ᒪᐃᔭ ᐹᓪ, ᐊᒻᒪᓗ ᐊᑦᑕᖓ/ᐊᔭᖓ ᒫᓕ ᓄᖓᒃᓴᖅ, ᐊᒻᒪᓗ ᓚᐅᓇ ᐹᓪ, ᐋᒡᒌᓯ 2019-ᖑᑎᓪᓗᒍ, ᐊᐅᓪᓚᖅᑐᑦ ᐅᒥᐊᖅᑐᖅᖢᑎᑦ ᐊᒃᑲᖓᑕ/ ᖓᖓᑕ ᓵᕈᓪᔅ ᐊᐅᔭᒃᑯᑦ ᐅᐱᕐᖏᕕᖓᓄᑦ.
ᐅᑭᐅᖅᑕᖅᑐᒥ ᑮᓇᐅᔭᖃᕐᕕᒋᕙᕋ
2019-ᖑᑎᓪᓗᒍ ᐊᐅᔭᒃᑯᑦ, ᖃᖓᑕᓲᒃᑰᖃᑎᒋᓚᐅᖅᓯᒪᒐᒃᑭᑦ ᐸᓂᒃᑲ ᐱᖓᓱᑦ ᔭᓗᓇᐃᑉ−ᒥ ᑐᒃᑐᔮᖅᑐᒧᑦ, ᒪᑭᒪᑎᒐᒃᓴᒥᒃ, ᑕᐃᒪᙵᑐᖄᓗᓪᓗ ᐱᖅᑯᓯᑐᖃᑦᑎᓐᓂᒃ ᐊᑐᖅᖢᑕ ᕿᓚᓗᒃᑭᐊᖃᑎᒋᒋᐊᖅᑐᖅᖢᒋᑦ. ᐊᓈᓇᐅᓪᓗᖓ ᐱᐅᓛᖑᓚᐅᖅᓯᒪᔪᖅ ᑕᐅᑐᖦᖢᒋᑦ ᐸᓂᒃᑲ, ᐅᑭᐅᓖᑦ 10, 8, ᐊᒻᒪᓗ 1, ᕿᓚᓗᒃᑭᐊᖃᑕᐅᓪᓗᑎᑦ ᒪᑭᐊᓐᔨ ᑰᖓᓅᕆᐊᕐᒧᑦ, ᐃᓚᒻᒪ ᑕᐃᒪᙵᑐᖄᓗᒃ ᓯᕗᕚᑦᑎᓐᓂᒃ ᐅᓪᓗᒥᒧᑦ ᑭᖑᕚᓄᑦ ᑎᑭᖦᖢᒍ ᐊᓐᓇᐅᒪᔾᔪᑎᒋᖃᑦᑕᖅᓯᒪᓪᓗᓂᒋᑦ.
ᕿᓚᓗᒃᑭᐊᕐᓂᖅ ᐃᓚᒋᔭᐅᖃᑕᐅᑐᐃᓐᓇᖅᐳᖅ ᐊᒥᓱᑦ ᐃᓄᕕᐊᓗᐃᑦ ᐱᖅᑯᓯᖏᖕᓂᒃ ᐃᓕᓐᓂᐊᕈᑎᒋᔭᐅᓯᒪᔪᑦ ᑭᖑᕚᕆᔭᐅᔪᓄᑦ ᐃᓄᕕᐊᓗᐃᑦ ᓯᕗᕚᑦᑎᓐᓂᒃ, ᐊᒻᒪᓗ ᐃᓕᓐᓂᐊᑎᑦᑎᒍᓯᑦᑎᐊᕚᓘᖏᓐᓇᖅᖢᓂ ᐊᒻᒪᓗ ᑲᓱᖅᓯᒪᑎᑦᑎᓲᖅ ᐃᓕᖅᑯᓯᑐᖃᖅᑎᓐᓄᑦ.
ᒨᕐᓇᐅᑉ ᐸᓂᖓ ᓚᐅᓇ ᐹᓪ ᐊᑦᑐᐊᔪᖅ ᕿᓚᓗᒐᐅᑉ ᑕᓕᕈᐊᖓᓂᒃ ᐊᖑᔭᐅᓚᐅᖅᑎᓪᓗᒍ ᐃᑉᐸᔅᓴᖓᓂ ᓂᐅᓪ ᑯᑉᑖᓇᒧᑦ.
