ᑕᐃᕕᑎ ᓯᖁᐊᖅ ᑲᓇᑕᑉ ᒪᓕᒐᓕᐅᕐᕕᕐᔪᐊᖓᑕ ᓴᓂᐊᓂ ᓇᖏᖅᑐᖅ ᐋᑐᕚᒥ.
ᑕᐃᕕᑎ ᓯᖁᐊᖅ ᐊᐱᖅᓱᑕᐅᔪᖅ
ᐊᕼᐃᐊᕐᒥᐅᑦ ᓅᑎᖅᑕᐅᖏᓐᓇᖃᑦᑕᓚᐅᖅᓯᒪᔪᑦ. 1949−ᖑᑎᓪᓗᒍ ᑲᓇᑕᒥ ᒐᕙᒪᒃᑯᑦ ᓴᓕᒍᐃᓚᐅᖅᓯᒪᔪᑦ ᓄᓇᓕᕋᓛᖏᓐᓂᒃ ᐃᓇᑕᐃ ᑕᓯᖓᓂ, ᓄᓇᕗᑦ ᓂᒋᐊᓂ ᐱᖓᓐᓇᖓᓂᒃ, ᐊᒻᒪᓗ ᐋᓐᓂᓇᖅᑐᒻᒪᕆᖕᒥᒃ ᖁᓖᑦ ᐊᕐᕌᒍᑦ ᐅᖓᑖᓃᑦᑐᑦ ᓅᑕᐅᖃᑦᑕᕆᐊᓯᓪᓗᑎᑦ. ᑕᐃᕕᑎ ᓯᖁᐊᖅ ᓱᕈᓯᐅᓚᐅᖅᓯᒪᔪᖅ ᓅᑎᖅᑕᐅᖃᑦᑕᓕᖅᑎᓪᓗᒋᑦ.
ᐃᖅᑲᓇᐃᔭᕈᓐᓃᖅᑐᖅ ᐃᓕᓴᐃᔨᐅᕙᓚᐅᖅᓯᒪᔪᖅ ᐊᒻᒪᓗ ᐃᓕᓴᕕᒻᒥ ᐊᖓᔪᖅᑳᖑᕙᓚᐅᖅᓯᒪᓪᓗᓂ ᐃᖃᓗᖕᓂ, ᒫᓐᓇ ᐋᑐᕚᒥᐅᑕᐅᓕᖅᑐᖅ. ᔮᓐᓄᐊᕆᐅᓚᐅᖅᑐᒥ, ᐊᕐᕕᐊᓂ, 21ᖑᔪᑦ ᐊᒥᐊᒃᑯᑦ ᐊᕼᐃᐊᕐᒥᐅᑦ ᓅᑕᐅᓚᐅᖅᓯᒪᔪᑦ ᑲᓇᑕᑉ ᒐᕙᒪᖓᓂᒃ ᒪᒥᐊᒃᑎᓪᓗᒋᑦ ᑐᓵᑦᑕᓯᓐᓇᓕᓚᐅᖅᓯᒪᔪᑦ.
ᐊᔾᔨᙳᐊᑦ ᐃᓚᓕᐅᑎᓯᒪᔪᑦ ᑖᔅᓱᒧᖓ ᐊᐱᖅᓱᖅᑕᐅᓂᕐᒧᑦ ᐊᔾᔨᓕᐅᖅᑕᐅᓚᐅᖅᓯᒪᔪᑦ 1955ᖑᑎᓪᓗᒍ ᐃᓇᑕᐃ ᑕᓯᖓᓂ ᐊᔾᔨᓕᐅᕆᔨᒧᑦ ᕗᕆᑦᔅ ᒍᕈ, ᐱᓕᕆᐊᖃᕆᐊᖅᑐᖅᖢᓂ ᐃᖅᑲᓇᐃᔮᖃᖅᑎᑕᐅᓪᓗᓂ ᑕᐃᒻ ᕿᒥᕐᕈᐊᒐᓕᐅᖅᑎᒃᑯᓐᓄᑦ. ᓴᖅᑭᖅᑎᑕᐅᓚᐅᖅᓯᒪᔪᑦ ᐊᖏᖅᑕᐅᓪᓗᑎᑦ ᓯᒥᑦᓲᓂᐊᓐ ᐱᓕᕆᕝᕕᖓᑕ ᐅᑭᐅᖅᑕᖅᑐᖅ ᖃᐅᔨᓴᖅᑕᐅᕝᕕᖓᓐᓄᑦ, ᐊᒻᒪᓗ ᒍᕆᐅ ᐃᓚᒌᓄᑦ.
ᐃᓄᒃᑎᑐᑦ ᕿᒥᕐᕈᐊᒐᖅ: ᓯᕗᓪᓕᖅᐹᒥᒃ, ᐃᓇᑕᐃ ᑕᓯᐅᑉ ᒥᒃᓵᓄᑦ ᐅᓂᒃᑳᕐᕕᒋᓚᐅᙵ.
ᑕᐃᕕᑎ ᓯᖁᐊᖅ: ᓄᓇᓕᕗᑦ, ᐃᖃᓪᓕᐊᕐᕕᑦᓈᖅ, ᓲᕐᓗᖃᐃ 2 ᑭᓛᒥᑕᑦ ᐅᖓᓯᖕᓂᖃᓚᐅᖅᑐᖅ ᓄᓇᓕᕋᓛᕐᒥᑦ, ᐃᖃᓗᒐᓱᐊᕐᕕᕋᓛᖑᓪᓗᓂ. ᐃᖅᑲᐅᒪᕗᖓ ᑐᐱᖃᖃᑦᑕᓚᐅᖅᓯᒪᒐᑦᑕ ᑕᐅᕙᓂ ᐊᒻᒪᓗ ᐃᒡᓗᕕᒐᖃᖃᑦᑕᖅᑐᑕ. ᐊᖓᔪᖅᑳᕗᑦ ᐊᒻᒪᓗ ᐊᓈᓇᑦᑎᐊᕗᑦ ᐆᒪᔾᔪᑎᖃᖅᐸᓚᐅᖅᓯᒪᔪᑦ ᓂᕐᔪᑎᓂᑦ: ᐃᒪᑦᑎᐊᕙᖕᒥ ᐃᖃᓗᒃ, ᒥᑭᒋᔾᔭᖃᑦᑕᖅᖢᑎᑦ, ᐊᒻᒪᓗ ᑐᒃᑐᐃᑦ ᓅᑉᐸᓪᓕᐊᓪᓗᑎᑦ.
