ᑭᐊᕈ ᐃᐊᕆ ᔫᓇᔅ ᒥᔪᖅ ᔫᓂᐅᕐ
ᐊᐱᖅᓱᕐᓂᖅ ᓂᐊᓕ ᐋᕆᒥᒃ
ᓂᐊᓕ ᐋᕆ ᐊᒃᖥᕕᖕᒥᐅᑕᐅᓯᒪᓕᕐᐳᖅ ᑕᐃᒪᖖᖓᓂ 1959-ᒥ ᐊᒻᒪᓗ ᓱᕈᓯᕐᒥᓂᒃ ᑕᕝᕙᓂ ᐱᕈᖅᓴᐃᓯᒪᔫᓪᓗᓂ, ᐃᓚᖃᖅᑎᓪᓗᒍ ᐊᓐᓇᐅᒪᔾᔪᑎᒃᓴᖅᑖᕐᐸᒃᓱᓂ ᓄᓇᒥᐅᑕᐅᕙᒃᓱᓂ. ᓂᐊᓕ ᑕᒫᓃᖃᑎᒋᕙᕋ ᐅᓂᒃᑳᕐᕕᒋᓂᐊᕐᒪᑎᒍᑦ ᖃᓄᐃᑦᑑᒪᐅᕐᓂᖓᓂᒃ ᐱᕈᖅᓴᑎᓪᓗᒍ ᓄᓇᒥᐅᑕᐅᓪᓗᓂ, ᓱᕈᓯᕐᒥᓂᒃ ᐃᕐᖑᑕᒥᓂᒃᓗ ᐃᓕᓐᓂᐊᖅᑎᑦᓯᕙᓪᓕᐊᓯᒪᓂᒥᓂᒃ ᐃᓚᒋᔭᒥᓂᑦ ᐃᓕᓐᓂᐊᕈᑎᒋᓯᒪᓕᓚᐅᖅᑕᒥᓄᑦ. ᑖᓐᓇ ᐊᐱᖅᓱᕈᓐᓇᕐᓂᕋ ᐅᕙᓐᓄᑦ ᐊᒃᑐᐊᓂᖃᓪᓚᕆᒃᐳᖅ, ᐱᔾᔪᑎᒋᓪᓗᒍ ᑖᔅᓱᒧᖓ ᐃᕐᖑᑕᕆᔭᐅᖃᑕᐅᓂᕋ, ᐊᒻᒪᓗ ᑐᓴᕈᓐᓇᓕᓚᐅᕋᒪ ᐅᓂᒃᑳᕆᔭᖏᓂᒃ ᑐᓴᓚᐅᖅᓯᒪᖖᒋᑕᓐᓂᒃ ᓱᓕ.
ᓂᐊᓕ: ᑕᕆᐅᑉ ᓯᓈᓂᕐᒥᐅᑕᐅᓪᓗᑕ ᐱᕈᖅᓴᓚᐅᖅᓯᒪᕗᖓ (ᖃᓂᒋᔭᖓᓂ ᕼᐆᕐᓱᓪ ᐊᐃᓚᓐᑦ), ᑭᓯᐊᓂᓗ ᓅᓕᓚᐅᖅᓯᒪᔪᖓ ᐊᒃᖥᕕᖕᒧᑦ 1959-ᒥ ᑖᑖᒃ (ᐊᑖᑕᑦᓯᐊᖅ) ᐃᓅᔪᖕᓃᕐᒪᑦ. ᑕᐅᕙᓃᖏᓐᓇᓚᐅᕋᓗᐊᖅᑐᖓ ᐅᑭᐅᖕᓄᑦ ᒪᕐᕉᖕᓄᑦ ᑐᖁᓯᒪᓕᖅᑎᓪᓗᒍ, ᑭᓯᐊᓂᓕ ᑕᐅᕙᓃᖏᓐᓇᕆᐊᖅ
ᐊᔪᓕᕋᒃᑯ ᓄᒃᑎᓕᓚᐅᖅᓯᒪᕗᖓ ᐊᒃᖥᕕᖕᒧᑦ. ᑎᑭᓚᐅᖅᐸᒃᖢᑕ ᐊᐅᓪᓚᒃᑲᓐᓂᖃᑦᑕᓚᐅᖅᓯᒪᔪᒍᑦ, ᓄᓇᓕᐅᔪᒧᑦ ᓄᒃᑎᓪᓚᑦᑖᖅᓯᒪᓕᖅᐸᖕᓇᑕ. ᐊᑦᓴᒐ ᑏᕙ, ᐊᐃᔭᐅᓚᐅᖅᓯᒪᖕᒪᑦ ᓄᓇᑦᑎᓐᓂᑦ, ᐅᑎᕈᔾᔭᐅᓪᓗᓂ ᓄᓇᓕᐅᔪᒧᑦ ᐊᒻᒪ ᓄᓕᐊᑖᕆᔭᐅᓪᓗᓂ. ᑕᒪᓐᓇ ᓈᒻᒪᓚᐅᖅᓯᒪᔪᖅ.
