September 20, 2024 — Inuvik, Inuvialuit Nunangat
Inuit Tapiriit Kanatami Katinngajingit katinngalaujut September 17 pinasuaqatigiinniasutik angiqatigiilauqtut pinngutitsiqatigiilaarlutik Katinngajinut Angiqtausimajumik kamagijaqaqatigiinnialutik Kavamatuqakkuni Inuit Piarait Pigujjaugutitsanginnik. Inuit Piarait Pigujjaugutingit nuititaugianngalaujujut 2018-ngutillugu Inunnik pigujjigutiuniaqtilugu ajjigijauluni Jordan Principal-mut. Taakkua pinngutitsiqatigiinniatut nutaanik pinasuariatsialutik Inuit piarait ilagiillu kinnguumagijanginnik pinasuarlutik sivuliqtilugu Inuit Tapiriit Kanatami pinasuaqatiqarluni Inuit Timiqutinginnik Angiqatigiigutilinnik ammalu Nunalituqarnik Pigujjivimmik Kanatami.
Katinngajiit angirutiqalaurmijut Inuit Timiqutingit kiinaujaqaqtitaulaaqtilugit $59 milian ungataanut nutaani kiinaujaqaqtisigutini kavamatuqakkut Maqaittinik Kiinaujaqaqtisigutingigut Nunalinnik Niqiqaqtisigutingigut. Taakkua pinasuaqtisigutiit pivaallititsigiarutiugasuaqtut ikajurutiulutik nunalinnik Inuit Nunanginni niqiqatsiatitsinirmik sapumminikkut nunalinnik maqaigunnaqattaniaqtilugit niqitsasiurlutillu niqituinnanik.
Inuit Tapiriit Kanatami Arraagutamaaqsiutiminik Katimaniqaqtilugit September 18, katinngajuniittut nirualauqtut asijjituigutiuniaqtunik akuniuniqpaaq Inuktitut Qimirruagalianganik. Taakkua nutausiliqtaunirilaaqtangani ilaqalaaqqut atinga asitjitaulunik Inuktut Qimirruagarmut, malilirlunik taiguusimik Inuit uqausilimaanginnut Kanatami. 2024 qimirruagaliurnirisuuttinut 65-ngugutiuliqtuq.
Katinngajuniittut tusaqtitaulaurmijut qaujisarutiusimajunik Inuit Nunanginni Imatuinnaqarnimik Pinasuaqatiutillugit Kanatami pitsanguriallagunnatulirijiit. Mitsausaqtausimajut sivunirmi imatuinnaqarajarnimut Inuit Nunanganni atuinnausautigilaaliqtut arraaguni 30-ni qaujisaqtausimajunik, Inuit sivunirmi qaujimagutigigunnarajaqtangit imaqariaqarnimik pimmariujuni inini, iqalliaviusuuni imiqtaviusuunillu.
Inuit Tapiriit Kanatami nuitsirataalaurmijut Arraagutamaat Unikkaaliaminik 2023-2024 kiinaujaqturutigisimajangit nuitatsutik pinasuaqattalauqtanginnilu arraani pivalliasimajunillu Inuit-Kavamatuqakkut Pinasuaqatigiirnirmut Katimajiralaanginnik.
Inuit Tapiriit Kanatami 2025-mi arraagutamaaqsiutinga atuutilaalirmijuq Iqaluttuuttiaq, Nunavummit.