ᐃᓄᒃᓱᐊᓗᓐᓄᑦ ᑎᑭᓴᕐᑐᑐᑦ. © Yvan Pouliot
ᑰᕕᐅᑉ ᑕᓯᐅᔭᖓ, ᐊᐅᒃᑲᐅᑎᐅᑉ ᓄᓇᒋᓯᒪᔭᖓ
ᑰᕕᒃ ᑕᕐᕋᒦᓐᓂᐸᐅᑦᓱᓂ ᑰᒻᒪᕆᒃ ᓂᐱᕝᕕᐊᓂ ᓯᑦᔭᖓᓂ ᓄᓇᕕᒃ, ᑯᐯᑉ. ᐊᒥᓱᑦ ᕿᑭᕐᑌᑦ ᐃᓱᐊᓃᑦᑐᑦ, ᐃᓚᐅᑎᓗᒍ ᐊᕿᒡᒋᑑᖅ ᑐᑭᖓ ᐊᒥᓱᓂᒃ ᐊᕿᒡᒋᓕᒃ. ᐃᓄᐃᑦ ᖃᐅᔨᒪᕙᑦᑐᕕᓃᑦ ᓇᑦᓯᖃᓲᒍᓂᖓᓂᒃ ᐊᒻᒪᓗ ᕿᓚᓗᒐᖃᕐᓱᓂ ᑖᕙᓐᓇ, ᐅᑭᐅᒥ ᐃᓄᓐᓄᑦ ᐃᓚᒌᓄᑦ ᓄᓇᓯᒪᕕᒋᒋᐊᖅ ᐃᓱᕐᕆᓇᕆᐊᖓ ᖃᐅᔨᒪᕙᑦᑕᕕᓂᖓ. ᑰᕕᒃ ᐃᖃᓗᑉᐱᓂᒃ ᑕᑕᑦᑐᖅ ᐅᐱᕐᖔᒥ ᑕᕆᐅᒧᑦ ᓯᑐᓕᕐᒪᑕ ᐃᓄᐃᑦ ᑰᕕᓕᐊᕐᐸᑐᕕᓃᑦ ᑌᒪ ᐅᑭᐊᒍᓕᕐᒪᑦ ᐅᑎᕐᕕᒋᓂᐊᓕᕐᒥᒐᒥᐅᒃ ᐃᖃᓗᐃᑦ ᒪᔪᐊᓕᕐᒪᑕ ᑰᑎᒍᑦ ᑕᓯᓕᐊᕐᓱᑎᒃ ᒪᓐᓂᑖᕆᐊᕐᑐᓱᑎᒃ. ᑰᕕᐅᑦ ᑐᑭᖓ ᑰᕝᕕᐅᔪᖅ ᐊᓯᖏᓐᓄᑦ ᑯᒐᔮᓄᑦ.
ᑰᕕᒃ ᐊᒻᒪᓗ ᓴᓂᐊ ᓇᔪᕐᑕᐅᓯᒪᔪᖅ ᐃᓄᓐᓄᑦ ᑌᒪᖕᖓᓂᐊᓗᒃ. ᓇᔪᕆᐊᖓ ᐊᓕᐊᒋᔭᐅᔪᖅ ᐃᓄᓐᓄᑦ ᐃᕗᔨᕕᒻᒥᐅᓄᑦ, ᓴᓪᓗᒥᐅᓄᑦ, ᐊᑯᓕᕕᒻᒥᐅᓄᑦ ᐊᒻᒪᓗ ᐳᕕᕐᓂᑐᒥᐅᓄᑦ. ᑖᓐᓇ ᐃᓄᐃᑦ ᐊᓐᓂᕆᔭᖓ ᓄᓇ ᐊᓐᓂᕆᒐᒥᐅᒃ ᐱᒋᐊᕐᑎᓯᐅᑎᒋᓯᒪᔭᖓ ᐱᓇᓱᒐᕐᒥᒃ ᐊᒻᒪᓗ ᓄᐃᑦᓯᒍᑎᒋᑦᓱᒍ ᑲᑎᒪᔨᓂᒃ ᐅᖑᒪᔭᐅᖁᑦᓱᒍ ᓄᓇ ᐃᖃᓗᐃᕈᑦᔭᐅᓂᐊᖕᖒᕆᒧᑦ, ᐃᖃᓗᑦᓯᐅᕆᐊᖃᖕᖏᑐᓄᓗ ᑖᕙᓂ ᐅᖑᒪᓗᒍ ᐊᒻᒪᓗ ᖃᓄᐃᓘᓗᑳᕝᕕᐅᖁᓇᒍ. ᑲᑎᒪᔩᑦ ᓄᐃᑕᓂᖏᑦ ᑕᑯᕙᓪᓚᑕᐅᓯᒪᔪᑦ ᐊᕙᑎᓕᕆᓂᕐᓄᑦ ᐊᖓᔪᕐᖄᖏᓐᓄᑦ ᐳᔮᕓᓐᓯᐅᑉ ᑲᕙᒪᖓᑕ ᑌᒪ ᐋᕐᖀᒍᑎᒋᓂᐊᓕᕋᒥᐅᒃ ᓇᓗᓀᕐᑕᐅᒪᒍᑎᑖᕐᓱᒍ ᐃᒪᕐᒥᐅᑕᓂᒃ ᐱᑕᖃᖏᓐᓇᑎᑕᐅᒋᐊᕐᓂᖓ ᐃᑲᔪᕐᓯᒪᓯᓗᒍ 2019-ᒥ, ᐅᖑᒪᔭᐅᓯᑎᓗᒍ ᓄᐃᑎᕆᕕᐅᑐᐃᓐᓇᕆᐊᖃᕐᓂᖓᓄᑦ.
