Uuttupiri 23, 2024
Ottawa – Inuit Tapiriit Kanatami upigusuujjivut Julie-Ann Berthe-mik, tunimatsuni pinasuarnilik ammalu uqausilirinirmik kiggatuqtiusuni Kuujjuamiungutsuni, ammalu saalaqaqsimajuq 2024 Ilitaqsijjutitaaqtittiningat Inuit Ajunngitsiaqtuuninginnivunnik.
Saalalik uqaqtaujuviniq ITK-kut arraagutamaat katimaningani Inuvimmi Siptimpiri 18, 2024-ngutillugu, tunijautsunilu Berthe-mut Ottawa-mi Uktuupirii 22-ngutillugu.
Berthe piaratsaliviniq tungalinganik piararmita pinasugaqtaarianngasuni Kativik Nunalilimaat Kavamangani piaralirijiunirmik pillukugialilirinirmik ikajuqtiunirmik – allatiutsuni, kiujiutsuni ammalu tusaajiusiqattasuni ikajuqsuni pinasuqatigiinik amisuunngitunik kamagijalinnik sitamanik piaralirivinni.
Arraaguit avati tallimallu naaliqtilugit, Berthe maanna tukimuattisijimut ikajuqtigijauliqtuq KRG-kut Nunalinni Naulimaani Pigujjinirmut Pinasuvvingani kamagijaqaqsuni piaralirivinganiittunik, kamagijaliit 19-nik piaralirivinnik 14-ni nunalinni. Pinasuqatingit ikajusuut ippigijaqaqsutik Nunavimmi piaralirivinnik attananngikaluarmangaata, iluqqusiqtigut naammanaatsiamangaata ammalu kamagijautsiamangaata pitaqaqtisitsutik qaujimajiunirmik kiinaujanut, pinasuttinut ammalu illujuanginnut, niqitsialirinirmut, qanuinngisiarnimut, salumatsianirmut, katimajingitta pinasuaqtanginnik ammalu piqujanik malittaugialinnik.
Angijummarik ammalu pimmariutsuni kamagijauninga kisiani niriusimanngituq saalaqarnisaminik taatsumunga.
“Sallujurilaujara taimaittunik allataalauqsimannginama. Quaqsaalaujunga,” uqaqtuq Berthe tusaqtitautsuni ITK-kkunut saalaqausiarmita mitsaanut. “Angajuqqaaqatsiasimajunga pirusaijuunnik uvannik ammalu qanutuinnaq pinasuarlunga ikajurlunga inuuqatikkanik”
Berthe ikajuqsimajuq pigumajauliqtisitsuni ammalu ikajuqsuni nuitauninginnut Nunavikmi piaraliriviit 2000-ngurataaqtilugu, Kupaikku nuitsijuviniutillugit akikilligiaqsimajunik, $5 ulluq atausiq pairijaugutinik. Taitsumani, pairiviit pitaqaqattasimanngitut Nunavimmiunut, kisiani sukattumik asijjijuviniq.
“Pigiannganingani pairiviit nutaangutillugit iluunnagalatik pairiviit inuqarningittut pijjutiqaqsutik uppirijaunningimmata manimajanginnik” uqaqtuq Berthe. “Arraagungani tungalingani, ilinniaviit pigiarmata, ilinniatitsijiit takujuviniit ajjigiinngininginnik piararmik pairivimmiituvinirmik ammalu uqaajaukattanialirmat. Inuit piararminik taavunngatutsaliusijuviniit.”
Maanna pijariatujuuliqtuq KRG-kkunut initaarumajut, uqaqtuq. Pinasuttitaarniq ammalu atatitsiniq ilinniariuqsatunik – taanna Bertheup pigasuaqtanga.
Pigumaliqtisiniq ilanga ammalu pinasuttiqarniq atatitsiniq ikajurlugit pinasuganginnut pivallirutitsanginnut ammalu pigiuqsatitauningit. Berthe taatsuminga atusuuq pivalliqutimik piviqaqtisigutimik ammalu 2019-mi pijariirutitaaqtuviniq pairitsivimmi kamajiunirmik Cégep de St-Félicien Kupaikkut nunangani.
Tallimanut anaanagijaujuq, anaanatsiangutsuni ammalu miqsutimmariutsuni, Berthe pigumaliqtisisuuq asiminik pinasugarmita silataagut. 2015-mi, upigilugit ilangit, nunalinga ammalu namminiq, nuqqatuviniq imirnimik ammalu supuurusijarnimik.
ITK-kut ilitaqsigutingit tunijausuut arraagu tamaat avatiit arraaguit aniguliqtut. 2023-mi, asijjiilaujugut ilitaqsinirmik inunnik nuitatitsijunik pitsianirmik ikajuqsijunik inuit namminiq aulatsigasuarninginnik.
“Upigusukkugut ilitaqsinirmik Julie-Ann Berthe-mik arraaguni pinasuarninganut Nunavimmiunut, pivalliniqarmijuq inulimaanik ammalu kanatamiulimaanik,” uqaqtuq ITK-kkut angajuqqaanga Natan Obed. “Tunimaninga pirursaininga piararnik ammalu sapummininga ilagiinik ikajuqsijut piruqtisinirmik suungujunik ammalu sapiliqqajanngitunik inuuqatigiinik, taanna tunngavinga pinasuaqtata.”
2024-mi saalalik nallikaaqtaulauqtuq ITK nallikaaqtinginnut katimajinut 50 ungataanit niruaqtaugasuttunit.
Tusaratsanit qaujisarviit:
Media@itk.ca