September 19, 2025
IQALUTTUUTTIAQ – Diana Neill-Anawak tunirrusiaqtaaqtuq 2025−mi Inuit Ajunngiattiaqtuuninginnut Ilisarijaujjutimik tunijauvattut arraagutamaaq Inuit Tapiriit Kanatami-kkunnut. Neill-Anawak uqariuqsatittivattuq quaqsaanaqtukkuuqsimaniqaqtunik amma qarasakkut-ajjigiinngittunik−tukisiumajunik, iliqqusirmuungajumillu uqariuqsatittijiulluni, ilaqaqtuni najjianngullutit Imialummut Attuqtaunikunit Akaungiliurutiqaqtunik (FASD) amma Inuktut qaujisarutiit Nunavummi amma Nunatsiamillu.
ITK Angijuqqaanga Natan Obed tunisilauqtuq tunirrusiarmik katujjiqatigiit arraagutamaaqsiutimik katimaniqaqtillugit Iqaluttuuttiami ippassaq.
“ITK Tunirrusiat ilisaqsivattut inunnik piusigiaqtittijumajunik Inuit inuusinginnik,” uqalauqtuq Obed. “una piliriarivattavut qujalijjutigivattavut inunnut iqqanaijaarijumajaminik aqqutiksaliuqtunik amma asijjiivalliajunillu pinasuagarijaminik kamattiarnikkut, pijumaniqattiarnikkut ammalu angiqsimattiarnikkut inuqutittinnut. Taassumunga ilisarijaujjutimut qujannamiiqpavut Diana pijittirarninganut, piqasiutillugu tautugarijanga najjianngullutit FASD-qaqtut ammalu Inuktut.”
Neill-Anawak, nunaqaqtuq Yellowknife-mi amma Qikiqtaalummiutassaujaulluni Nunavummi, pigialauqtuq qaujisaqtiunirmut nalunaiqtaujjutitaarasunnirmut Edmonton-mik, ilinniaqtuq uqariuksatittinirmik/ikajuqti amma Inuktut ilagijaulluni surusiit uqausinginni pivalliatirtinirmut.
ITK Tunirrusiat tunijauqattaqsimajut arraagutamaaq arraagut 20 ungataani. 2023−mi, piliriangujuq angilligiaqtaulauqtuq kinatuinnat niruagaksannguqtittijunnaqullugu Inummik pilirittiaqsimajumik. 2025-mi tunirrusiaksamut piliriaq 64-nik niruagaksannguqtitaujunik pilauqtuq. Taikkua tunijauqattaqsimajut ilisarijausimajut ikajuqtuinasuqattaqsimaninginnut inuusuttunik, arnanik, uqausilirinirmik amma iliqqusirmik, aanniaqtulirinirmik, innatuqarnik, iliqqusirnik utiqtittinasunnirmik, Inuit qaujimajatuqanginnik, ammalu akiliqsuqtaugatik ikajuqattarninginnut.
Arraani tunirrusiaqtaaqtitaulauqtuq Julie-Ann Berthe, paivimmi piliriji amma uqausiliriji Kuujjuarmiutaq, Nunavimmi, amma 2023−mi tunirrusiaqtaalauqtuq Julie Dicker, sivulliqpaangulluni Inuk Ilinniavimmi Ajuqqaaqtaarijaulauqtuq Nain, Nunatsiavummi, ammalu ilisaijumattiaqtunik Inuktut uqausingani amma iqailisarnirmut.
Neill-Anawak tunisijaulaaqtuq kiinaujanik ammaluttauq ingirrajutiksanut amma tujurmijjutiksanut Tapiriit 2026−mut.
Tukisigiakkannirumaguvit
Media@itk.ca