December 12, 2024
OTTAWA – Ceporah Mearns akuniuliqtuq ilinniaqpaktuq, qaujimajitaq, taqasuittuq ikajuqturnirmik ilaliutijauninginnit Inuit qaujimajatuqangit iqqanaijarvikmi ammalu qaujisarnikkut, amma maanna, tunijaujuq ITK-kut Inuit Ilisarijjutaujumik Tunijauniq.
Taanna Inuit Ilisarijjutaujumik Tunijauniq, aaqqiqtausimajuq taakkunanngat ArcticNet-kunnut Inuit Qaujisarnirmut Kamajiujut Katimajiralaat, tunijaujuq arraagutamaat Inukmut pivalliatittivaktumut Inuit nangminiqaqpallianirmut qaujisarnikkut. Amisut titiraqtausimajut ikajuqtuqtut tunijausimajut katimajiralaamut ilaliutijaullutik Mearns’ niruaqtaujjutigilauqtangata katiqsuqsimajumut nalunairivuq taasuma ajunginninganut.
Pangniqtuurmiutaksajaq, Mearns Tukimuaqtittijiujuq Nunavut Katujjiqatigiit Pilirivik Nunaqaqaaqtuvinirnut Aanniaqarnangittulirinirmut Qaujisarniq (NEIHR) ataaniituq Qaujigiartiit Aanniaqarnangittulirinirmut Qaujisarniq Tuqtarvik (QHRC) inilik Iqalunni. Tigumiaqtuq Paippaaqtaaqsimanirmik Ilinniaqsimaninganut Qanutuinnaq Inulirinirmut asinginnullu taikangat Carlton Silattuqsarvik, Paippaaqtaaqsimajuq Ilinniaqtulirinirmut Nunavut Silattuqsarvikmit Regina, ammalu maana iliniaqtuq Quttikniqpaamik Paippaaqtaarasuknirmik Ilinniarvikmi Ukiuqtaqturmiutat ammalu Tarramiut Pillugit Ilinniarniq taikani Memorial Silattuqsarvik taikani St. John’s, Newfoundland ammalu Labrador.
Mearns pilirilluataqsimajangit ilinniariulisaaqtunik surusirnik, ilinniarutiliurnirmik, ammalu uvikanut isumaqattiarnirmik ammalu qanuinginnirmik ammalu pillirilluataqpaktuq ilaliutittinasuknirmik asijjiqpalliatittinikkut sangininga taakunangat Inuit Ilisaijjusiit (Inuit Ilisaijjutingit) qutikniqsanut iliniarnirmut.
Ikajuqtaunirijanga Mearns ukunangaalauqtut silattuqsarvinik suurlu McMaster Silattuqsarvik, Silattuqsarvik Alberta ammalu Toronto Metropolitan Silattuqsarvik, Gavamakkut Nunavut ammalu timiujut Canada ammalu silataani.
“Quviasukpunga ilisarijijunnarattigut, taassumuuna tunijaunikkut, pirjuanik ikajuqsimaninganut Ceporah Mearns taavunga asijjiivallianirmut uqausirijauvaktut silattuqsarvini, turaarijaulutik Inuit Qaujimajangit ammalu pivaliatittinirmik ilautittinikkut ammalu ajjigiiktittinikkut Inuknut taakkunani qaujisaqpaktunik nunalikni tavvani Kanatami ammalu asinginni,” uqalauqtuq ITK Angajuuqqaaq Natan Obed. “Sanilirillunigit nirualauqtut ammalu piliriqatingit, qujagivavut ajuinnarninga ammalu pijittirarninga piuniqsamik inuusiqarunnaqullugit Inuit.”
Silattuqsarvikmi Ukiuqtaqtumi Qaujisarnirmut Iksivautaq Inuit Ilisaijjutit taikani Dartmouth-mi Silattuqsarvik taikani Hanover, New Hampshire – ilangat Mearns’ amisunit sivuliqtiunirmut tigumiaqtangit – aaqqiqsuivaktuq paippaaqtaarasuknikkut aulataujjutit ammalu ilinniarutit kiggaqtuijuq ammalu turaangatitaujunik Inuit pijjutingit qaujimanirmut. Mearns qangattiarataaq taijaulauqtuq Qutikniqsaq Ukiuqtaqtumi Ilinaqti taikani Dartmouthmi, “ilisarinirmik Inuit qaujimajanginnik uqausiqaqpaknikkut – ammalu niriukpugut uqausiqapakniarninganik qaujimajaminik – taakununga Dartmouth nunalittini,” titiralauqtuq Melody Brown Burkins, Tukimuaqtittiji Iliniarvik Ukiuqtaqtuq Iliniarutit taikani Dartmouth-mi.
Mearns iqqanaijalilauqtuq Qaujigiartiit arraagumi 2012-mi Kiggaqtuijiuluni Uvikkanut Qaujisaqti ikajuqtiulluni ammalu ingiinakautigipaluk “atuqtummariuliqtuni piliriqatigiiktunut,” uqalauqtuq Gwen Healey Akearok, Angajuraaq ammalu Kiglisiniaqti Tukimuaqtittiji taikani QHRC, niruaqsilauqtuq Mearns taasumunga tunijaunirmut ilisarijjutimik. Taimanganik, Mearns ajurunniiqsimajuq ammalu qaujimajauttiarliktunik aulatittinirmik katimajunik, iliniaqti, qaujisaqti, titiraqti uqalimaaganik ammalu uqalimaji inugiaktunik, piluaqtumik kamagijaqarumaninga surusirniq, uvikkanik ammalu isuma qanuingittiarninganik.
“Ceporah ilisaijiusimajut uvannut ammalu suuqaima asinginnut Inullattaangungittunut ammalu aaniaqannangittulirijinut iqqanaijaqtinut Nunavummi, takutittilluni uvannik ammalu qaujitittilluni tautugarnit sunatuinnarnik Inuit qanuinginninginut pillugu, inuuttiarninginnut ammalu qaujisarnikkut atuqtauvaktunik,” titiraqtuq Amy Caughey, Ilisaijiukainnasuuq Silattuqsarvikmi Alberta.
Mearns tunijaulauqtuq taassuminga Inuit Ilisarijjutaujumik Tunijauniq December 12, 2024, taikani arraagutamaat ArcticNet quviasugutiqaqtillugit Ottawa-mi. Asinginnik saalaksaqatausimajunik ilaliutijauvuq ukuninga:
- 2023 Eric Oliver, Nunatsiavut
- 2022 Jean Allen, Nunavut
- 2021 Frank ammalu Nellie Pokiak, Inuvialuit Nunataarvik, ammalu Elizabeth (Liz) Pijogge, Nunatsiavut
- 2019 Robert Way, Nunatsiavut
- 2018 Michelle Wood, Nunatsiavut
- 2017 Lucassie Arragutainaq, Nunavut
- 2016 Inez Shiwak, Nunatsiavut
- 2015 Doug Esagok, Inuvialuit Nunataarvik
- 2014 Joey Angnatok, Nunatsiavut
Pivalliajulirijiit qaujigiarumajut:
media@itk.ca