ᐊᕐᕌᒍᐃᑦ 120 ᐊᓂᒍᕐᓯᒪᓕᕐᑐᑦ, ᐊᔪᒉᑦᑐᓕᑎᓗᒍ ᐃᓚᒌᑦ ᑰᕕᒻᒥᒃ ᓄᓇᒥᒃ ᕿᒣᑦᓱᑎᒃ ᕿᒫᓚᐅᕐᑐᕕᓃᑦ. ᐃᓄᐃᑦ ᐃᕐᐹᑎᓚᐅᕐᑐᕕᓃᑦ ᐊᑦᔨᒌᖕᖏᑐᓄᑦ ᓄᓇᓄᑦ ᓄᓇᕕᓕᒫᒥ ᐅᖓᑖᓄᒐᓴᒃ. ᐊᒥᓱᑦ ᐃᓚᒌᑦ ᑰᕕᒻᒥᐅᒍᓚᐅᕐᑐᕕᓃᑦ ᓄᓪᓚᖓᑦᓯᐊᓱᑎᒃ. ᑕᕆᐅᖓ ᓇᑦᓯᖃᕐᑎᓗᒍ ᓂᕆᔭᑦᓴᑖᕐᐸᓱᑎᒃ ᐊᒻᒪᓗ ᐊᓐᓄᕌᑦᓴᑖᕐᐸᓱᑎᒃ ᓇᑦᓯᔭᓂᒃ, ᖁᓪᓕᖏᑦ ᐃᑯᒪᑦᓴᑖᕐᐸᓱᑎᒃ, ᐊᒻᒪᓗ ᓴᓇᕐᕈᑎᖏᑦ ᐃᓚᑦᓴᑖᕐᐸᓱᑎᒃ ᐊᒻᒪᓗ ᖃᔭᕐᑖᐸᑦᓱᑎᒃ. (ᐊᑕᐅᓯᖅ ᖃᔭᖅ ᐊᒥᓱᐃᑦ ᖃᔦᑦ). ᐅᑭᐅᒥ 1899-ᒍᑎᓗᒍ ᐅᓪᓗᑐᓯᓕᕐᑎᓗᒍ, ᐊᑯᓂᐅᓂᕐᓴᖅ ᖃᐅᒪᒍᓐᓇᓯᕙᓪᓕᐊᓕᕐᑎᓗᒍ, ᐃᓄᐃᑦ ᐱᔪᓐᓇᓯᐊᕐᑐᑦ ᐊᖑᑏᑦ ᓯᑯᓕᐊᕐᐸᑐᕕᓃᑦ ᓇᑦᓯᓯᐅᕆᐊᕐᓱᑎᒃ, ᐊᐅᒃᑲᐅᑎᒃ ᐃᓚᒋᔭᐅᕙᑦᑐᕕᓂᖅ. ᐊᐅᒃᑲᐅᑎᒃ ᐱᓯᑎᐊᓗᕕᓂᖅ, ᓲᔪᐊᓘᑦᓱᓂ ᐊᒻᒪᓗ ᐃᓄᑦᓯᐊᒍᑦᓱᓂ ᐊᕐᓇᖃᕐᓱᓂ ᕿᑐᕐᖓᖃᕐᓱᓂᓗ ᒪᕐᕉᓂᒃ. ᑌᒣᒃᑲᒥ ᐃᓚᒥᓂᒃ ᐊᒻᒪᓗ ᓄᓇᕐᖃᑎᒥᓂᒃ ᐆᒪᑦᓯᓯᐊᕐᐸᑐᕕᓂᖅ.
