Inungnit nipiqaqtittijiusimaliqsutik inuit atuqsimajanginnit turaangajunut ungataanuuliqtuq 60 ukiunut, Inuktitut uqalimaagangita turaarviksaqaqtitauvut atuliqtittigiaminnik Inuit katinniqaqsimaninginnik, titiraqtausimaliqtittilutik Inuit uqausiksanginik, ammalu ikajuqtuivannirmut ammalu sivummugiaqtittivannirnik Inuit unikkaarillugit sanaugaliarivaktanginik, ilaqaqtillugit piliriqatigiigviqaqtittinirmik inuit titiraujagaliuqtinginnut ammalu ajjiliurijinginnut. Inuktitut uqalimaagaliarivaktangit kisimituaq saqqiijiuvakput Inuit uqausiksanginik inuit takunnaaqtanginnut maliktitausimajunik, piluaqtumik turaangajunut tusagaksanut, qanuiliuqtittinirnut, piusituqalirinirnut, ammalu inuusirminni pilirianguliqsimavaktunut Inuit nunaluktaanganni.
