June 2025 – Ottawa, ON
Kanataup ukiuqtaqtuqpasinga nunaqutigijaunajanngittuq Kanatamut Inuktaqarningippat. Inuit aulattijiuningit Kanatamiunut aulattijjutauvut.
Inuit Tapiriit Kanatami tungasuktittivuq Kanataup nutaanik piniarniriliqtanginnik sannginiqtaaqtittikannirumanirmut ammalu sapunniaqtauqujininganut Inuit Nunangannik, Ukiuqtaqtumi nunatuqattinni, saangaliqtillugu nunarjuarmi ilaliutiviujumaninginnik ammalu ulurianarunnaqtunik.
Inuit isumaqarvigijanginnik sivulliutittijumanirmut, ITK ullumi saqqitittiqqaujuq qanuilangajariaqarninganik titiqaqutimik taijaujunik Inungnut Tautugarijait Ukiuqtaqtuup Aulatauninganut, Ulurianaqtumiittailimaninganut, Sapunniaqtauvanninganullu, tusagaksaluatalingnik tammautauqattaqsimajunik taissumaninik, Inuit sannginiqarninginni qaujimaninginnilu tamakkununga Kanatamik sanavalliajumanirmut uqausiujunik ammalu ilitarijaujariaqarninginnik pimmariuningit Inuit ulurianaqtumiittailimaningit Kanataup attanaqtumiittailimaninganut.
“Kanata piviksalik ajuqsarunniirjuagunnanirmik sanngijualuulirunnarnirmilu Inuit Nunangat pitaqarninganut pitaqarialimmarinit nunami ujaranniagaksanit, uummaqusiurutiksaliurunnaqtunit, ammalu pimmariujunik umiarjuakkuurviqarninginnu imaqutivut,” titiqqaquti uqaqtuq.
“Kisiani Inuqutitta nunaliillu qanuinnginningit taimanngat tugligijautuinnasimavut Kanataup pilirianginnut ulurianaqtumiittailimanirmut. Tamanna asijjirialik.”
Inuit Nunangat ilaqaqtuq sitamanik nunataarutiqarviujunik – Nunatsiavut Labrador-mi, Nunavik Quebec-mi, Nunavut ammalu Inuvialuit Nutaarutinginnik Nunatsiarmi. Tammanna ajjiqanngituq nunangat, iliqqusikkut ammalu aulattijiqarninginnik, nunaqaqsutik 40 pusantilingmik anginilik Kanatalimaap nunaqutialuanik, 72 pusantimiitsutik sigjaqarvingit Kanatalimaami ammalu 35 pusantinginniissutik imangit tariungunngitut.
Pijittiraqtausiasimannginikuq ikpigijautsiasimananilu, silangalu asijjiqpalialuni ammalu matuingaluaqtuni Kanatamiutaungitunnut sanngijunut suurlu Amialikamiunut, Rassiamiunut ammalu China-miunut anginiqsakkut aulattiniqsaujumajunik imaqutittinnik ammalu ujaranniagaksattinnik.
ITK unikkaliangit iluliqaqtut pimmaringnik Inungnut isumagijausimajunik tikiutiqullugit naliqqagijaulutik, ajuqsarunniirutiksaqarlutit, ammalu aulattijigijaulutik, sappunniaqtiulutiglu tamainnut Kanatamiutanut.
“Inuit upigusuktut Kanatamiutaunirminik. Isumaluutauvaktunik Inuuqatittinnut isumaaluutiqaqatauvugut Kanataup aulataujunnarninganu ammalu ulurianatuqariaqannginingannik,” titiqqak uqaqtuq. “Tunngasuktitaulaugaluaqsutik maannasaangulauqtuq piniarniqarnirailaurningit Kanatami sivuliuqtiujut sivulliutittijumanirailluti aviktuqsimaningani, sannginiqsanik kisiani isumaksaqsiurutausimattiaqtunik tautugaliurutik Kanatamut ilisimatsianirmut aqqutiksatuariliqtavut akuniuniaqtumut ulurianaqtumiittailimaniaruni ukiuqtaqtuqpasik.”
Tusagaksaliriit Apiqqutiqarutik: media@itk.ca
