Tisipiri 6, 2024
OTTAWA – Inuit Tapiriit Kanatami Katimajingit angirutiqalauqtut kinguliriiktunik 14-nik atuliqujalianik maliktaujuksani qanuiliurutaunirmut parnautauninganut ammalu pivalliajjutiksangannut Inuit Nunangat Silattuqsarvijjuangani, katimallutik Nuvipiri 28-mi ammalu 29-mi Ottawa-mi. Katimajiit atuliqujaliarilauqtangit ilaqalaurivut angirutauninginnik Ilitaqsijjutiksait Titiraqutingit ammalu Ilinniarviujunnarninganut Tunngaviksangani; nalunaisijunik qanuq niruaqtaulaarmangaak nunalik tuttavigijauniaqtuq silattuqsarvijjuarmut, ammalu suli qanuq saqqitittilaarnirmik Silattuqsarvijjuarmut Kiinaujaqutinginnik Papattiviksamik. Inuit Nunangat Silattuqsarvijjuaq tungasuktittijumavuq sivullirmi iliniariarumaaqtunik tamaani 2030-mi arraagungani.
Sivuniaguttauq, Katimajiit sanirvailauqtut Kiinaujanik Atuqtuksait $370 milijanik taikunga Nunaqaqqaaqsimajut Igluqarutiksanginnut ammalu Nunalingmi Piqutirjuaqariaqarninginnut, angirutaujarialingnik suli Kanatami Kiinaujalirijijuakkut Katimajinginnut. Katimajiit angirutiqalaurivut sanirvaqtauniaqtunik $19.6 milijanik Inuit aviktuqsimaninginnut pigiarutiksanit Kanatami Sanasimattiarniqsanik Igluliurutiksanik, turaangallutik iliuqqaiviuningit uummaqqutinginniqsauniaqtunik aaqqigiaqtausimjuksanik kiinaujaliunginniqsaujunut akiliqtuqtaujunnarniaqtunik najuqtaulutik.
Katimajiit angirutiqalauqtut sanirvaijumanirmik $36 milijanik Kiinaujanik Atuqtuksanik 2024-mi Inuit Nunangat Ilinniaqtunut Niqitaarutiksanginnik, kiinaujait atuqtauniarmata Inungnut turaangalutuqtunik niqiksaqarutiksaliurnirmut atuliqtitaujumaaqtunik 75-nik ilinniarvingni Inuit Nunanginnik.
Katimajiit angiqatigiilaurivut sanirvaijumallutik $11 milijanik Katanami Inuit Ingminiiqtailimagiarutiksanginnik Qanuiliurutiksait ikajuutiulutik isumakkut qanuingittunarnirmut sitamani Inuit aviktuqsimaninginnit.
Katimatillugit, Katimajiit tusaumatittigiakkanilauqtut maannasaaq puvaglungniusimajumi Inuit Nunangata nunalinginni ammalu ikajuqtaunginnariaqarninginni Gavamatuqakkunnut nunguutinasunnirmut puvagluqattarnirmik Inuit Nunanginnik, pitaqarunniiqtitaugiarlutik arraagumi 2030-mi. ITK-kut ilitaqsisimagivut pitaqariaqarniaqtunik tamaani $131.6 milijanik pilirianguinnaqullugit piniarnirijausimajut tagvuuna.
ITK-kut Nuvipirimi katimaningit kingullirijaulauqtuq Nunavut Tunngavik Timiqutingangata Angajuqaanganut Aluki Kotierk. Katimajiit qujalittialauqtut Kotierk-mik pimmarialungni ikajuqattaqsimaningannut sivuvaqtittivallianirmik Inuit pijunnautinginnik ammalu uqausituqanginnik.