ᕿᒥᕐᕈᐊᒐᖅ: ᓇᓗᓇᐃᔭᐃᔪᓐᓇᖅᐲᑦ ᑭᒃᑰᒻᒪᖔᑕ ᐊᕼᐃᐊᕐᒥᐅᑦ?
ᓯᖁᐊᖅ: ᐃᓄᐃᑦ ᑲᑎᙵᐅᖅᑐᑦ, ᑕᒪᐃᓐᓂᓕᒫᑦᓯᐊᖅ ᑕᑎᖃᖅᑐᑦ ᐃᓅᓇᓱᐊᕈᑎᒋᓪᓗᒋᑦ ᑐᒃᑐᐃᑦ ᐊᒻᒪᓗ ᐃᒪᑦᑎᐊᕙᖕᒥᒃ ᐃᖃᓗᐃᑦ; ᐊᕼᐃᐊᕐᒥᐅᑦ ᑐᑭᓕᒃ “ᐃᓄᐃᑦ ᓄᓇᖅᐸᓯᖕᒥᐅᑕᐃᑦ.” ᓯᓚᑦᑐᓴᕐᕕᕐᔪᐊᕐᒥ ᖃᐅᔨᓴᖅᑏᑦ, ᖃᐅᔨᓴᖅᑎᒻᒪᕇᑦ ᐊᒻᒪᓗ ᑎᑎᕋᖅᑏᑦ ᐃᓛᓐᓂᒃᑯᑦ ᓇᓗᓇᐃᕈᑎᒋᕙᓚᐅᕌᑎᒍᑦ “ᐃᓄᐃᑦ ᐅᖓᑖᓃᙶᖅᑐᑦ,” “ᐊᓯᖏᖕᓃᙶᖅᑐᑦ,” ᐅᕝᕙᓘᓐᓃᑦ ᓇᓗᓇᐃᖅ ᑕᐅᕙᒃᖢᑕ ᐃᓄᐃᑦ ᑐᒃᑐᒥᐅᑦ. ᐊᒥᓱᑦ ᐃᓅᖃᑎᒃᑲ ᐃᓱᒪᓲᑦ ᐃᓄᐃᑦ ᑖᒃᑯᐊ ᐊᑦᑎᓂᖅᐹᖑᔪᑦ ᐃᓄᐃᑦ ᐃᓅᖃᑎᒌᑦᑐᓂᒃ. ᑕᒪᓐᓇ ᐊᑯᓂᐊᓗᒃ ᐳᐃᒍᕈᓐᓇᓚᐅᙱᑕᕋ. ᐃᓱᒪᒋᔭᐅᑦᑎᐊᖅᐸᓚᐅᙱᑦᑐᒍᑦ ᓱᒃᑰᓱᒋᔭᐅᓗᐊᒧᑦ ‘ᐊᐅᓚᓂᖃᑦᑎᐊᙱᑦᑐᒥᒃ ᐃᓅᓯᖃᕐᓂᑦᑎᓐᓄᑦ’ ᓄᓇᖃᖅᖢᑕ, ᓄᒃᑎᖅᑕᐅᓪᓗᑕ ‘ᐊᐅᓚᓂᖃᑦᑎᐊᖅᑐᒧᑦ ᐃᓅᖃᑎᒌᓄᑦ’; ᐱᕙᓪᓕᐊᓯᒪᙱᑦᑐᑦ ᐃᓯᑭᒨᑦ. ᐅᓪᓗᒥᐅᔪᖅ ᓱᓕ, ᑕᐃᒪᓐᓇ ᐃᑉᐱᓐᓂᐊᓲᖑᕗᖓ.
“ᑖᓐᓇ ᑕᒪᐃᓐᓂ ᕿᓚᐅᑎᓃᙶᕈᑎᒋᔭᐅᔪᖅ,” ᐅᖃᖅᖢᓂ ᑕᐃᕕᑎ ᓯᖅᑯᐊᖅ. ᕿᓚᐅᑎᓕᐅᖅᑎᐅᔪᖅ ᐊᑐᖅᑐᖅ ᑐᒃᑑᑉ ᑭᐊᓯᖓᓂᒃ ᒥᖅᑯᐃᔭᐅᓪᓗᓂ ᑐᒃᑑᑉ ᐊᒥᖓᓂᒃ.
ᕿᒥᕐᕈᐊᒐᖅ: ᕿᒥᕐᕈᓪᓗᒋᑦ ᑖᒃᑯᐊ ᐊᔾᔨᙳᐊᑐᖃᐃᑦ, ᑕᑯᓪᓗᒋᑦ ᑭᓱᑦ ᐃᓱᒪᒋᕕᒋᑦ?
