Airili 4, 2025 — Ottawa, ON
Inuit Tapiriit Kanatami Katimajingit katimalauqtut tamatumani pinasuarusirmik ammalu uqausiqalauqtut sivulliutiinnarniarmata Inuit sivulliutiqujangit tusaqtaulutik tikiutivallianittini gavamatuqakkut niruarviksanganut Airili 28, ammalu nuuppallialirutta nutaanut gavamakkunut ammalu ministait katimajiuvingit.
Inuit sivuliuqtingit uqariakkannilauqtut pijumallutik aaqqittiaqsimajunik, akuniujukkut Inuit qakijjutiksaliurutinginnit nappariaqaqtutinnut ammalu igluksanut, ammalu ilisarijauqujillutik taakkua inuusilirinirmut ammalu kiinaujaliurutiksanut qakijjutiksaliurutit iluani Inuit Nunangani atuutiqammariktut Ukiuqtaqtuup ulurianaqtumiittailimaninganut.
Katimajit uqalaurmijut kajusinginnagiaqarninganik gavamatuqakkut Inuit Nutaqqat Kiinaujaqutingit kajusiniarmata akiliivallutik ikajuutinik inuusilirinirmut, aanniaqaqtailitittinirmut ammalu ilinniaqtulirinirmut. Nutaanguriaqtitaulauqtuq atausirmut arraagumut, kisiani nalunaqtuq nutaaq gavamaq Kanataup Maligaliurvinganit angiqsigajarmangaaq $121 milian nutaat kiinaujaksanik. Katimajit uqalauqtut ukua piliritittijjutaujut atuutiqarniqpaungmata kinnguumanarmatalu tamaita Inuit Nunangani.
Ukua Katimajit tusalauqtut qanuilingalirmangaaq sanajauvallianinga Inuit Nunangat University, ilagijautsunik qinirniq nunalingmi iniqaqtittiniaqtumik silattuqsarvijjuap ilinniarvinginni, taakkualu ilinniarvit asinginni aviktuqsimajuni. Akitturautit pilirijumajuqarmangaat pigiaqtitaulauqtuq nalunaiqsiniarmata ajurajanngittunik nunalingnik, taanna Airili 17 isulivigilugu tunisijunnarvingitta.
Una katimaniq sivulliqpaarilauqtanga Nunavut Tunngavik Incorporated Angajuqqaaq Jeremy Tunraluk, niruaqtaulauqtuq Tisipiri 2024, ammalu kingulliqpaagijautsunik Kanatami Inuit Uvigaqtut Katimajingita Angajuqqaanganu Susie-Ann Kudluk, isulittiviqaqtuq katimajiunirminut tamatumani upirngaaq.