ᐅᔭᕋᓱᑦᔪᑕᖃᒻᒪᕆᑦᑐᖅ ᓴᓇᒪᔪᖅ ᐃᑎᕐᓯᒪᒐᑦᓴᕕᓂᖅ ᐃᓄᑦᓱᐊᓗᓐᓂ. ᑖᒃᑯᐊ ᓴᓇᒪᔪᑦ 100-ᐅᓈᕐᑎᑐᓂᒃ ᐊᒥᓱᐃᓂᒃ ᐅᑭᐅᖃᕐᑐᓴᐅᓕᕐᑐᑦ. © Yvan Pouliot
ᑌᑦᓱᒪᓂ ᐊᑑᑎᑎᓪᓗᒍ ᐅᓪᓗᖅ ᓯᑯᓕᐊᕐᑐᕕᓂᖅ ᓇᑦᓯᓯᐅᕆᐊᕐᓱᓂ, ᒪᓕᑦᑎᓗᒍ ᓴᓂᓪᓕᒥᑕ ᑎᒍᐊᖓ ᐃᕐᓂᖓ. ᓇᑦᓯᓯᐅᕐᓱᑎᒃ, ᐃᓛᓂᐅᖕᖏᑐᖅ ᑐᕈᓯᕐᒥᒃ ᖁᑮᔪᕕᓂᖅ, ᖁᑭᕐᒪᐅᒃ ᑐᖁᔪᕕᓂᖅ. ᓂᖕᖓᓱᓂ, ᑐᕈᓯᐅᑉ ᐊᑖᑕᖓ ᐃᓄᐊᕐᑐᕕᓂᖅ ᐊᐅᒃᑲᐅᑎᐅᑉ ᐊᕐᓇᖓᓂᒃ ᐊᒻᒪᓗ ᕿᑐᕐᖓᖏᓐᓂᒃ ᐱᓱᑦᓱᓂ ᑐᕈᓯᐅᑉ ᑎᒥᖓᓂᒃ ᐁᑦᓯᑎᓗᒍ ᓇᓄᔭᒥᒃ ᐅᓂᐊᕈᑎᑦᓴᒋᑦᓱᓂ. ᐊᓇᕐᕋᒥᓄᑦ ᑎᑭᒐᒥ ᑕᑯᑦᓱᓂ ᓇᓪᓕᒋᔭᒥᑕ ᑎᒥᒋᓐᓂᒃ ᐃᓅᒍᓐᓀᑑᓐᓂᒃ, ᐊᐅᒃᑲᐅᑎᒃ ᖃᐅᔨᒣᓕᔪᕕᓂᖅ ᖁᑭᐊᑲᑦᑕᓕᕐᓱᓂ ᐃᓄᓐᓂᒃ ᐁᕕᖃᕋᓱᐊᕐᑐᓂᒃ. ᐊᓐᓇᑐᕕᓂᖅ ᖁᑭᕐᑕᐅᔭᒐᓂ ᑎᑭᓕᕐᑐᕕᓂᖅ ᕿᒫᔪᖅ ᐃᔦᑦᑐᓄᑦ, ᑰᕕᐅᑉ ᓯᕿᓂᖓᓃᑦᑐᓄᑦ ᓄᓇᓕᓐᓄᑦ, ᑌᒪ ᐊᐅᒃᑲᐅᑎᐅᑉ ᐃᕐᓯᓇᕐᓯᓂᖓ ᓇᒧᓕᒫᖅ ᑐᓴᕐᑕᐅᓕᕐᑐᕕᓂᖅ. ᑭᓇᓕᒫᒃᑯᑦ ᐱᓱᒍᓐᓇᑐᓕᒫᑦ ᕿᒫᓕᕐᑐᕕᓃᑦ ᐅᖓᓱᑦᑐᓄᑦ ᓴᓪᓗᓄᒐᓴᒃ ᐊᒻᒪᓗ ᑲᖏᕐᓱᔪᐊᒧᑦ. ᐊᒥᓱᑦ ᓄᓇᒥᓂᒃ ᕿᒣᑲᓪᓚᒐᓱᐊᕐᓱᑎᒃ ᐱᐅᓕᓂᐊᒐᕐᒥᓂᒃ ᕿᒣᓐᓀᖃᑦᑕᑐᕕᓃᑦ, ᐸᕐᓀᖄᕈᓐᓇᓯᓐᓂᖏᒻᒧᑦ, ᐃᓚᖏᑦ ᑕᖃᑦᓱᑎᒃ ᐊᒻᒪᓗ ᑳᑦᓱᑎᒃ ᐊᕐᖁᑎᒥᓂ ᑐᖁᖃᑦᑕᑐᕕᓃᑦ.