ᓯᖁᐊᖅ: ᐊᒥᓱᐊᖅᑎᖅᖢᑎᑦ ᒐᕙᒪᒃᑯᑦ ᐅᓂᒃᑲᐅᓯᖃᓕᕋᐃᖕᒪᑕ ᑕᑯᔭᖅᑐᓚᐅᖅᖢᑎᑦ ᐅᐸᑉᑎᖕᓂᑦ ᐃᓇᑕᐃ ᑕᓯᖓᓂᒃ, ᐅᖃᖅᐸᓚᐅᖅᑐᑦ ᐱᐅᙱᑦᑑᓕᕐᓂᑦᑎᓐᓂᑦ. ᑭᓯᐊᓂᓕ ᐊᔾᔨᙳᐊᑦ ᑕᑯᓪᓗᒋᑦ, ᖃᓄᐃᑦᑑᔮᙱᑦᑎᐊᖅᑐᑯᓘᔪᒍᑦ, ᑎᒥᒃᑯᑦ. ᐊᓐᓄᕌᖏᑦ ᐊᑐᖅᓯᒪᓗᐊᕐᓂᑰᔮᕕᐅᑎᑦᑐᑦ. ᑭᓯᐊᓂᓕ ᑕᒪᓐᓇ ᐱᔾᔪᑕᐅᙱᓚᖅ. ᐱᔾᔪᑎᐅᔪᕐᓕ ᖃᓄᖅ ᖃᓄᐃᓚᐅᙱᓐᓂᖏᖕᓂᒃ ᓯᓚᑖᓂᕐᒥᐅᑕᓄᑦ ᑲᒪᒋᔭᐅᙱᒃᑲᓗᐊᖅᑎᓪᓗᒋᑦ. ᐊᒻᒪᓗ ᐱᕚᓪᓕᖅᓯᒪᔪᒻᒪᕆᐅᓚᐅᖅᑐᑦ.
ᕿᒥᕐᕈᐊᒐᖅ: ᐅᖃᐅᓯᖃᕈᓐᓇᖅᐲᑦ ᖃᐅᑕᒫᑦ ᐃᓅᓯᕆᔭᐅᕙᓚᐅᖅᑐᒥᒃ ᓄᓇᓕᕋᓛᔅᓯᖕᓂᒃ?
ᓯᖁᐊᖅ: ᑭᒃᑯᓕᒫᑦᑎᐊᑦ ᐱᓕᕆᖃᑎᒌᑉᐸᓚᐅᖅᐳᑦ. ᓇᖕᒥᓂᖅ ᐃᖏᕐᕋᔾᔪᑎᒃᓴᖏᓐᓂᒃ ᓴᓇᕙᒃᖢᑎᑦ, ᖃᔭᓕᐅᖅᖢᑎᑦ. ᐊᕐᓇᐃᑦ ᐊᒥᐊᕆᖃᑕᐅᕙᓚᐅᖅᑐᑦ ᖃᔭᕐᓂᒃ ᒥᖅᓱᖅᖢᑎᒃ. ᐊᕐᓇᐃᑦ ᓂᒃᑯᓕᐅᖅᐸᓚᐅᖅᐳᑦ ᑐᒃᑐᕕᓂᕐᒥᒃ ᐅᑭᐊᒃᓵᖑᑎᓪᓗᒍ, ᓄᓂᕙᒃᖢᑎᑦ ᐊᖅᐱᓂᒃ ᐊᒻᒪᓗ ᑐᖅᑯᖅᑕᐅᓪᓗᑎᑦ. ᐊᖑᑏᑦ ᓱᕋᐃᔭᐃᕙᓚᐅᖅᑐᑦ ᓂᕿᓂᑦ ᐅᑭᐊᒃᓵᒃᑯᑦ ᐱᕈᔭᐅᓪᓗᑎᓪᓗ ᐅᔭᕋᖕᓄᑦ — ᐱᕈᔭᐅᓪᓗᑎᑦ ᓂᕿᖏᑦ. ᐅᑎᒧᑦ ᐱᓱᒃᐸᓚᐅᖅᐳᑦ ᐅᕝᕙᓘᓐᓃᑦ ᕿᒧᒃᓯᖅᖢᑎᑦ ᔮᓐᓄᐊᕆᑉ ᕿᑎᐊᓂ ᐊᑐᕆᐊᖃᕋᐃᒐᒥᒋᑦ ᐊᒻᒪᓗ ᐲᖅᓯᐊᕐᔪᑯᓗᒃᖢᑎᑦ ᐱᕈᒃᑲᓐᓂᖅᑐᓂᒋᑦ. ᐅᓪᓗᒥᐅᔪᖅ ᐃᓚᖏᑦ ᐃᓐᓇᑐᖃᐃᑦ ᐊᒻᒪᓗ ᐊᖑᓇᓱᒃᑏᑦ ᑕᐃᒪᓐᓇᐃᓕᐅᖅᐸᑉᐳᑦ ᓱᓕ.
ᑕᐃᕕᑎᐅᑉ ᐊᑖᑕᖓ, ᒥᑭ, ᐊᒻᒪᓗ ᐊᐅᓚᔅᔪᑦ ᒥᖅᑯᐃᔭᐃᔫᒃ ᑐᒃᑐᑉ ᐊᒥᖓᓂᒃ
ᕿᒥᕐᕈᐊᒐᖅ: ᐃᖅᑲᐅᒪᕕᒋᑦ ᓄᒃᑎᖅᑕᐅᓂᐅᕙᓚᐅᖅᓯᒪᔪᑦ?