ᑖᒻ ᐃᐊᕆ ᓯᐊᕋ ᒪᒃᓚᐅᑦ ᑭᐊᕈᓪ ᐃᐊᕆ
ᑮᓚ: ᐃᖏᕐᕋᒐᔪᓚᐅᖅᓯᒪᕕᓯ ᐊᖑᓇᓱᐊᕆᐊᖅᐸᒃᖢᓯ ᐊᒻᒪᓗ ᒥᑭᒋᐊᕆᐊᖅᐸᒃᖢᓯ?
ᓂᐊᓕ: ᐆ ᐄᒻᒪᕆᐊᓗᒃ ᐱᕈᖅᓴᕙᓪᓕᐊᓂᓐᓂ ᐃᖏᕐᕋᒐᔪᓚᐅᖅᓯᒪᔪᒍᑦ. ᐃᒫ ᑕᕝᕙᓂᑦᓴᐃᓐᓇᖅ ᐃᒃᓯᕚᑐᐃᓐᓇᖅᐸᓚᐅᖅᓯᒪᖖᒋᑦᑐᒍᑦ, ᐅᓪᓛᖓᓂᑦ ᐅᓐᓄᖓᓄᑦ. ᐃᖏᕐᕋᕈᓘᔭᐃᓐᓇᖅᐸᓚᐅᖅᑐᒍᑦ ᐊᒻᒪᓗ ᐱᓕᕆᒃᑲᐅᓪᓗᑕ. ᐊᐅᔭᐅᓂᖓᓂ ᐱᓱᕋᔭᒐᔪᓚᐅᖅᑐᒍᑦ, ᐱᔾᔪᑎᒋᓪᓗᒍ ᕘᕐᑦ ᕆᕗᕐ ᑰᖓᓄᐊᕋᔪᓚᐅᕋᑦᑕ ᔫᒍᔭᖅᒥᑦ…. ᐊᑯᓐᓂᖓᓃᑦᑐᒧᑦ ᓄᓈᓗᑉ ᐊᒻᒪᓗ ᑯᒪᒃᑯᑉ, ᑕᐅᕙᖖᒐ ᐱᓱᒋᐊᓯᕙᓚᐅᖅᓯᒪᒐᑦᑕ.
ᑮᓚ: ᓱᖕᒪᑕᓕ ᕿᒻᒥᓯ?
ᓂᐊᓕ: ᐊᐅᔭᒃᑯᑦ ᐱᓱᖃᑦᑕᓕᕌᖓᑦᑕ, ᕿᒻᒥᕗᑦ ᐊᑐᖅᐸᓚᐅᖅᓯᒪᒻᒥᔭᕗᑦ ᐱᖁᑎᓂᒃ ᓇᖕᒪᓕᖅᑎᑦᓱᒋᑦ ᐊᒃᔭᖅᓯᔾᔪᑎᒋᕙᒃᓱᑎᒍᑦ. 15-ᓗᐊᓂᒃ ᕿᒻᒥᖃᖅᐸᓚᐅᖅᑐᒍᑦ. ᑕᐃᑦᓱᒪᓂᐅᑎᓪᓗᒍ, ᕿᒻᒥᕗᑦ ᐊᖏᔪᐊᓘᕙᓚᐅᕐᒪᑕ. ᕿᒻᒥᕗᑦ ᓇᖕᒪᑦᑎᑦᓱᑎᒍ, ᐊᒻᒪᓗ ᐃᓄᐃᑦ ᓇᖕᒥᓂᖅᑕᐅᖅ ᓇᖕᒪᖃᖅᐸᒃᑭᓪᓗᑎᒃ. ᐅᑭᐊᒃᓴᓕᖅᑎᓪᓗᒍ ᐅᒡᒍᑎᐅ ᓯᕗᕐᖓᓂ, ᐅᑎᖅᐸᓪᓕᐊᓕᖅᐸᓚᐅᖅᑐᒍᑦ ᑕᐅᓄᖓ ᔫᒍᔭᖅᒧᑦ. ᐃᖏᕐᕋᓪᓗᑕ ᑖᕐᒥᑲᓐ ᐸᐃ ᑲᖏᖅᖢᐊᓄᑦ, ᑕᐅᕙᓂᓗ ᐅᑮᓕᖅᐸᒃᖢᑕ. ᑭᓯᐊᓂᓗᑦᑕᐅᖅ ᕼᐆᕐᓱᓪ ᕿᑭᖅᑕᖓᓂ ᓇᑦᑎᖅᓯᐅᕆᐊᖅᐸᓚᐅᕆᓪᓗᑕ.
