ᐊᑦᓱᕉᑎᒋᓕᖅᑕᕗᑦ ᐅᓪᓗᒥᐅᕙᓕᖅᑐᖅ

ᐃᖕᒥᓂᒃ−ᐃᓕᑕᕆᔭᐅᑎᑦᑎᕙᓐᓂᖅ ᖄᖐᑐᐃᓐᓇᒍᓐᓇᓯᒃᑲᐃᕙᒃᑐᖅ ᐊᑯᓂ ᐱᐅᓯᕆᔭᐅᓕᖅᑐᓂᒃ ᐃᓄᖕᓄᑦ, ᐊᑐᖅᑕᐅᕙᒃᑐᑐᖃᕐᓂᑦ ᑭᓇᒃᑰᓂᑦᑎᓐᓂᒃ ᓇᓗᓇᐃᔭᐃᖃᑦᑕᒍᓯᑦᑎᓐᓂᒃ. ᓄᓇᑖᕈᑎᖃᖅᑐᒍᑦ ᑲᓇᑕᐅᑉ ᒐᕙᒪᖓᒍᑦ, ᑎᒥᖁᑎᒋᔭᐅᔪᓪᓗ ᐊᑐᓕᖅᑎᑦᑎᔨᐅᕙᒃᐳᑦ ᓄᓇᑖᕈᑎᓪᓚᕆᒃᑎᓐᓂᒃ, ᑐᑭᓕᐅᖅᑎᐅᓱᑎᒃ ᑭᓇᒃᑰᓪᓚᕆᐅᓂᑦᑎᓐᓂᒃ, ᓇᓂᒥᐅᑕᓪᓚᕆᐅᓂᑦᑎᓐᓂᒃ ᐊᒻᒪᓗ ᐱᔪᓐᓇᐅᑎᖃᕈᑎᒋᔭᑦᑎᓐᓂᒃ ᑎᒍᒥᐊᖅᑕᑦᑎᓐᓂᒃ.

ᐃᖕᒥᒍᑦ ᑕᑯᑦᑎᐊᕐᓗᒋᑦ, ᐃᖕᒥᓃᓈᕐᓗᑎᒃ-ᐃᓕᑕᕆᔭᐅᔪᓐᓇᕐᓂᖏᑦ ᑐᑭᖃᓕᖅᑐᖅ ᓄᓇᖃᖅᑳᖅᓯᒪᔫᙱᑐᑦ ᐃᓅᒻᒪᕆᓂᕋᕈᓐᓇᖅᓯᑎᓪᓗᒋᑦ ᐊᔭᐅᕈᑕᐅᓗᑎᒡᓗ ᐃᖕᒥᓄᑦ ᖃᑭᕚᓪᓕᕈᑎᒃᓴᓄᑦ, ᐱᔪᓐᓇᕐᓂᖅᓴᐅᓂᐊᓕᕐᒪᑕ, ᐃᖅᑲᓇᐃᔮᒥᒍᑦ ᓯᕗᕙᕆᐊᕈᓐᓇᖅᓯᓗᑎᒃ ᐊᒻᒪᓗ ᐱᔪᓐᓇᕐᓂᖅᓴᐅᓕᖅᓱᑎᒃ ᑮᓇᐅᔭᓕᐅᕈᑎᒃᓴᓂᒃ. ᐃᑲᔪᖅᑕᐅᒍᓐᓇᕙᒃᑐᑦ ᐃᑲᔫᑎᒃᓴᓄᑦ ᐃᓄᓐᓄᐊᖕᒐᔪᓂᒃ, ᐃᓕᔭᐅᓯᒪᓂᑯᓂᑦ ᓱᕋᐃᒋᐊᕈᑎᐅᓗᑎᑦ ᐃᓄᐃᑦ ᐱᑦᓯᐊᑕᐅᓯᒪᙱᓂᖕᒋᓐᓂᑦ ᐊᒻᒪᓗ ᓇᕐᕈᓇᖅᑑᑎᑕᐅᓯᒪᓂᖕᒋᓐᓂᑦ ᑎᑭᑕᐅᓚᐅᖅᓯᒪᑎᓪᓗᒋᑦ ᖃᓪᓗᓈᓄᑦ.

