ᔫᓂ 2025 – ᐋᑐᕚ, ᐋᓐᑎᐊᕆᐅ
ᑲᓇᑕᐅᑉ ᐅᑭᐅᖅᑕᖅᑐᖅᐸᓯᖕᒐ ᓄᓇᖁᑎᒋᔭᐅᓇᔭᙱᑦᑐᖅ ᑲᓇᑕᒧᑦ ᐃᓄᒃᑕᖃᕐᓂᖕᒋᑉᐸᑦ. ᐃᓄᐃᑦ ᐊᐅᓚᑦᑎᔨᐅᓂᖕᒋᑦ ᑲᓇᑕᒥᐅᓄᑦ ᐊᐅᓚᑦᑎᔾᔪᑕᐅᕗᑦ.
ᐃᓄᐃᑦ ᑕᐱᕇᑦ ᑲᓇᑕᒥ ᑐᖕᒐᓱᒃᑎᑦᑎᕗᖅ ᑲᓇᑕᐅᑉ ᓄᑖᓂᒃ ᐱᓂᐊᕐᓂᕆᓕᖅᑕᖕᒋᓐᓂᒃ ᓴᙱᓂᖅᑖᖅᑎᑦᑎᑲᓐᓂᕈᒪᓂᕐᒧᑦ ᐊᒻᒪᓗ ᓴᐳᓐᓂᐊᖅᑕᐅᖁᔨᓂᖕᒐᓄᑦ ᐃᓄᐃᑦ ᓄᓇᖕᒐᓐᓂᒃ, ᐅᑭᐅᖅᑕᖅᑐᒥ ᓄᓇᑐᖃᑦᑎᓐᓂ, ᓵᖕᒐᓕᖅᑎᓪᓗᒍ ᓄᓇᕐᔪᐊᕐᒥ ᐃᓚᓕᐅᑎᕕᐅᔪᒪᓂᖕᒋᓐᓂᒃ ᐊᒻᒪᓗ ᐅᓗᕆᐊᓇᕈᓐᓇᖅᑐᓂᒃ.
ᐃᓄᐃᑦ ᐃᓱᒪᖃᕐᕕᒋᔭᖕᒋᓐᓂᒃ ᓯᕗᓪᓕᐅᑎᑦᑎᔪᒪᓂᕐᒧᑦ, ᑕᐱᕇᒃᑯᑦ ᐅᓪᓗᒥ ᓴᖅᑭᑎᑦᑎᖅᑲᐅᔪᖅ ᖃᓄᐃᓚᖕᒐᔭᕆᐊᖃᕐᓂᖕᒐᓂᒃ ᑎᑎᖃᖁᑎᒥᒃ ᑕᐃᔭᐅᔪᓂᒃ ᐃᓄᖕᓄᑦ ᑕᐅᑐᒐᕆᔭᐃᑦ ᐅᑭᐅᖅᑕᖅᑑᑉ ᐊᐅᓚᑕᐅᓂᖕᒐᓄᑦ, ᐅᓗᕆᐊᓇᖅᑐᒦᑦᑕᐃᓕᒪᓂᖕᒐᓄᑦ, ᓴᐳᓐᓂᐊᖅᑕᐅᕙᓐᓂᖕᒐᓄᓪᓗ, ᑐᓴᒐᒃᓴᓗᐊᑕᓕᖕᓂᒃ ᑕᒻᒪᐅᑕᐅᖃᑦᑕᖅᓯᒪᔪᓂᒃ ᑕᐃᔅᓱᒪᓂᓂᒃ, ᐃᓄᐃᑦ ᓴᙱᓂᖃᕐᓂᖕᒋᓐᓂ ᖃᐅᔨᒪᓂᖕᒋᓐᓂᓗ ᑕᒪᒃᑯᓄᖕᒐ ᑲᓇᑕᒥᒃ ᓴᓇᕙᓪᓕᐊᔪᒪᓂᕐᒧᑦ ᐅᖃᐅᓯᐅᔪᓂᒃ ᐊᒻᒪᓗ ᐃᓕᑕᕆᔭᐅᔭᕆᐊᖃᕐᓂᖕᒋᓐᓂᒃ ᐱᒻᒪᕆᐅᓂᖕᒋᑦ ᐃᓄᐃᑦ ᐅᓗᕆᐊᓇᖅᑐᒦᑦᑕᐃᓕᒪᓂᖕᒋᑦ ᑲᓇᑕᐅᑉ ᐊᑦᑕᓇᖅᑐᒦᑦᑕᐃᓕᒪᓂᖕᒐᓄᑦ.
