Tisipiri 13, 2024 — Ottawa, Ontario
Inuktitut qimirruagaq akuniuniqpaaq saqqitausimavuq Kanatami Nunaqaqqaaqsimajuup uqausinganiilluni, nutaamilu atiqalaaliqsuni 2025-mit – Inuktut.
Nutaami atitaaqtitauninga malippuq Inuktut taiguusiup atuqtauninganik Inuit uqausilimaanginnik taisimmat Inuit Nunangani ammalu malinirsausunik taiguusiujunik ullumiuliqtuq. Atitaanga angiqtaulauqtuq katimajilimaanut Inuit Tapiriit Kanatami (ITK) Arraagutamaaqsiutimik Katimaniqaqtillugit Sitimpirimit.
Saqqitauqqaalauqsimatsunik 1959-mit, Inuktut qimirruagaq ingirrataunginnasimavuq Inunnut, aaqqisuijiqqaangutillugit Mary Panigusiq Cousins, Elijah Menarik, ilagijautsunilu Robert (Bobby) Williamson. Saqqitauqqaalauqsimajuq gavamatuqakkunnut ITK-kunnulu aulatausiliqsunik 1989-mit.
Inuktut qimirruagaq takutitsisuuq piujualunnik atjigiituinnaungittuniluk inuusigijaujunik iliqqusigijaujuniluk Inunnut Inuit Nunanganik. Marruaqtisunik saqqitausuuq arraagumik 51 nunaliujunut Inuit Nunanganik, takutsauliqsuniluk qaritaujakkut quviasuutiummisunik 65-nik arraagutaaqsimanirminik. Taanna qimiruagaq atausivitsuni atimini asitjiisimajuq, Inuttituut/Inuktitun-ngutsunik 1972-mit 1977-mut taima utiqsunik Inuktitut-mut 40-nit arraaguusimaliqtunik.
Taanna qimirruagaq inigijauvuq tusaumatitsisunik Inuit nipinginnit, Inuit atausiuqatigiinninginnik, ammalu Inunnut ITK-kunulu sivumugiarnirivattanginnik. Inuit titiraqtanginnik saqqititsisuuq, titravallianiqsauqujitsunik, sivumugiarqujitsuniluk Inunnut titiraqtaujunik, iniutsuniluk Inuit titiqtugarsimajanginnik atjilianginnilu. Amiisuunngitunik ilagijaujuq tusaumaqattautilirijinik saqqititsisuunik Inuit nipinginnik Inuit taututtamigut, turaangatsunik atuqtauvalliajunik, iliqqusigijaujunik, inuusigijaujuniluk Inuit Nunangatigut.
“Inuktitut qimirruagaq qaujimautiuvuq kinaunittinik ammalu namunngaliarnitinnik. Taanna asitjiniq angijualuunngituq, kisiani takutitsijuq pirugunnanittinik, asitjigunnanittinik, pivaalligunnanittinilu, pimmariutitsijattiniluk takutsautitsinirmik ullumiuliqtuq Inuulluta inuusigiliqtatinnik,” uqaqtuq Natan Obed, Angajuqqaaq Inuit Tapiriit Kanatakkunit.
Taanna asitjiniq atikkut ilagijauvuq qimirruagaup nutaangugiartitaunirilaaqtaminik. Inuktut qimirruagaq saqqitaulaaqtuq nutaangugiartausimaluni, nutaamilu atimi aturluni, 2025-mit. ITK tunngasutitsivuq Inunnit nanituinnamiunik tujuigiamik titirarsimajaminik, titiragumajaminik, atjinguanit uvvaluunnii titiqtugaqsimajunik takutsauqujaminik qimirruagarmik. Qaujigiarvigigut Aaqqisuijik Jessie Fraser irngiinaaqtautikkut inuktut@itk.ca titirartausimajut qanuilluagiaqarmangaati, akiliqtauniujunik, ammalu qangakkut tunisiviqarmangaaq qimirruagaq.
Tusaumaqattautilirijiit qaujigiakkannigunnatut:
Inuit Tapiriit Kanatami
media@itk.ca
613-292-4482