Nuuviivva 8, 2024 Ottawa, Ontario
Natan Obed, Angijuqqaaq Inuit Tapiriit Kanatami, ammalu Maligaliuqtimmarik Gary Anandasangaree, Minista Kuip-Nunaqaqqaaqsimajuliriniq, katujjilluti katimatittilauqtuuk Inuit−Kuip Kiggatuqtingit Piliriqatigiinnikkut Katimajiralaangit (ICPC) katimaningani ullumi Ottawami.
Atiliuqtaulauqtillugu Inuit Nunangat Suliniraruti arraagu 2017−mi, Inuit sivuliqtingit amma Gavamatuqakkut piliriqatigiinginnaqtut ukutiguuna Inuit−Kuip Kiggatuqtingit Piliriqatigiinnikkut Katimajiralaangit turaarillugu nutaanguniqsakkut Inuit−Kuip kiggatuqtingit piliriqatigiittianirmi pijjutiqaqtutik ilisarijauqullugit pijunnautit, ippigusuqtiarniq, amma piliriqatigiittianikkut. Kinngurlippaami katimaniulauqtuq Inuit−Kuip Kiggatuqtingit Piliriqatigiinnikkut Katimajiralaangit Mai 2024−mi amma iksivautaqalauqtuq Angijuqqaaq Natan Obed−mi amma Kanataup Angijuqqaarjuangani Justin Trudeau−mi.
Ullutuinnaup katimaningani, Inuit−Kuip Kiggatuqtingit Piliriqatigiinnikkut Katimajiralaangit uqausiqalauqtut piliriarijauvalliasimajunik sivulliqpauqujausimajunut, ilagijaulluni pivalliatittiqatigiinniq kanataup atuaganga Inuit K-12 Ilinniarniq, ikajuqtuigajarluni angirutausimajumut nalunaijaqsimajuq Nunarjuarmi Katujjiqatigiit Sulinirarutinga Nunaqaqqaaqtuminiit Pijunnautinginnut Piqujaq Aulajjaigiarutiup Pannautinga. Gavamatuqakkut Ministangit uqakkannilauqtut ikajuqtuiniraqtukik piliriangujumut Inuit sivuliqtinginnut turaagaqaqtumik sanajauvallianingata Inuit Nunangat Ilinniarvijjuaksanga.
Sivuliqtit nalunaiqsilauqtut piliriqatigiinniusimajuq attuaniqaraluarmangaaq Kanataup Silataaninngaaqtut Atuagangani Inuit namminiq−pijumaniqarninganut amma ininginnut Inuit pimmariugianga ammalu piliriqatigiinniujuq piliriaqaqtumik nunarjuarmi piliriqatiqaqtut Inuit Nunangani.
Inuit amma kanataup piliriqatigiingit nillialaurmijut sivumuaqtauqujaulluni atangiijumik gavamakkunnut turaarijaujuq Niqiqattiarniq Inuit Nunangani, piqasiutilluni piusititaugiaqarninga Niqittiavaliriniq Ukiuqtaqtumi Kanatami titiqqalirinikkut−turaangaluni piliriaq pijiqtiraqtiarluni amma kamaniqsauniarluni Inuit nunanginni.
Inuit−Kuip Kiggatuqtingit Piliriqatigiinnikkut Katimajiralaanginnut ilagijaujut piliriaqallarigumajut piqujalirinirmik amma maligaliangusimangittunik piliriqatigiinnikkut piliriarijauqullugu uviniqatigiinginirmut akiraqtuniq aanniaqarnangittulirinirmi, kajusiinnarluni piliriangujuq kamagijaulauqtut Inuit−Kuip Kiggatuqtingit Piliriqatigiinnikkut Katimajiralaakkunginnut aaqqisuivallianiujuq gavamatuqakkut Nunaqaqqaaqtuminiit Aanniaqarnangittulirinirmut Piqujanga. Sivuliqtit uqausiqalaurmijut atuliqtitauqullugu Inuit Nunangat atuagaq, ikajuqtuqtaulluni Inuit−Kuip Kiggatuqtingit Piliriqatigiinnikkut Katimajiralaakkunginnut arraagu 2022mi. Piluaqtumi, uqausiqalauqtut aaqqiksuivalliajumallutik atanginiikkut gavamakkut pilirijjusinginnik qaujimajauqullugit kanatami pilirivilimaat amma tuttarviit aturaluarmangaata Inuit Nunanginnik tautugusinginni aaqqittauqullugit atuagait, piliriangit, pijittirautingit, amma pilirianguvalliajumajut.