“ᑲᓇᑕ ᐱᕕᒃᓴᓕᒃ ᐊᔪᖅᓴᕈᓐᓃᕐᔪᐊᒍᓐᓇᓂᕐᒥᒃ ᓴᙱᔪᐊᓘᓕᕈᓐᓇᕐᓂᕐᒥᓗ ᐃᓄᐃᑦ ᓄᓇᖕᒐᑦ ᐱᑕᖃᕐᓂᖕᒐᓄᑦ ᐱᑕᖃᕆᐊᓕᒻᒪᕆᓂᑦ ᓄᓇᒥ ᐅᔭᕋᓐᓂᐊᒐᒃᓴᓂᑦ, ᐆᒻᒪᖁᓯᐅᕈᑎᒃᓴᓕᐅᕈᓐᓇᖅᑐᓂᑦ, ᐊᒻᒪᓗ ᐱᒻᒪᕆᐅᔪᓂᒃ ᐅᒥᐊᕐᔪᐊᒃᑰᕐᕕᖃᕐᓂᖕᒋᓐᓄ ᐃᒪᖁᑎᕗᑦ,” ᑎᑎᖅᑲᖁᑎ ᐅᖃᖅᑐᖅ.
“ᑭᓯᐊᓂ ᐃᓄᖁᑎᑦᑕ ᓄᓇᓖᓪᓗ ᖃᓄᐃᙱᓐᓂᖕᒋᑦ ᑕᐃᒪᙵᑦ ᑐᒡᓕᒋᔭᐅᑐᐃᓐᓇᓯᒪᕗᑦ ᑲᓇᑕᐅᑉ ᐱᓕᕆᐊᖕᒋᓐᓄᑦ ᐅᓗᕆᐊᓇᖅᑐᒦᑦᑕᐃᓕᒪᓂᕐᒧᑦ. ᑕᒪᓐᓇ ᐊᓯᔾᔨᕆᐊᓕᒃ.”
ᐃᓄᐃᑦ ᓄᓇᖕᒐᑦ ᐃᓚᖃᖅᑐᖅ ᓯᑕᒪᓂᒃ ᓄᓇᑖᕈᑎᖃᕐᕕᐅᔪᓂᒃ – ᓄᓇᑦᓯᐊᕗᑦ ᓛᐸᑐᐊᕆᒥ, ᓄᓇᕕᒃ ᑰᐱᐊᑭᒥ, ᓄᓇᕗᑦ ᐊᒻᒪᓗ ᐃᓄᕕᐊᓗᐃᑦ ᓄᑖᕈᑎᖕᒋᓐᓂᒃ ᓄᓇᑦᓯᐊᕐᒥ. ᑕᒻᒪᓐᓇ ᐊᔾᔨᖃᙱᑐᖅ ᓄᓇᖕᒐᑦ, ᐃᓕᖅᑯᓯᒃᑯᑦ ᐊᒻᒪᓗ ᐊᐅᓚᑦᑎᔨᖃᕐᓂᖕᒋᓐᓂᒃ, ᓄᓇᖃᖅᓱᑎᒃ 40 ᐳᓴᓐᑎᓕᖕᒥᒃ ᐊᖕᒋᓂᓕᒃ ᑲᓇᑕᓕᒫᑉ ᓄᓇᖁᑎᐊᓗᐊᓂᒃ, 72 ᐳᓴᓐᑎᒦᑦᓱᑎᒃ ᓯᒡᔭᖃᕐᕕᖕᒋᑦ ᑲᓇᑕᓕᒫᒥ ᐊᒻᒪᓗ 35 ᐳᓴᓐᑎᖕᒋᓐᓃᔅᓱᑎᒃ ᐃᒪᖕᒋᑦ ᑕᕆᐅᖕᒍᙱᑐᑦ.