ᑕᒪᐃᓐᓂ ᑕᑯᒋᐊᕐᓗᒋᓪᓕ, ᑕᒪᓐᓇ ᑐᑭᓕᒃ ᐊᑐᕐᓂᕐᓗᒃᑕᐅᖃᑦᑕᕈᓐᓇᕐᓂᖏᓐᓂᒃ ᐃᑲᔫᑎᒃᓴᓂᒃᑕᐅᓯᒪᔪᓂᑦ, ᐊᑐᐊᒐᐅᓕᖅᑐᓂᑦ, ᐋᖅᑭᐅᒪᓕᖅᑐᓂᑦ, ᒪᓕᒐᕐᓂᓪᓗ ᐃᓄᖕᓄᑦ ᐱᓇᓱᒃᑕᐅᓯᒪᓚᐅᖅᑐᓂᑦ ᐊᑯᓂᐊᓗᒃ ᐊᔾᔨᒌᙱᑑᑎᐅᔪᒃᑯᑦ ᒐᕙᒪᓕᒫᒃᑯᑦ. ᐱᒋᐊᖅᓱᑎᒃ 1970-ᖏᓐᓂ, ᐃᓄᐃᑦ ᐃᓕᓐᓂᐊᒋᐊᖃᓚᐅᖅᑐᑦ ᓄᑖᑦᓯᐊᒻᒪᕆᖕᒥᒃ ᐅᖃᐅᓯᕐᒥᒃ ᐊᒻᒪᓗ ᒐᕙᒪᐃᑦ ᐱᐅᓯᖏᓐᓂᒃ, ᐊᖑᒪᒋᐊᖃᖅᓱᑎᒃ ᐊᖏᖃᑎᒌᒐᓱᐊᕈᑕᐅᓂᖏᓐᓂᒃ ᒪᓕᒐᖃᕐᓂᖏᓐᓄᑦ ᑲᓇᑕᐅᑉ ᒐᕙᒪᖏᑦ ᑕᐃᒫᒃ ᓄᓇᑖᕈᓐᓇᖅᓯᓕᓵᕐᓂᐊᕋᒥᒃ, ᐱᓕᕆᐊᖑᔭᕆᐊᖃᓚᐅᖅᓯᒪᔪᓂᒃ 30 ᐅᖓᑖᒍᑦ ᐊᕐᕌᒍᓂᒃ. ᑎᒥᐅᕙᓕᖅᑐᑦ ᑕᒪᒃᑯᓂᖓ ᐱᓕᕆᖃᑕᐅᓚᐅᖅᓯᒪᒐᑎᒃ ᐊᒃᓱᕈᕐᓇᖅᑐᒃᑰᕈᑕᐅᓯᒪᕐᔪᐊᖅᑐᓂᒃ ᐃᓄᖕᓄᑦ ᓯᕗᒧᐊᑐᐃᓐᓇᕈᓐᓇᖅᓯᔪᑦ ᐊᑐᕐᓗᑎᒃ ᐃᑲᔫᑎᒃᓴᓂᒃ ᐊᑯᓂᐊᓗᒃ ᐱᓇᓱᒃᑕᐅᓚᐅᖅᓯᒪᔪᓂᒃ ᐃᓄᖕᓄᑦ.

