November 4, 2025 – Ottawa, Ontario
Inuit Tapiriit Kanatami quviasuppuq Inuit taijausimammata Kiinaujaqutiit 2025-mit, ilagijautsunik Inuit Nunangat Silattuqsarvijjuaq, $1B sitamakkut arraaguuniaqtukut nutaamut Ukiuqtaqtumi Piqutirjuanut Kiinaujaqutinginnut ammalu Gavamatuqakkut-Nunaqaqqaaqsimajuit Pilirivinga ammalu Nunaqaqqaaqsimajuit Pijittiraqtauninginnut Kanatami kiinaujaqutingit nakatauniaramik 2-pusatikungaaq, 15-pusatikuunngituq allaviit asingititut.
Kiinaujaqutiuniaqtut pivalliasimagalaaqsutik, akuniujukkut pivaalliniqaniaqpukisiani qanutigi, qanutsiaq, ammalu takutsausiaqtukkut atuliqtitauguni, ammaluttauq sivulliujjijauppata Inuit-Gavamatuqakkut Piliriqatigiitsianinginnut Katimajiralaat pimmariutingit, ilagijaulutik Inuktut, imminiqsurniq qaujisarnirmit ammalu pijunnautigijaujut atuliqtitauningit.
Tapiriikkut isumaaluutiqaqput gavamatuqakkut turaaqtitsisimanngimata kiinaujakkannirnit Inuit Surusiit Sivulliujjijauninginnut Pilirianganut (ICFI). Kiinaujaqutingit nuqqatitaulaaqtut March 31, 2026, ammalu kiinaujaksaniktaukkanningippat, attanaqtumiituinnagiaqarniqsait inuqutittinik inuusiqatsiagutinginnut ammalu pijittiraqtauvinginnut avitaulaaqtut.
2018-ngulauqsimammat, ICFI Inungnut-turaangatsunik atjigijaulauqtuq Jordan’s Principle-nganut, pijunnautigijaujunik atuliqtitsigutiutsunik saqqitautsuni Kanatami Pijunnautigijaujunut Killisiniaqtinginnut. Nuitauqqamiutillugut, gavamatuqakkut piniarniralauqsimajut tuksiraqtaujunik-malittumik atuagamik atuliqtitsilaagiamik ICFI singillugu ammalu arraani, ITK ammalu Inuit Angirutiliit Timiqutingit piliriqatiqasimavut gavamatuqakkunit sanaqatigiiniaramik nutaamik atuagamik singitsigajaqtumik.
ITK ammalu Timiqutiujut pingaagumavut ICFI-mit ammalu piliriqatigilugit gavamatuqakkut piuniqsaugajammat akitugajaqtumik iqqaqtuivikkuutitsinirmik. Inuit pivilimaanginnik qaujisaniaqput – iqqaqtuivikkuuqtitsiniq ilagilugu – surusivut piviqagunnaqullugit pijittirautinik pigialinginniluk pigiaqalirunigit.
Quviasunngimmarikkivugut kiinaujaksaniktaukkannisimanngimat puvalluniq nungutaugasuarninga Inuit Nunangannik, gavamatuqakkut kikkulimaanut uqalauqsimagaluaqtillugit nungulaarniraqsugu puvalluniq 2030-ngiinnaatillugu.
Inuit nunaqutinginnik 300-villugu puvalluniqarnisauvapput saniani Nunaqaqqaaqsimanngituit Kanatami, ammalu pivallianirijausimajut Inungnut aulatamigut qaujigiarnikut, pittailigutikkut ammalu kamanikkut puvalluniujunik asiutuinnangusupput kiinaujaksaniktaunngituunginnapat. Taatsuminga kiinaujaqutiuniarniraqtausimajumik tunisiniqaniannginiq puvallulirinirmut takutitsivuq kamagumannginirmik tuavirnaqtukkut kamagijaugialimik aanniagutiusuumik.
Isumaaluutiqarivugut Inuit taijausimanngimata unikkaaqtauttillugu Ukiuqtaqtuup imminiqsurninga ammalu Kanataup attanaqtumiittailimaninga, ammalu ilitaqsisimanngimat Inuit-imminiqsurnirijanginnit ammalu pijunnautinginnit nunattinik.
“Inuit-Gavamatuqakkulu piliriqatigiinniq pinnguatuinnaungittuq – atuutilillarik gavamaliritsianirmut Ukiuqtaqturmit,” uqaqtuq Tapiriit Angajuqqaanga Natan Obed. “Niriuqpugut gavamatuqakkunik piliriqatiqalaagiamik ullumi uqaqtaujut sulitigasuarlugit naasagunnatukkut piusigiaqullugit Inuit inuusingit nunalingillu.”
2015-ngulauqsimammat, gavamatuqakkut kiinaujaqutingit pivaalligiaqtitsisimajut Inuit pimmariuningita ilitarijauningannik Kanataup qanuilinganinganut. Ukua kiinaujaqutiit uqaqtauqammiit qimaivuq aqqutikkuuqatigiinnirisimajattinik.