ᐱᔨᑦᑎᕋᖅᑕᐅᓯᐊᓯᒪᙱᓂᑯᖅ ᐃᒃᐱᒋᔭᐅᑦᓯᐊᓯᒪᓇᓂᓗ, ᓯᓚᖕᒐᓗ ᐊᓯᔾᔨᖅᐸᓕᐊᓗᓂ ᐊᒻᒪᓗ ᒪᑐᐃᖕᒐᓗᐊᖅᑐᓂ ᑲᓇᑕᒥᐅᑕᐅᖕᒋᑐᓐᓄᑦ ᓴᙱᔪᓄᑦ ᓲᕐᓗ ᐊᒥᐊᓕᑲᒥᐅᓄᑦ, ᕋᔅᓯᐊᒥᐅᓄᑦ ᐊᒻᒪᓗ ᑦᓴᐃᓇᒥᐅᓄᑦ ᐊᖕᒋᓂᖅᓴᒃᑯᑦ ᐊᐅᓚᑦᑎᓂᖅᓴᐅᔪᒪᔪᓂᒃ ᐃᒪᖁᑎᑦᑎᓐᓂᒃ ᐊᒻᒪᓗ ᐅᔭᕋᓐᓂᐊᒐᒃᓴᑦᑎᓐᓂᒃ.
ᑕᐱᕇᒃᑯᑦ ᐅᓂᒃᑳᓕᐊᖕᒋᑦ ᐃᓗᓕᖃᖅᑐᑦ ᐱᒻᒪᕆᖕᓂᒃ ᐃᓄᖕᓄᑦ ᐃᓱᒪᒋᔭᐅᓯᒪᔪᓂᒃ ᑎᑭᐅᑎᖁᓪᓗᒋᑦ ᓇᓕᖅᑲᒋᔭᐅᓗᑎᒃ, ᐊᔪᖅᓴᕈᓐᓃᕈᑎᒃᓴᖃᕐᓗᑎᑦ, ᐊᒻᒪᓗ ᐊᐅᓚᑦᑎᔨᒋᔭᐅᓗᑎᒃ, ᓴᑉᐳᓐᓂᐊᖅᑎᐅᓗᑎᒡᓗ ᑕᒪᐃᓐᓄᑦ ᑲᓇᑕᒥᐅᑕᓄᑦ.
“ᐃᓄᐃᑦ ᐅᐱᒍᓱᒃᑐᑦ ᑲᓇᑕᒥᐅᑕᐅᓂᕐᒥᓂᒃ. ᐃᓱᒪᓘᑕᐅᕙᒃᑐᓂᒃ ᐃᓅᖃᑎᑦᑎᓐᓄᑦ ᐃᓱᒫᓘᑎᖃᖃᑕᐅᕗᒍᑦ ᑲᓇᑕᐅᑉ ᐊᐅᓚᑕᐅᔪᓐᓇᕐᓂᖕᒐᓄ ᐊᒻᒪᓗ ᐅᓗᕆᐊᓇᑐᖃᕆᐊᖃᙱᓂᖕᒐᓐᓂᒃ,” ᑎᑎᖅᑲᒃ ᐅᖃᖅᑐᖅ. “ᑐᙵᓱᒃᑎᑕᐅᓚᐅᒐᓗᐊᖅᓱᑎᒃ ᒫᓐᓇᓵᖕᒍᓚᐅᖅᑐᖅ ᐱᓂᐊᕐᓂᖃᕐᓂᕋᐃᓚᐅᕐᓂᖕᒋᑦ ᑲᓇᑕᒥ ᓯᕗᓕᐅᖅᑎᐅᔪᑦ ᓯᕗᓪᓕᐅᑎᑦᑎᔪᒪᓂᕋᐃᓪᓗᑎ ᐊᕕᒃᑐᖅᓯᒪᓂᖕᒐᓂ, ᓴᙱᓂᖅᓴᓂᒃ ᑭᓯᐊᓂ ᐃᓱᒪᒃᓴᖅᓯᐅᕈᑕᐅᓯᒪᑦᑎᐊᖅᑐᓂᒃ ᑕᐅᑐᒐᓕᐅᕈᑎᒃ ᑲᓇᑕᒧᑦ ᐃᓕᓯᒪᑦᓯᐊᓂᕐᒧᑦ ᐊᖅᑯᑎᒃᓴᑐᐊᕆᓕᖅᑕᕗᑦ ᐊᑯᓂᐅᓂᐊᖅᑐᒧᑦ ᐅᓗᕆᐊᓇᖅᑐᒦᑦᑕᐃᓕᒪᓂᐊᕈᓂ ᐅᑭᐅᖅᑕᖅᑐᖅᐸᓯᒃ.”
ᑐᓴᒐᒃᓴᓕᕇᑦ ᐊᐱᖅᑯᑎᖃᕈᑎᒃ: media@itk.ca
