Naamaniitirniit Ullungit Ukkuitut Kanatami Inuit Uvikkait Katimajinginnut Angajuqqaangunirmut

Airili 22, 2025

Naamaniitirniit ukkuingaaliqtut Angajuqqaap ininga innuqullugu Kanatami Inuit Uvikkait Katimajinginnut (NIYC). Naamaniitirniit ukkualaaqtut Mai 30, 2025, 5-nngumi qitiraliriikkut ET. Taakkunani ulluni, Inuit uvikkait iligasuarutimik tunisigunnatut naamaniitirlutik uvvaluunniit naamaniitiqtaulutik, iligasuarunnatut malittautillugit ataaniittut allasimajut.

NIYC kiggatusuut Inuit uvikkanginni Kanatalimaami. Angajuqqaaq angajuqqaangugajaqtuq katimajinik kiggaturnilinnik Inuvialuit Nunalilimaangitta Katujjiqatigiittunginni, Kitikmeot Inuit Katujjiqatigiittunginni, Kivalliq Inuit Katujjiqatigiittunginni, Qikiqtani Inuit katujjiqatigiittunginni, Qarjuit Uvikkait Katimajinginni ammalu Nunatsiavut Kavamakkunginni.

Angajuqqaaq niruaqtaulaaqtuq Aippanganniutillugu, Juuni 3, 2025-mi, unurnipaami niruaqtaujuq ilaulaaqtuq NIYC-kkuni arraaguunnik marruunik. Angajuqqaaq uqaqtiusuuq NIYC-kkuni nunalilimaani nunalirjuanillu ammalu atainnatumi Katimajiuniaqsuni Inuit Tapiriit Kanatami ammalu Inuit Ukiuqtaqtumiuqatigiit Katimajinginnut Kanatami.

Taanna sivuliqtiuluni pinasuarniqaqattarialik kaivalagusinit 20 taqqiup iluani. Taanna anirramiitsuni pinasugaq akiliqtutauniqasuuq ullutamaanuulingajumik pinasuarningagut ammalu aullaqattaluni pigujjiluni NIYC-kkuni. Arraaguup iluani NIYC angajuqqaanga qaiqujauqattasuuq katimanirnut makununga: ITK Katimaninga Aatugaami, United Nations Katimajiunginnatut Nunaqaqqaatunit Mitsaanulingajuni New York-mi, United Nations Silaup Uqquusivallianinganut Katimaniq, ammalu asinginnut katimanirnut aulataunilinnut Inuit Ukiuqtaqtumi Katimajinginnut.

NIYC Angajuqqaangunirmut Iligasuarunnatut

Angajuqqaamut Iligasuarunnatut ilaujuugialiit Inuit Angiqatigiigutingata Inillasimautinginnut ukiuqarluni 18-lu 30-lu akunninginni niruarnait ullunginni.

Naamaniitirniit NIYC Angajuqqaap Ininganut

Iligasuarunnaniit marruuk Inuk uvikkait pivitsaqarasuarlutik:

1. Iligasuarniq: Iligasuaqtut tunisigialiit allaqutinik makuninga NIYC Niruarniit Kamajinganut tunisiluni Mai 30, 2025-ngulauqtinagu 5-ngumi qitiraliriikkut ET:
   1. Allasimajuliuqsimarialik nalunaiqsijumi inuup pijunnautinginni pinasuaqsimajanginnilu sivuliqtiusuni, qaujimajanginnilu Inuit uvikkait pinailutarisuunginnilu, ammalu allasimajuliurluni qanuq pinasuarumagajarmangaammi angajuqqaanguliruni NIYC-mi
   2. Iluittumik tatarsaisimaluni atiliuqsimalunilu Iligasuarutimut Tataqsagarmik, ilautillugit 10 atiliuqsimatillugit sapummijut Inuit ukiuliit 18-lu 35-lu akunninginni
   3. Ajjinguaqarluni aullarutiit ajjinguangitta ajjinganik (ajjinguaq ungataani sunataqarani, iggasimanngiluni nasaqsimanngilunilu)
   4. Ullumi Avittusimanilimmik 1 Pirajatsimanirmut Qaujisaqtausimaluni (atausirmik nunait avittusimaningitigut atuni nunasimavivininginnik arraaguit tallimait iluani)
2. Naamaniitirniq: Inuit ukiuliit 18-lu 35-lu akunninginni ilaujuutsutik Inuit Angiqatigiigutinginnut naamaniitirunnatut asiminik Inunnik ilaujuujumik Inuit angiqatigiigutinginnut ukiulimmik 18-lu 30-lu akunninginnik niruarnait ullunginni tunisisimaluni naamaniitirutimik tataqsagarmik ammalu allaqutinik NIYC Niruarniit Kamajinganut Mai 30, 2025-mi 5-nngumi qitiraliriikkut ET:
   1. Allasimajuliurialik Inuit naamaniitiqtaup pinasuaqsimajanginnik sivuliqsuni, qaujimajanginnik pinailutagijausuunit uvikkanut, ammalu allasimajuqtaqarluni naamaniitiqtaujuq sugami ilijutsaumangaat
   2. Iluittumik tatarsaisimaluni Naamaniitirnimut Tataqsagarmik, naamaniitiqtuq naamaniitiqtalu atiliuqsimalutik
   3. Ajjinguaqarluni aullarutiit ajjinguangitta ajjinganik (ajjinguaq ungataani sunataqarani, iggasimanngiluni nasaqsimanngilunilu)
   4. Ullumi Avittusimanilimmik 1 Pirajatsimanirmut Qaujisaqtausimaluni (atausirmik nunait avittusimaningitigut atuni nunasimavivininginnik arraaguit tallimait iluani)

NIYC Angajuqqaangunirmuq Naamaniitirniup Tataqsaganga

NIYC Angajuqqaangunirmuq Iligasuaqtuup Tataqsagatsanga