ᓯᖁᐊᖅ: ᓯᕗᓪᓕᖅᐹᒥᒃ ᐃᓚᒌᑦ ᓅᑕᐅᓚᐅᖅᓯᒪᔪᑦ ᓄᐃᐅᓪᑎᓐ ᑕᓯᖓᓄᑦ 1949ᖑᑎᓪᓗᒍ. ᐃᓅᓚᐅᖅᓯᒪᙱᓚᖓ ᓱᓕ ᑕᐃᔅᓱᒪᓂ. ᑐᓴᕆᐊᕐᕕᐅᓚᐅᖅᓯᒪᙱᑐᓪᓘᓐᓃᑦ ᓄᒃᑎᖅᑕᐅᔪᒪᒐᓗᐊᕐᒪᖔᑦᑕ. ᓱᑲᑦᑐᒻᒪᕆᐅᓚᐅᖅᓯᒪᔪᖅ, ᐃᓐᓇᑐᖃᐃᑦ ᐅᖃᐅᓯᖏᑦ ᒪᓕᒃᖢᒋᑦ. ᓱᓇᒃᑯᑖᖅᑖᖅᑎᑕᐅᓚᐅᙱᑦᑐᑦ ᓄᒃᑎᖅᑕᐅᓂᖏᓐᓄᑦ, ᐱᔨᑦᑎᕋᖅᑕᐅᒐᑎᑦ, ᐊᓐᓇᐅᒪᔾᔪᑎᒃᓴᓂᒃ ᓱᓇᒃᑯᑖᖅᑕᖃᕋᓂ. ᐱᖓᓱᑦ ᐃᓄᐃᑦ ᖃᐃᓪᓗᑎᑦ ᑐᐱᐅᔪᓄᑦ ᐊᒻᒪᓗ ᑭᒃᑯᓕᒫᓂᒃ ᐊᓂᖁᔨᓪᓗᑎᑦ ᓴᓕᒍᖅᑕᐃᓐᓇᕆᔭᐅᓪᓗᑎᑦ ᐱᖁᑎᓕᒫᑦᓯᐊᖏᑦ ᓄᓇᓯᐅᑎᓄᑦ ᐅᖁᒪᐃᑦᑐᓄᑦ. ᑕᐃᒫᑐᐃᓐᓇᓪᓚᕆᒃ. ᐊᐅᓪᓚᐅᔾᔭᐅᓪᓗᑕ ᓄᐃᐅᓪᑎᓐ ᑕᓯᖓᓄᑦ. ᕿᓚᒥᐅᔪᖅ ᑕᐅᕙᓃᓚᐅᖅᓯᒪᔪᑦ, ᐃᓐᓇᑐᖃᖁᑎᑦᑎᓐᓄᑦ ᐅᖃᐅᔾᔭᐅᓪᓗᖓ; ᑎᓴᒪᑦ ᐃᓄᐃᑦ ᑐᖁᓚᐅᖅᓯᒪᔪᑦ. ᐅᑭᐊᒃᓵᕈᕋᒥᒃ, ᐱᓱᓚᐅᖅᓯᒪᔪᑦ ᐅᑎᖅᖢᑎᑦ ᐃᓇᑕᐃ ᑕᓯᖓᓄᑦ, ᐱᖓᓱᑦ ᑕᖅᑮᑦ ᐱᓱᒃᖢᑎᑦ. ᐅᑎᖅᖢᑎᑦ ᐃᓇᑕᐃ ᑕᓯᖓᓄᑦ ᐅᑭᐅᕌᓗᒃᑯᑦ.
ᕿᒥᕐᕈᐊᒐᖅ: ᑭᓱᑦ ᐱᔾᔪᑎᒋᔭᐅᓚᐅᖅᓯᒪᕙ ᓯᕗᓪᓕᖅᐹᒥᒃ ᓄᒃᑎᖅᑕᕕᓂᐅᓪᓗᑎᑦ?
ᓯᖁᐊᖅ: ᐃᓚᖓ ᐊᕝᕕᐊᓕᓚᐅᖅᓯᒪᒻᒪᑕᒎᖅ ᓈᓚᐅᑎᖃᕐᕕᑉ ᐃᖅᑲᓇᐃᔭᖅᑎᖏᓐᓄᑦ; ᑕᑎᖃᓗᐊᓕᖅᖢᑎᑦ. ᐊᓯᐊ ᐱᔾᔪᑕᐅᒋᓪᓗᓂ ᑮᓇᐅᔭᓕᐅᕋᓱᐊᖅᑐᑎᑦ ᐃᖃᓗᒐᓱᐊᖃᑦᑕᓚᐅᖅᓯᒪᖕᒪᑕ ᓄᐃᐅᓪᑎᓐ ᑕᓯᖓᓂᒃ ᐊᓪᓚᓄᑦ, ᐊᒻᒪᓗ ᓂᐅᕕᕐᕕᑕᖃᓕᖅᖢᓂ.
ᕿᒥᕐᕈᐊᒐᖅ: ᐃᓇᑕᐃᒥ ᐃᓅᓂᑰᕖᑦ?
ᓯᖁᐊᖅ: ᐄ, ᐃᓅᓚᐅᖅᓯᒪᔪᖓ ᑭᖑᓂᒃᑎᐊᖓᒍᑦ ᐱᓱᓚᐅᖅᑎᓪᓗᒋᑦ ᓄᐃᐅᓪᑎᓐ ᑕᓯᖓᓃᙶᖅᖢᑎᑦ. ᐊᕐᕌᒍᑦ ᐊᓂᒍᖅᓯᒪᓕᖅᑎᓪᓗᒋᑦ, 1957ᖑᑎᓪᓗᒍ, ᐃᓱᒪᓕᐅᖅᑐᖃᓕᓚᐅᖅᓯᒪᖕᒥᔪᖅ ᓄᒃᑎᖅᑕᐅᓕᕐᒥᓗᑕ ᐅᐊᖕᓇᖓᓄᑦ ᕼᐃᓂᒃ ᑕᓯᖓᓄᑦ, ᐃᓇᑕᐃ ᑕᓯᖓᑕ ᐊᒻᒪᓗ ᐊᕐᕕᐊᑦ ᐊᑯᕐᖓᖓᓂ. ᐅᐊᖕᓇᖓᓂ ᕼᐃᓂᒃ ᑕᓯᖓᓄᐊᕋᑦᑕ, ᐃᖅᑲᐅᒪᔪᖓ ᓄᑖᕐᓂᒃ ᑐᐱᖅᓯᒪᔪᖃᓕᕇᓚᐅᖅᓯᒪᔪᖅ ᒥᑭᔪᑯᓗᖕᒥᒃ ᑕᖂᑎᒃᑯᕕᑕᖃᖅᖢᓂ ᓂᕆᔭᐅᖃᑦᑕᕋᔭᖅᑐᓂᒃ. ᑖᓐᓇ ᑕᐅᕗᖓᑐᐊᖅ ᐊᐅᓪᓛᕐᕕᐅᓂᐊᓚᐅᖅᑐᖅ ᐅᑎᐅᑎᖃᙱᓪᓗᓂ, ᐱᓱᒍᓐᓇᓚᐅᙱᓐᓇᑉᑕ ᐅᑎᒧᑦ. ᐱᐅᙱᓛᖑᓚᐅᖅᑐᖅ ᑕᐅᕙᓃᒃᖢᑕ ᕿᓚᒥᑯᓗᒃ ᓂᕿᖃᕈᓐᓃᕋᑉᑕ.