ᐋᕐᓰᖅ ᑕᑯᓐᓇᐅᔮᕐᑎᓯᔨ ᑲᒥᐸᓂ, ᑲᔪᓯᑎᑦᓯᓲᖅ ᐃᓗᒡᒍᓯᒧᐊᖓᔪᓂᒃ ᐱᓇᓱᒐᕐᓂᒃ ᓄᓇᕕᒻᒥ, ᐊᑐᐃᓐᓇᕈᕐᑎᓕᕐᑐᖅ ᐱᖕᖑᐊᓂᖃᕐᑎᓯᓛᕐᓱᓂ ᑐᖕᖓᕕᒋᓗᒍ ᑖᓐᓇ ᓱᓕᔪᖅ ᐅᓂᒃᑳᖅ ᐃᓄᓐᓄᑦ ᑖᕙᖕᖓᓂᑦ ᑐᓴᐅᒪᔭᐅᔪᖅ. ᐋᕐᓰᑉ ᐊᖓᔪᕐᖄᖓ, ᐋᑕᒥ ᖃᓕᖑ ᐃᕗᔨᕕᒻᒥᐅᖅ, ᐃᓚᐅᑎᓗᒋᑦ ᑕᑯᓐᓇᐅᔮᕐᑎᓯᓂᕐᓄᑦ ᑲᑎᒪᓚᐅᕐᓯᒪᑎᓗᒋᑦ ᐊᕐᕌᒍᐃᑦ ᐊᒥᓲᖕᖏᑐᑦ ᓈᓯᒪᓕᕐᑐᑦ, ᓇᓗᓀᕐᓯᕕᒋᓚᐅᕐᓯᒪᔭᖓ ᐊᐅᒃᑲᐅᑎᐅᑉ ᐅᓂᒃᑳᖓᓂᒃ ᐱᓇᓱᒐᐅᒍᓐᓇᕋᔭᕆᐊᖓ ᓄᐃᑎᑕᐅᒍᓐᓇᓱᓂ. ᑐᖓᓕᐊᓂ ᑲᑎᒪᓂᖃᓚᐅᕐᓯᒪᔪᑦ ᐃᓄᐃᑦ ᐃᓄᑐᙯᑦ ᐊᒻᒪᓗ ᐊᐅᒃᑲᐅᑎᐅᑉ ᐃᓚᖏᑦ ᐃᕗᔨᕕᒻᒥ 2019-ᒍᑎᓗᒍ ᐃᓱᒪᒋᔭᖏᑦ ᖃᐅᔨᒋᐊᕐᑕᐅᑎᓗᒋᑦ ᐊᒻᒪᓗ ᑐᓴᐅᒪᑎᑕᐅᖃᑦᑕᓚᖓᓕᕐᓱᑎᒃ. ᐅᕕᒃᑲᓄᑦ ᓄᓇᕕᒻᒥᐅᓄᑦ 2023-ᒍᓕᕐᐸᑦ ᐱᖕᖑᐊᕈᑕᐅᓛᕐᑐᖅ.
ᐃᒻᒥᓂᒃ ᐃᑉᐱᒍᓱᓐᓂᑖᕆᐊᕐᓱᑎᒃ ᓄᓇᒥᒃ ᐊᑦᔨᒌᖕᖏᑐᓄᑦ ᐊᑑᑎᕕᐅᖃᑦᑕᑐᕕᓂᕐᒥ ᑕᕝᕙᓃᑦᑑᑉ ᐅᓂᒃᑳᑉ, ᐋᕐᓰᖅ, ᓯᕗᓕᕐᑕᐅᓱᓂ ᐋᑕᒥᒧᑦ, ᖃᔭᕆᐊᒃᑯᑦ ᑰᕕᓕᐊᕐᑎᓯᓚᐅᔫᖅ. ᓯᓂᑦᑕᕕᑦᓴᑎᓐᓄᑦ ᑎᑭᓚᐅᔪᔪᒍᑦ ᔪᓓ 2021-ᒥ ᐊᕿᒡᒋᑑᑉ ᕿᑭᕐᖓᓄᑦ, ᑖᕙᓂ ᐅᓂᒃᑳᖅ ᐊᑑᑎᓯᒪᒻᒪᑦ, ᐊᒻᒪᓗ ᐅᓪᓗᓂ ᐱᖓᓱᓂ ᐊᑦᔨᒌᖕᖏᑐᓂᒃ ᓄᓇᑐᕐᓕᓂᒃ ᕿᒥᕐᕈᖃᑦᑕᓱᑕ ᐋᑕᒥᐅᑉ ᓇᓪᓕᑳᕐᓯᒪᔭᖏᓐᓄᑦ ᐊᒻᒪᓗ ᐃᓄᑐᖃᐅᑉ ᐊᑯᓕᕕᒻᒥᐅᑉ ᓄᓇᒥ ᑖᕙᓂ ᖃᐅᔨᒪᔫᑉ, ᔪᐊᓇᓯ ᖃᕐᖁᑑᑉ.
