March 20, 2026 — Ottawa, Ontario
Inuit Tapiriit Kanatami Katimajingit angirutiqalauqtut Inuit Nunanganni Ajuqsaluattailimatitsinirmut Parnautimik katimatillugit Ottawami tavvani pinasuarusittinni. Taanna Pannasimatsiariaruti angirutausimajuq Inuit Tapiriit Kanatamikkut Upalungaijautinut Parnagutingani ammalu tunngaviqaqtuni Inuit pinnarijanginnik ammalu aulataulluni tautunnguaqatigiigutaujumut nungutitsinasuarnirmut ajuqsaluarnirmik Inuit Nunanganni. Upalungaijarutauniaqtuq kikkutuinnarnut saqqitauniarluni taqqini amisuunngittuni aggiqtuni.
Katimajiit angirutiqalaurmijut tukimuagutitsanik gavamatuqakkunni kaillutuiniarnirmut nuititauvallianinganut nutaangulluni, nalunairutitsalinnit tunngaviqaqtuni niqitsaqatsiariaqanirmut piliriatsamik Inuit kinnguumagijanginni. Taanna Inunnut−sivuliqtaulluni pinasuarniarnirmut Parnasimauti tutsirautiqaqtuq inangiqtauqullugu Niqitsiavaliriniq Ukiuqtaqtumi Kanatami Pilirianguninga malitsiarluni Inuit Nunangatta Atuaganganik ippigusuttiarlunilu Inuit namminiqsurunnarninginnik.
Ilagilluniuk uqaqatigiigutaujut Ukiuqtaqtumi nautsiturnirmi, namminiqsurunnarniq ammalu sapummigiarnirmut, maligaliuqtiit ilitaqsilauqtut Inuit pivaallirutitsaqaqtutsauninginni unuqsigiaqtauninginnut sapumminirmut kiinaujaqaqtitaugutingigut, piqasiutilugit marruilingajunik atuqtaujunnaqtunik piqutirjuanik. Nalunaiqsilaurmijut ilautsiariaqarninginnik aaqqitsuitillugit Kanataup sapummijaujjutinginnik ammalu nautsiturnirmut sunakkutaaqariaqarninga Ukiuqtaqtumi, ikajuqtuitsiarniqsaulutik Kanatami unalitsajanik angilligiaqtitsilutik Kanatami unalitsajait nuitanirivattangani Inuit Nunangannilimaaq..
Uqausiqalauqtut kajusiinnaqtumik piliriaqarnirmik Kanataup Angajuqqaarjuangani katimatitsiqujillutik Inunnut turaanganilinnit Gavamatuqakkut Aggutuqsimajuillu Gavamangita Sivuliqtingillu (IFMM) piqataugajarlutit Kanatami sivuliqtiit, isumagillugit Inuit Nunangat ilaliujjisimammat marruunnik avittuqsimajuunnik puvaaransiinnik ammalu marruunnik ukiuqtaqtuup avittuqsimajuunnik ammalu Inuit nunaqarninginnut namituinnaq Kanatami. Saqqiigajaqtuq nutaamik ijjuaratsamik Inuit-Gavamatuqakkut-Avittuqsimajuni piliriqatigiinniujumi malittumik Inuit aulatsigusinginnit ammalu Inuit piliriqatauninginnik Kanataup maligaliurvirjuangani.
Angirutiqalauqtut sanngiliqpaallititsigumallutik Inuit−Gavamatuqakkut Pinasuaqatigiinninginnut Katimajiralaarni saanngaviqarniqsaulutit sivulliutijaugumajunit ingirrajjutaujunnaqtunik tukiqattiaqtunik kiinaujaqaqtitsinirmi Inuit Nunanganni. Taanna ijjuaratsaq sanngiliqtitsikkanniqtuq pimmariuninganik Inuit−gavamatuqakkut Pinasuaqatigiinningita Katimajiralaangit piliriarijangitta kiutsautigigunnaqullugit ammalu saqqittiqattaqullugit kinguvaqsimanngittunik ammalu atuutiqatsiaqtunit.
Uqausiqalaurmijut pilirianguinnarninganit nuititsinasuarniq Kanatalimaami Inuit Kinauninginnut Nalunaikkutarmik aulataujumik Inunnut ikajuutaugajaqtumik Inunnut pijitsirautinik manimmijaujunit gavamatuqakkunnut, avittuqsimajuni/ukiuqtaqtumi avittuqsimajuni, nunalinni gavamaujuni ammalu nunarjualimaami.
Kingullirpaarilugu, Katimajiit tunngasuttitsilaurtut nutaanguniqpaamik katimajiuqataulirtumik, Inuvialuit Avittursimaningani Kuapuriisakkunnut Itsivautarijiqtanga ammalu Aulatsijimmarik, Erwin Elias, niruartaulaurtuq nutaamut pinasuarutiginialiqtaminut Januarymi.