ᕿᒥᕐᕈᐊᒐᖅ: ᐃᓄᐃᑦ ᖃᓄᐃᓕᐅᖅᐸᓚᐅᖅᐸᑦ ᐊᓐᓇᐅᒪᓇᓱᐊᖅᖢᑎᑦ?
ᓯᖁᐊᖅ: ᐋᓐᓂᐊᙱᒃᑯᕕᑦ, ᖃᓂᓛᖅ ᓱᓇᒃᑯᑖᖅᑖᕐᕕᐅᓚᐅᖅᓯᒪᔪᖅ ᐱᖓᓱᓄᑦ ᐅᓪᓗᓄᑦ ᐱᓱᕝᕕᒃᓴᖅ, ᑕᐅᕗᖓᑐᐊᖅ, ᐹᓪᓕᕐᒧᑦ [ᕼᐊᑦᓴᓐᔅ ᕙᐃ ᓂᐅᕕᕐᕕᖓ]. ᐃᓚᖏᑦ ᐃᓄᐃᑦ ᑐᖁᓚᐅᖅᓯᒪᔪᑦ ᐱᕐᓕᖅᖢᑎᑦ, ᖃᑦᑏᓐᓇᑦ ᓯᓚᑉ ᐱᓪᓗᒍ, ᒪᕐᕉᒃ ᐃᓅᒃ ᐃᓄᐊᖅᑕᐅᓪᓗᑎᒃ. ᐃᓚᖓᓂᒃ ᐅᓪᓗᖏᓐᓂ ᐱᖓᓱᑦ ᐊᖑᑏᑦ ᐃᒡᓗᕋᓛᕐᒥ ᐊᖅᑯᓵᓚᐅᖅᓯᒪᔪᑦ ᓇᖕᒥᓂᖁᑎᒋᔭᐅᓪᓗᓂ ᐅᔭᕋᓐᓂᐊᖅᑎᒃᑯᓐᓄᑦ. ᓴᓐᓂᕈᐊᖓ ᓱᕋᒃᖢᓂᐅᒃ ᐊᒻᒪᓗ ᓂᖀᑦ ᐱᔭᐅᓪᓗᑎᑦ ᓂᕆᔭᐅᓂᐊᕋᒥᒃ ᐃᓚᒥᓄᑦ. ᑭᖑᓂᑦᑎᐊᖓᒍᑦ, ᐳᑭᖅᑕᓕᒃᑯᑦ ᖃᐃᓪᓗᑎᑦ ᐊᒻᒪᓗ ᐃᖅᑲᖅᑐᕋᒃᓴᓕᐅᖅᑐᕕᓂᐅᓪᓗᑎᑦ, ᐊᒻᒪᓗ ᐊᕐᕕᐊᓅᕈᔾᔨᓪᓗᑎᑦ ᐊᒃᓱᕈᕐᓇᖅᑐᒥᒃ ᓴᓇᑎᑕᐅᓪᓗᑎᑦ, ᕿᒪᐃᓪᓗᑎᑦ ᐃᓚᒥᖕᓂᒃ; ᐊᒃᓱᕈᕐᓇᓂᖅᓴᐅᒍᑎᒋᓚᐅᖅᓯᒪᔮ ᑖᒃᑯᓄᖓ ᐃᓄᖕᓄᑦ. ᑕᐃᒪᐃᑦᑐᐃᓐᓇᐅᑎᓪᓗᒋᑦ, ᓅᒋᐊᖃᓕᓚᐅᖅᓯᒪᔪᒍᑦ ᐹᓪᓕᕐᒧᑦ, ᐱᖓᓱᓄᑦ ᐅᓪᓗᓄᑦ ᐊᑯᓂᐅᑎᒋᔪᖅ ᐱᓱᒃᖢᑕ. ᑕᒪᐃᓐᓂ ᐃᓚᒌᑦ ᑕᐅᕗᙵᖅᖢᑎᑦ. ᕿᓚᒥᑯᓗᒃ ᑕᐅᕙᓃᓚᐅᖅᖢᑕ, ᐳᑭᖅᑕᓕᒃᑯᑦ ᖃᐃᓪᓗᑎᑦ ᐊᒻᒪᓗ ᕿᓂᓚᐅᖅᓯᒪᔪᑦ ᐃᓄᖕᓂᒃ ᐃᓅᒍᓐᓃᖅᑐᕕᓂᕐᓂᒃ ᐃᓄᑐᖃᐅᓗᐊᓕᒧᑦ ᐅᕝᕙᓘᓐᓃᑦ ᐱᕐᓕᖅᑐᕕᓂᐅᔪᓄᑦ, ᕿᒪᒃᑕᕕᓃᑦ, ᐅᕝᕙᓘᓐᓃᑦ ᐃᓄᐊᖅᑕᕕᓃᑦ. ᑕᐃᒪᓕ, ᑕᒪᐃᓐᓂᓕᒫᖅ ᐊᕼᐃᐊᕐᒥᐅᑦ ᖃᖓᑕᓲᒃᑯᑦ ᐊᕐᕕᐊᓅᕈᔾᔭᐅᓕᓚᐅᖅᓯᒪᔪᑦ 1957−ᖑᑎᓪᓗᒍ. ᐱᖓᓲᔪᖅᑐᐸᓗᖕᓂᒃ ᐅᑭᐅᖃᓚᐅᖅᓯᒪᔪᖓ.
ᕿᒥᕐᕈᐊᒐᖅ: ᓱᒻᒪᑦ ᐊᕐᕕᐊᑦ?