ᑕᐱᕇᒃᑯᑦ ᑲᑎᒪᔨᖏᑦ ᑲᔪᓯᑎᑦᑎᓚᐅᖅᑐᑦ ᐱᖁᔨᕗᖔᕈᒻᒥᒃ ᑕᒫᓂ ᓯᑎᐱᕆ 2023-ᒥ ᓇᓗᓇᐃᔭᐃᑦᑎᐊᒃᑲᓐᓂᖅᑐᑎᒃ ᑕᐃᒃᑯᓂᖓ ᐃᖕᒥᓂᒃ ᑕᐃᕙᒃᑐᓂᒃ ᓄᓇᑐᖃᕗᑦ ᑲᑐᔾᔨᖃᑎᒌᖏᑦ ᐃᓄᓪᓚᕆᖕᓄᑦ ᑎᒥᖁᑎᒋᔭᐅᙱᓂᖏᓐᓂᒃ, ᐊᑎᓕᐅᖅᓯᒪᓂᖏᓪᓗ ᐃᓚᒋᔭᐅᔪᑦ ᑖᒃᑯᓄᖓ ᐊᔪᖅᓱᑎᒃ ᑎᒍᒥᐊᒋᐊᒥᒃ ᒪᓕᒐᕐᔪᐃᑦ ᐃᓗᓕᖏᓐᓃᑦᑐᓂᒃ 35-ᒥ ᐱᔪᓐᓇᐅᑎᖃᖅᑎᑦᓯᔪᓂᒃ, ᐃᓕᑕᕆᔭᐅᓯᒪᓇᑎᓗ ᑕᐱᕇᒃᑯᓐᓄᑦ. ᖄᖓᒍᓪᓗ, ᐃᓄᐃᑦ ᐊᖏᕈᑎᖃᙱᑐᑦ “ᐃᓄᐃᑦ” ᑐᑭᖓ ᐊᓯᔾᔨᖅᑐᖅᑕᐅᓂᖓᓂᑦ ᐅᕝᕙᓘᓐᓃᑦ ᑐᑭᓕᐅᑦᑎᐊᒃᑲᓐᓂᕈᑕᐅᓂᖓᓂᑦ ᐊᓯᖏᓐᓄᑦ. ᐃᓄᐃᑦ ᓄᓇᖓᑦ ᐊᑐᐊᒐᖓᒍᑦ, ᑎᑎᕋᖅᑕᐅᓚᐅᖅᑐᖅ ᑕᓪᓕᒪᑦ ᐊᕐᕌᒎᒃᑯᑦ ᑕᐃᒃᑯᓄᖓ ᐃᓄᐃᑦ-ᒐᕙᒪᑐᖃᒃᑯᓪᓗ ᐱᓇᓱᐊᖃᑎᒌᑦᓯᐊᓂᕐᒧᑦ ᑲᑎᒪᔨᕋᓛᖏᓐᓄᑦ, ᑐᑭᓯᓇᑦᑎᐊᖅᐳᑦ ᒪᓕᒐᐃᑦ ᒐᕙᒪᒃᑯᑦ ᒪᓕᒋᐊᖃᖅᑕᖏᑦ ᐊᖏᕈᑎᒋᓚᐅᖅᑕᖏᑦ.

ᒐᕙᒪᑐᖃᒃᑯᑦ ᐅᖃᖃᑎᖃᖏᓐᓇᕐᓂᖏᑦ ᓄᓇᑐᖃᕗᑦ ᑲᑐᔾᔨᖃᑎᒌᖏᓪᓗ ᓇᓗᓇᓯᒪᔪᖅ ᓱᓕᔪᖅᓴᖃᑦᑕᐅᑎᔪᓐᓃᑲᐃᓯᒪᑦᓱᓂᓗ, ᑲᑕᒃᑎᕆᓯᒪᓪᓗᓂᓗ ᐱᓇᓱᐊᖅᑕᐅᑦᑎᐊᖅᑑᒐᓗᐊᓂᒃ ᐱᐅᓯᒋᐊᕈᑎᒃᓴᓂᒃ ᐃᓄᐃᑦ ᐃᓅᓯᖏᓐᓂᒃ ᑮᓇᐅᔭᓕᐅᖃᑕᐅᔪᓐᓇᕐᓂᖏᓐᓂᓗ, ᑕᒪᐃᓐᓂᒃ ᐃᓄᐃᑦ ᓄᓇᖓᑕ ᐃᓗᐊᓂ ᐊᒻᒪᓗ ᓯᓚᑖᓃᑦᑐᓄᑦ.

