓈᒐᒃᓴᓂᒃ. ᑕᐃᑲᓂ, ᑕᐅᑐᕋᓈᖅᑕᐅᓗᑎᒃ ᐱᓱᒃᑐᔮᕐᓇᖅᑐᖅ ᐃᓄᐃᑦ ᓄᓇᖓᒍᑦ, ᐊᒻᒪᓗ ᐃᑭᒪᙳᐊᕐᓇᖅᑐᓕᒃ ᕿᒧᒃᓯᒃᑯᑦ, ᑐᓵᓗᒋᓪᓗ ᖃᒧᑎᒃᑰᖅᕙᓗᒃᑐᑦ ᐊᒻᒪᓗ ᑕᐃᒍᑏᑦ ᐃᓄᒃᑎᑑᖅᑐᑦ ᓇᓗᓇᐃᔭᐃᔪᑦ ᕿᒻᒥᓂᑦ ᓇᐅᒃᑰᕆᐊᖃᕐᓂᖏᓐᓂᒃ.

ᖃᐅᑕᒫᖅ, ᐃᖅᑲᐃᑎᑕᐅᕙᒃᑐᒍᑦ ᓴᙱᓂᖃᕐᓂᑦᑎᓐᓂᒃ ᐊᒻᒪᓗ ᐅᕙᒍᑦ ᐃᓅᓪᓚᕆᐅᓂᑦᑎᓐᓂᒃ, ᑕᒪᓐᓇ ᓴᙱᓂᖅ ᓴᖅᑭᐅᒪᕙᖕᒪᑦ, ᓴᙱᔫᓪᓗᓂᓗ ᑕᐃᒪᙵᑦ ᐱᐅᓯᕇᓐᓇᑕᑦᑎᓐᓂᒃ ᐱᓯᒪᕗᖅ ᕿᒧᒃᓯᕈᓐᓇᕐᓂᑦᑎᓐᓂᒃ.

ᒫᓐᓇᐅᓕᖅᑐᕐᓕ, ᕿᒧᒃᓯᕌᖓᒪ ᑕᐅᕘᓇ ᓱᕐᓗ ᐆᒃᑐᑎᒋᓗᒍ ᐊᒡᒐᐅᑎᒧᑦ, ᑕᐅᕘᓇᓗ ᖃᐅᒻᒫᕐᕕᐅᑉ ᒥᕐᖑᐃᖅᓯᕐᕕᖓᒍᑦ ᓄᓇᕗᒻᒥ, ᑕᐅᕙᓂᓗ ᐃᖃᓗᐃᑦ ᑰᖓᑎᒍᑦ, ᑲᔪᓯᕙᓪᓕᐊᖃᑦᑕᖅᑐᖓ ᐅᐱᒋᓪᓗᒍ ᑕᒪᓐᓇ ᐊᒻᒪᓗ ᐱᔾᔪᑎᒃᓴᖃᕈᑎᒋᓕᖅᑕᒃᑲ, ᖃᐅᔨᒪᓪᓗᖓ ᐱᐅᓯᑐᖃᕆᔭᐅᖏᓐᓇᖅᑐᑐᖃᕐᒥᒃ ᐅᕙᖓᑦᑕᐅᖅ ᐊᒃᓱᕉᑎᖃᕋᒪ ᐊᔪᙱᑐᒫᖁᓪᓗᒋᑦ ᐃᓅᔪᒫᕐᒥᔪᑦ ᑕᒪᒃᑯᓂᖓ ᓯᕗᓂᒃᓴᒥ.