“ᒫᓃᓚᐅᖅᓯᒪᕗᑎᑦ, ᐃᖅᑲᐅᒪᕖᑦ?”

ᕿᑐᕐᖓᖏᑦ ᑎᓴᒪᑦ ᐃᓕᓐᓂᐊᖅᓯᒪᔪᑦ ᐊᐅᓱᐃᑦᑐᕐᒥ. ᐃᖅᑲᓇᐃᔮᖃᖅᓯᒪᔪᖅ ᐊᑕᐃᓐᓇᖅᑐᓂ ᐃᓄᒃᑎᑐᑦ ᐃᓕᓴᐃᕙᒃᑐᓂ ᐱᒋᐊᙵᕐᓂᖏᓐᓂᒃ 1990ᖏᑦ. ᑭᓯᐊᓂᓕ, ᐆᒪᔪᕋᓱᐊᕐᓂᒃᑯᑦ ᐃᓚᒌᑦ ᑮᓇᐅᔭᓕᐅᕈᑎᖃᖅᐸᒃᑐᑎᑦ. ᒪᑯᐊᑕᒡᕙ ᖁᕕᐊᒋᓛᖏᑦ ᐃᖅᑲᐅᒪᒋᒋᐊᖅ, ᐅᓐᓄᑕᒫᑦ ᐊᓯᕙᖃᒃᑕᕐᓂᖅ ᓯᑯᒥ ᖃᐅᒪᐃᓐᓇᑎᓪᓗᒍ ᐊᐅᔭᒃᑯᑦ. ᐊᐃᒐ, ᐅᐃᖓ, ᕿᑐᕐᖓᖏᓪᓗ ᐅᓯᓕᖅᑐᐃᕙᒃᑐᑎᑦ ᐊᑐᕆᐊᓕᓪᓚᕆᒻᒥᓂᒃ; ᑏ, ᐸᓚᐅᒑᖅ, ᓴᓇᕐᕈᑏᓪᓗ ᓇᑦᑎᕋᓱᐊᕈᑏᑦ ᕿᓯᓕᕆᐅᑏᓪᓗ. ᓇᑦᑎᕋᓱᓐᓂᖅ ᐊᓐᓇᐅᒪᒍᑎᒋᓪᓗᓂᒡᔪᒃ; ᓇᑦᑎᖅ ᓱᓕ ᒫᓐᓇᒧᑦ ᐃᓚᖏᓐᓄᑦ ᓂᕿᒃᓴᕆᔭᐅᕙᒃᑐᖅ, ᓂᕿᒃᓴᓂᒃᐸᒻᒥᒃᓱᑎᒃ ᓂᐅᕕᕐᕕᓐᓂ.

ᐊᓯᕙᕈᓐᓇᕐᓂᖏᒃᑎᒍᑦ ᐃᓕᓴᐃᔨᐅᓂᖓᒍᓪᓗ, ᐊᐃᒐ ᐃᓚᖏᓪᓗ ᕿᑲᕆᐊᖃᒃᑕᕈᓐᓇᖅᓯᒪᔪᑦ ᐅᐊᓐᓇᖓᓄᑦ ᑲᓇᑕᐅᑉ. ᑕᐃᒃᓱᒪᓂᓕ, ᖃᖓᒃᑕᐅᑏᑦ ᖃᐅᓱᐃᑦᑐᕐᒥ ᐊᑦᒪᓐᑕᓐᒧᑦ ᐊᑭᑭᓐᓂᖅᓴᐅᕙᔪᒻᒪᑕ ᑎᑭᒐᔪᓐᓂᖅᓴᐅᓪᓗᑎᓪᓗ ᖃᖓᑕᓲᑦ ᐅᔭᕋᓐᓂᐊᕐᕕᖃᖅᑎᓪᓗᒍ ᖃᓂᒋᔮᓂ ᖃᐅᓱᐃᑦᑑᑉ. ᑭᓯᐊᓂᓕ, ᐅᔭᕋᓐᓂᐊᕐᕕᒃ ᒪᑐᓚᐅᖅᓯᒪᑎᓪᓗᒍ ᐱᒋᐊᓕᓵᖅᑎᓪᓗᒋᑦ 2000ᖏᓐᓂ, ᑐᕋᐃᓐᓇᖃᒃᑕᕐᓂᖏᑦ ᖃᖓᑕᓲᑦ ᖃᐅᓱᐃᑦᑐᕐᒧᑦ ᐊᑐᕈᓐᓃᖅᑎᑕᐅᓚᐅᖅᓯᒪᔪᑦ. ᐃᖅᑲᓇᐃᔭᖅᑎᖏᑦ ᐅᔭᕋᓐᓂᐊᕐᕕᓐᓂ ᐱᑕᖃᕈᓐᓃᕐᒪᑕ ᖃᐅᓱᐃᑦᑐᓕᐊᖅᐸᓚᐅᖅᑑᒐᓗᐊᑦ
ᖃᖓᑕᓲᓕᕆᔩᑦ ᓱᐴᖅᑐᓕᓐᓂᒃ ᐊᑐᕈᓐᓃᖅᑐᑎᑦ ᓱᒃᑲᐃᓐᓂᖅᓴᒻᒪᕆᓐᓂᒃ ᒪᕐᕈᓖᓐᓂᒃ ᐊᑐᖔᖃᒃᑕᓯᓚᐅᖅᑐᑦ. ᑕᒪᓐᓇ ᐊᒃᑐᐃᓂᖃᓪᓚᕆᒃᓯᒪᔪᖅ ᕿᑲᕆᐊᖃᒃᑕᕐᓂᕐᒥᑐᐊᖑᙱᒃᑐᖅ, ᑭᓯᐊᓂᒃᑕᐅᖅ ᐋᓐᓂᐊᕕᓕᐊᕐᓂᒃᑯᑦ ᐊᐅᓪᓚᖃᒃᑕᕐᓂᕐᒥᒃ, ᐋᒃᑲᐅᒐᓗᐊᖅᑎᓪᓗᒍ ᑐᐊᕕᕐᓇᖅᑐᓕᕆᓂᕐᒧᑦ ᐊᐅᓪᓚᐅᒡᔭᐅᓂᖅ, ᑕᖃᓇᖅᑐᓪᓗᕆᒻᒥᒃ ᐅᓪᓗᕋᓴᕐᓂᒃ ᐊᐃᒐᓱᐊᖅᐸᓕᖅᓱᑎᒃ ᑎᑭᐅᑎᒐᓱᐊᖅᑕᒥᓐᓄᑦ.

ᐃᓚᒌᒃᑐᑦ ᐊᐅᓱᐃᑦᑐᕐᒥ, ᓲᕐᓗ ᐊᐃᒐᐅᑉ ᐃᓚᖏᒃᑐᑦ, ᒪᑭᑎᒃᓯᑐᐃᓐᓇᖅᓯᒪᙱᒃᑐᑦ ᓄᓇᒥᓐᓂ, ᑭᓯᐊᓂᒃᑕᐅᖅ ᐊᓐᓇᐅᒪᒍᓐᓇᖅᓯᒪᔪᑦ ᐊᓯᒡᔨᕐᓂᖃᓪᓚᕆᒃᑐᒃᑯᑦ ᒐᕙᒪᓕᕆᓂᒃᑯᑦ, ᐃᓄᓕᕆᓂᒃᑯᑦ, ᑮᓇᐅᔭᓕᕆᓂᒃᑯᓪᓗ ᓄᓇᕗᒻᒥ. ᓄᑖᖑᓂᖓᓄᑦ ᓴᖅᑭᑕᐅᖃᑖᓂᖓ ᓄᓇᕗᑦ ᐃᓱᓕᓕᖅᑎᓪᓗᒍ ᐊᕐᕌᒍᕋᓴᐃᑦ ᐊᕕᒃᑐᖅᓯᒪᓂᖏᑦ, ᐃᓄᐃᑦ ᐃᒃᐱᓐᓂᐊᒋᔭᖃᓚᐅᖅᑐᑦ ᐱᕈᖅᐸᓪᓕᐊᓕᑕᐃᓐᓇᖅᑐᕐᒥᒃ ᓴᖅᑭᓕᓵᖅᑐᕐᒥᒃ ᐊᓪᓚᕕᒻᒥᒃ. ᓴᖅᑭᖅᑕᐅᓂᖏᑦ ᓄᑖᑦ, ᐊᕕᒃᑐᖅᓯᒪᓂᖃᕐᓂᖏᑦ ᒐᕙᒪᒃᑯᑦ ᐱᓕᕆᕕᕐᔪᐊᖏᑦᑕ ᑐᑭᖃᖅᓯᒪᔪᖅ ᐃᓚᖏᑦ ᓄᓇᓖᑦ ᐊᒃᑐᖅᑕᐅᓯᒪᓂᖃᕐᓂᖅᓴᐅᒻᒪᑕ. ᐱᒋᐊᓕᓵᕐᓂᖓᓂᒃ ᐊᕐᕌᒍᕋᓴᐃᑦ ᐊᕕᒃᑐᖅᓯᒪᓂᖏᑦ, ᐊᐃᒐ ᐅᔾᔨᕈᓱᒃᓯᒪᔪᖅ ᐃᖅᑲᓇᐃᔮᖓ ᐃᓄᒃᑎᑐᑦ ᐃᓕᓴᐃᔨᐅᓂᖓ ᐃᓕᓐᓂᐊᕋᒃᓴᓪᓚᕆᓐᓂᒃ ᐊᑐᖅᑕᐅᓗᐊᕈᓐᓃᕆᐊᖓ. ᑭᓯᐊᓂᓕ, ᖃᐅᔨᒪᔪᖅ ᐅᑎᕐᕕᖃᕈᓂ ᐱᖅᑯᓯᑐᖃᕐᒥᓄᑦ, ᓄᓇᒧᑦ, ᐅᖃᐅᓯᑐᖃᕐᒥᓄᑦ, ᐃᓚᖏᑦ ᐊᒻᒪᓗ ᓄᓇᓕᖓ ᓴᙱᓕᖅᐸᓪᓕᐊᑐᐃᓐᓇᕐᓂᐊᕆᐊᖏᑦ.

ᐊᐃᒐ ᐃᓅᓕᖅᑐᕕᓂᖅ ᖁᒃᓯᑐᒥ ᓄᓇᖓᓐᓂ ᑲᖏᖅᑐᒑᐱᐅᑉ.
ᐊᑖᑕᖓ ᐳᑭᖅᑕᓕᐅᓚᐅᖅᓯᒪᔪᖅ ᐊᐅᓱᐃᑦᑐᕐᒥ, ᒪᒃᑯᒃᑐᒻᒪᕆᐅᓪᓗᓂᓪᓗ, ᐊᐅᓪᓚᖅᑎᑕᐅᓚᐅᖅᓯᒪᔪᖅ ᐃᓚᒥᓃᒋᐊᖅᑐᖅᑐᓂ.
ᐱᒋᐊᓕᕋᑖᖅᑎᓪᓗᒋᑦ 1960ᖏᑦ, ᐊᐃᒐ ᐃᖅᑲᐅᒪᔪᖅ ᐋᓐᓂᓇᖅᑐᒥᒃ ᐊᑐᓚᐅᖅᓯᒪᔭᕐᒥᓂᒃ ᓄᑕᕋᐅᓪᓗᓂ ᐳᕙᓪᓗᓚᐅᖅᓯᒪᒻᒪᑦ.
ᐃᖅᑲᐅᒪᒋᔭᖃᓗᐊᙱᒃᑐᖅ ᑕᐃᒃᓱᒪᓂᐅᓚᐅᖅᓯᒪᔪᕐᒥ; ᐃᖅᑲᐅᒪᒋᓗᐊᖅᑕᖓᓪᓕ ᐃᓄᑑᓚᐅᖅᓯᒪᓂᕐᒥᓂ ᐅᒥᐊᕐᔪᐊᕐᒥ ᑲᑉᐱᐊᓱᒃᑐᓂᓪᓗ ᐅᑎᓚᐅᖅᓯᒪᙱᔭᖒᒧᑦ ᐃᓚᒥᓄᑦ.