June 9, 2026 — Ottawa, Ontario
Inuit Tapiriit Kanatami ullumi saqqiivuq Inuit Nunanganni Ajuqsaluannginiqsautittigiarnirmut Upalungaijautimik, Inunnut sivuliqtaulluni aqqutiksaq ajuqsaluannginiqsautittigiarnirmut, sanngiliqpaalliqullugu namminiq aulatsijunnarniq, ammalu nuqqatillugulu akuniuluaqtumi inuusilirinirmut kiinaujaliurutiqarasuarnirmullu angummatinngijjutauqaqtaqsimajut akurnganni Inuit Nunaqaqqaaqsimajutsajaunngittullu Kanatamiutait.
Upalungaijauti tusaumagutiqalauqtuq arraagugasangnut piliriqatiqaqattalaurninginnut inunnit Inuit Nunangannilimaaq. Taimaitillugu akituluaqtailimaniq nalunaiqsijjutaulirmat Kanatami pijjutaujunik Kanatamiunut. Illumiuqatigiit Kanatalimaami ikpigusuktillugit akittuqpalliajunik, Inuit Nunangat sivulliqpaunginnaqpuq Kanatami akituluanngittunik akitujunik, inuunasuarnirmut akitujualuutillugit, illuit inugialuarninginnut, niqiqattiannginninginnut, piqutirjuat amigarninginnut, ammalu avviarutauqattarninginnut kiinaujaliurutiqarasuarnirmut ajuqsarniq Kanatami quttingniqsammariungmat.
Tusaumatitsigiarutaulluni tamatuma pinasuaqtauningani, Inuit Tapiriit Kanatamikkut nuititsisimajut Inuit Nunanganni Niurrutiksanut Uutturauti (English only), sivulliqpaangujuq ajuqsaluarnirmut nalunaiqsigutaugunnaqtuq aaqqittausimalluni pijjutiqallariktuni Inuit Nunanganniittunut.
Inuit Tapiriit Kanatamikkut nuitiksisimangmijut Niqittiavaqarnirmut Ukiuqtaqtumi Kanatami Pilirijjutiksaq (English only), Inunnut sivuliqtaujunit piqujivungaarutitsaqaqtuni qanuq asijjiqsigutaugunnarmangaat gavamatuqakkunnut aulataujumik.
June 9, 2026 — Ottawa, Ontario —Inuit Tapiriit Kanatami ullumi saqqititsivut Inuit Nunanganni Ajuqsaluannginiqsautittigiarnirmut Upalungaijautimik, Inunnut sivuliqtaulluni aqqutiksaq ajuqsaluaqtailimanirmut, sanngiliqpaalliqullugu Inuit namminiqsurunnarningit, nuqqatillugulu akuniuluaqtumi inuusilirinirmut kiinaujaliurutiqarasuarnirmullu angummatinngijjutauqaqtaqsimajut akurnganni Inuit Nunaqaqqaaqsimajutsajaunngittullu Kanatamiutait.
Ilagilluniuk tamatuma pilirianguningata, Inuit Tapiriit Kanatami tutsiraqtut qanuqtuurutiksanik piusivaalliqullugit Inuit piqatauningit kiinaujatigut makimagasuarnikkut, kamagilugit akitujualuit inuunasuarnirmut Inuit Nunangani ammalu naammattukkut kiinaujaqaqtitsilutik inunnik tunngaviqaqtunik inulirinirmik. Makuninga ilaqaqtut:
- Kiinaujjassaangitigut−qaujisaqtausimalutit utiqtuksatigut utiqtittiviujunnaqtut kiinaujjassaluanngittunut nunaqaqtunut Inuit Nunanganni. qitianiittut taaksiijaijalauqtillugit kiinaujalingit Inuit aviktuqsimajuni $32,000 takunnaqtugit $100,000 Inutuinnaunngittut Inuit Nunanganni.
- Asijjiqtauluni niqittiavanut ukiuqtaqtumi akikilligiaruti (NNC) pijunnaqtittiqullugu asijjiqtarunnaqtunik, turaangallariktunik kiinaujatigut ikajuqsuijjutinik pijunnarniqtaaqtittijjutauniaqtunik inunnut ilagiinullu, ammaluttauq qanuqtuurutiksanik turaangallariktunik niqiit akinginnut, piqasiutillugu aaqqiksuqtaukkanniqsimajuq niqinut ikajuuti.