ᐸᐸᑦᑎᔨᐅᓚᐅᖅᓯᒪᒐᒪ ᑕᑯᒃᓴᐅᑎᑕᐅᑎᓪᓗᒋᑦ “ᕿᓚᓗᒃᑲᑦ! ᕿᓚᓗᒐᐃᑦ ᐊᒻᒪᓗ ᐃᓄᕕᐊᓗᐃᑦ: ᐊᓐᓇᐅᒪᖃᑎᒌᖕᓂᕗᑦ.” ᑖᓐᓇ ᑕᑯᒃᓴᐅᑎᑦᑎᓂᐅᔪᖅ ᐅᓪᓗᒥ ᐋᖅᑭᒃᑕᐅᓯᒪᕗᖅ ᓄᓇᓕᕆᓂᕐᒧᑦ ᑕᑯᔭᒐᖃᕐᕕᖓᓂ ᐋᑐᕚᒥ, ᐋᖅᑭᓱᖅᑕᐅᒃᑲᓐᓂᖅᓯᒪᓪᓗᓂ ᑕᑯᒃᓴᐅᑎᑕᑦ ᓯᕗᓪᓕᖅᐹᒥ ᑕᑯᔭᐅᓚᐅᖅᓯᒪᓪᓗᓂ ᐳᕆᓐᔅ ᐊᑉ ᕙᐃᔪᓪᔅ ᐅᑭᐅᖅᑕᖅᑐᒥ ᐱᖅᑯᓯᑐᖃᒃᑯᕕᒃ ᔭᓗᓇᐃᑉ−ᒥ. ᑕᑯᒃᓴᐅᑎᑦᑎᓂᐅᔪᖅ ᑖᓐᓇ ᐅᓂᒃᑲᐅᓯᖃᖅᑐᖅ ᐃᓚᒌᑦᑐᑦ ᐃᓅᓯᖃᖃᑦᑕᕐᓂᖏᑦ ᑕᑎᖃᖅᖢᑎᑦ ᓄᓇᒥ ᐊᒻᒪᓗ ᑕᕆᐅᕐᒥ, ᐊᒻᒪᓗ ᐃᓄᕕᐊᓗᐃᑦ ᐃᓕᖅᑯᓯᖃᕐᓂᖏᑦ ᐊᓐᓇᐅᒪᓲᖑᓂᖏᖕᓂᒃ ᕿᓚᓗᒃᑭᐊᖃᑦᑕᖅᖢᑎᑦ. ᐊᔾᔨᙳᐊᑦ, ᑕᕐᕆᔮᒃᓴᑦ, ᐊᒻᒪᓗ ᐃᑦᑕᕐᓂᓴᐃᑦ ᑕᑯᒃᓴᐅᑎᑕᐅᔪᓂ ᓇᓗᓇᐃᔭᐃᓯᒪᕗᑦ ᐱᒻᒪᕆᐅᓂᖓᓂᒃ ᕿᓚᓗᒃᑭᐊᕐᓂᐅᑉ, ᐊᒻᒪᓗ ᓂᕈᐊᖅᑕᐅᓯᒪᓪᓗᑎᑦ ᑭᒡᒐᖅᑐᐃᓂᐊᕐᒪᑕ ᑕᑯᒃᓴᐅᓂᐊᕐᓗᑎᑦ ᐊᔾᔨᒌᙱᑦᑐᑦᖃᓄᐃᑦᑑᓂᖏᑦ ᑕᒪᔅᓱᒪᑉ ᐱᖅᑯᓯᕆᔭᑦᑕ. ᑕᑯᒃᓴᐅᑎᑦᑎᓂᐅᔪᕐᓗ ᑕᐃᒪ ᐸᐸᑦᑎᕗᖅ ᑕᐃᔅᓱᒪᓂᐅᓚᐅᖅᓯᒪᔪᑐᖃᕐᒥ, ᐃᓅᓯᓕᒫᕐᒧᑦ ᐃᖅᑲᐅᒪᒋᔭᐅᓂᐊᓕᖅᑐᓂᑦ,
ᐊᒻᒪᓗ ᓂᕆᐅᓐᓂᖃᖅᖢᑕᓗ ᐃᓄᖕᓂᒃ ᐱᓕᕆᐊᖃᕈᒪᓕᖅᑎᑦᑎᓂᐊᕋᒥᒃ ᐃᓕᖅᑯᓯᑦᑎᓐᓂᒃ ᐊᑐᐃᓐᓇᖃᑦᑕᕐᓗᑎᑦ.
