September 19, 2025 — Iqaluttuuttiaq, Nunavut
Inuit Tapiriit Kanatami katimatittilauqtut Katimajinginni Iqaluttuuttiarmi September 17−mi, Arraagutamaaqsiuti Katimaniqaqtuni September 18−mi, Katimajiit amma Katimajaqtursimajullu nutaaruriaqtittilauqtut angiqsimanirminik Inuit pijunnautinginnik ammalu namminiqsurunnaninginni katujjillutik sivulliujjauqujaujunik.
Katimajiit nutaanguriaqsimajunik tusaqtitaulauqtut Inuit Nunangani Ilinniavimmarialuup pivallianingani, pivallianirijaujunik attuaniqaqtut sivuniksami aulattijjutiksanit, pinasuarniujut saqqittinasuarnirmut maligarnik, ilinniarutiksanik ammalu kingullirmi qanuiliuqtaujariaqarniaqtunik pigiaqtitaunasunningani ilinniavimmarialuk 2030-mi.
Katimajiit uqausiqalaurmijut Niqittiavalirinirmik Ukiuqtaqtumi Kanatami, nalunaiqsillutik ajauqtuiniq kajusiinnariaqarningani piliriangujut takuksauttiaqullugit piliriaqaqtillugit tukimuagutauniaqtunik sivuniksami aaqqigiaqtauqullugit piliriangujut tunngaviqaqullugit Inuit aaqqigutiksanginnik tukiqattiaqtumik kamagijaqarniaqtunik niqiqattiaqattanginnirmik Inuit Nunanganni.
Katimajiit sanivvailauqtut $13.58 million-nik Inuusuttut Isumalirinirmut Kiinaujaqutinginni Inuit Angiqatigiigutigut Katujjiqatigiinut tisamanut arraagunut atuqtauniaqtunik tavvuuna ITK kiinaujat sanivvaqtaujjutinginni.
AGM-mi Katimajaqtuqsimajut tusalauqtut qanuilingalirningani atuliqtitaunasuttuq Maligaq Ippigusuttiarniqaqtuq Iqqiliit, Inuit ammalu Allangajut Surusinginni, Inuusuttunik ammalu Ilagiinik amma ikajuqtuijjutaunasuttut inunnik pijunnarnirijaminik surusirnut ammalu ilagiinut pijittirarutiujut. Katimajaqtuqsimajut ilisaqsilaurmijut Qanuippitaa?-mik Kanatalimaami Inuit Aanniaqarnangittulirinirmut Qaujisarniq pimmariujumik nalunaiqtaujuq tamatumani arraaguumi tukisigiarutiksanut nuattinirmit Inuit Nunangani sivulliqpaangulluni qaujisarniujuq pijariiqtaulauqtuq.
September 18 arraagutamaaqsiummi, ITK tunirrusiaqtaaqtittilauqtut Diana Neill-Anawakmi, uqausiliriji/ikajuqti Nunavummiutaq, 2025−mi Inuit Ajunngiattiaqtuuninginnut Ilisarijaujjutimik.
ITK saqqissilauqtut 2024-2025 Arraagutamaaqsiummut Unikkaangani iluliqaqtuni katujjiqatigiit 2024-2025−mi kiinaujalirinirmut unikkaanginni ammaluttauq pijjutiqaluaqtuni ITK upalungaijautinginnut piliriarisimajat arraaguulauqtumi ammalu pivalliasimaningit aqqutigillugit Inuit Katujjiqatigiit Katimajiralaangit.
ITK 2026−mi Arraagutamaat Katimaninga Kuujjuamiilaaqtut, Nunavimmi.