ᓯᖁᐊᖅ: ᐳᑭᖅᑕᓕᒃᑯᑦ ᖃᐅᔨᓴᓚᐅᖅᓯᒪᖕᒪᑕ ᐃᓄᐊᖅᓯᔪᖃᖅᑐᕕᓂᐅᓂᖓᓄᑦ. ᐃᓄᐃᑦ ᐊᕐᕕᐊᕐᒥᐅᑕᓂᑦ ᐃᓅᖃᑎᖃᕈᓐᓇᓚᐅᖅᓯᒪᙱᑦᑐᑦ. ᐊᑕᐅᓯᖅ ᐊᕐᓇᖅ ᐃᖅᑲᖅᑐᕋᒃᓴᕈᖅᑎᑕᐅᓚᐅᖅᓯᒪᖕᒪᑦ ᐃᓄᐊᖅᓯᔪᕕᓂᐅᓂᖓᓄᑦ ᐊᒻᒪᓗ ᕿᒪᐃᔪᕕᓂᐅᓂᖓᓄᑦ ᕿᑐᕐᖓᖏᓐᓂᒃ. ᑲᖏᖅᖠᓂᕐᒥ ᐃᖅᑲᑐᖅᑕᐅᓚᐅᖅᓯᒪᓪᓗᓂ ᐸᓯᔭᒃᓴᐅᙱᓐᓂᕋᖅᑕᐅᓪᓗᓂᓗ. ᐃᖅᑲᑐᖅᑕᐅᔭᕇᕋᒥ, ᐅᖃᐅᔾᔭᐅᓚᐅᖅᓯᒪᔪᒍᑦ ᐅᐊᖕᓇᒧᐊᕆᐊᓯᓂᐊᕋᑦᑕᒎᖅ, ᐅᒥᐊᒃᑯᑦ ᐊᐅᓪᓚᖔᓕᕐᓗᑕ. ᐃᓇᑕᐃ ᓄᓇᓕᐅᓕᓚᐅᖅᓯᒪᔪᑦ ᑕᒪᐃᓐᓄᑦ ᐊᕼᐃᐊᕐᒥᐅᑕᓄᑦ ᖃᓂᒃᑑᓪᓗᓂ ᑲᖏᖅᖠᓂᕐᒧᑦ, ᑕᐃᔭᐅᔪᖅ ᐃᑎᕕᐊ. ᕿᓚᒥᑯᓗᒃ ᑕᐅᕙᓃᓚᐅᖅᓯᒪᔪᒍᑦ. ᐃᓕᓐᓂᐊᕐᕕᖕᒥ ᒥᑭᔫᑕᐅᓂᖅᐹᖏᓐᓂᒃ ᐃᓕᓐᓂ ᐊᕆᐊᓯᓚᐅᖅᓯᒪᒐᑦᑕ ᑭᓯᐊᓂᓕ ᓄᒃᑎᖅᑕᐅᓕᕆᓪᓗᑕ ᐅᒥᐊᒃᑯᑦ ᑎᑭᕋᕐᔪᐊᒧᑦ, ᐊᒻᒪᓗ ᐅᑎᑦᑕᑐᐃᓐᓇᓕᖅᖢᑕ ᐱᒋᐊᕐᕕᒋᓚᐅᖅᓯᒪᔭᑦᑎᓐᓄᑦ. ᓄᓇᐃᓐᓈᓘᓪᓗᓂ, ᓇᐹᖅᑐᖃᕋᓂ. ᐱᒡᒐᓇᓚᐅᖅᑐᖅ ᐃᒡᓗᕕᒐᕐᒥᐅᑕᐅᒃᑲᓐᓂᕋᓱᐊᓕᖅᖢᓂ. ᖃᑦᑏᓐᓇᐅᓚᐅᖅᓯᒪᔪᑦ ᐊᕼᐃᐊᕐᒥᐅᑦ ᓴᓐᓂᖓᔪᖅ ᑰᖓᓂᒃ ᐊᒻᒪᓗ ᖃᒪᓂ’ᑐᐊᕐᒥ ᐊᑕᐅᑦᑎᒃᑯᑦ ᖃᖓᑕᓲᒃᑯᑦ ᑕᐅᕗᙵᖅᑎᑕᐅᓪᓗᑎᑦ. ᑎᑭᕋᕐᔪᐊᕐᒦᓚᕿᓕᓚᐅᖅᓯᒪᕗᒍᑦ 1960ᒥ.
ᕿᒥᕐᕈᐊᒐᖅ: ᖃᓄᖅ ᑖᒃᑯᐊ ᐃᓄᐃᑦ ᓄᒃᑎᖅᑕᐅᖏᓐᓈᓗᖃᑦᑕᑎᓪᓗᒋᑦ ᐊᑐᖃᑦᑕᓚᐅᖅᐸᑦ?
