July 24, 2025—Inuvik, Nunatsiaq
Ullumi, Kanatami Angajuqqaarjuaq, Mark Carney, Inuit Tapiriit Kanatami Angajuqqaangat, Natan Obed, Gavamatuqakkut Ministangit, ammalu niruaqtausimajut Inuit sivuliqtiit Inuvialuit Aviktuqsimajuni Kuapuriisakkunni, Nunavut Tunngavik Timinga, Makivvik, ammalu Nunatsiavut Aavamanga katilauqtut katimatillugit Inuit−Gavamatuqakkut Pinasuaqatigiinninginnut Katimajiralaangit Inuvik, Nunatsiarmi.
Taimanngat atiliuqtaulauqtillugu Inuit Nunangat Angirutinga 2017-mi, Kanataup Gavamakkungit ammalu Inuit sivuliqtiit kajusisimainnaqtut katimaqattaqtutik pingasuaqtiqsutik arraagutamaat ammalu piliriqatigiinginnaqtut Inuit−Gavamatuqakkut Pinasuaqatigiinninginnut Katimajiralaatigut sivumuattitsinasuaqsutik taakkusainnaullutit sivulliujjaugumajunik, sanngiliqpaalliqtitaunasuaqsutik Inuit-Gavamatuqakkut pinasuaqatigiingningit, ammalu saqqitittinasuaqsutik makimatsiarniqsamik Inuit Nunangannik.
Ullumi katimatillugit, sivuliqtiit uqausiqaqqauvut Kanatami Illuliurnirmut Maligarjuarmik qanurlu atuliqtitaugunnarmangaat atuutiqatsiaqtumi malitsiarlunilu Inuit Maannalitait Angirutingit ammalu pinasuaqatiqarnikkut Inunnit.
Qaakkanniagut Kanatami Illuliurnirmut Maligarjuap, gavamatuqakkut ammalu Inuit sivuliqtingit uqausiqalauqtut piqutirjuani pitaqariaqarningani Inuit Nunanganni, Kanataup Ukiuqtaqtungata Kanataup Silataanut Atuagaq, sapummijaukkanniriaqarningillu attanaqtumiiqunagit aulatsigunnainnaqullugillu ukiuqtaqtumi ammalu Inuit Nunanganni. Sivuliqtiit nalunaiqsilauqtut pivitsaqarniujunik sanaqatigiigunnarnirmik kamagijaqarnirmik tamakkuninga ajuinnaarijaugiaqaqtunik ammalu saqqitsigumanirmik atuutiqatsiaqtumik kiinaujatigut makimatsiarutiqarumanirmik.
Inuuvimmi, Kanataup Angajuqqaarjuanga tusaqtitsilauqtuq tikkuaqtauninganik Virginia Mearns Kanataup Ukiuqtaqtungani Kiggaqtuqtiunialiqtilugu, pigiarluni September 15, 2025. Kiggaqtuqtiup tilijaujjutinga turaagaqarniaqtuq sanngiliqpaalliqtitsinirmik Kanataup Ukiuqtaqtunga ilauqatautsiaqattaqullugu taimaatsainna isumaqatigiittunik katujjiqatigiinik ammalu ajjigiinngittunik katimaviujunik, sanngiliqpaalliqtitsigiarluni Ukiuqtaqtumi aulatsiviqarnimi, sivumuattisinirmillu pivitsaqarniujunit attanaiqsimagiarnirmut piruqpallianirmullu.
Inuit sivuliqtiit ammalu gavamatuqakkut nalunaiqsigiakkannilauqtut katujjillutik angiqsimanirminik piliriqatigiinnikkut sivulliujjaujarialinnik Inuit−Gavamatuqakkut Pinasuaqatigiinninginnut Katimajiralaangitigut.
