Amauti, 2018
ᑳᑐᕆᓐ ᑕᒃᐹᓂᐅᑉ ᐃᓅᓯᖓ ᐊᔾᔨᙳᐊᒃᑯᑦ
ᑳᑐᕆᓐ ᑕᒃᐹᓂ ᐅᑭᐅᖃᖅᑎᓪᓗᒍ 15ᓂᒃ, ᑎᒍᓯᓚᐅᖅᓯᒪᔪᖅ ᐊᔾᔨᓕᐅᕈᑎᒥᒃ ᐊᒃᑲᒻᒥᓂᒃ ᐱᓯᒪᔭᒥᓂᒃ ᐊᔾᔨᓕᐅᕆᖃᑦᑕᓕᖅᑐᓂᓪᓗ ᖃᐅᑕᒫᑦ ᑕᖅᑭᓄᑦ ᖁᓕᐅᖏᒐᖅᑐᓪᓗᐊᒐᓚᓐᓄᑦ: ᐃᓄᐃᑦ, ᓄᓇ, ᐃᓪᓗᕐᔪᐊᑦ. ᓱᓕ ᐸᐸᑦᑕᖏᑦ ᐊᔾᔨᓕᐊᒥᓂᖏᑦ ᑕᑯᓕᕋᐃᒐᒥᒋᓪᓗ ᒫᓐᓇ, ᑕᑯᖃᒃᑕᓕᖅᑐᖅ ᐱᕈᖅᐸᓪᓕᐊᓂᕆᓯᒪᔭᕐᒥᓂ ᐊᔾᔨᓕᐅᕆᖃᑦᑕᓂᒃᑯᑦ ᐱᓕᕆᐊᖃᓕᖅᑐᓂ.
“ᐊᔾᔨᓕᐅᕈᑎᒐ ᐱᓯᒪᐃᓐᓇᕋᓱᐊᖅᐸᒃᑕᕋ ᐅᐱᓐᓇᕋᓂ ᓄᓇᕐᔪᐊᕗᑦ ᐱᐅᔪᐊᓘᒻᒪᑦ ᐊᔾᔨᓕᐅᕈᒪᔭᐃᓐᓇᕆᓪᓗᒋᓪᓗ” ᐅᖃᓚᐅᖅᑐᖅ.
ᑕᒃᐹᓂ 32ᓂᒃ ᐅᑭᐅᓕᒃ, ᐃᓕᑕᕆᔭᐅᓯᒪᔪᖅ, ᓄᓇᖃᖅᑐᖅ ᐋᑐᕚᒥ ᐊᔾᔨᓕᐅᕆᔨᐅᓪᓗᓂ ᐊᔾᔨᓕᐅᕈᑎᒥᓂᒃ ᑕᑯᑎᒃᓯᕙᒃᑐᖅ ᓄᓇᕐᔪᐊᕐᒥ ᑕᑯᓐᓇᕐᓂᕐᒥᓂ, ᐊᑐᖅᑕᐅᓯᒪᔪᓂᒃ ᐊᓯᒥᓐᓄᑦ ᐊᐅᓚᑕᐅᓂᕐᒧᑦ ᐃᓕᖅᑯᓯᑐᖃᖃᙱᒃᑐᓄᓪᓗ ᐃᒡᔪᐊᖅᑕᐅᕙᓐᓂᕐᒧᑦ, ᓂᐱᖃᖅᑎᒃᓯᒋᐊᖅᐸᒃᑐᖅ ᓄᓇᖃᖅᑳᖅᓯᒪᔪᐃᑦ ᓂᐱᖏᓐᓂᒃ ᐊᑐᕈᒪᔭᖏᓐᓂᓪᓗ, ᐊᔾᔨᓕᐅᖅᐸᒃᑭᓪᓗᓂ ᐱᐅᓂᖓᓂᒃ ᓄᓇᐅᑉ.