Inuit amma gavamatuqakkut sivuliqtingit qimirrulaurmijut Inuit Tapiriit Kanatami−kut arraagu 2025 kiinaujat atuqtussat tunijausimajut, tautunniqaqtutik sivulliqpaujjauqujausimallarittunik nalimuniqarluti Gavamatuqakkut pilirigumallarittanginnut, atuaganginnut, amma pilirianguvalliajumajunut.
Kingulliqpaami, sivulitit quviasujjutiqalaurmijut arraagukasaalunnut piliriarijausimajunik, piqasiutillugu ukutiguuna Inuit−Kuip Kiggatuqtingit Piliriqatigiinnikkut Katimajiralaakkut, turaarijangit kanatamut ilisarijauquninga amma mamiaqujiniq Gavamatuqakkut piliriaqalaurninginnut qimminik tuqurainiulauqtumik Nunavimmi arraagunginni 1950 ammalu 1960−nginni.
Uqausiujut
“Arraagugiliqtangani Inuit−Kuip kiggatuqtingit piliriqatigiinniup, kajusiinnaqtugut pijjutiqattiaqtumik, matuingattiaqtumik nilliaqatigiittianirmik Kanataup Ministanginni kamagijauqullugit pijaujariaqallarittut Inunnut Kanatami. Upigusuppunga piliriarisimaliqtatinnik tamatuma mitsaanut. Inuit−Kuip Kiggatuqtingit Piliriqatigiinnikkut Katimajiralaangit aaqqissimaqtiaqtunik pilirijjusiqarmata Inunnut amma Kanatamut nalunaijaqtauqullugit amma sivumuaqtauqullugit sivulliqpaujjauqujat katujjinikkut. Niriuppunga pivalliattiaqulluta piliriarisimaliqtatinnik katujjinikkut sannginiqsauqullugu Kanata, ippigusunniqaqtiaqtumik amma atuliqtittiniaqtumik pijunnautingita Inulimaat.”
Natan Obed, Angijuqqaaq Inuit Tapiriit Kanatami
“Nunataarnirmut angiqatigiigutiup atuliqtitauninga, illulirinirmut, aanniaqarnangittulirinirmut, Inuit ajauqtirivut amma aaqqissigumalluti − amma taimailiuqsimaliqtut kinguvaariinut. Gavamavut angiqsimattiaqtuq piliriqatigiinnirmik amma uppirittiaqtugit piliriqatigiinnikkut piliriarijavut. Inuit−Kuip Kiggatuqtingit Piliriqatigiinnikkut Katimajiralaangit sulillarittutik tusaagumattiaqtut amma piliriqatiqarumattiaqtut katujjinikkut sivulliqpauqujanik. Atautikkut, piliriaqallarigumavugut sivumuaqtittinirmik Inuit pijunnautinginni, Inuit namminiq−pijumanirmik, amma qanuingittiaqujinirmik Inuit Nunangani.”
Maligaliuqtirmarik Gary Anandasangaree
Minista Kuip-Nunaqaqqaaqsimajuliriniq,
Ilaujut ullutuinnaup katimaningani ukuanguvut:
- Natan Obed, Angijuqqaaq, Inuit Tapiriit Kanatami
- Duane Smith, Iksivautaq amma Aulattiji, Inuvialuit Aviktusimajunik Kuapurisan
- Paul Imgaut Angijuqqaaq Tungilinga, Nunavut Tunngavik Timinga
- Johannes Lampe, Angijuqqaaq, Nunatsiavut
- Pita Aatami Angijuqqaaq, Makivvik
- Lisa Qiluqqi Koperqualuk, Angijuqqaaq, Inuit Silarjuarmi Katimajingit Kanata
- Nancy Etok, Iksivautaq, Pauktuutit Inuit Arnait Kanatami
- Gary Anandasangaree, Minista Kuip-Nunaqaqqaaqsimajuliriniq
- Dan Vandal, Minista Ukiuqtaqtuliriniq Kanatami
- Patty Hajdu, Minista nunaqaqqaaqtuliriniq kanatami
- Arif Virani, minista Iqqaqtuiviliriniq amma Maligaliuqtimmarik Kanatami
- Mélanie Joly, Minista Silataaniirngaqtut
- Diane Lebouthillier, Minista Iqaluliriniq, Imarmiutaliriniq amma Kanatami Sikusiuqtinginnut
- Bill Blair, Minista Kanatami Sapujjijit
Pijjutaujut
- Inuit−Kuip Kiggatuqtingit Piliriqatigiinnikkut Katimajiralaangit (ICPC) katippattut pingasuaqtittutik arraagu iluani amma iksivautaqaqpattut Angijuqqaangani Inuit Tapiriit Kanatakkut (ITK) ammalu Minista Inuit−Kuip Nunaqaqqaaqsimalirinirmut. Atausiaqtutik arraagumi, Inuit−Kuip Kiggatuqtingit Piliriqatigiinnikkut Katimajiralaangita katimaninga iksivautaqaqattaqtuq Inuit Tapiriit Kanatami Angijuqqaangani amma Kanataup Sivuliqtimmaringani.
