July 24, 2025 — Inuvik, Nunatsiaq
Inuit Tapiriit Kanatami tunngasuttitsijut tikkuaqtauninganik Kanataup Ukiuqtaqtumut Kiggaqtuqtinga, Virginia Mearns, uqausilluni Kanataup Angijuqqaanganut Mark Carney-mut katimatillugit Inuit-Gavamatuqakkut Pinasuaqatigiinnirmut Katimajiralaangit Inuvik, Nunatsiarmi, ippatsaulauqtuq.
Ukiuqtaqtumut Kiggaqtuqti piliriatsanga pimmariuvuq ilagijaulluni gavamakkut Ukiuqtaqtumi Kanataup Silataanuungajunut Atuaganganut, pigiaqtitaulauqtuq December 2024. Inuit Tapiriit Kanatami niriupput piliriqatiqarniarnirminik Kiggaqtuqti Mearns-mik ikajurniarmata pimmariujunik uqaqatigiinniujunik Ukiuqtaqtumi attanaiqsimanirmut aulatsinirmullu, kiinaujatigut makigiaqtitsinikkut, sailiqatigiinnirmut asinginnullu Inuit sivulliujjauqujanginnut.
“Virginia-p qaujimaninga ammalu pilirisimaninga tikkuaratsatsiangugutigivaa,” uqaqtuq Natan Obed, Angajuqqaangat Inuit Tapiriit Kanatami inangiimakainnaqtunilu Inuit Ukiuqtaqtumiutauqatigiit Katimajinginnut Kanatami. “Ukiuqtaqtumut Kiggaqtuulluni, iniqarviqatsiaqtuq ikajurunnarluni asinginnik nunalirjuanik tukisiumaqullugit qanuq Kanata tigumiarninganik aulatsinirminik, piliriqatiqarnirminik Inunnik ammalu asinginnik Nunaqaqqaaqsimajunik Ukiuqtaqtumi nunaqaqtunik.”
Mearns, Inuk Nunavummiutaulluni, maannarataangulauqtuq iqqanaijaaqalauqtuq Puqtuniqsani Tukimuattitsijiunirmut Inunnik Piliriqatiqarnirmut Qikiqtani Inuit Katujjiqatigiikkunginni. Aulatsijiuqattaqsimammijuq Nunavut Tunngavikkunni ammalu Nunavut Gavamakkunginni.
Inuit Tapiriit Kanatami, piqataullugit Inuit Nunamik Angiqatigiigutingitta Timiqutingit ammalu Inuit Ukiuqtaqtumiutauqatigiit Katimajingit Kanatami, pimmariujumik piliriqataulauqtut katujjillutik pivalliatitsinirmik Ukiuqtaqtumi Kanataup Silataanuungajunut Atuaganganik. Inuit sivuliqtiit niriupput piliriqatiqatsiarniarnirminik Kanataup Gavamakkunginnik atuliqtitautsiaqullugu atuagaq.
Kanataup Ukiuqtaqtumi aulatsininga tunngaviqaqtuq Inuit nunamik aturninginnut ammalu nunaqarninginnut. Ukiuqtaqtuq kinaugutigillarimmagu Kanataup kinauninganut, makimatsiarninganut ammalu attanaiqsimagiarnirmut. Inuit Nunangat anginiqpaujuq Kanataup Ukiuqtaqtunganit, anginiqaqtuni 40 pusantingani Kanataup nunangata ammalu atangiqtugu Ukiuqtaqtumi sijjangata.