ᑖᒃᑯᐊ ᑕᑯᒃᓴᐅᑎᑕᐅᔪᑦ ᐊᔪᕐᓇᙱᓕᖅᑎᑕᐅᓯᒪᕗᑦ ᐊᒥᓱᑦ ᐃᓄᕕᐊᓗᐃᑦ ᐃᓚᒌᑦᑐᑦ ᖃᐅᔨᒪᑦᑎᐊᑎᑦᑎᓯᒪᓂᖏᖕᓄᑦ ᐃᓕᓐᓂᐊᖅᑎᑦᑎᖃᑦᑕᖅᖢᑎᑦ ᑭᖑᕚᑦᑎᓐᓄᑦ ᐃᓕᓐᓂᐊᖅᑎᑕᐅᖃᑦᑕᕐᓂᖏᖕᓂᒃ. ᖁᔭᓐᓇᒦᖅᐸᒃᑲ ᑕᐃᒃᑯᐊ ᐅᐊᑦᑎᖃᑦᑕᖅᓯᒪᔪᑦ ᕿᓚᓗᒃᑲᑦ ᐊᒥᓲᓂᖏᖕᓂᒃ ᖃᐅᔨᓴᖃᑦᑕᖅᖢᑎᑦ ᐊᒻᒪᓗ ᐃᑉᐱᒍᓱᖃᑦᑕᖅᓯᒪᔪᑦ ᐊᕙᑎᑦᑎᓐᓂᒃ ᓯᕗᒧᐊᑦᑎᑕᐅᓪᓗᑎᑦ ᑕᐅᑐᙳᐊᖃᑦᑕᕐᓂᑯᖏᑦ ᓯᕗᕚᑦᑕ. ᐊᑖᑕᑦᓯᐊᕐᒪ ᐅᖃᐅᑎᓚᐅᖅ- ᓯᒪᒻᒫᖓ, “ᓄᓇ ᑮᓇᐅᔭᖃᕐᕕᒋᕙᕋ.” ᓄᓇᒥ ᕿᒪᐃᓂᑰᕗᑦ ᐅᕙᑦᑎᓐᓄᑦ, ᓯᕗᓂᒃᓴᖓᓄᑦ ᐃᓄᕕᐊᓗᐃᑦ.
ᕿᓚᓗᒃᑭᐊᕆᐊᖃᓪᓚᕆᓲᖑᕗᒍᑦ ᑕᑎᒋᓪᓗᑎᒍᑦ ᐊᒻᒪᓗ ᓂᕿᒋᑐᐃᓐᓇᙱᑦᑐᒍ ᓂᕿᑦᑎᐊᕙᖓ. ᐱᖅᑯᓯᖅ ᑕᒪᓐᓇ ᐃᓕᓐᓂᐊᑎᑦᑎᓲᖅ ᐃᑉᐱᒍᓱᑦᑎᐊᕐᓂᕐᒥᒃ, ᕿᓄᐃᓵᕐᓂᕐᒥᒃ, ᐊᒻᒪᓗ ᐱᓕᕆᐊᖃᐃᓐᓇᓂᐊᕐᓂᕐᒥᒃ. ᐃᑉᐱᒍᓱᑦᑎᐊᖃᑦᑕᕐᓂᖅ ᐃᓕᓐᓂᐊᖅᑎᑕᐅᓲᖅ ᑕᐅᑐᖦᖢᑎᑦ ᐊᒻᒪᓗ ᑐᑭᓯᐅᒪᓪᓗᑎᑦ ᕿᓚᓗᒃᑲᑦ ᐳᐃᔾᔪᕋᓲᖑᓂᖏᖕᓂᒃ, ᐅᔾᔨᓱᑦᑎᐊᖅᖢᑎᑦ ᒪᓕᖏᖕᓂᒃ, ᐊᒻᒪᓗ ᑎᐱᖓᓂᒃ ᑕᕆᐅᑉ. ᓯᓚ ᐃᓕᓐᓂᐊᖅᑎᑦᑎᓲᖅ ᕿᓄᐃᓵᕐᓂᕐᒥᒃ, ᐊᓄᕆ ᓯᓚᓗ ᓇᓗᓇᐃᖅᓯᓲᑦ ᖃᖓᒃᑯᑦ ᐊᖑᓇᓱᓐᓂᐊᕐᒪᖔᑦᑕ, ᐅᓪᓘᒐᓗᐊᕈᓂ ᐅᓐᓅᒐᓗᐊᕈᓂ.