Uqausiusimajut
“Ullumi Inuit−Gavamatuqakkut Pinasuaqatigiinninginnut Katimajiralaat katimmaningat pijjutiqaqqaummat piruqtitsinasuarnirmik sivunitsatinni ammalu Inuit Nunangatta ilakuunngittunit kiinaujaliurutiqarunnarninganik. Pinasuaqatigiinnikkut, Inuit Gavamatuqakkullu angijuutinik piliriatsanik sananiaqtut kasuqtiriniaqtunik asijjiigutauniaqtunillu kiinaujaliurutiqarasuarnittinnik, saqqiilutillu makimatsiarniqsaunirmik pivissaqattiarniqsaulutillu, piruqpalliatiniqarluta sannginiqsaulirluni Kanata.”
— Maligaliuqtirjuaq Mark Carney, Kanataup Angijuqqaarjuanga
“Maanna 9-giliqtangani arraagungani, Inuit−Gavamatuqakkut Pinasuaqatigiinninginnut Katimajiralaangit suli aturiaqallarittut sivumuattitsinirmut taakkuasainnaullutik sivulliujjaujagumajunik. Tamanna ilaqaqtuq angilligiaqtitauluni kiinaujaqaqtitsinirmik Inuit Nunanganni atuliqtitsinikkut Kanatami Illuliurnirmut Maligarjuaq malitsiarluni Inuit angiqatigiigutinginnik ammalu katujjiqatiqarnikkut Inunnik. Piruqsailuta makimatsiarutitsanik Inuit Nunanganni ammalu Kanatalimaami ullumi quviasuutiqarmijugut Virginia Mearns Kanataup Ukiuqtaqtunganut Kiggatuqtiunialirninganik, iqqanaijaaq pivalliatitaulauqtuq Inuit−Gavamatuqakkut Pinasuaqatigiinninginnut Katimajiralaangitigut.”
— Natan Obed, Angajuqqaangat Inuit Tapiriit Kanatami
“Sannginiqsauniarutta qanuinnginiqsanik nunalinnik makimatsiaqtunillu kiinaujaliurutiqarunnaqulluta piliriqatigiigiaqaratta tamanna pijjutigillugu piliriat sivumuappalliajut Inuit nunanganni katujjiqatiqarniaqtut Inunnik. Angiqsimatsiaqtugut ilautitsiluta, naalagunnarluta, ammalu piliriqatiqarluta nunalinnit Inuillu sivuliqtinginnit sivulliutigumajangit takunnarusingillu ilautitautsiaqullugit pilirianguniaqtunut. Ullumi katimmaniujuq pimmaripujuq alluriarutauluni qaujimatsiariarutigilugu Kanatami Illuliurnirmut Maligarjuanga ikajuqtuigaluarmangaat sivunitsaqatsiarniqsauqullugit inulimaat inuit Nunanganni.”
— Minista Rebecca Alty, Minister of Crown-Indigenous Relations Minista Gavamatuqakkut-Nunaqaqqaaqsimajuit Piliriqatigiinninginnut
“Kanata angijuutinik piliriatsanik sanaqattarniaqtut katujjiqatiqatsiarlutik Inunnik ammalu tukimuagutiqarniaqtugut ajjigiittitsinirmik, ilaliujjinirmik ammalu makimatsiqatigiilluta. Uqaqatigiinnikkut katujjiqatigiinnikkullu Inuit nipingit aaqqitsuivalliangmata sivunitsatinnik piqutirjuanik, namminiqarnirmik ammalu kiinaujaliurutaujunnaqtunik Inuit Nunangannilimaaq.”
— Minista Rebecca Chartrand, Minista Ukiuqtaqtumut Ukiuqtaqtumilu Pilirijinut ammalu Minista Kamagijalik Kanatami Ukiuqtaqtumi Kiinaujaliurutiqarasuarnirmut Pilirivinganut
“Kanata Ukiuqtaqtumiiqataungmat, pimmariujumiilirattalu, pimmariuliqtillugu saputisimajariaqarattigut namminirijavut ammalu saputisimalugit Ukiuqtaqtumi pijumajavut. Pijitsiqtiulluni Kanatami Ukiuqtaqtumi angijuqqautiulluni, Kiggaqtuqti Mearns sivumuattitsiniaqtuq Kanataup Ukiuqtaqtungata pijumajanginnik ajjigiinngittunut katimaniujunut, piliriqatiqarluni Ukiuqtaqtumiutarnik ammalu Ukiuqtaqtumiutaunngittunik ammalu kiggaqtuijiuluni gavamalirijiqutittinni.”