- Iipuru 21, 2022mi, Kanataup Sivuliqtimmaringa Justin Trudeau amma Angijuqqaat Natan Obed Inuit Tapiriit Kanatami−kut, ilaqaqtutik kanatami ministanginni amma niruaqtausimajunik Inuit sivuliqtinginni ukunanngaaqsimajut Inuvialuit Aviktumajunik Kuapurisakkut, Nunavut Tunngavit Timinga, Makivvik, amma Nunatsiavut Gavamakkunginni, angilauqtut pimmarialuujumik Inuit Nunangat Atuanganik katimaniqaqtillugit Inuit−Kuip Kiggatuqtingit Piliriqatigiinnikkut Katimajiralaangit.
- Inuit Nunanngat Atuagaq nalunaijaqsimajuq turaagaqarasuaqtutik sanajauninganut amma nutaannguqtitaugasuarninganut kanataup atuagangit, piliriangit, pijiqtirarnirmut, amma piliriarijaujumajut atuutiqarniarluti Inuit Nunanganut uvvaluunniit ikajuutiqarniarlutit Inunnut. Una turaarijaunasuttuq piusivaallitittiniaqtuq aulatauninganut Inuit Nunanga amma katititauqattarluti Inuit ukua piliriarijautillugit.
- Inuit−Kuip Kiggatuqtingit Piliriqatigiinnikkut Katimajiralaakkut sivulliqpauqujangit iluliqaqtut ukuninga Pivalliatittinirmik amma Niuviqattanirmik; Ilinniarniq, Ilinniariuqsanirmik amma Ajurunniiqsanirmik; Avatiliriniq amma Silaup Asijjipallianinga; Aanniaqarninangittuliriniq amma Qanuingittiaqujiniq; Angirraqanginniq, Illuliriniq, Makimajjutit; Nunarjuarmi Inuit Sivulliqpauqujaujut; Inuit Nunataarnirmut Atuliqtittiniq, Inuit Nunangani Atuagaliriniq, Inuktut Uqausirmik Makimatittiniq, Aqqiumatittiniq, Sapujjiniq amma Quvvassainiq; Maligalirinirmut Sivulliqpauqujat; Aaqigiarutiqarniq Asiujijaujullu amma Inuaqtausimajullu Nunaqaqqaaqsimajut Arnait amma Surusiillu; amma Kanataup Nunaqutinga, Sapujjiniq amma Nautiqsuutinut.
- Inuit Nunangat Inunnut nunagijaummat Kanatami. Iluliqaqtuq nunamik, imarmik, amma sikunik aviktusimaniujunik nunanik kiggaqtuilluni Inuvialuit Aviktusimajunik Nunaliit Nunatsiavummi, Nunavut, Nunavik Ukiuqtaqtungani Quebec, amma Nunatsiavut Ukiuqtaqtungani Labrador.
Aktuaniqaqtut Ikiaqqivimmi
- Inuit Nunangat Atuagaq
- Inuit Nunangat Suliniraruti Inuit-Kuip Kiggatuqtingit Piliriqatigiinnikkut
- Inuit-Kuip Pivallianirmut Tunngavvit
- Nunannguaq Inuit Nunangat
- Inunnut−Turaangajut Surusilirinirmut Titiqqait Nuatausimajut Uqausiksanut Paippaa