ᐊᐅᔭᐅᓚᐅᖅᑐᒥ ᐅᒥᐊᖅᑐᖅᓯᒪᓪᓗᑕ, ᐊᓄᕌᓗᐊᓕᕋᒥ ᕿᓚᓗᒐᕐᓂᒃ
ᓇᓂᓯᔪᓐᓇᐃᓪᓕᑦᑎᐊᓚᐅᖅᓯᒪᕗᒍᑦ, ᐅᑕᖅᑭᓚᐅᖅᐳᒍᑦ ᕿᓄᐃᓵᖅᖢᑕ, ᐅᒥᐊᑉ ᐊᐅᓚᐅᑎᖏᑦ ᓄᖅᑲᖓᑎᖦᖢᒋᑦ, ᕿᓂᖅᖢᑕ ᕿᓚᓗᒐᕐᓂᒃ. ᒪᓕᖦᖢᑎᒍᑦ ᒪᓖᑦ, ᐃᒃᓯᕙᓪᓗᑕ ᓂᐱᖃᙱᑦᑎᐊᖅᖢᑕ. ᑕᐃᒪᓐᓇᐃᑎᓪᓗᑕ ᐱᐅᒋᓪᓚᕆᑦᑕᕋ — ᑕᓚᕖᓴᑕᖃᙱᑦᑐᖅ, ᐃᑭᐊᖅᑭᔾᔪᑎᖃᙱᑦᑐᖅ — ᐊᑐᑦᑎᐊᑐᐃᓐᓇᖅᖢᒍ ᖁᕕᐊᒋᓪᓗᒍᓗ ᐊᕙᑎ ᐃᓄᕕᐊᓗᐃᑦ ᓯᕗᕚᑐᖃᑦᑕ ᕿᒪᓐᓂᑯᖓ ᐅᕙᑦᑎᓐᓄᑦ.
ᐸᓂᒃᑲ ᐊᖑᓇᓱᒋᐊᖃᑎᒋᓚᐅᖅᓯᒪᕙᒃᑲ ᐅᐱᒍᓱᖁᓪᓗᒋᑦ ᓇᐅᓕᒃᓯᔪᖃᖅᑎᓪᓗᒍ ᕿᓚᓗᒐᕐᒥᒃ. ᐃᓕᓐᓂᐊᖁᓚᐅᕋᒃᑭᑦ ᑕᐃᒪᓐᓇ ᐃᓕᓐᓂᐊᖅᑎᑕᐅᓯᒪᒐᒪ — ᐃᓚᓐᓄᑦ. ᐊᑦᑕᒐ/ᐊᔭᒐ ᒫᓕ ᐲᑕ ᓄᒐᓴᖅ, ᐊᑦᑕᒐ/ᐊᔭᒐ ᐊᐃᑕ, ᐊᒃᑲᒐ/ᐊᖓᒐ ᓵᕈᓪᔅ ᐳᒃᑭᐊᖅ, ᐊᒻᒪᓗ
ᐃᓪᓗᕐᒪ ᕘᓇᐅᑉ ᐃᕐᓂᖓ, ᐋᓐᑕᓂ ᐳᒃᑭᐊᖅ, ᐊᐅᓪᓚᖃᑎᒋᓚᐅᖅᐸᕗᑦ. ᑕᐅᕗᖓᓕᒫᖅ ᖁᔭᓖᓐᓇᓂᐊᖅᐳᖓ ᖃᐅᔨᒪᓂᖏᖕᓂᒃ.
ᑎᑎᕋᖅᖢᒋᑦ ᑕᒪᒃᑯᐊ ᐊᑐᖃᑦᑕᕐᓂᑯᕕᓂᕗᑦ ᐊᒻᒪᓗ ᑕᑯᒃᓴᐅᑎᖦᖢᒋᑦ ᐊᔾᔨᙳᐊᑦ ᑕᓪᓕᒪᑦ ᑭᖑᕚᕇᑦᑐᑎᒍᑦ ᐃᓄᕕᐊᓗᐃᑦ ᐃᓚᒌᖑᔪᒍᑦ ᐱᖅᑯᓯᑦᑎᓐᓂᒃ ᐊᑐᖅᖢᑕ ᐱᒻᒪᕆᐊᓘᓚᐅᖅᐳᖅ ᐅᕙᒻᓄᑦ. ᑕᒪᓐᓇ ᐊᖑᓇᓱᓐᓂᖅ ᑐᑭᖃᕐᒪᑦ — ᐱᖅᑯᓯᑦᑎᓐᓂᒃ ᑲᔪᓯᑎᑦᑎᓪᓗᑕ ᐊᒻᒪᓗ ᐃᓚᒌᑦᑎᐊᓂᖅᓴᐅᓕᖅᖢᑕ.
ᑦᓵᕈᓪᔅ ᐳᒃᑭᐊᖅ ᐃᓕᓐᓂᐊᑎᑦᑎᔪᖅ ᐃᕐᓂᕐᒥᓂᒃ ᔭᐃᒥᓯ ᐳᒃᑭᐊᖅ ᖃᓄᖅ ᐊᒡᒍᕈᓐᓇᕐᒪᖔᕐᒥᒃ ᑕᓕᕈᖓᓂᒃ ᐅᖅᓱᕐᒨᕐᓂᐊᕋᒥᐅᒃ ᐸᐸᑕᐅᓗᓂ ᐊᒻᒪᓗ ᓂᕆᔭᐅᓛᖅᖢᓂ.