- Pijariiqsilutik akuniujukkut piliriaksamik tauqsiigutauniaqtumik a Inuit Nutaqqanit Sivulliutitsiniq (CFI) piliriangulaukaktumik sivurngasigiarutauluni Inuit nutaqqat itirviqarunnatsiqallugit taimaatsainnaq piviqaqtitauvanningita asingititut nutarait Kanatami.
Inuit Nunanganni Ajuqsaluannginiqsautittigiarnirmut Upalungaijauti tusaumagutiqalauqtuq arraagugasangnut piliriqatiqaqattalaurninginnut Inunnit Inuit Nunangannilimaaq. Taimaitillugu akituluanngittut nalunaiqsijjutauliqtillugit kanatalimaami pijjutaujunik. Inuit Inuit Nunanganniittut ajjigiinngittukkut attuqtauniqaqtut akituluanngittunut tamainnik aviktuqsimajuni ammalu Kanatami. Inuunasuarnirmut akitujualuuningit, illuit inugialuarningit, niqiqattianginningit, piqutirjuat amigarningit, ammalu kiinaujaliurutiqarasuarnirmut avviarutaujut suli ajuqsarutauvalliatuinnarmata Kanatalimaami.
2023-mi, 41 pusantingit ilagiit Inuit Nunanganni kiinaujjaksalauqtut ajuqsarniup kiglingata ataani, Kanatamiunut tamainni 11.1 pusantiulauqtut. Nutaaq sanarrutiujuq, Inuit Nunanganni Niurrutiksanut Uutturauti, saqqitaulauqtuq atauttikkut Upalungaijautimut, aaqqittaulauqtuq uutturarutaulluni sulijumik ajuqsarniujumik Inuit Nunanganni.
“Inunnut, inuusiqarniq ajuqsangilluni tukiqaqpuq pijariaqallarittavut tikiutijauvallutit, nunalivut sannginiqarlutit, ammalu inuqutivut pijunnarniqaqtitaulutit namminiq tukitaarunnaqattarluta sivuniksariniaqtatinnik,” uqaqtuq Natan Obed, Angajuqqaangat Inuit Tapiriit Kanatami. “Taimaitillugu akituluanngittut isumagijautillugit Kanatalimaami, taanna Upalungaijauti piliriqatigiigutauvuq piijainasuarluta avviarutauvaktunik amaataaqsimajunit saalakkataaqarumanirmi ammalu kajusititaullutik arraagurasarnut kiinaujaqaqtitaunngiluarninginnut ammalu kiinaujaqaqtitaulutik Inunnut sivuliqtaujunit aaqqigutiksanut saqqittijunnaqtunik asijjirutaujunnaqtunik.”
Nutaannguriaqsimaliqtillugu Kanatalimaami pijumaniujuq Ukiuqtaqtumi pivalliatittinirmut amma nangminiqarnirmut, Upalungaijauti tukisinattiaqtuq kiinaujaqaqtittiniq ajuqsaluaqtailimatittinirmut Inuit Nunanganni kiinaujaqaqtittiniungmat makimajunnattiaqtunut ukiuqtaqtumi nunalinnut, ilaliujjisimattiarlutik kiinaujaliurutiqarasuarnirmut piruqpallianirmut, amma Kanataup sivuniksanganut. Taanna Upalungaijauti ikajuutiniaqtuq Kanata saqqiiqunagu marruunnik ajjigiinngittuunnik malittaujarialinnik inunnut iqqanaijaqtunut Inuit Nunanganni takulugit Inuit taikani nunaqaqtut.
Inuit Tapiriit Kanatami Mitsaanut
Inuit Tapiriit Kanatami Inuit Tapiriit Kanatami (ITK) kanatalimaami, niruaqtausimajunut inunnut kiggaqtuijiullutit katujjiqatigiingujuq piliriassangit aaqqittausimallutit Inuvialuit Aviktuqsimaniujunut Kuapurisankunnut, Nunavut Tunngavikkunnut, Makivvikkunnut, amma Nunatsiavut Gavamakkunginnut.
Tukisigiarumaguvit
Inuit Tapiriit Kanatami
media@itk.ca; 613-292-4482