ᐱᔫᒥᓴᐃᓕᖅᑐᒍᑦ ᑲᓇᑕᐅᑉ ᒐᕙᒪᒃᑯᖏᓐᓂᒃ, ᓇᖕᒥᓂᖅ ᐱᓕᕆᕝᕕᓕᖕᓂᒃ, ᐃᓕᓐᓂᐊᕐᕕᒡᔪᐊᕐᓂᒃ, ᐊᖏᖅᑎᐅᕙᒃᑐᓂᑦ ᑎᒥᖁᑎᓂᒃ ᑕᒪᐃᓐᓂᒡᓗ ᓄᓇᖃᖅᑳᖅᓯᒪᔪᓂᒃ ᐃᑲᔪᖅᑎᓂᒃ ᑐᑭᓯᐅᒪᑦᑎᐊᖁᓪᓗᒋᑦ ᐃᒃᐱᒍᓱᑦᑎᐊᕐᓗᑎᒡᓗ ᖃᓄᖅ ᐃᓄᐃᑦ ᐊᒻᒪᓗ ᓄᓇᖃᖅᑳᖅᓯᒪᔪᐃᑦ ᐃᓕᑕᕆᔭᐅᔾᔪᑎᖃᕐᒪᖔᑕ ᖃᓄᕐᓗ ᓇᖕᒥᓂᖅ ᑲᒪᒋᓂᖃᓲᖑᒻᒪᖔᑕ. ᐃᖕᒥᓃᓐᓇᖅ−ᐃᓕᑕᕆᔭᐅᑎᑦᑎᕙᖕᓂᖅ ᓈᒻᒪᖏᑦᑐᖅ ᑐᕌᓲᖑᓪᓗᓂᓗ ᐱᕋᔭᕐᓂᕐᒧᑦ. ᓄᓇᑖᕈᑎᓂᒃ ᐊᖏᕈᑎᓖᑦ — ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᑯᐊᐳᕇᓴᒃᑯᑦ, ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ, ᒪᑭᕝᕕᒃᑯᑦ ᐊᒻᒪᓗ ᓄᓇᑦᓯᐊᕗᑦ ᒐᕙᒪᖓᑦ — ᑖᒃᑯᐊᑐᐊᑦᑎᐊᖑᕗᑦ ᑎᒍᒥᐊᖅᑎᐅᔪᑦ ᒪᓕᒐᖅᑎᒍᑦ ᐱᔪᓐᓇᐅᑎᒥᒃ ᐃᓚᒋᔭᐅᑎᑦᑎᒍᓐᓇᕐᓂᒥᒃ ᑕᒪᐃᓐᓂᒃ ᐃᓄᓪᓚᕆᐅᓂᖏᓐᓄᑦ.

ᐆᒃᑑᑎᒃᓴᑦᑎᐊᕙᐅᕗᖅ ᐅᓇ ᑕᐱᕆᔭᐅᓂᖓ ᓴᔅᑳᑦᓱᐋᓐ ᓯᓚᑦᑐᓴᕐᕕᔾᔪᐊᖓ. ᑕᒫᓂ ᔫᓐ 2024-ᒥ, ᑕᐱᕇᒃᑯᑦ ᐊᑎᓕᐅᓚᐅᖅᑐᑦ ᑐᑭᓯᐅᒪᖃᑦᑕᐅᑎᓂᕐᒧᑦ ᐊᖏᕈᑎᒥᒃ ᓴᔅᑳᑦᓱᐋᓐ ᓯᓚᑦᑐᓴᕐᕕᔾᔪᐊᖓᓗ, ᓴᖅᑭᑎᑦᑎᓂᐊᕐᓂᕐᒥᒃ ᐊᖏᕈᑕᐅᕌᓂᒃᓯᒪᓕᖅᑐᓂᒃ ᓴᐳᓐᓂᐊᖅᑕᐅᔾᔪᑎᒃᓴᖏᓐᓂᒃ ᐃᓄᐃᑦ ᐱᔪᓐᓇᐅᑎᖏᑦ ᐊᒻᒪᓗ ᓯᓚᑦᑐᓴᖅᕕᔾᔪᐊᑉ ᓱᓕᔪᕆᔭᐅᔪᓐᓇᕐᓂᖏᑦ. ᑖᓐᓇ ᐊᖏᕈᑎ ᐋᖅᑭᐅᒪᑎᑦᑎᕗᖅ ᓴᔅᑳᑦᓱᐋᓐ ᓯᓚᑦᑐᓴᖅᕕᔾᔪᐊᖓᓂ ᓴᖅᑭᑎᑦᑎᓂᕐᒧᑦ ᑐᕌᒐᕆᔭᐅᓂᐊᖅᑐᓂᒃ ᐊᒻᒪᓗ ᐱᕋᔭᒌᒃᑯᑎᐅᓂᐊᖅᑐᓂᒃ ᑲᒪᒋᔭᐅᕙᖕᓂᖏᓐᓂ ᓇᓗᓇᐃᔭᐃᕙᖕᓂᕐᒧᑦ ᐊᑎᓕᐅᖅᑕᐅᓯᒪᓂᖏᑦ ᐃᓄᓪᓚᕇᑦ ᐆᒃᑐᕐᓂᖏᓐᓂ ᓄᓇᖃᖅᑳᖅᓯᒪᔪᓄᑦ-ᑐᕌᖓᓪᓗᑐᖅᑐᓂᒃ ᐱᕚᓪᓕᕈᑎᒃᓴᓂᒃ ᐃᖅᑲᓇᐃᔮᒃᓴᓂᒡᓗᓐᓃᑦ ᑐᓂᔭᐅᖃᑦᑕᕈᓐᓇᐅᑎᖏᓄᑦ ᑖᕙᓂ.