ᐊᑐᖅᐸᓚᐅᖅᓯᒪᔪᒍᑦ ᓇᑦᑏᑦ ᕿᓯᖏᓂᒃ ᒪᑦᑎᑕᐅᓕᓂᐊᖑᓯᒪᔪᓂᒃ ᐊᒻᒪᓗ ᐃᖃᓪᓕᕿᓕᖅᐸᒃᖢᑕ. ᓯᑯᓚᐅᖅᑳᖅᑎᓐᓇᒍ, ᐊᑯᓐᓂᖓ ᕼᐆᕐᓱᓪ ᑖᒥᑲᓐ ᐸᐃ ᑕᐃᒪᓐᓇᐃᑉᐸᓚᐅᖅᑐᒍᑦ. ᑕᐃᒪᓕ ᐃᖃᓪᓕᕿᒃᑲᓐᓂᖅᐸᓚᐅᕐᒥᔪᒍᑦ ᖁᐊᖃᐅᒻᒧᑦ ᐃᓕᐅᖅᑲᒐᒃᓴᑦᓐᓂᒃ.
ᐅᑭᐊᒃᓵᒥ ᑎᖕᒥᐊᓂᒃ, ᓇᑦᑎᕐᓂᒃ ᐊᖑᓇᓱᐊᖅᐸᓚᐅᖅᑐᒍᑦ, ᐊᒻᒪᓗ ᐃᖃᓪᓕᕿᕙᒃᖢᑕ, ᑐᒃᑐᓕᐊᖅᐸᒃᖢᑕ, ᓱᓇᑐᐃᓐᓇᓂᒃ ᓂᕐᔪᑎᓂᒃ ᐱᑕᕆᔪᖕᓇᖅᑕᑦᑎᓐᓂᒃ. ᐊᒻᒪᓗ ᑕᐃᒃᑯᐊᒃ ᐃᓅᒃ ᒪᕐᕉᒃ, ᐊᐃᑉᐸᕇᒃᑐᒃ ᑕᐅᕙᓂᕐᒥᐅᑕᐅᕙᓚᐅᕐᒥᔪᒃ, ᑲᐃᑎ ᐊᒻᒪᓗ ᕉᓚᓐᑦ. ᐊᖑᓇᓱᐊᕈᑎᕙᓚᐅᕐᒥᔭᕗᑦ, ᐃᑲᔪᕋᓱᒃᖢᑎᒍ.
ᓱᓕ ᐃᒡᓗᒋᕙᓚᐅᖅᑕᖏᑦ ᑕᐃᒪᐅᕗᑦ ᑕᐅᓇᓂ, ᑖᕐᒥᑲᓐ ᐸᐃ ᐊᑭᐊᓃᑦᑐᑦ.