ᑕᑯᑦᓴᐅᖃᑦᑕᓚᐅᔪᒻᒪᑕ ᐊᒥᓱᐃᑦ ᐊᑯᓂᓂᑌᑦ ᐃᓄᒃᓱᐃᑦ ᐊᕐᖁᑎᑦᑎᓂ, ᑖᕙᓐᓇ ᓄᓇ ᑕᑯᑦᓴᖅ ᓇᔪᕐᑕᐅᖃᑦᑕᓯᒪᒋᐊᖓ ᐃᓄᓐᓄᑦ ᐊᕐᕌᒍᓂ ᐊᒥᓱᓂ ᓯᕗᓂᕐᒥ. ᓄᓇᒥ ᐊᑎᓕᒻᒥ ᐃᓄᒃᓱᐊᓗᐃᑦ, ᐅᔭᕋᓪᓓᑦ ᓴᓇᒪᔪᑦ ᐊᒥᓱᑦ ᐆᑦᑑᑎᒋᑦᓱᒋᑦ ᕿᖕᖐᑦ ᑎᕆᒐᓐᓂᐊᓂᒃ ᒥᑭᒋᐊᕐᓂᐊᕕᕕᓃᑦ, ᐃᓄᒃᓱᐃᑦ (ᐊᒥᓲᓕᕋᒥᒃ ᐃᓄᒃᓱᐃᑦ ᐊᑕᐅᓯᐅᓕᕋᒥ ᐃᓄᒃᓱᒃ) ᐊᒻᒪᓗ ᐃᓄᐃᑦ ᓄᓇᕕᓂᖏᑦ. ᑕᑯᓚᐅᔪᔪᒍᐊᓪᓛᑦ ᖃᒡᒋᒥᒃ, ᓴᓇᓯᒪᔪᖅ ᐊᑐᕐᑕᐅᕙᑦᑐᕕᓂᖅ ᖁᕕᐊᓱᖃᑎᒌᑦᑐᓄᑦ ᐊᒻᒪᓗ ᐊᖓᒃᑯᓄᑦ. (ᐃᓄᐃᑦ ᑑᕐᖏᔫᖁᑎᖏᑦ). ᐋᑕᒥᐅᑉ ᑐᑭᓯᑎᑦᓯᐅᑎᖓᑎᒍᑦ, ᓄᓇᑐᕐᓕᖅ ᑐᑦᑐᓯᐅᕐᕕᕕᓂᐅᒋᐊᖓ ᖃᐅᔨᒪᓇᓚᐅᔫᖅ. ᐃᓄᒃᓱᐃᑦ ᐃᓛᓐᓂ ᐊᑐᕐᑕᐅᕙᑦᑐᕕᓃᑦ ᑕᑯᑦᓴᐅᑎᑕᐅᑦᓱᑎᒃ ᑐᑦᑐᓂᒃ ᓯᕗᓕᕈᑕᐅᑦᓱᑎᒃ ᓄᓇᒧᑦ ᐆᒪᔪᕐᓯᐅᑎᓄᑦ ᐅᑕᕐᕿᕕᐅᔪᒧᑦ.
ᐊᐅᐸᕐᑐᖅ ᓯᒃᑭᑕᖅ ᑕᑯᑦᓴᐅᑎᑦᓯᔪᖅ ᓇᓃᓐᓂᖓᓂᒃ ᑰᕕᐅᑉ ᑕᓯᐅᔭᖓᑕ ᐊᒻᒪᓗ ᐊᕿᒡᒋᑑᑦ ᕿᑭᕐᑕᐅᑉ.
ᖃᐅᔨᒋᐊᓪᓚᕆᐊᕐᓱᑕ ᐃᓄᑦᓱᓗᐃᑦ ᓄᓇᖓᓂᒃ, ᐅᖄᕕᖃᓚᐅᔪᔪᒍᑦ ᑐᓂᕐᑕᓂᐊᕐᑎᖓᓂᒃ ᐊᕙᑕᖅ ᐱᐅᓯᑐᖃᓕᕆᔨᒃᑯᑦ. ᑐᓂᕐᑕᓂᐊᕐᑎᒧᑦ ᐅᖃᐅᑦᔭᐅᓚᐅᔪᔪᒍᑦ ᑖᕙᓐᓇ ᓇᓗᓀᕐᑕᐅᓯᒪᒻᒪᑦ ᐱᐅᓯᑐᖃᓕᕆᔨᒃᑯᓄᑦ ᓇᓗᓀᕐᑕᐅᒪᑦᓱᓂ ᐃᒫᒃ. “ᑖᕙᓐᓇ ᓄᓇᑐᕐᓕᖅ ᖃᑦᓯᑐᑯᑖᕐᑕᓕᒃ ᑭᓪᓕᒥᑦᓱᓂ ᐅᔭᕋᓱᑦᔪᓂᒃ. ᑕᑯᑦᓴᐅᓱᓂ ᐅᖓᓯᑦᑑᖏᓐᓈᑐᓄᑦ ᐊᒥᓱᐃᓄᑦ ᐃᓄᒃᓱᓄᑦ, ᐃᓕᒪᕕᐅᔪᖅ 100 ᐅᖓᑖᓅᕐᑐᓄᑦ ᐊᑯᓂᓂᑕᕐᓄᑦ ᑐᓂᕐᑕᓂᐊᕋᑦᓴᓄᑦ ᓴᓇᒪᔪᓄᑦ: ᐅᔭᕋᕐᑕᓕᓐᓂᒃ ᑐᐲᑦ ᐱᕈᕕᓂᖏᓐᓂᒃ, ᓂᕿᖃᐅᑏᑦ ᕿᖕᖐᑦ, ᐆᒪᔪᕐᓂᐊᑐᑦ ᓇᓯᕝᕕᖏᑦ, ᑎᕆᒐᓐᓂᐊᓂᒃ ᒥᑭᒋᐊᕐᓂᐊᕖᑦ, ᖃᔭᖃᐅᑏᑦ ᓄᓇᑐᐃᓐᓇᒦᒌᒃᑯᑎᕕᓂᖏᑦ, ᖃᒡᒋᖅ ᐊᒻᒪᓗ ᐊᒥᓱᐃᑦ ᐃᓄᒃᓱᐃᑦ.” ᐅᖃᕆᐊᓪᓚᓚᐅᔫᖅ ᓄᐃᑕᓂᖏᑦ ᖃᒡᒌᑦ ᓇᓗᓀᕐᓯᓯᔪᑦ ᐱᒻᒪᕆᖁᑎᒋᔭᐅᑦᓱᓂ ᑲᑎᒪᕕᐅᕙᑦᑐᕕᓂᐅᒋᐊᖓ ᐊᒻᒪᓗ ᐅᑭᐅᖃᕐᓂᖏᓐᓂᒃ ᓇᓗᓀᕐᓯᓯᒪᓂᕋᕐᓱᓂ 100 ᐊᒻᒪᓗ 300 ᐊᑯᓐᓂᖏᓐᓂ, ᑌᑦᓱᒪᓂᓪᓗᐊᖅ ᐃᓄᐃᑦ ᑖᒃᑯᑑᕙᑦᑐᕕᓂᐅᑎᓗᒋᑦ ᑎᑭᓚᐅᕐᑎᓇᒋᑦ ᖃᓪᓗᓈᑦ. ᑌᒣᑦᑐᑦ ᓇᔪᕐᑕᐅᕙᑦᑐᕕᓂᐅᕗᑦ ᐊᐅᒃᑲᐅᑎᒃ ᐃᓅᑎᓪᓗᒍ. ᐊᒥᓲᒻᒪᑕ ᐊᑦᔨᖏᑦ ᑌᒣᑦᑐᐃᑦ ᓄᓇᑐᕐᓖᑦ, ᐃᓂᖃᓚᐅᔫᖅ ᓇᓛᓂ ᐅᔭᕋᓱᑦᔪᐃᑦ ᐱᑦᔪᑎᖃᕐᓱᑎᒃ ᐅᔭᕋᓱᔪᐃᑦ ᑭᓪᓕᖏᓐᓃᐸᓐᓂᒪᑕ: ᓴᓂᖏᓐᓃᓱᑎᒃ ᐊᑐᕋᑦᓭᑦ ᖃᒡᒋᓕᐅᕐᑐᓄᑦ, ᐅᖓᓯᑦᑐᒥᑦ ᐊᑦᔭᑐᕋᕆᐊᖃᕐᓇᒋᑦ.
ᓄᓇᑐᕐᓖᑦ ᐆᑦᑑᑎᒋᑦᓱᒍ ᐃᓄᒃᓱᐊᓗᐃᑦ ᑌᒣᒻᒪᑦ ᐊᑯᓂᓂᑕᐅᓗᐊᖕᖏᓚᑦ ᐃᓘᓐᓈᒍᑦ ᐃᓄᐃᑦ ᓄᓇᕕᒻᒥᒃ ᓄᓇᖃᕐᓯᒪᓕᕐᓂᖏᑦᑕ ᓴᓂᐊᓂ. ᐊᕙᑕᒃᑯᑦ ᑐᓂᕐᑕᓂᐊᕐᑎᖓ ᐅᖃᓚᐅᔫᖅ ᐊᓯᖏᒎᖅ ᐃᓄᐃᑦ, ᐊᑦᔨᒋᖕᖏᑕᖏᑦ ᐅᓪᓗᒥ ᐃᓄᑐᐃᓐᓇᐅᓕᕐᑐᑦ, ᐅᑭᐅᕐᑕᑐᒧᑦ ᑎᑭᓚᐅᕐᓂᒪᑕ 4,000 ᐊᕐᕌᒍᐃᑦ ᓈᓯᒪᓕᕐᑐᑦ (Pre-Dorset). ᐊᑯᓂᓂᑕᐅᓂᕐᐸᐅᑎᓗᒍ ᓇᓗᓀᕐᑕᐅᓯᒪᔪᖅ ᓄᓇᑐᕐᓕᖅ ᓄᓇᕕᒻᒥ, ᐅᑭᐅᓕᒃ 4,400-ᓂᒃ, ᑕᑯᔭᐅᓯᒪᔪᖅ ᐃᕗᔨᕕᐅᑉ ᓴᓂᐊᓂ. ᑖᒃᑯᐊ ᐊᓯᐅᖏᓐᓇᓚᐅᕐᑐᕕᓂᐅᑎᓪᓗᒋᑦ 900 ᐊᕐᕌᒍᐃᑦ ᓴᓂᐊᓃᑦᑐᑦ ᐊᓂᒍᕐᓯᒪᓕᕐᑐᑦ (Dorset ᐅᕝᕙᓘᓐᓃᑦ ᑐᓃᑦ). ᑐᕃᓐᓇᑐᑎᒍᑦ ᐅᓪᓗᒥ ᐃᓅᓕᕐᑐᑦ ᓯᕗᓪᓕᕕᓂᖏᑦ, ᑌᔭᐅᓲᑦ Thule people, ᑎᑭᓚᐅᕐᑐᕕᓂᐅᑎᓗᒋᑦ ᐅᑭᐅᕐᑕᑐᒧᑦ ᐊᕐᕌᒍᐃᑦ 800 ᐊᓂᒍᕐᓯᒪᓕᕐᑐᑦ. Thule-ᐃᑦ ᓄᓇᑐᕐᓕᖏᑦ ᐊᑯᓂᓂᑕᐅᓂᕐᐹᑦ ᑕᑯᑦᓭᑦ ᓄᓇᕕᒻᒥ ᐅᑭᐅᓖᑦ 750-ᓂᒃ ᐊᒻᒪᓗ ᓇᔪᕐᑕᖃᕐᓱᑎᒃ ᐊᑯᓕᕕᐅᑉ ᓴᓂᐊᓂ, ᐅᖓᓯᑦᑕᕆᖕᖏᑕᖓᓂ ᐃᖏᕐᕋᓚᖓᑦᓱᑕ ᐱᒋᐊᕐᕕᒋᓚᐅᔪᔭᑦᑕ ᐊᐅᒃᑲᐅᑎᐅᑉ ᓄᓇᕕᓂᖓᓅᓚᖓᑦᓱᑕ.
ᖃᐅᔨᓴᕆᐊᕐᑐᓱᑕ, ᐋᑕᒥ ᐅᕙᑦᑎᓂᒃ ᐅᖃᐅᑏᓚᐅᔫᖅ: “ᑐᑭᓯᒋᐊᒥᒃ ᓇᓗᓇᖕᖏᑐᖅ ᓱᒧᑦ ᐊᐅᒃᑲᐅᑎᒃ ᑕᒫᓂ ᓄᓇᖃᓚᐅᕐᑐᕕᓂᐅᓂᖔᑕ”. ᐆᒪᔪᓕᐊᓗᒃ, ᐱᓗᐊᕐᑐᒥᒃ ᐃᖃᓗᑉᐱᓂᒃ ᐃᖃᓘᔭᕐᑕᐅᓲᓂᒃ ᑰᒻᒥ ᓯᑯᒦᑦᑐᓄᑦ ᐅᐱᕐᖔᒥ, ᐊᒻᒪᓗ ᐅᑭᐊᕐᓂᐅᔭᓕᕐᑎᓗᒍ ᑕᕆᐅᑉ ᓴᓂᐊᓂ. ᐊᒻᒪᓗ ᓄᓇᖃᕐᓱᓂ ᖃᓂᑦᑐᒥ ᑭᖑᓂᕐᒥ ᐁᕖᑦ ᑲᑎᕐᓱᓯᒪᕕᒋᕙᑦᑕᕕᓂᖓᓂᒃ. ᐁᕖᑦ ᐱᒻᒪᕆᐊᓗᕕᓃᑦ ᑌᑦᓱᒪᓂ, ᐱᓗᐊᕐᑐᒥᒃ ᕿᒻᒥᓄᑦ ᓂᕆᒃᑲᐅᑎᑦᓴᐅᓱᑎᒃ. ᒪᕐᕈᐃᓂᒃ ᐁᕕᖃᓚᐅᔪᔪᒍᑦ ᑌᒣᑦᑐᓄᑦ ᑕᕆᐅᒥᐅᑕᓄᑦ ᐆᒪᔪᕐᓄᑦ ᓇᔪᕐᑕᐅᓲᕕᓃᓐᓂᒃ: ᐁᕕᕐᓯᐅᕕᒃ ᐊᒻᒪᓗ ᙯᕐᑐᐊᔪᐃᑦ. ᒪᓂᕋᕐᓂᒃ ᙯᕐᑐᑕᓖᒃ ᑕᒃᑯᐊ ᐊᒥᓲᓗᑎᒃ ᑕᙯᕐᓯᕕᕕᒍᓐᓇᑕᖏᒃ ᐅᓪᓕᕕᒋᒍᓐᓇᑕᖏᒃ ᐊᒻᒪᓗ ᓯᐅᕋᔮᕐᑕᖃᕐᓱᑎᒃ ᓯᑦᔭᒥ ᓂᕆᔭᑦᓴᑕᓕᒻᒥᒃ ᒥᕐᖁᓕᓐᓂᒃ ᐅᕕᓗᕐᓂᒃ ᐁᕕᕐᓄᑦ ᓇᔪᕐᑕᐅᒋᐊᖏᒃ ᐊᓕᐊᒋᔭᐅᕙᑦᑐᕕᓂᕐᓂᒃ. ᐅᓪᓗᒥ ᑖᕙᓃᓲᒍᒍᓐᓀᑐᑦ ᐁᕕᕐᓂᐊᕕᐅᓗᑭᑉᐸᑐᕕᓂᐅᓂᕐᒥᓄᑦ 100-ᐅᓈᕐᑎᑐᑦ ᐊᕐᕌᒍᐃᑦ 19-ᒍᒍᑎᖏᓐᓂ ᐊᒻᒪᓗ 20- ᐅᒍᑎᖏᓐᓂ — ᐅᕝᕙᓘᓐᓃᑦ ᓂᕿᖏᓐᓄᑦ, ᐅᕐᓱᖏᓐᓄᑦ ᐊᒻᒪᓗ ᑐᒑᖏᓐᓄᑦ — ᐊᑐᕐᑕᐅᒪᕆᑉᐸᑐᕕᓂᐅᒻᒪᑕ ᐊᒥᓱᒻᒪᕆᐅᑎᓗᒋᑦ ᐁᕕᕐᐸᑐᕕᓂᐅᒻᒪᑕ ᓄᖑᐃᓐᓇᕋᑕᕐᑎᓗᒋᑦ.