ᒫᑯᕋᐱ ᓯᐊᓐ ᒥᔅᑎᑉᓯ, 2017
“ᐊᔾᔨᓕᐅᕈᑎᒐ ᐱᓯᒪᐃᓐᓇᕋᓱᐊᖅᐸᒃᑕᕋ ᐅᐱᓐᓇᕋᓂ ᓄᓇᕐᔪᐊᕗᑦ ᐱᐅᔪᐊᓘᒻᒪᑦ ᐊᔾᔨᓕᐅᕈᒪᔭᐃᓐᓇᕆᓪᓗᒋᓪᓗ” ᐅᖃᓚᐅᖅᑐᖅ. “ᐊᔾᔨᓕᐅᕆᖃᑦᑕᕐᓂᕋ ᐅᖃᐅᓯᖃᕈᑎᒋᖃᑦᑕᖅᓯᒪᕙᕋ ᐃᑉᐱᓐᓂᐊᓂᒃᑲᓂᒃ, ᓴᖅᑭᑎᒃᓯᒋᐊᖅᑐᖓᓪᓗ ᐊᔾᔨᒌᙱᒃᑑᑎᓂᒃ ᐊᑐᖅᓯᒪᓕᖅᑐᓂᒃ ᐃᓅᓯᕐᓂᒃ.”
ᑕᒃᐹᓂ ᐊᔾᔨᓕᐅᕆᒍᑎᖃᖅᓯᒪᔪᖅ ᐃᓱᒪᒌᓐᓇᕐᓇᖅᑐᓂᒃ, ᑕᑯᒥᓇᖅᑐᓂᒃ ᐊᔾᔨᙳᐊᕐᓂᒃ ᓴᖅᑭᔮᖅᑎᑕᐅᓯᒪᓪᓗᑎᓪᓗ ᑕᑯᔭᒐᖃᕐᕕᓐᓂ ᐱᐅᒋᔭᐅᒻᒪᕆᒃᑐᓂ. 2020ᒥ, ᑕᒃᐹᓂ ᐃᓚᒋᔭᐅᓚᐅᖅᑐᖅ ᐱᖓᓱᓄᑦ ᓵᓚᖃᐅᓯᐊᖅᑐᓄᑦ ᑲᓇᑕᒥ ᑕᑯᔭᒐᖃᕐᕕᕐᔪᐊᕐᒥ ᓯᑰᓴᕚᖕᒃᑯᑦ ᓄᑖᕐᓂᒃ ᐊᔾᔨᓕᐅᕆᔨᐅᒋᐅᖅᓴᖅᑐᓂᒃ ᐃᓕᑕᖅᓯᔾᔪᑎᒥᒃ, ᐃᓚᖏᓪᓗ ᐊᔾᔨᓕᐊᒥᓂᖏᑦ ᓂᕈᐊᖅᑕᐅᓚᐅᖅᑐᑎᑦ ᓴᖅᑭᔮᖅᑎᑕᐅᓪᓗᑎᑦ ᑕᑯᔭᒐᖃᕐᕕᖓᓂ.
“ᐊᔾᔨᓕᐅᕆᖃᑦᑕᕐᓂᕋ ᐅᖃᐅᓯᖃᕈᑎᒋᖃᑦᑕᖅᓯᒪᕙᕋ ᐃᑉᐱᓐᓂᐊᓂᒃᑲᓂᒃ, ᓴᖅᑭᑎᒃᓯᒋᐊᖅᑐᖓᓪᓗ ᐊᔾᔨᒌᙱᒃᑑᑎᓂᒃ ᐊᑐᖅᓯᒪᓕᖅᑐᓂᒃ ᐃᓅᓯᕐᓂᒃ.”
ᐃᓚᒋᔭᖓᑦ ᐊᔾᔨᙳᐊᖓᑕ, ᐊᑎᖃᖅᑐᖅ “ᐊᕐᓇᕗᑦ ᓂᕕᐊᖅᓯᐊᕗᓪᓗ ᐱᒻᒪᕆᐅᔪᑦ,” (ᓴᖅᑭᔮᖅᑎᑕᐅᔪᖅ ᐱᒋᐊᙵᐅᑎᑦᑎᓐᓂ) ᑕᑯᒃᓴᐅᓪᓗᓂ ᐊᕐᓇᖅ ᑕᑯᓐᓇᙱᑦᑐᓂ ᐊᔾᔨᓕᐅᕈᑎᒧᑦ, ᑎᒥᖓ ᐊᐅᐸᖅᑐᒥᒃ ᐳᔪᕐᒥᒃ ᐊᕙᓗᑕᐅᒪᓪᓗᓂ. ᐊᔾᔨᙳᐊᖅ ᐃᓚᒋᔭᐅᓚᐅᖅᑐᖅ ᐅᖃᐅᓯᖃᕈᑎᐅᓪᓗᓂ ᐊᓯᐅᓯᔭᐅᓯᒪᔪᑦ ᐃᓄᐊᖅᑕᐅᓯᒪᔪᓪᓗ ᓄᓇᖃᖅᑳᖅᓯᒪᔪᐃᖅᑦ ᐊᕐᓇᐃᑦ, ᓂᕕᐊᖅᓯᐊᑦ ᐊᒻᒪᓗ ᐱᐅᓯᖅᓱᕈᒪᔪᑦ ᑎᒥᒥᒍᑦ ᐃᖅᑲᐅᒪᓪᓕᓂᐅᓪᓗ ᐱᖃᓐᓇᕆᓯᒪᔭᓂ, ᐃᓅᓪᓗᓂ ᓴᓇᙳᐊᖅᑎ ᐊᓂ ᐳᑐᒍᖅ, ᓇᐃᐱᑕᐅᓚᐅᖅᓯᒪᔪᖅ ᑐᖁᖓᑎᓪᓗᒍ ᐋᑐᕚᑉ ᑰᖓᓂ 2016ᒥ. ᐋᑐᕚᒥ ᐸᓖᓯᒃᑯᖏᑦ ᐸᓴᒋᔭᖃᓚᐅᕋᓗᐊᖅᑎᓪᓗᒋᑦ ᐃᓄᐊᖅᑕᕕᓂᐅᒋᐊᖓ, ᐸᓯᔭᒃᓴᓕᐅᖅᑐᖃᓚᐅᖅᓯᒪᒋᑦᑐᖅ ᐃᓄᐊᖅᑕᐅᓂᖓᓄᑦ.
“ᒪᒥᓴᐅᑎᖃᕐᓂᖅ ᓴᓇᙳᐊᕐᓂᒃᑯᑦ ᐱᒻᒪᕆᐅᔪᖅ. ᐃᑲᔪᖅᐸᒃᑐᖅ ᑐᙵᒋᐊᒃᑲᓐᓂᖅᑎᒃᓯᓪᓗᓂ ᐅᕙᑦᑎᓐᓂᒃ. ᐱᐅᔪᒥᒃ ᐱᓕᕆᐊᖃᕐᓇᖅᑐᖅ. ᐱᐅᔪᓂᒃ ᐱᓕᕆᐊᖃᖃᑦᑕᕐᓂᖅ ᐱᐅᔪᓪᓚᕆᐅᔪᖅ,” ᑕᒃᐹᓂ ᐅᖃᖅᑐᖅ. “ᐃᓅᓯᕋ ᐱᐅᔪᓐᓇᒃᑰᖅᓯᒪᙱᑦᑐᖅ. ᑲᓱᕆᐊᒃᑲᓐᓂᕐᓂᕋ ᐃᓕᖅᑯᓯᑐᖃᕐᓄᑦ ᓴᖅᑭᑎᖃᑦᑕᖅᑕᒃᑲᓗ ᐊᔾᔨᓕᐅᒐᒃᑯᑦ ᒪᒥᓴᕈᑎᒋᓯᒪᓪᓚᕆᒃᑕᕋ ᐃᓅᓯᕐᓂ. ᓴᓂᕋᖃᖅᑐᖓ ᓇᓪᓕᒍᓱᒃᓯᐊᖅᑐᒥᒃ ᐅᐃᓐᓂᒃ ᐃᕐᓂᕋᓂᓪᓗ.”
