June 3, 2025 – Ottawa, ON
Inuit Tapiriit Kanatami issumaaluutigijaminik uqausiqaqaujut Inuit ilautitaulaungininginnik Kanataup aviktuqsimaninginni Sivuliqtiit Katimaninginni Saskatunmi tamaani pinasuarusirmi. Pimarialuuvuq Inuit ilagijaujariaqarningit taimaatsainniq ilitarijaulutik ilagijauningit uqaussiuninginni Kanatami-sanavallianialirniq pigiaqtitauvallianiaqtunik maanaujuq, piluaqtumik pijjutiqarninginni sanginiqtaaqttitivalianiq kiinaujaliurviksattinnik ammalu aaqiumajauvalianingit ulurianariikutiksait taikkualu aulattijiuqataujut Ukiuataqturmi najugarijattinni, Inuit Nunaginni, nunagiinaqtattinnik naasagaksautiqangitunik arraaguni.
Kanataup Sivuliqtanga Mark Carneyiup Juun 2, 2025-mi uqasiksarijangit issuani katimaninginni pijjutiqaqtut makpiijumaniq “Ukiuqtaqtuup kiinaujaliurutaujunarningit ammalu uqaqauluni “Nunalituqait naliqqagijaulutik ammalu ilagijauningit pitaqariaqarmarikput kajussijunarniarutik tammakkua piliriaksait pigiaqtitaujumajut” uqariallaqaugilluni imaak, “qilamialuk tuaviarijaulutik piusigiarutiksait Kanatamik sappuniarutiksait aaqiumajarialiit.” Isumaalungnallariktuq tamaani 2025-miiliqtilluta, Gavamakkut Kanatami suli qanuiksangitut pillariniavalunngitunnik uqausiqarunarniq ilautitaungitsutik suli innilangainiarniraqtangit ilaginiarniraqssunigit.
Inuit upigivaa Kanatamiutaunirni, sivumullu niriuktugut piliriqatiqarumaniq Kanata ikajurlugu Ukiuqtaqtuup aulattijiqarninginnik ammalu sanginiqarutaujunnarninginnut Kanatami kiinaujaliurutaujunnaqtuni. Kanataup Ukiuqtaqtuqpassia sanavviussimanginniqpaangungmat aviktuqsimaninga nunarjuarmi assitinni Ukiuqtaqturmiutauqataujuni nunalingni, piviksalialuugaluaqssutik tamaani akuniuniaqtumut kiinaujaliurviksanik piruqtitijunarniq tamainut Kanatamiutaujunut piqataujunaqtunik.
Inuit nunalituqauninginnut, nunataarutiqaqsutik sappuniaqtaussimajunik Kanataup Tungavirjuanganut taikkualu Nunarjuarmiut Katujjiqatigiigjuanginni Nalunaijautingit maligait Pijunautiqarninginnut Nunalituqait ilitaqsisimalutik Inuit pivaliattitijunarninginnik ammalu ingminik-isumaliuqtiujunarninginnik, ITK-kut suli issumaaluutiqaqput Kanataup Gavamakut malikssimanginninginnik kamagijarialinginnik tukissiniarviqariaqarniq ammalu piliriqatiqariaqarniq Inungnik Atausirmik Kiinaujaliurviksaliittaijaujunik maliganginnik.
Quaqsaarnaqtukuurutaussimaningit tikitaulaurninginnut-iqaumajaujariaqaluaqtuq tamanna, ilangagut aulattijiussikautigilaurningit gavamakkut ingmiinaq isumaliuqtiuvakssutik- isulissamavut. Nutaanik pigiaqtitijariaqaliqtugut taimainulimaaq ikajurniqarunnaqtunik maanauliqtuq saimanikkut aaqqiiqatigiigassungnirmut ammalu aturninginnut Inuit-Kanataullu gavamakkut ilagiilirvinginginnik katimajiralaarnik. Sivummut taugugiaqaliqtugut ilagiijauluta sanginniqsamik piruiniarutta Kanatamik.