ᐅᑭᐅᓚᐅᖖᒋᓐᓂᖓᓂ, ᐱᔭᒃᓴᑲᓪᓛᓗᖕᓂᒃ ᐱᓕᕆᐊᖃᕆᐊᖃᖅᐸᓚᐅᖅᑐᒍᑦ. ᐊᖑᓇᓱᐊᕆᐊᖅᓯᒪᓪᓗᑕ, ᑲᑎᖅᓱᐃᓪᓗᑕ ᕿᔪᒃᓴᖁᑎᑦᑎᓐᓂᒃ ᐅᑭᐅᖑᓂᖓᓂ. ᕿᔪᒃᑕᕆᐊᖅᓯᒪᔭᕗᑦ ᑲᑎᖅᓱᐊᕆᕙᓚᐅᖅᑕᕗᑦ ᐊᔾᔨᒌᖖᒋᐅᖅᑐᓂ ᓄᓇᓂ, ᕿᓂᕆᐊᖃᕈᒫᖖᒋᓐᓇᑦᑕ ᕿᔪᒃᓴᑦᑎᓐᓂᒃ ᐅᑭᐅᖑᓕᖅᑎᓪᓗᒍ. ᐅᑭᐊᒃᓵᒥ, ᓯᑯᓯᒪᓕᖅᑎᓪᓗᒍ, ᑕᓯᕐᓄᐊᖅᐸᓚᐅᖅᓯᒪᕗᒍᑦ, ᓯᑯᓯᐅᖅᓯᒪᓪᓗᑕ ᑭᑉᐹᕆᒃᑐᓂᒃ ᐅᓗᐊᖅᖢᑎᒍ, ᓯᑯᖁᑎᑖᖅᓯᒪᕙᒌᕆᐊᖅᐸᓚᐅᖅᑐᒍᑦ ᑕᓯᕐᓂ ᓯᑯᖏᑦ ᐃᑉᔪᓗᐊᓕᓚᐅᖅᑎᓐᓇᒋᑦ ᓱᓕ.
ᑮᓚ: ᐊᓈᓇᒐ ᐊᓯᖏᓪᓗ ᐃᓕᓐᓂᐊᕆᐊᖃᑦᑕᓚᐅᖅᓯᒪᕙᑦ?
ᓂᐊᓕ: ᐄ ᑖᑖᒃᐱᑦ ᐃᓕᓐᓂᐊᕈᑎᒥᓐᓂᒃ ᐱᓕᕆᓯᒪᑎᒋᐊᖅᐸᓚᐅᖅᓯᒪᔭᖏᑦ. ᐃᓕᓐᓂᐊᕆᐊᖅᑎᑉᐸᒃᓱᓂᒋᑦ ᐊᒻᒪᓗ ᐱᓕᕆᐊᒃᓴᕆᔭᐅᔪᓂᒃ ᐱᓕᕆᑎᑉᐸᒃᓱᓂᒋᑦ. ᐊᒻᒪᓗ ᒨᓯᓯ ᑕᐃᑕᔅᓗ ᐃᑲᔪᖅᑎᒻᒪᕆᒋᕙᒪᐅᖅᓯᒪᖕᒪᒋᑦ; ᑕᒪᕐᒥᐅᑎᓪᓗᑎᒃ
ᑮᓚ: ᐊᓈᓇᒐ ᐊᖓᒃᑲᓗ ᐃᓕᓐᓂᐊᕆᐊᖅᓯᒪᑎᓪᓗᒋᑦ, ᓱᓕ ᐊᖑᓇᓱᐊᕆᐊᖃᑦᑕᖅᑐᐊᓘᓚᐅᖅᐱᓯ ᐅᕝᕙᓘᓐᓃᑦ ᓂᐅᕕᕐᕕᖕᒥᑦ ᓂᕿᒃᓴᖅᑖᕆᐊᖃᖅᐸᓚᐅᓂᖅᐱᓯ?
ᓂᐊᓕ: ᐱᔭᕆᐊᖃᖅᑕᑦᑎᓐᓂᒃ ᓂᐅᕕᕐᕕᖕᓂᑦ ᓂᐅᕕᖅᐸᓚᐅᖅᑐᒍᑦ, ᐊᒻᒪ ᒥᑭᒋᐊᕆᐊᖅᓯᒪᓕᖅᐸᒃᓱᑕ. ᒥᑭᒋᐊᖅᐸᓚᐅᖅᑐᒍᑦ ᐅᑲᓕᕐᓂᒃ, ᑭᕝᒐᓗᖕᓂᒃ, ᓕᖕᒃᔅᓂᒃ (ᐳᓯᕐᔪᐊᓂᒃ), ᐊᒻᒪᓗ ᐃᖃᓗᒃᐸᒃᖢᑕ. ᓱᓇᒃᑯᑎᒃᓴᓕᒫᑦᑎᓐᓂᒃ ᓇᒃᓴᖅᐸᓚᐅᖅᓯᒪᔪᒍᑦ ᐃᕐᓂᕗᑦ ᒥᑭᔫᑎᓪᓗᒋᑦ, ᑭᓯᐊᓂᓗ ᒥᑭᑦᑑᒐᓗᐊᒥᒃᑕᐅᖅ ᐃᑲᔪᖅᐸᒪᐅᕐᒥᔪᑦ.