ᐊᑎᖃᙱᑦᑐᖅ, 2020
ᑲᓇᑕᒥ ᑕᑯᔭᒐᖃᕐᕕᕐᔪᐊᖅ ᐃᓕᑕᖅᓯᓯᒪᔪᑑᙱᑦᑐᑦ ᑕᒃᐹᓂᐅᑉ ᐱᓕᕆᐊᖃᖅᐸᓐᓂᖓᓂᒃ. ᐊᖏᔪᒻᒪᕆᐅᓘᓐᓗᓂ “ᐊᒪᐅᑎ” ᒪᑐᖏᓐᓂ ᓂᕕᖓᔪᖅ ᐲᕈᓪ ᑕᑯᔭᒐᖃᕕᖓᓐᓂ ᓴᓇᙳᐊᖅᓯᒪᔪᓂᒃ ᐃᑦᑕᕐᓂᓴᒃᑯᕕᖓᓂᓪᓗ ᕗᕌᓐᑕᓐ. 2020ᒥ, ᐃᓕᑕᕆᔭᐅᓯᐊᓚᐅᖅᑐᖅ ᓵ ᑕᑯᔭᒐᖃᕐᕕᖓᓐᓂ ᓄᑖᕐᓂᒃ ᓴᓇᖃᑦᑕᕐᓂᕐᒧᑦ ᓴᖅᑭᔮᖅᑎᑕᐅᓚᐅᖅᑐᓂᓪᓗ ᐊᕐᕌᒍᖅ ᑕᒡᕙᓂᒃᓴᐃᓐᓇᖅ ᓴᓇᙳᐊᖅᓯᒪᔪᓂᒃ ᑕᑯᔭᒐᖃᕐᕕᖓᓐᓂ ᐋᓐᑎᐅᕆᔫᒥ ᐃᑭᐊᖅᑭᕕᖓᓐᓂ ᓴᓇᙳᐊᖅᑏᑦ ᓴᖅᑭᔮᖅᑎᑕᐅᑎᓪᓗᒋᑦ.
ᑭᓯᐊᓂᓕ ᐊᐃᕆᔭᐅᒐᐃᒐᒥ ᐊᔾᔨᓕᐊᕆᓯᒪᔭᖏᓐᓂᒃ, ᓇᒻᒥᓂᖅ ᖁᒡᕙᖅᑎᒃᐸᙱᒃᑐᖅ ᐃᓕᑕᕆᔭᐅᔾᔪᓯᐊᖅᓯᒪᓂᕐᒥᓂ ᑕᑯᔭᒐᖃᕐᕕᓐᓃᑦᑐᓂᓪᓗ. ᑭᓯᐊᓂᖔᕐᓕ, ᓇᓗᓇᐃᔭᐃᖔᖅᐸᒃᑐᖅ ᑕᑯᓐᓇᕐᓂᒃᑯᑦ ᐱᔪᒥᓇᖅᓯᕙᓐᓂᖓᓂᒃ ᓴᖅᑭᔮᖅᑎᕙᓐᓂᖓᓗ ᐊᔾᔨᓕᐅᒐᖏᑦᑎᒍᑦ.
“ᒫᓐᓇᐅᓂᖅᓴᖅ ᐅᓂᒃᑳᕈᒪᓂᖅᓴᐅᕙᑦᑐᖓ ᐱᔾᔪᑎᖃᖅᑐᓂᒃ ᐃᓄᓐᓂᒃ ᐃᓕᖅᑯᓯᑦᑎᓐᓂᓪᓗ,” ᐅᖃᓚᐅᖅᑐᖅ. “ᐊᔾᔨᓕᐊᕆᕙᒃᑕᒃᑲ ᓴᖅᑭᔮᖅᑎᒃᓯᔪᑦ ᐊᖅᑯᑎᓐᓂᒃ ᐃᓅᓯᕐᓂ: ᐅᖃᐅᓯᕆᒍᒪᔭᒃᑲᓂᒃ ᐅᔾᔨᕈᓱᓕᖅᑎᒃᓯᒋᐊᕈᒪᔭᒃᑲᓐᓂᓪᓗ ᐅᕝᕙᓘᓐᓃᑦ ᓱᓇᑐᐃᓐᓇᐃᑦ ᐃᓱᒪᒋᒍᒪᔭᒃᑲ ᐅᐱᓐᓇᕋᓂ ᐊᒃᑐᐃᓂᖃᖅᓯᒪᒻᒪᑕ ᐃᓅᓯᕐᓂᒃ ᖃᓄᑐᐃᓐᓇᖅ.