ᓴᐅᒥᐊᓂᑦ ᑕᓕᖅᐱᐊᓄᑦ: ᑕᐃᕕᑎ ᓯᖁᐊᑉ ᐊᓈᓇᒋᓚᐅᖅᓯᒪᔭᖓ ᖃᕼᐅᖅ ᐊᒻᒪᓗ ᓄᑕᕌᓗᒃ
ᐊᓕᑲᓱᐊᖅ ᐊᒥᕋᔭᖕᒥᒃ ᑐᐱᑉ ᓴᓂᐊᓃᑦᑐᖅ
ᓯᖁᐊᖅ: ᓲᕐᓗᖃᐃ ᐊᒃᓱᕈᕐᓇᑐᒃᑰᕐᓂᖅᓴᐅᕙᓚᐅᖅᑐᑦ ᐊᖓᔪᖅᑳᕗᑦ. ᓱᕈᓯᐅᓚᐅᖅᓯᒪᒐᑦᑕᓕ, ᐊᒫᖅᑕᐅᕙᒃᖢᑕ ᐊᓈᓇᑦᑎᓐᓄᑦ. ᑎᑭᕋᕐᔪᐊᕐᒥ, ᐊᖓᔪᖅᑳᕗᑦ ᓱᑲᑦᑐᒻᒪᕆᐊᓗᖕᒥᒃ ᐃᓅᓯᕐᒧᑦ ᓱᖏᐅᑎᔭᕆᐊᖃᓚᐅᖅᓯᒪᔪᑦ. ᐊᖓᔪᖅᑳᕆᔭᐅᔪᑦ ᐃᓕᓐᓂᐊᒃᑲᓐᓂᕆᐊᖃᓕᓚᐅᖅᓯᒪᔪᑦ ᐃᓚᖏᓐᓂᒃ ᐃᓅᓇᓱᐊᕐᓂᕐᒥᒃ ᓯᔾᔭᒥᐅᑕᐅᓪᓗᑎᑦ. ᖃᐅᔨᒪᓚᐅᙱᑦᑐᑦ ᑎᓂᖃᑦᑕᕐᓂᐅᔪᓂᑦ ᑕᑯᓚᐅᖅᓯᒪᒐᑎᓪᓗ ᐳᐃᔨᓂᒃ. ᐊᒥᓱᑎᒍᑦ ᓂᕆᒋᐅᕐᓂᑰᓚᐅᙱᑦᑐᒍᑦ ᐳᐃᔨᓂᒃ.
ᕿᒥᕐᕈᐊᒐᖅ: ᐊᒥᓱᑦ ᐊᕐᕌᒍᑦ, ᖁᓖᑦ ᐊᕐᕌᒍᑦ ᐅᖓᑖᓄᒻᒪᕆᒃ ᐋᖅᑮᓚᐅᖅᓯᒪᔪᑎᑦ ᐊᕼᐃᐊᕐᒥᐅᑦ ᓄᒃᑎᖅᑕᐅᓂᑯᕕᓃᑦ ᑲᑐᔾᔨᖃᑎᒌᖏᖕᓂᒃ. ᓱᒻᒪᑦ ᑲᑐᔾᔨᖃᑎᒌᓕᐅᓕᓚᐅᖅᓯᒪᕕᑦ?
ᓯᖁᐊᖅ: 1998ᖑᓚᐅᖅᓯᒪᔪᖅ. ᖃᐅᔨᔪᒪᐃᓐᓇᖅᐸᓚᐅᖅᓯᒪᒐᒪ ᓱᒻᒪᑦ ᓄᒃᑎᖅᑕᐅᓯᒪᓂᑰᒻᒪᖔᑦᑕ. ᐊᓯᐅᓚᐅᖅᓯᒪᙱᑦᑐᖅ ᑕᒪᓐᓇ. 1999ᕈᕋᓱᐊᕐᓂᖓᓂᒃ, ᐃᖅᑲᓇᐃᔭᖅᑎᑖᕆᔭᐅᑲᐃᓐᓇᓚᐅᖅᓯᒪᔪᖓ ᐱᓕᕆᐊᖃᕐᓂᐊᕐᓗᖓ ᓄᑖᕐᒥᒃ ᓄᓇᕗᒻᒥ ᐃᓕᓐᓂᐊᕐᓂᓕᕆᔨᒃᑯᓐᓂᑦ ᐊᖓᔪᖅᑳᖃᕐᕕᖓᓂᒃ. ᐃᓚᖓᑦ ᐃᖅᑲᓇᐃᔮᕐᒪ ᐱᓕᕆᐊᒃᓴᕆᕙᓚᐅᕋᑉᑯ ᓄᓇᓕᖕᓄᐊᑲᑕᓪᓗᖓ. ᐊᑕᐅᓯᐊᖅ ᐊᐅᓪᓚᓚᐅᖅᓯᒪᔪᖓ ᒥᓂᔅᑕᐅᑉ ᑐᖏᓕᐊ ᐊᐃᑉᐸᕆᓪᓗᒍ ᐊᕐᕕᐊᓄᑦ. ᐱᖓᓲᔪᖅᑐᑦ ᐊᑕᐅᓯᕐᓗ ᐃᑲᕐᕋᑦ ᐊᑯᓂᐅᑎᒋᔪᖅ ᐅᖃᓪᓚᕝᕕᒋᓚᐅᖅᓯᒪᔮᑎᒍᑦ. ᑕᐃᑲᓂ ᐅᓐᓄᖓᓐᓂ, ᒪᒃᑯᓐᓂᖅᓴᐅᔪᐃᑦ ᑲᑎᓚᐅᖅᓯᒪᔪᑦ ᐊᒻᒪᓗ ᐃᓱᒪᓕᐅᖅᖢᑎᑦ ᑲᑐᔾᔨᖃᑎᒌᑖᕐᓂᐊᕋᒥᒃ. ᐃᓐᓇᑐᖃᐃᑦ ᐅᖃᐅᑎᓚᐅᖅᓯᒪᔮᑎᒍᑦ ᑐᓴᕈᒥᓇᙱᒻᒪᕆᒃᑐᓂᒃ ᐅᓂᒃᑳᕐᓂᒃ. ᐃᓄᐃᑦ ᖃᐅᔨᒪᔭᕆᐊᖃᓚᐅᖅᓯᒪᖕᒪᑕ.
ᕿᒥᕐᕈᐊᒐᖅ: ᑕᒪᓐᓇ ᐅᐊᑦᑎᐊᕈᑲᓪᓚᐅᓚᐅᖅᓯᒪᔪᖅ, ᖃᓄᐃᓚᐅᖅᓯᒪᕙᓕ ᒪᒥᐊᕝᕕᐅᒐᓱᐊᕐᓂᔅᓯᖕᓂᒃ ᑕᒫᓂ ᐊᕐᕌᒍᒧᑦ?