ᓴᐅᒥᒻᒥᑦ ᑕᓕᕐᐱᒧᑦ: ᓖᓴ ᖁᐱᕐᕈᐊᓗᒃ, ᑲᐳᕆᐊᓪ ᓕᔦ-ᓴᕚᕐ, ᓲᓯ ᖃᓕᖑ, ᐲᑕ ᓇᐅᔭ ᖁᒪᖅ ᐊᒻᒪᓗ ᐋᑕᒥ ᖃᓕᖑ. © Yvan Pouliot
ᐊᐅᒃᑲᐅᑎᒧᓪᓕ, ᑰᕕᐅᑉ ᓄᓇᖓ ᓄᓇᒋᒋᐊᒥᒃ ᓈᒻᒪᓯᐊᕐᑐᕕᓂᖅ. ᑖᕙᓐᓇ ᐱᑕᖃᑦᓯᐊᑐᖅ ᐊᕙᑎᖓ ᑲᑎᕕᒋᔭᐅᔪᖅ ᐃᒪᕐᒧᑦ ᑕᕆᐅᒍᖕᖏᑐᒧᑦ ᐊᒻᒪᓗ ᑕᕆᐅᒧᑦ, ᐆᒪᕕᐅᒍᓐᓇᑐᖅ ᐊᒥᓱᐃᓄᑦ ᐆᒪᔪᓄᑦ. ᓄᓇᖓ ᒪᓂᕋᐅᑦᓱᓂ ᐅᖓᓯᑦᑑᖏᓐᓈᑎᓗᒋᑦ ᑖᕙᓃᑦᑐᓂᐊᕆᐊᕐᑐᑦ ᑕᑯᑦᓴᐅᒍᓐᓇᒪᑕ ᐊᒡᒋᓕᕋᒥᒃ. ᓄᓇᐅᑦᓱᓂᓗ ᑕᕆᐅᑉ ᐊᒻᒪᓗ ᓄᓇᐅᑉ ᐊᑦᔨᒌᑐᐃᓐᓇᕕᒋᒍᓐᓇᓱᒍ, ᑭᓇᑐᐃᓐᓇᒧᑦ ᓱᖏᐅᓐᓂᖃᖕᖏᑐᒧᑦ ᑖᕙᓃᑦᑐᒧᑦ ᐊᓯᐅᕕᐅᒡᒐᑐᑦᔭᖏᑦᑐᖅ. ᐊᐅᒃᑲᐅᑎᒃ ᐊᑯᓂ ᐃᕐᓯᓇᕐᓯᒪᔪᖅ ᑰᕕᒻᒥ ᐊᒻᒪᓗ ᐅᓂᒃᑲᐅᓯᖓ ᓱᓕ ᑕᑯᓐᓇᑕᑐᐃᓐᓇᐅᔮᖏᓐᓈᓱᓂ ᐳᐃᒍᕐᓴᐅᒐᓂ ᓄᓇᕕᒻᒥᐅᓄᑦ. ᐋᑕᒥ ᐅᖃᓚᐅᔫᖅ ᐊᐅᓚᓂᖃᕐᑎᓗᑕ ᑖᕙᓂ “ᑰᕕᐅᑉ ᑕᓯᐅᔭᖓ ᐱᐅᔪᒻᒪᕆᐊᓘᒐᔭᕐᑐᖅ ᓄᓇᒋᒋᐊᒥᒃ ᐊᒻᒪᓗ ᐃᓄᓐᓄᑦ ᓄᓇᓕᒋᔭᐅᒐᓂ ᐅᓪᓗᒥ, ᐃᒻᒪᖄ ᐊᐅᒃᑲᐅᑎᒧᑦ ᐃᓘᓐᓇᑎᒃ ᕿᒪᑦᓯᓯᑕᐅᓯᒪᒻᒪᑕ ᑖᕙᓃᒍᓐᓀᑎᑕᐅᑦᓱᑎᒃ!”
