Ottawa, Nuvipiri 27, 2024 – Inuit Tapiriit Kanatami tusagaksaliuqqaujut ullumi tautugariinnaqtanginnik turaangajunik pitaqaliqujiniq Inungnut-aulatauniaqtumik silattuqsarvijjuasamik Inuit Nunangani pimmariujumik pivalliasimalirmata, ilaliutininginnut ammalu atuqtaulauqsimangittunik kiinaujaksaniktauninganut $50 milijannik taikkununga Mastercard Foundation-kut Tunngavinganut, anginiqpaattiarmik kiinaujanik ikajuutaujunik tunausimajunik Inungnut. Tamanna ikajuutaujuq kiinaujaksanigutauniaqtuq pigialisaarutiksaunirmut ilagijaujuni Inuit Nunagani Silattuqsarvijjuasamut sivullirijauniarmat ilinniarviksaq turaangajut nunarjuarmi piuniqpaanguqatauniaqtunik silattusaqvijjuasaulluni Inuit Nunangani.
“Pivallianginnarningit Inuit Nunangani Silattuqsarvijjuasamik kajusitittijunnaqsijut sapiliqtailimainnarnirmik pinasuinnarninginnut sivuliqtiqalirunnarninginnut uvagut quttiniqsanik ilinniarunnaqtittijumaarni ammalu qaujisarviksaqarunnarnirmik. Silattuqsarvijjuaqaliqpat Inuit Nunangani ajurutaujunniirunnaqput amisunut Inungnut quttingniqsanik ilinniakkannirumavaktunut ammalu tigumiarunnaqsiniaqtunik ilitarijaujjutinik ikajuutaujunnaqtunik nunalingni pinasuaqattainaqtunik,” uqaqqaujuq Natan Obed, Angajuqaangat Inuit Tapiriit Kanatami.
“Qujalittiaqtunga Mastercard Foundation-kut Tunngavinganik ikajuqsuininginnut piliriariliqtattinnik amisugasangnik arraagunik, ikajurninginnilu uvattinnik pigiasaarutiksaniksimagamik Inuit Nunangani Silattuqsarvijjuasamik. Ikajuutiksaniktangit naammanaalluattiaqput pitaqariaqallaringmata asivut ilaujunnarninginnut tamakkuninga pilirijunik ammalu ujjiqtuttiarumanirmut ilinniarniaqtut tunngasuktitaujunnariaqarninginnik tamaani 2030-ngulaaqtumi.”
NUNALILIUQPALLIANIQ
Tamakkuninga kiinaujaksaniksijut asijjiijunnarnirmik pijunnautaulariktuq Inuit Tapiriikkut pivalliajunnarninginnik ajurunniirutauvaallirunnarnirmut, sivuvaqpalliajunnarninginnut ilinniarutiksalaringnik parnaijunnarnirmut ammalu ilinniakkannirutiksanginnik aaqqiumavagiirunnarniq, qaritaujakkullut atuqtaujunnarninginni ammalu nunalingnut piuniqsanik ilauqataujunnarninginnik. Inuit Tapiriit akiqarninginnik tukisiniarutigijanginni tukiliulauqtut tamaani $160 milijanginniitunik inulimaanik nangminiqaqtuniglu pisimajariaqarajaqtut matuiqsijunnarsiniarutik pimmariujunik ammalu ilinniarutiksanik quttingniqpaanguqataujunik ilitariujjutiksaqtaarviujunnaqtunik pitaqalirunnarniq. Inuit Tapiriit pinasuksimaliqtut $50 milijannik Kanataup Gavamakkunginnik sanajaulisaarutiksanganik pimmariujumik Silattuqsarvijjuanguniaqtumik.
“Inuit Nunangani Silattuqsarvijjuaq atuutiqarniaqtuq asijjiijunnalarinnik maliglutik Inuit tautugarijanginnik ammalu pimmariutippaktanginnik,” uqalauqtuq Jennifer Brennan, Angajuqqaarijaq Tukimuaktingat, Kanatami Pilirianguvaktunik Mastercard Foundation-kut Tunngavinganik. “Taakkualuattiangungmata isumagijauqattaqsimajut Mastercard Foundation-kut Tunngavinganut upigijaullarimmata ikajuqsuqtaujumavaktut – quvvasingniqsanik ilinniakkannirviksanik, maliktunik iliqqusituqait tunngaviuninginni, atuqtaujunnaqtunik ammalu tukiliurutaujunnaqtunik Inuit Nunanginni aqqusiurutaujunnaqtut inuusiksaminut atuutiqarniaqtunik, Inuit makippalliajunnaqullugit, ikajuqsuqtaullutik qanuininginnikkut ammalu sannginiqarunnarninginnik piruqpallialutik Inuit nunalinginni.”
Inuit Nunangani tamanna sivullirijauniaqtuq Inungnut-aulatauluni ammalu Inungnut nangminirijauluni silattuqsarvijjuanguniaqtuq Kanataup Ukiuqtaqtuqpasinganiiniaqtuq. Anginiqaqtiginiaqtuq ajjigiingittuutiujunik gavamaqarviujuni, isumagillugu angininga Inuit Nunangat, tamaanilu anginilingmi 40 pusantinganiiktumik Kanataup nunaqutilimaanganik, ikaaqsimajumik marruungnik Ukiuqtaqtuup aviktuqsimaningani ammalu Kanataup aviktuqsimaninginnik marruungnik. Pilirianguvallianialiqtuq piuniqpaaq iniksangat, Inuit Nunangani sanavviuniaqtuq silattuqsarvijjuaq asinginniglu qaujimavviksanik ilagijauniaqtunik taassumunga.
NUTAANIK ISUMMIQSAUTIIT QANUQTUURUTAUNIRMUT
Isuani turaagaqaqput tamakkua sannginiqtaqpalliaqujiniq ilinniaqtinik tunngaviqattiaqtunik ilinniarninginnik ikajuqtiulirunnaqullugit nunalingmini, atulirlutik nutaanik isummiqsautigijunnaqtanginnik ammalu aturunnaqsilutik isumaminik qanukkanniq isumaksaqsiurutiqarunnarniq, atuqtausimanngittunik sivuniagut. Inuit ilinniaqtiuvaktut ajurutiqasuungungmata angijuutinik ilinniaraanigunnarniq silattuqsarvingni qallunaat nunanginni nanituinnaq. Silattuqsarvijjuaqtaarutik Inuit Nunangani, saqitittivalliajunnarniarmijut iqqanaijarviksanik, ajuruniiqsaijunnaqtunik ilinniaraniksimattiaqtunik ammalu qanukanniq asiagut isumaksaqsiurunnaqsilutik sivuliqtiqalirlutik makuninga pijjutiqaqtunik aanniaqtulirinirmik, gavamalirinirmik, piqutirjualirinirmik sanajaujunnaqtunik ammalu atuqtauqattarunnaqtunik aulattijunnarniq, nangminiq pilirivilirinirmik ammalu ilinniaqtulirinirmik.
Kinakkuuningit Inuit Tapiriit Kanatami
Inuit Tapiriit Kanatami kiggaqtuijiuvut timiqutigijaullutik Inungnik tamainni Kanatalimaami, amisuuningit Inuit Nunanganirmiutaullutik, Inuit nunatuqanginni, amisuunilingnik 51-nik nunallingni tauvanngat ualinirmiunik Inuvialuit Nunataarvigisimajanganni (Nunatsiarmi), Nunavummi, Nunavimmi (Kupaik Tarrangani) ammalu Nunatsiavummi (Lapatoriup uangnanganik). Inuit Nunangat qanigijaani anginilik tamaani 40 pusantinik Kanataup tamainni nunaqutigijalimaanganik ammalu 72 pusantinga tariurmi imaqutinginnik angilik imaa.
Kinakkuuningit Mastercard Foundation-kut Tunngavingat
Taakkua Mastercard Foundation-kut Tunngavingat atiliuqtausimavut ilitarijaumaniq Kanatamiuni kiinaujaksaniksivangninginnik timiqutigijauninginni ammalu nunarjualimaami anginiqpaattiarijauqataujut kiinaujaksaniksivaktut timiqutinginni. Taakkua pilirivaktut tautugarijaujunik isumagijausimajunik timiqutigijaujunut sivuvariaqtittijumanirmut ilinniaqtulirinirmik ammalu kiinaujaqtigut ilaujjutiksaniksivaktut makkuktuqutinginnik nunaligjuarni tauvani Africa-mi ammalu Nunalituqait makkuktuqutinginni Kanatami pijunnaqsiqullugit iqqanaijarviksattiavannik ammalu quviagijauvaktunik iqqanaijarunnaqsiqullugit. Saqqititaulauqsimajut 2006-ngutillugu, tunisikauninginginnut Mastercard-kut timiqutingat kampaniuliramik, Tunngavingat ingmiguuqtumik kampanigijanganik, ilitarijauluaqtut, iqqanaijarviqaqsutik Toronto-mi, Kigali-mi, Accra-mi, Nairobi-mi, Kampala-mi, Lagos-mi, Dakar-mi ammalu tauvani Addis Ababa-mi. Atuagaqutigijangit, aulattijiuvvigijangillu ammalu ikajuutiksanikpaktangit isumaliurutauvaktut Tunngavingani katimajinginnut ammalu sivuliqtinginnut.
Tusagaksalirijinut apiqqutiksaliit uvunga qaujigiarunnaqput:
Inuit Tapiriit Kanatami
Irngiinaaqtautikkut: media@itk.ca
Uqaalautikkut: 613-292-4482