ᓕᐊᕆ ᐋᕆ, ᓂᐊᓕ ᐋᕆ ᐊᒻᒪᓗ ᐃᓚᒋᔭᖏᑦ
ᐃᒡᓗᑕᖃᓚᐅᖅᓯᒪᖕᒪᑦ ᑕᐃᓗᒃᑯᑦ ᐃᒡᓗᖓᓂᒃ, ᑕᐃᑲᓃᑉᐸᓚᐅᖅᓯᒪᔪᖓ ᐱᓯᒪᓪᓗᒋᑦ ᐃᕐᓃᒃᑲ ᐊᒻᒪᓗ ᐊᓈᓇᐃᑦ, ᓯᑦᑎ ᐊᒻᒪᓗ ᒫᒃᑰ. ᐅᓪᓗᑦ ᐃᓚᖓᓐᓂ ᒥᑭᒋᐊᖁᑎᑦᑎᓐᓂᒃ ᑕᑯᔭᖅᑐᐃᓯᒪᓚᐅᕋᒪ ᑖᖅᓯᕙᓪᓕᐊᓕᖅᑎᓪᓗᒍ. ᖃᐅᒪᔪᖅ ᐅᖅᓯᖅᓯᒪᕙᒌᕆᐊᖅᓱᒍ ᐸᓃᒃᑲ ᐊᔪᕿᖅᑐᖅᓱᒋᒃ ᖃᓄᖅ ᐃᑭᑕᐅᓲᓂᖓᓄᑦ. ᐃᒡᓗᕐᔪᐊᕐᒥᒃ ᐅᖅᑰᑦᓯᐊᖅᑎᑦᓯᔨᐅᓂᐊᕐᒪᑎᒃ. ᑭᐊᕈᓪ ᓇᒃᓴᓚᐅᖅᓯᒪᔭᕋ. ᑖᖅᑐᒥ, ᓯᓐᑎ ᖁᐃᖏᓕᑕᖓᓂᒃ ᓕᐊᕆᐅᑉ ᖁᐃᖏᓕᑕᕋᓱᓚᐅᖅᓯᒪᔪᕕᓂᖅ. ᐊᓇᕐᓂᕐᒪᑦ ᐊᓇᖏᓪᓗ ᑕᐅᓄᖓ ᓇᑎᕐᒧᑦ ᐊᖕᒪᓗᖅᑐᑯᓗᐃᑦ ᑲᑖᓕᕐᓂᖅᓱᑎᒃ ᓲᕐᓗ ᐊᖅᓴᑯᓘᖅᑰᓕᓪᓗᑎᒃ [ᐃᒡᓚᓯᓪᓗᓂ]. ᓯᓐᑎ ᐅᖃᖅᓱᓂ ᑖᖅᑐᒥ ᐊᕿᑦᑐᓂᒃ ᑎᒍᓯᓇᓱᖃᑦᑕᓕᕋᒥ ᒫᒃᑰᒥᒃ ᐅᖃᐅᔾᔨᓕᕐᓂᕐᐳᖅ ᖃᐅᒪᔪᖅ ᐃᑭᑕᐅᖁᓪᓗᓂᐅᒃ.
ᐃᑭᑦᑎᓇᓱᓕᕐᓂᖅᐳᒃ ᖃᐅᒪᔪᒥᒃ, ᑖᒃᑯᐊ ᓂᕕᐊᖅᓯᐊᑯᓘᒃ ᓯᓚᑐᐃᑦᑑᒃ, ᐃᒃᑭᑎᒥᒃ ᐃᑭᑦᓯᖅᑳᕋᑎᒃ ᒪᑐᐃᕆᐊᓕᖓ ᒪᑐᐃᖅᑳᓂᖅᓱᒍ. ᐃᓛ ᐳᓪᓚᒃᓴᖅᓯᒪᑎᓪᓗᒍ, ᒪᑐᐃᕈᕕᐅᒃ ᐳᓪᓚᐃᕐᐸᓪᓕᐊᓂᐊᕐᒪᑦ. ᑖᒃᑯᐊ ᓂᕕᐊᖅᓯᐊᒃ ᑕᐃᒪᓐᓇᐃᓕᐅᕐᓂᕐᒪᑎᒃ, ᐊᔪᓕᕋᒥᑦᔪᒃ ᓯᓚᒧᑦ ᐃᒋᓕᕐᓂᖅᓱᓂᑦᔪᒃ ᖃᐅᔨᒪᔪᖅ [ᐃᒡᓚᓯᓪᓗᓂ. ᑖᖅᑐᐊᓗᖕᒥ ᐃᑎᖅᓯᒪᑐᐃᓐᓇᓕᕐᓂᖅᓱᑎᒃ.