ᑖᓐᓇ ᑐᑭᓯᐅᒪᖃᑦᑕᐅᑎᓂᕐᒧᑦ ᐊᖏᖃᑎᒌᓐᓂᖅ ᓴᖅᑭᑎᑦᑎᕗᖅ ᓄᑖᒥᒃ ᐊᖅᑯᑎᒃᓴᒥᒃ ᐃᓚᒋᔭᐅᔪᓐᓇᕐᓂᖏᓐᓄᑦ ᐃᓄᐃᑦ, ᐆᒃᑑᑎᐅᑦᓱᓂᓗ ᑐᙵᓇᑦᑎᐊᖅᑐᓂᒃ ᐋᖅᑭᖃᑎᒌᑦᑎᐊᕈᓐᓇᕐᓂᕐᒧᑦ ᑐᕌᖓᔪᓂᒃ ᐱᓕᕆᖃᑎᒌᓂᑦ. ᓂᕆᐅᒃᑐᒍᑦ ᑖᑦᓱᒪ ᒪᓕᒃᑕᐅᕙᓪᓕᐊᔪᓐᓇᕐᓂᖓᓂᒃ ᓯᕗᓂᒃᓴᒥᑦ, ᐱᕋᔭᑦᑕᐅᒌᒃᑯᑎᖃᕐᒪᑕ ᐊᑐᕐᓂᕐᓗᒌᒃᑯᑕᓂᒡᓗ ᐊᑐᐃᓐᓇᐅᑎᑕᐅᔪᓂᒃ ᒫᓐᓇᐅᔪᖅ ᐊᑐᕐᓂᕐᓗᒃᑕᐅᓲᓂᒃ ᖁᔭᓈᖅᑕᐅᕙᒃᓱᑎ ᐃᓄᐃᑦ ᐊᒃᓱᕈᒃᓱᑎᒃ ᐱᔪᓐᓇᐅᑎᑖᕆᓯᒪᔭᖏᓐᓂᑦ ᑲᓇᑕᒥᐅᓄ ᐊᒻᒪᓗ ᑲᓇᑕᐅᑉ ᓯᓚᑦᑐᖅᓴᕐᕕᔾᔪᐊᖏᓐᓄ.

ᐃᓄᐃᑦ ᖃᐅᔨᒪᔪᑦ ᑭᓇᒃᑰᓂᕐᒥᓂᒃ, ᓇᓂᒥᐅᑕᐅᓂᕐᒥᓂᒃ, ᓇᒧᙵᐅᕙᓪᓕᐊᓂᕐᒥᓂᒡᓗ. ᐅᕙᒍᑦ ᓇᖕᒥᓂᖅ ᐊᖅᑯᓯᐅᖅᑎᐅᔭᕆᐊᖃᖅᑐᒍᑦ ᓯᕗᓂᓴᑦᑎᓐᓂᒃ, ᑲᓇᑕᒥᐅᓄᓪᓗ ᐃᒃᐱᒋᔭᐅᑦᑎᐊᕆᐊᖃᖅᓱᑎᒃ ᐅᒃᐱᒋᔭᐅᑦᑎᐊᓗᑎᓗ ᖃᐅᔨᒪᓂᕗᑦ ᑭᓇᐅᓂᑦᑎᓂᒃ.