ᓯᖁᐊᖅ: ᖃᓄᐃᓕᐅᕈᑕᐅᓚᐅᙱᑦᑐᖅ ᐊᑯᓂᕈᓗᒃ. ᐱᖓᓲᔪᖅᑐᑦ ᐊᑕᐅᓯᕐᓗ ᐊᕐᕌᒎᓕᖅᑐᓂᑦ, ᓄᑖᖅ ᒪᓕᒐᓕᕆᔨᕗᑦ ᓯᑏᕙᓐ ᑰᐳᕐ ᖃᐅᔨᒪᑦᑎᐊᓚᐅᖅᑐᖅ ᒐᕙᒪᒃᑯᑦ ᑕᑯᓪᓚᒃᑖᕋᓗᐊᕐᒪᖔᕐᒥᒃ ᐊᕼᐃᐊᕐᒥᐅᑕᓂᑦ. ᐊᕐᕕᐊᓅᕈᑎᓚᐅᖅᓯᒪᔭᕗᑦ. ᑕᑯᔪᓐᓇᓚᐅᕐᒪᑕ ᐱᓪᓚᑦᑖᓂᒃ ᐊᕼᐃᐊᕐᒥᐅᑕᓪᓚᑦᑖᕐᓂᒃ. ᑕᐃᑲᙵᑦ, ᐃᖅᑲᓇᐃᔭᖃᑎᒌᑦᑎᐊᕈᓐᓇᖅᓯᓕᓚᐅᖅᓯᒪᔪᒍᑦ. ᐃᓱᒪᒋᔭᖃᐃᓐᓇᓚᐅᖅᑐᖓ ᑕᒪᓐᓇ ᓴᖅᑮᒐᔭᕆᐊᖓᓂᒃ ᐊᑭᓕᖅᑕᐅᓗᑕ, ᒪᒥᐊᕝᕕᐅᓗᑕ, ᐊᒻᒪᓗ ᓇᓗᓇᐃᒃᑯᑕᖅᑖᕐᓗᑕ. ᐊᒻᒪᓗ ᑕᒪᐃᓐᓂᓕᒫᖅ ᑕᐃᒪᐃᓚᐅᖅᐳᑦ.
ᕿᒥᕐᕈᐊᒐᖅ: ᖃᓄᖅ ᒪᒥᐊᕝᕕᐅᓂᖅ ᐃᓕᖕᓄᑦ ᑐᑭᖃᖅᐸ?
ᓯᖁᐊᖅ: ᐊᖓᔪᖅᑳᑦᑎᓐᓄᑦ, ᓯᓐᓇᑦᑑᒪᑲᒻᒪᑐᕐᔫᔮᕐᓇᖅᓯᒪᔪᖅ ᐊᓯᐅᓚᐅᖅᓯᒪᙱᒃᖢᓂ. ᐊᒻᒪᓗ ᐅᑭᐅᖃᑎᒃᑲᓗ ᐱᔭᕕᓂᕆᓪᓗᑎᒍᑦ ᓯᓐᓇᑦᑑᒪᑲᒻᒪᓐᓂᖅ. ᒪᒥᐊᕝᕕᐅᓪᓗᑕᓕ, ᑐᐸᒃᑐᕐᔫᔮᓚᐅᖅᑐᒍᑦ ᓯᓐᓇᑦᑑᒪᑲᒻᒪᓐᓂᐊᓗᒃᑎᓐᓂᑦ. ᒪᒃᑯᒃᑑᔪᓄᑦ ᐅᓪᓗᒥ, ᐅᖃᕈᓐᓇᖅᐳᖓ: ᐊᕼᐃᐊᕐᒥᐅᑕᐅᓗᓂ ᖃᓄᐃᙱᓚᖅ. ᑕᓗᕈᒃᑯᑎᑦᑕᐃᓕᒋᑦ.
ᕿᒥᕐᕈᐊᒐᖅ: ᖃᖓ ᑭᖑᓪᓕᖅᐹᒥᒃ ᐃᓇᑕᐃ ᑕᓯᖓᓃᓚᐅᖅᓯᒪᕕᑦ?
ᓯᖁᐊᖅ: ᓯᑏᕝᕙ 1985ᖑᑎᓪᓗᒍ ᐃᓐᓇᑐᖃᐃᑦ ᑕᑯᔭᖅᑐᖅᑎᓕᓚᐅᖅᓯᒪᔭᕗᑦ. ᑖᕙᓃᓐᓂᕆᔭᕗᑦ ᒪᕐᕉᒃ ᐱᓇᓱᐊᕈᓰᖕᓂᒃ ᓴᙱᔪᒻᒪᕆᐊᓘᓚᐅᖅᓯᒪᔪᖅ. ᐊᓈᓇᒐᓗ, ᐊᖓᔪᒃᑯᒃᑲᓗ, ᐱᓱᓚᐅᖅᓯᒪᔪᒍᑦ ᐃᖃᓪᓕᐊᕐᕕᑦᓈᕐᒧᑦ ᐊᒻᒪᓗ ᑕᑯᓪᓗᒍ ᑐᐱᕐᕕᕕᓂᕗᑦ. ᓇᓂᓚᕿᓚᐅᖅᓯᒪᔭᕋ — ᓇᓗᖅᑯᑎᙱᓚᖓ — ᐱᙳᐊᑐᖃᕕᓂᕈᓗᒐ, ᖃᔭᙳᐊᖅ ᒥᑭᔪᖅ. ᐅᕙᑦᑎᓐᓃᑎᑕᕋ ᓱᓕ ᐋᑐᕚᒥ. ᑖᓐᓇ ᐊᐱᖅᓱᖅᑕᐅᓯᒪᓂᖓ ᓇᑲᑎᖅᑕᐅᓯᒪᔪᖅ ᓈᒻᒪᓐᓂᐊᕐᒪᑦ ᑕᑭᓂᖓ ᐊᒻᒪᓗ ᓱᖅᑯᐃᓇᖅᓯᑎᑕᐅᒋᐊᖅᓯᒪᓪᓗᓂ.
ᐊᓇᐅᑕᓕᒃ ᐊᒻᒪᓗ ᐋᔮᖅ ᒥᐊᕆ ᐊᓇᐅᑕᓕᒃ.