ᐊᖏᕐᕋᑐᐊᕋᒪ, ᐃᑎᕆᐊᕐᓗ ᐃᒡᓗᒧᑦ ᐃᑭᓕᖅᐸᕋ ᖃᐅᒪᔪᖅ, ᓯᓐᑎᐅᑉ ᐅᓂᒃᑳᕐᕕᒋᓕᖅᓱᓂᖓ:
‘ᓂᐊᓖ, ᐊᓇᖅᑕᖃᑐᐃᓐᓇᕆᐊᓕᒃ ᓇᑎᕐᒥ, ᑎᒎᖅᑲᕋᓱᓚᐅᖅᑕᒃᑲ ᐊᒡᒐᓐᓄᑦ.’’ ᐅᖃᐅᑎᓪᓗᒍ ‘ᐅᐊᑦᓯᐊᕈ ᐃᑭᓐᓂᐊᕋᒃᑯ ᖃᐅᒪᔪᖅ ᓇᐅᒃ ᑕᐃᒪ?’
‘ᓯᓚᒥ!’
‘ᓱᕙ?!’ [ᐃᒡᓚᓯᓪᓗᓂ]. ᐊᓂᓪᓗᖓ ᑎᒍᔭᖅᑐᓕᖅᐸᑕ ᓯᓚᒥᑦ. ᐃᒐᓛᖓ ᐊᓯᔾᔨᕆᐊᖃᓚᐅᖅᓯᒪᔭᕋ, ᐊᓪᓚᖅᑎᖅᓱᒍ, ᐊᒻᒪ ᐃᑭᓕᖅᓱᒍ. ᑕᐃᒪᓗ ᓯᓐᑎ ᑲᑎᖅᓱᐃᓕᖅᓱᓕ ᐊᓇᕐᓂᒃ ᓇᑎᕐᒥᑦ. ᒫᒃᑰ ᐃᕐᓂᓐᓂᒃ ᐊᒫᖅᓱᓂ. ᐄᓛᒃ [ᐃᒡᓚᓯᓪᓗᓂ] ᑕᒪᓐᓇ ᓯᓐᑎᒧᑦ ᐅᓂᒃᑲᐅᓯᕆᔪᒫᕈᒪᔭᕋ ᖃᓄᐃᓐᓂᕕᓂᖓᑦ. ᖃᓄᐃᑉᐸᓚᐅᖖᒋᑦᑐᒍ, ᐃᓅᓯᖃᑦᓯᐊᖅᑑᓪᓗᑕ, ᐋᖓᔮᕐᓇᖅᑐᓂᒃ ᐱᑕᖃᖅᐸᓚᐅᖖᒋᑦᑐᖅ, ᐃᒥᐊᓗᒃᑕᖃᖅᐸᒐᓂᓗ ᖃᖓᓕᒫᖅ.
ᑖᒻ ᐃᐊᕆ |
ᐃᓕᓐᓂᐊᕐᓇᖅ ᐃᓱᓕᓯᒪᓕᕌᖓᑦ [ᓱᕈᓯᕐᓄᑦ] ᓄᓇᓕᐊᕈᑎᓯᒪᕙᓚᐅᖅᑕᒃᑲ. ᐱᓇᓱᐊᕈᓯᐅᑉ ᐃᓱᐊᓂ ᑕᒫᑲᓴᒃ, ᒥᑭᒋᐊᕆᐊᖃᑎᒋᕙᒃᓱᒋᑦ, ᓄᓇᒧᑦ. ᓄᓇᓕᐅᔪᒦᒋᐊᖅ ᖁᕕᐊᒋᕙᓚᐅᖖᒋᓐᓇᒃᑯ. ᓯᑭᑑᖅᑕᖃᖃᑦᑕᓕᕐᒪᑦ, ᓯᑯᑑᓂᒃ ᐊᑐᖅᐸᓕᓚᐅᖅᓯᒪᔪᒍᑦ, ᕿᒧᒃᓯᒃᑰᖖᒋᑦᓱᑕ. ᑖᑖᒃ ᕿᒻᒥᒥᓂᒃ ᕿᒧᒃᓯᕈᑎᒥᓂᒃ ᐱᓯᒪᑕᐃᓐᓇᓚᐅᖅᓯᒪᔫᒐᓗᐊᖅ. ᐊᓈᓇᐃᑦ ᕿᒧᒃᓯᕋᔪᒃᑑᒪᐅᖅᓯᒪᕗᖅ ᑕᐃᑦᓱᒪᓂ. ᑖᑖᒃ ᕿᒧᒃᓯᕆᐊᕆᐊᒥᓂᒃ ᐊᔪᓕᓚᐅᖅᓯᒪᒻᒪᑦ, ᐃᑯᐊᓪᓚᒃᑐᓕᕆᔨᒃᑯᓐᓂ ᐃᓱᒪᑕᕆᔭᐅᓕᓚᐅᕋᒥ. ᕌᓄᓪᑦ ᓯᑐᕐ ᐃᑲᔪᖅᑎᒋᕙᒪᐅᖅᓯᒪᔭᖓ. ᑎᑭᒐᔪᓚᐅᖅᓯᒪᔪᖅ ᕋᓂᖕ ᕆᕗᕐ ᑰᖓᓄᑦ.
ᑮᓚ: ᑕᐃᑦᓱᒪᓂᐅᑎᓪᓗᒍ ᓱᓇᑦ ᐱᓕᕆᐊᕆᔭᕆᐊᖃᓗᐊᖅᐸᓚᐅᖅᐱᒋᑦ? ᓱᕈᓯᑦ ᐃᓕᓐᓂᐊᕆᐊᖅᑎᓯᒪᒋᐊᖅᓱᒌᑦ? ᐊᖑᓇᓱᐊᕆᐊᒥᒃ ᐊᒻᒪᓗ ᒥᑭᒋᐊᕆᐊᒥᒃ?
ᓂᐊᓕ: ᐃᓕᓐᓂᐊᕆᐊᖏᓐᓇᐅᔭᖅᑎᒋᐊᓚᐅᖅᑕᕗᑦ ᐃᓕᓐᓂᐊᕆᐊᖃᕌᖓᑕ. ᒥᖅᓱᒐᓕᐅᖏᓐᓇᐅᔭᖅᐸᓚᐅᖅᑐᖓ, ᔭᐸᓂᒃ, ᑲᒥᖕᓂᒃᓗ ᐱᒋᔭᐅᓂᐊᖅᑐᓂᒃ ᓱᕈᓯᓐᓄᑦ. ᓄᓇᓕᐊᕈᑎᓯᒪᔪᒪᒑᖓᒃᑭᑦ ᐃᓕᓐᓂᐊᕐᕕᖕᒥ ᐸᐃᑉᐹᓂᒃ ᐊᑎᓕᐅᕆᓯᒪᔭᕆᐊᖃᖅᐸᓚᐅᖅᑐᖓ. ᖃᖓᓕᒫᖅ
ᐊᖏᕐᕋᒥᓐᓂ ᐱᓕᕆᐊᒃᓴᖃᖅᑎᑕᐅᕙᓚᐅᕐᒪᑕ
ᑮᓚ: ᑕᐃᑦᓱᒪᓂᑕᒥᑦ ᓱᓇ ᐱᐅᒋᓛᕆᕕᐅᒃ ᐃᖅᑲᐅᒪᔭᕆᐊᒥᒃ?
ᓂᐊᓕ: ᐃᖅᑲᐅᒪᔭᒃᑲ ᐱᐅᒋᓛᕆᓯᒪᓪᓗᒋᑦ, ᓲᖃᐃᒻᒪ, ᐳᐃᒍᕐᓇᖖᒋᑦᑐᑦ. ᐃᓚᒋᔭᑎᑦ ᐱᒻᒪᕆᐅᓂᖅᐸᐅᕙᓚᐅᖅᑐᑦ. ᖁᕕᐊᒋᕙᓚᐅᖅᑕᕋ ᓱᕈᓯᒃᑲ ᓄᓇᓕᐊᕈᑎᓯᒪᔭᕌᖓᒃᑭᑦ ᐃᓕᓐᓂᐊᖅᑎᑉᐸᒃᓱᒋᑦ ᓱᓇᓕᕆᕙᒋᐊᓕᖕᓂᒃ, ᑕᐃᒫᒃᑕᐅᖅ ᐃᕐᖑᑕᒃᑲ.