— Minista Anita Anand, Minista Kanataup Silataani Piliriangujunut
Sulijuqutingit
- Inuit Nunangat Inuit nunaqarvituqarijanga Kanatami. Iluliqaqtuq nunamik, imarmik, sikumillu sitamanik angiqatigiigutikkut avittuqsimaniujunik kiggaqtuqtaullutik Inuvialuit Nunataarvigijanginnut Nunatsiarmi, Nunavut, Nunavik Quebec Uangnangani, ammalu Nunatsiavut Labrador Uangnangani.
- Kanatami Illuliurnirmut Maligarjuaq nalunaiqsivuq uqaqatiqarniq Inunnit asinginnillu Nunaqaqqaaqsimajunit sanajausimangmat atuliqtitauninganut nalunaiqsinirmut piliriatsait Kanatami pijumigijaungmangaata ammalu pivalliatitauninginnut qanuilinganitsangit ilaqariaqaqtut pijunnautinit angiqtaujjutinillu.
- Kanatami Illuliurnirmut Maligarjuaq sunaugijaqatsiaqtuq angirutitigut pijunnautinik, piqasiutilugit Ullumiuliqtuq Angiqatigiigutiit Inuit angiqatigiigutikkut timiqutinginnit. Asijjiinngilaq iliqqusiuvattunik aaqqittausimajunik maannalitarnut angirutinut uvvaluunniit Kanataup Gavamakkungita maannalitarnut angirutinut angirutigisimajanginnut. Sunaugijaqattiarmijuq angiqatigiigutitigut avatilirinirmut qaujisarnirmut atuqtauvattunik.
- Kanatami nutaangujuq Ukiuqtaqtumi Kiggaqtuqtiujuq, Virginia Mearns, sunagijautsiaqtuq Inunnut sivuliqtiujuq akunialuk pinasuagaqaqsimalluni sivumuaktitsinirmik Inuit namminiqsulirunnarninginnik ammalu nunaliit qanuinngitsiariarutinginnit Nunavummi. Maanna angajuqqaangujuq Tukimuattitsijiulluni Inunnuungajunut Piliriagujuni Qikiqtani Inuit Katujjiqatigiinginni ammalu angijuqqautini iqqanaijaaqaqattaqsimalluni Nunavut Gavamakkunginni ammalu Nunavut Tunngavikkunni. Ilagijautsiaqtuni nunalingani, tunijaulauqtuq King Charles III Coronation Ilitarijaujjutimik piliritsiaqsimaninganut.
- Taimanngat atiliuqtaulauqtillugu Inuit Nunangannut Angirutinga 2017-mi, Inuit sivuliqtingit ammalu Kanataup gavamakkungit kajusisimainnaqtut piliriqatigiinnirmit aqqutigillugit Inuit−Gavamatuqakkut Pinasuaqatigiinninginnut Katimajiralaangit nutaaruriaqtauqullugu Inuit-Gavamatuqakkut piliriqatigiinningit tunngaviqarlutik ilitarijausimaninginnut pijunnautiit, sunagijaqatsiarniq, ammalu ikajuqtigiinniq.
- Inuit Nunangannut Atuagaq pivaallirutauvuq Inuit namminiq aulatsigunnarninginnit ikajuqtuillunilu nunalinnit immikkullu inuusiqatsiarnirmit Inuit Nunangalimaanganit, turaagaqaqsutik inuuqatigiittuni-kiinaujaliurasuarnirmit nalimugiititsinirmit Inunnit asilimaanginnillu Inunnit Nunaqaqtunit Kanatami. Pitaqaqtitsijuq mikilaangujumik malittaujarialimmik qanuq niriugijaujunnarmangaata piliriqatigiinninginnit Inuit ammalu tamainnik gavamatuqakkut pilirivingit timiqutingillu, ammalu tukimuagutitsaqaqtuni gavamatuqakkut pilirivinginnut timiqutinginnullu qanuq kajusititsigiaqarmangaata pilirianik, atuagarnik, pijitsirutinillu Inuit Nunanganni.